San Juan 14

1’Caxu a'ij tyá'ujmuajca. Sauche'e xu yeehui ra'atzaahuatya'a ɨ Dioj, sauche'e xu sajta na'atzaahuatya'a inyeetzi. 2Eihua pu chi'i aun teje'eseijre'e a'u tɨ niya'upua huatyeechi'i ɨ ute'e. Tɨ pua'a cai ayan ti'ayajnacache'e, nyaa nu yeehui saɨque tyajámuaata'ixáate'enche'e. Au nu a'uma'a na'ame nyej ni nyaun rɨ'ɨ raaruuren a'u saj saun a'utyá'a xa'aju'un. 3Ajta, tɨ pua'a neyan nyaun a'ura'ani nyej ni neyan rɨ'ɨ raaruuren a'u sej a'utyá'a sa'aju'un, aj nu ni yan va'acányejsin nyajtahua'a nyej ni neyan amua'anvi'itɨn sej si sajta saun a'utyá'a xa'ara'ani a'u nyaj nyajta a'ucai na'ame. 4Sajta muan, xu'uri yeehui huamuájte ɨ juye jetze tɨ aun a'uré'eninyei a'u nyaj a'uma'a na'ame. ―Ayaa pu tyu'utaxajtaca'a aɨjna ɨ Jesús. 5Aj pu'i Tomás ayan tiraata'ixaa tɨcɨn: ―Tavastara'a, catu yeehui ramua'aree a'u paj a'uma'a pua'ame. Aɨj tu cɨn catu a'atzu huamuájte ɨ juye jetze tɨ aun a'uré'eninyei. 6Tɨ'ɨqui Jesús ayan tiraata'ixaa tɨcɨn: ―Nyaa nu nyaɨn pueen ɨ tɨ amua'avi'itɨn aɨjna jetze ɨ juye, nyaa nu nyajta nyaɨn pueen ɨ tɨ tzaahuati'ira'a cɨn ti'ixaxa'a, nyajta nu yeehui nyaɨn pueen ɨ tɨ jetzen e'iraninyei ɨ saj cɨn ruuri xa'ara'ani. A'atɨ tɨ na'a tɨ ayan huataujtuiire'en ɨ Dioj jemi, ayaa pu ruxe'eve'e tɨ aɨn anacaican huataujtuiire'en inyeetzi jemi. 7Tɨ pua'a rɨ'ɨ se tinaamua'ati, ayaa xu sajta tiraamua'ati saɨjna ɨ niya'upua. Tɨj na'a tɨ yu áuca'itɨ a'ame, muan xu xaa ramua'ate, sajta seri raaseij. 8Aj pu'i aɨn Felipe ayan tiraata'ixaa tɨcɨn: ―Tavastara'a, pata'aj yeehui taataseijrate'en paɨjna ɨ a'aya'upua. Aɨj tu'uj xe'eve'e ityan. 9Aj pu'i Jesús ayan tiraata'ixaa tɨcɨn: ―Nu'uri xaa yeehui a'atee nyaj muejmi jemi huaca. ¿Ni tzaa pacai xɨ nyamua'ate, muaa Felipe? Ayaa nu ti'imue'ixaate'e. A'atɨ tɨ na'a tɨ ayan naaseij inyeetzi, aɨ pu ajta ari raaseij ɨ niya'upua. ¿A'ini een cɨn peyan tinaata'ixaa yee nyaj nu'u amuaataseijrate'en ɨ niya'upua? 10¿Ni tzaa pacai peyan tya'atzaahuate'e tɨ aɨn niya'upua nye jemi seijre'e, nyajta nu yeehui che'eta nyana'a niya'upua jemi seijre'e? Canu nyasaɨj a'ij tirajtyau a'ij nyaj ti'imue'ixaate'e, silu aɨn niya'upua tɨ ayan nyej jemi seijre'e, aɨ pu rumuare'eri'ira'a cɨn ayan rɨcɨ. 11Pata'aj peyan na'antzaahuate'en tɨ pua'a yeehui neyan timuaata'ixaate'en yee niya'upua pu nu'u nye jemi seijre'e, nyajta nu jemin seijre'e ɨ niya'upua jemi. Na'ari cai, pata'aj paɨjna cɨn pana'a tya'antzaahuate'en a'ij nyej yeehui huarɨj tɨ huapɨ'ɨ ruxe'eve'e. 12’Ayaa nu tyaja'amue'ixaate'e tzaahuati'ira'a cɨme'e. A'atɨ tɨ na'a tɨ ayan na'astijre'e inyeetzi, ayaa pu che'eta na'a huarɨni a'ij nyej rɨjcaa inyaa. Ee xaa nya'u, aɨ pu yeehui ayan huarɨni tɨ eitze'e ruxe'eve'e cai ɨ nyaj cɨn neyan rɨjcaa. Ayaa pu een cɨn rɨni aɨjna cɨme'e nyaj nyaun a'uma'a na'ame ɨ niya'upua jemi. 13Nyajta neyan huarɨni a'ij sej seyan tiraatahuaviira neetzi jetze ma'acan, nyej ni rɨ'ɨ tiraata'an ɨ niya'upua. 14Ti'itɨ tɨ na'a sej yeehui seyan tiraatahuaviira nyeetzi jetze ma'acan, ayaa nu xaa neyan rɨni. 15’Tɨ pua'a yeehui seyan nyexe'eva'a inyeetzi, ayaa su saɨjna ara'astijre'en ɨ nyaj cɨn tyajamuaataijte'esin. 16Nyajta nu neyan raatahuaviira ɨ niya'upua jemi tɨ i aɨn yan amuaja'utaíti'i seij tɨ a'amua japua huanyuuni, tɨ i aɨn muejmi jemi huatyaturan tɨ na'a rusen cɨme'e. 17Ai pu aɨn pueen ɨ xaijnyu'ucari tɨ jetzen e'iraninyei tɨj na'a tɨ ayan ti'ayajna. Capu rɨ'ɨri mej meyan ra'ancura'an aɨme ɨ mej yan japuan huachaatɨme ɨ chaanaca japua, a'ini capu a'ij hua'amityejte'e a'ij tɨ rɨcɨ aɨjna ɨ xaijnyu'ucari. Camu yeehui majta ramua'ate. Ma sajta muan, ayaa xu een cɨn ramua'ate a'ini aɨ pu a'amua jemi seijre'e, ajta pu muejmi jemi huatyaturaasin. 18’Canu yeehui rusentacan amuaatyatuaasin, tɨ cai a'atɨ ayan a'amuavaɨre'e silu nyaa nu nyajtahua'a muejmi jemi uve'enyejsin. 19Capu che'e a'ateere mej hui cai che'e nyeseijran aɨme ɨ mej yan japuan huachaatɨme ɨ chaanaca japua. Ma sajta muan, muan xu xaa nyeseijran. Nyaa nu huatarujsin nyej ni nyajtahua'a ruuri na'ara'ani, aɨj xu cɨn sajtahua'a ruuri xa'aju'un. 20Ajna xɨcaara'an jetze nyej jetzen huatarujsin, aj xu si seyan ramua'areeran nyej neyan jemin seijre'e ɨ niya'upua jemi, ajta yeehui aɨn, aɨ pu ajta nyeetzi jemi seijre'e. 21A'atɨ tɨ na'a tɨ ayan ra'ancura'a a'ij nyej tyu'utaijtaca'a, tɨ ajta ayan nain ra'ara'astijre'en, aɨ pu aɨn pueen tɨ xaa nyexe'eve'e. Niya'upua pu hui ajta raxe'eva'a a'ame aɨjna tɨ ayan nyexe'eve'e. Nyajta inyaa, nyaa nu raxe'eva'a na'ame, nyajta jemin huataseijre'esin. ―Ayaa pu tyu'utaxajtaca'a aɨjna ɨ Jesús. 22Aj pu'i saɨj tyu'utaxajtaca'a tɨ ayan antyahuaaca'a tɨcɨn Judás. Capu aɨjna ɨ Judás tɨ ayan te'entimu'utaca tɨcɨn Iscariote, silu saɨj. Ayaa pu tiraata'ixaa tɨcɨn: ―Tavastara'a, ¿a'ini auj ti'irɨ'ɨri pej pi peyan pana'a tyejmi jemi huataseijre'esin, pajta cai aɨme jemi ɨ mej yan japuan huachaatɨme ɨ chaanaca japuan? 23Aj pu'i Jesús ayan tiraata'ixaa tɨcɨn: ―Tɨ pua'a a'atɨ ayan nyexe'eva'a, aɨ pu ayan ra'ara'astijre'en a'ij nyej ti'imua'ata. Niya'upua pu ajta raxe'eva'a a'ame. Tyan tu yeehui tyajta huataseijre'esin ɨ jemin. Tyajta teyan huatyaturaasin ɨ jemin. 24Ajta aɨn tɨ cai ayan nyexe'eve'e, aɨ pu ajta cai ra'astijre'e a'ij nyej ti'imua'ata. Canu yeehui nyasaɨj a'ij tirajtyau a'ij nyej tyaja'amue'ixaate'e silu aɨjna ɨ nyuucari, aɨj pu jetze e'iraninyei aɨjna ɨ niya'upua tɨ yan nyaja'utaityaca'a. 25’Ayaa nu tyajamuaata'ixaa ijii nyej nyauj a'amua jemi yan huaca. 26Ajta aɨn tɨ hui a'amua japua huanyuuni, aɨjna ɨ xaijnyu'ucara'ara'an ɨ Dioj, ɨ tɨ ayan tiraavijte'e sej si rana'amiche'en, aɨ pu ɨ niya'upua ayan ya'utaiti nyeetzi jetze ma'acan, tɨ i aɨn nain cɨn tyajamuáamua'aten. Aɨ pu hui ajta ayan amuaata'asin sej si seyan ra'utamua'aree nain cɨn a'ij nyej tyajamuaata'ixaa. 27’Ayaa nu neyan amuaata'asin tɨ ij nain cɨn amuaatyápua'arite'en. Aɨjna ɨ nyaj cɨn amuaatyápua'arite'esin, nyeetzi pu jetze e'iraninyei. Capu hui ayan een a'ij tɨ aɨn tɨ hua'a jetze na'a e'iraninyei aɨme ɨ mej yan japuan huachaatɨme iiyan chaanaca japua ɨ maj maɨjna cɨn hua'utyápua'arite'en ɨ ruxa'aj tyaɨtye. Caxu a'ij pua'a tya'ujmuajca. Caxu sajta ti'itzɨɨnya'a. 28Xu'uri yee seyan raanamuajri'i nyej neyan tyajamuaata'ixaa nyaj nu'u a'uma'a na'ame, nyajta nu'u muejmi jemi uve'enyejsin. Tɨ pua'a yeehui seyan nyexe'eva'acache'e, ayaa xu een cɨn rutyamua'ava'acache'e saɨjna cɨme'e nyaj nyaun a'uméj ɨ niya'upua jemi a'ini niya'upua pu eitze'e ruxe'eve'e nyacai inyaa. 29Ayaa nu anacai tyaja'amue'ixaate'e tɨ cai xɨ ti'itɨ a'ij huarɨj sej si seyan tya'antzaahuate'en nyaj nyaɨn pueen ajna xɨcaara'an jetze tɨ jetzen ayan tyaja'ure'enyejsin nyaj nyaun a'uméj. 30’Canu yeehui che'e eihua tyajamuaata'ixaate'esin a'ini pu'uri tɨn ya uve'enyejsin aɨjna tɨ a'ij pua'a een, tɨ ajta yan japuan tie'ijta ɨ chaanaca japua. Ma ajta aɨn, capu a'atzu rɨ'ɨri tɨ ayan ti'itɨj cɨn na'antimue'itɨn. 31Che'ere yeehui, tiche'e huiracɨɨnye teyujna mej mi maɨn ɨ mej yan chaanaca japua huachaatɨme, meyan raamua'aree nyej neyan raxe'eve'e ɨ niya'upua, nyajta neyan che'eta nyana'a rɨcɨ a'ij tɨ aɨn ayan tinaataij.

will be added

X\