San Juan 13

1Pu'uri tɨmua'a ajna tyaja'ure'enyejsima'a ɨ maj cɨn ra'utamua'aree a'anaj tɨ Dioj ayan tihua'utauuni'iri'i. Pu'uri ramua'areeraca'a ɨ Jesús tɨ ari ajna tyaja'ure'enye ɨ xɨcaara'an jetze tɨ jetzen a'ura'ani iiyan chaanaca japua tɨ ij aun a'ujnyén u ute'e, ya'upuaara'an tɨ e'eseijre'e. Tɨj na'a tɨ yan huataseijre iiyan chaanaca japua, aɨ pu ayan hua'axe'eva'acaa aɨme ɨ maj jamuan á'ujhua'anya'a. Ajta ijii pu'uri ayan hua'utaseijrataca'a tɨ nain cɨn hua'axe'eva'acaa. 2Matɨ'ɨj ti'icua'acaa ɨ́ chumua'an, aɨ pu ajta aun a'utyavaaca'a aɨjna ɨ Judás, tɨ yaujra'an pueen ɨ Simón, tɨ ajta ayan te'entimu'utaca tɨcɨn Iscariote. Pu'uri aɨn Satanás ca'anijra'a raata'acaa tɨ tyu'utatuiire'en ɨ Jesús. 3Jesús pu ajta ramua'areeraca'a tɨ aɨn ya'upuaara'an ayan nain cɨn tiréijca, tɨ ajta ruya'upua jemi a'uve'eme, ajta au pu ajta a'ujnyejsin ɨ jemin. 4Aj pu'i ajchee a'u mej tyaja'acua'acaa, ajta huira'ujchuiiri'i ɨ rutasi tɨ ru'irá'avɨjca'a. Aj pu'i ava'ujjɨ'ɨque cɨɨxuri cɨme'e ɨ maj cɨn huá'acáimɨ. 5Tɨ'ɨqui aun atyeejei ɨ caasu jetze. Aj pu'i autyejche tɨ hua'anaja'usixɨ'ɨn ɨ hua'achapuatze'en seij ajta seij ɨ maj jamuan á'ujhua'anya'a. Ajta hua'anahuatzi'iraxɨ aɨjna cɨme'e ɨ cɨɨxuri tɨ cɨn ava'ujjɨ'ɨca'acaa. 6Aj pu'i aun e'ire'enye aɨjna jemi ɨ Simón tɨ ajta i'i Pedro. Aj pu i aɨn Pedro ayan tiraata'ixaa tɨcɨn: ―Nyavastara'a, ¿ni yeehui pajta peyan nya'anaja'usixɨ'ɨsin nyechapua jetze? 7Aj pu'i ayan tiraata'ixaa ɨ Jesús tɨcɨn: ―Capuu xɨ a'ij timua'amitejte'e a'ij nyaj aɨn cɨn nyeyan rɨcɨ, silu majca'ihuayee paj xaa yeehui yau'eitaa pua'ame. 8Aj pu'i Pedro ayan tiraata'ixaa tɨcɨn: ―Capej xaa nya'u, a'anaj peyan na'anaja'usixɨ'ɨsin ɨ nyachapuaatze'e. Ajta aɨn Jesús, ayaa pu tiraata'ixaa tɨcɨn: ―Tɨ pua'a yeehui nyacai neyan mua'anaja'usixɨ'ɨn a'achapuaatze'e, capej che'e hua'a jetze ajtyama'acanta pua'ame ɨ mej nyeetzi jemi seiira'a mua'aju'un. 9Aj pu'i ayan tyu'utaxajtaca'a aɨjna ɨ Pedro tɨcɨn: ―Nyavastara'a, tɨ pua'a yeehui ayan ruxe'eve'e, capaj ayaa pana'a na'anaja'usixɨ'ɨn ɨ nyechapuaatze'e, silu pajta paj peyan na'anaja'usixɨ'ɨn ɨ nyamuajca'a jetze, pajta na'ava'aja'usixɨ'ɨn ɨ nyamu'u jetze. 10Aj pu'i Jesús ayan tyu'utanyúu tɨcɨn: ―Tɨ pua'a yeehui a'atɨ ari ayan huaɨ'ɨhuaca'a, ayaa pu'u ruxe'eve'e tɨ ayaa na'a ra'anaja'usixɨ'ɨn ɨ chapuaatze'e, a'ini capu che'e chuaamuara'a nain japua tɨ ratyáhue'ira'a. Sajta muan, caxu che'e chuaamua, silu seij pu yeehui xaa ayan chuaamuara'a. 11Ayaa pu een cɨn ayan tyu'utaxajtaca'a tɨ nu'u saɨj na'a chuaamuara'a, a'ini aɨ pu ari ramua'areeraca'a a'atɨ tɨ aɨn puéenya'a tɨ ayan tyu'utatuiire'esin ɨ́ cɨme'en ɨ Jesús. 12Tɨ'ɨj raatapua'ajtaca'a tɨ ayan hua'anaja'usixɨ, ajta pu huira'ujvɨjri'i ɨ rutasi. Aj pu'i a'ujyeijxɨ ɨ meesa jetze. Ayaa pu tihua'utaihua'uri'i tɨcɨn: ―¿Ni yeehui sajmua'aree a'ij nyaj een cɨn neyan amuaaruu? Nyaa nu tyajamuaata'ixaate'esin. 13Ayaa xu yeehui muan naatamua'amua yee Maeestru, sajta seyan tɨcɨn Tavastara'a. Ayaa pu yeehui tiraavijte'e a'ini nyaa nu nyaɨn pueen. 14Ajta ijii, nyaj a'amuavastara'a pueen, nyajta a'amua maeestru, ayaa nu amua'anaja'usixɨ ɨ a'amuachapuaatze'e. Sata'aj yeehui seyan che'eta sana'a anauja'usixɨ'ɨn ruchapuaatze'e rujɨɨmua'a. 15Ayaa nu amuaata'itiiri'i sej si seyan huarɨni a'ij nyej neri amuaaruu muejmi. 16’Ayaa nu yeehui tyaja'amue'ixaate'e tzaahuati'ira'a cɨme'e tɨ eitze'e ruxe'eve'e aɨjna tɨ ti'ijta cai aɨjna tɨ ravaɨre'e. Ajta yeehui, eitze'e pu ruxe'eve'e aɨjna tɨ yan nyaja'utaityaca'a cai i nyaj a'utaiti'ihuaca'a. 17Ajta ijii, satɨj seri ti'ijmua'aree saɨjna, Dioj pu yeehui rɨ'ɨ tyajamuaata'asin tɨ pua'a seyan che'eta sana'a huarɨni. 18’Canu naijmi'ica muejmi cɨme'en neyan ti'ixaj. Nyaa nu ramua'aree a'ij mej e'en ɨ nyej hua'ava'ahuau. Nyajta nu neyan ra'ava'ahuau tɨ ij aráurasten a'ij tɨ te'eyu'usi'i ɨ yu'uxari jetze tɨ ayan tɨcɨn: “Aɨ pu nu'u yeehui ɨ nyaj raata'inee tɨ tyu'ucua'ani inyeetzi jamuan, aɨ pu nu'u yeehui autyejche tɨ najcháɨra'a a'ara'ani.” 19Ayaa nu anacai neyan tyaja'amue'ixaate'e ijii tɨ'ɨj cai xɨ ayan tyu'urɨni sej si seyan tya'antzaahuate'en nyaj nyaɨn pueen a'ij nyej neri tyajamuaata'ixaa, sej si sauj tya'atzaahuate'e ajna tɨ ayan ti'inyaruuren. 20’Ayaa nu tyaja'amue'ixaate'e tzaahuati'ira'a cɨme'e, tɨ pua'a yeehui a'atɨ ayan ra'ancure'evi'itɨn aɨjna nyaj raataityaca'a, aɨ pu ajta na'ancure'evi'itɨ inyeetzi. Ajta a'atɨ tɨ na'a tɨ ayan na'ancure'evi'itɨ inyeetzi, ayaa pu che'eta na'a ra'ancure'evi'itɨ aɨjna tɨ yan nyaja'utaityaca'a. ―Ayaa pu tihua'uta'ixaa. 21Tɨ'ɨj ayan tihua'uta'ixaa, eihua pu a'ij pua'a raata'a ɨ tzajta'an ɨ Jesús. Aj pu'i ayan a'ahuauritaacan cɨn tyu'utaxajtaca'a tɨcɨn: ―Ayaa nu hui tzaahuati'ira'a cɨn neyan tyaja'amue'ixaate'e, saɨj tɨ muejmi jetze ajtyama'acan ayan tyu'utatuire'esin inyeetzi. 22Majta aɨme ɨ maj jamuan á'ujhua'anya'a, mua'araujseijraxɨ seij ajta seij. Camu a'ij tirájtyauva'a a'ij tɨ huataujmua'a aɨjna tɨ Jesús ayan tiraataxajtaca'a. 23Ajta saɨj tɨ aɨme jetze ajtyama'acan, aɨ pu aicaujtutzi ɨ Jesús jemi. Ai pu aɨn pueen Jesús tɨ raxe'eva'acaa. 24Ajta aɨn Simón, tɨ ajta i'i Pedro, aɨ pu rumuajca'a cɨn raatajé aɨjna tɨ Jesús raxe'eva'acaa. Aj pu'i ayan tiraata'ixaa tɨcɨn: ―Pata'aj yeehui raataihua'u a'atɨ tɨ pueen tɨ cɨme'en raataxajtaca'a. 25Ajtahua'a pu ayan aicaujtutzi ɨ Jesús jemi. Aj pu'i ayan tiraataihua'uri'i tɨcɨn: ―Nyavastara'a, ¿a'ataani aɨn pueen? 26Aj pu'i ayan tiraata'ixaa ɨ Jesús tɨcɨn: ―Tɨ pua'a yeehui neri ra'atyáru'unyen i tuxa'a jetze ɨ pan, aj nu ni raata'ɨte'esin nyaɨjna ɨ a'atɨ tɨ aɨn pueen. Aj pu'i Jesús ayan ra'atyáaru'unyej ɨ pan ɨ tuxa'a jetze. Aj pu'i aɨjná huata'ɨte ɨ Judás, tɨ yaujra'an pueen ɨ Simón, tɨ ayan te'entimu'utaca tɨcɨn Iscariote. 27Cɨme'en pu'u ayan ra'ancura'ɨ ɨ pan aɨjna ɨ Judás, aj pu'i Satanás ayan huataseijre ɨ tzajta'an. Ajta aɨn Jesús, ayaa pu tiraata'ixaa tɨcɨn: ―Pata'aj yeehui ca'anacan peyan huarɨni a'ij pej peri tyu'umuá'a. 28Majta ɨ seica, camu a'atzu yau'eitaa mua'araa a'ij een cɨn ayan tiraata'ixaa. 29Seica mu meyan tiraamua'a tɨ Jesús ayan tiraata'ixaa tɨ ti'itɨ huananan ɨ maj cɨn tyu'uyesten na'ari ti'itɨ tɨ hua'utapueijve'en ɨ maj cai a'ij ti'ijviicue'i. 30Cɨme'en pu'u ayan ra'ancura'ɨ ɨ pan, aj pu'i huirajraa aɨjna ɨ Judás. Ajta pu'uri huatɨca'acaa. 31Tɨ'ɨj huirajraa aɨjna ɨ Judás, aj pu'i Jesús ayan tihua'uta'ixaa tɨcɨn: ―Pu'uri hui Dioj ayan rɨ'ɨ tinaata'a i nyaj nyajta tyaata'a jetze e'irannyejte. Nyajta inyaa, ayaa nu neri nyaɨjna cɨn rɨ'ɨ tiraata'a ɨ Dioj nyaɨjna cɨme'e a'ij nyej huarɨj. 32Tɨ pua'a yeehui neyan rɨ'ɨ tiraata'an ɨ Dioj nyaɨjna cɨme'e nyej neyan huamɨ'ɨni, Dioj pu ajta rusaɨj ayan rɨ'ɨ tinaata'asin aɨjna cɨme'e tɨ ayan na'ajjájsin. Ajta aɨ pu ca'anacan rɨ'ɨ tinaata'asin. 33’Niyaujmua'a, a'atzu nu'u neyan ya a'ateeri muejmi jemi. Muan xu nyahuauni. Me nyajta inyaa, ayaa nu che'eta nyana'a tyaja'amue'ixaate'e a'ij nyej neri tihua'uta'ixaa aɨme ɨ mej Israel jetze ajtyama'acan. Capu xaa nya'u rɨ'ɨri saj yeehui aun a'ujnyén a'u nyaj a'ujnyejsin. 34Nyajta nu neyan jajcuacan cɨn tyaja'amueijcate'en sej seyan huaujxe'eve'en. Ayaa pu ruxe'eve'e sej seyan che'eta sana'a huaujxe'eve'en a'ij nyej neri tyajamuaaxe'eve muejmi. 35Tɨ pua'a yeehui seyan huaujxe'eve'en, aj mu mi naimi'i meyan ramua'areeran sej seyan na'astijre'e. 36Aj pu'i ayan tiraataihua'uri'i aɨjna ɨ Simón, tɨ ajta i'i Pedro tɨcɨn: ―Tavastara'a, ¿a'uni yeehui pa'uma'a pua'ame? Ajta Jesús ayan tiraata'ixaa tɨcɨn: ―Capuu xɨ yeehui rɨ'ɨri paj paun á'ume'en nyeetzi cujta'a a'u nyaj a'uméj silu majca'ihuayee xaa pej peyan paun nyaj cujta'a pa'uma'a pua'ame. 37Aj pu'i Pedro ayan tiraata'ixaa tɨcɨn: ―¿A'ini een cɨn cai rɨ'ɨri ijii nyaj yeehui nyaun á'ume'en a'a cujta'an mueetzi? Nyaa nu yeehui á'anca'anye nyaj huamɨ'ɨni a jetze ma'acan. 38Aj pu'i Jesús ayan tyu'utanyúu tɨcɨn: ―¿Ni tzaa yeehui peyan ahua'aca'anye paj nu'u peyan huamɨ'ɨni nyeetzi jetze ma'acan? Ayaa nu yeehui tzaahuati'ira'a cɨn ti'imue'ixaate'e a'ij pej peyan rɨni. Tɨ'ɨj cai xɨ huajiihuan ɨ tyacuaara'i, hueica paj peyan tyu'utyaahue'ita paj nu'u cai nyamua'ate.

will be added

X\