San Juan 12

1Tɨ'ɨj auj tya'aturaaca a'achu cumu arájsevi xɨcaj mej mi meyan maɨjna cɨn tyu'uyesten ɨ xɨcajra'an tɨ jetzen Dioj tihua'utauuni'iri'i, au pu á'umej u Betania aɨjna ɨ Jesús. Au pu e'echajca'a aɨjna ɨ Lázaro tɨ Jesús ra'ajjáj hua'a tzajta'a ɨ mej meri huacuii. 2Matɨ'ɨj mi tyá'ucue'iraataca'a maɨjna cɨme'e a'ij tɨ Jesús huarɨj. Matɨ'ɨj mi tiraami. Ajta aɨn Marta, ayaa pu ti'ivaɨra'acaa tɨ tihua'atyá'axɨ'ɨn. Ajta aɨn Lázaro, aɨ pu huatyacatii ɨ meesa jetze jamuan aɨjna ɨ Jesús. 3Aj pu'i Mariiya ayan a'a yajjaj a'achu cumu e'ita'a liitru aɨjna ɨ a'aseiiti tɨ náa tyáará'i, tɨ ajta huapɨ'ɨ eihua ti'ijnajchi. Naardu pu raja'ara'a tɨ rumua'atɨ. Mariiya pu ra'anaxɨri'iri'i ɨɨcajra'an jetze ɨ Jesús. Aj pu'i rucɨpua cɨn ra'anáhuatzi'iri'i. Ajta tyamua'a pu náa tya'uhuá'aacaca'a nainjapua u chi'ita aɨjna cɨme'e ɨ a'aseiiti tɨ naa tya'aaca. 4Ma ajta seij tɨ jamuan á'ucha'acanya'a, ayaa pu tihuaujnyuuste tɨ'ɨj raaseij. Ai pu aɨn pueen aɨjna ɨ Judás, tɨ ayan te'entimu'utaca tɨcɨn Iscariote. Aɨ pu ajta e'eyan tyu'utatuire'esin ɨ Jesús. 5Ayaa pu tyu'utaxajtaca'a tɨcɨn: ―¿A'ini yeehui een cɨn macai raatuaa maɨjna ɨ aseiiti a'ini ayaa pu ti'ijnajchi a'achu cumu hueica cieentu ɨ tumin? Aj pu'i yeehui rɨ'ɨrista a'ame'enche'e mej meyan hua'uta'an ɨ tumin aɨme ɨ maj cai a'ij ti'ijviicue'i. ―Ayaa pu tyu'utaxajtaca'a aɨjna ɨ Judás. 6Capu ayan raataxajtaca'a aɨjna cɨme'e tɨ jetzen ruxe'eva'acaa a'ij tɨ tihua'aruure aɨme ɨ maj cai a'ij ti'ijviicue'i, silu ayaa pu aɨjna cɨn ayan tyu'utaxajtaca'a a'ini aɨ pu nahua'ari puéenya'a. A'ini aɨ pu rachaɨca'a ɨ maj tzajta'an ru'ucá'ave ɨ tumin, aɨ pu ajta ruvaɨra'acaa aɨjna cɨme'e ɨ tumin. 7Aj pu'i Jesús ayan tiraata'ixaa tɨcɨn: ―Capej yeehui ra'ɨtziitya'a. Che'e ayan huarɨni a'ini aɨ pu ayan raatyajtuaa aɨjna ɨ aseiiti tɨ ij ayan ra'utamua'aree ɨ xɨcajra'an mej jetzen na'ava'anajsin. 8Aɨ mu yeehui muejmi jemi seira'a mua'aju'un para rusen cɨme'e aɨme ɨ maj cai a'ij ti'ijviicue'i. Me nyajta inyaa, canu neyan rusen cɨn muejmi jemi seira'a na'ame. Aɨj pu cɨn xa'apɨ'ɨn huarɨj amɨjna mɨ jɨita'a. ―Ayaa pu tyu'utaxajtaca'a aɨjna ɨ Jesús. 9Meenti aɨme ɨ maj Israel jetze ajtyama'acantacaa, mui'itɨ mu meyan raamua'areeri'i tɨ Jesús aun a'utyavaaca'a. Matɨ'ɨj mi maun e'ire'enye mej mi raaseij, majta maj raaseij maɨjna ɨ Lázaro tɨ Jesús ayan ra'ajjáj hua'a tzajta'a ɨ mej meri huacuii. 10- 11Aɨj mu cɨn meyan tiraaxa'apɨ'ɨntare aɨme ɨ mej maun ti'ijta teyujta'a mej mi majta raaje'ica maɨjna ɨ Lázaro, a'ini mu'itɨ mu meyan rá'ajaahuatya'acaa ɨ Jesús maɨjna cɨme'e tɨ ayan Lázaro huarujte. Majta aɨme ɨ mej Israel jetze ajtyama'acantacaa, aɨ mu meyan huataujtuira'acaa ɨ Jesús jemi. 12Yaa ruijmua'a yee, aɨme ɨ mej maɨjna cɨn ajtyáxɨɨraca'a mej mi maun tyu'uyesten, ayaa mu raamua'areeri'i tɨ nu'u aɨn Jesús e'eve'ema'acaa aujna Jerusalén. 13Matɨ'ɨj mi tacɨj xámue'i antíveichixɨ, majta ya'upí. Matɨ'ɨj mi a'uju'un mej mi ye'entinajche. Ayaa mu ti'ijíjhuaca'a tɨcɨn: ―Tyamua'a pu ti'ixa'apɨ'ɨn. Tiche'e yeehui rɨ'ɨ tiraata'an tyaɨjna tɨ ye'eve'eme nyuucajtze'en ɨ tavastara'a. Tiche'e yeehui rɨ'ɨ tiraata'an tyaɨjna ɨ Rey tɨ titaataijte'esin ityejmi tyaj Israel jetze ajtyama'acan. ―Ayaa mu e'evé'ejijhuajma'a. 14Aj pu'i Jesús ayan puuru'u ráatyau tɨ cai xɨ a'atɨ japuan ave'eyeijxɨ. Aj pu'i japuan ave'eyeijxɨ tɨ ij ayan huarɨni a'ij tɨ te'eyu'usi'i ɨ yu'uxari jetze tɨcɨn: 15Caxu yeehui ti'itzɨɨnya'a mɨ sej saun huachaatɨme u Sión. Casi'i yeehui muan, aɨ pu me'eve'emej ɨ tɨ tyajamuaataijte'esin. Aɨ pu ajta yeehui ava'aca yaujra'an japua ɨ puuru'u. 16Majta aɨme ɨ maj Jesús jamuan á'ujhua'anya'a, anacaican, camu yau'eitaa mua'araa a'ij tɨ huataujmua'a tɨj na'a tɨ ayan te'eyu'usi'ihuaca'a. Ma ajta, tɨ'ɨj ari Dioj ayan ra'ajjáj ɨ Jesús, ajta ayan nain cɨn tiréijca, aj mu mi xaa ra'utamua'areeri'i tɨ ayan cɨme'en te'eyu'usi'ihuaca'a aɨjna cɨme'e ɨ Jesús. Majta meyan ra'utamua'areeri'i mej meyan raaruu. 17Majta aɨme ɨ maj mui'i ɨ maj jamuan á'ujhua'anya'a, aɨ mu majta Jesús jamuan seira'acaa tɨ'ɨj Jesús ayan raatajé aɨjna ɨ Lázaro tɨ nu'u ayan huirajra'ani a'utɨ a'avá'anami'ihuaca'a, tɨ'ɨj Jesús ayan ra'ajjáj hua'a tzajta'a ɨ mej meri huacuii. Aɨ mu e'eyan meyan tyu'utaxajtaca'a a'ij tɨ huarɨj. 18Majta aɨme ɨ seica ɨ tyaɨte, matɨ'ɨj raamua'areeri'i tɨ Jesús ayan ti'itɨ cɨn huarɨj tɨ huapɨ'ɨ ruxe'eve'e, matɨ'ɨj mi meyan u a'uju'un mej mi ye'entinajche. 19Majta aɨme ɨ fariseos, ayaa mu tyu'urixaatya'acaa tɨcɨn: ―Ayej xaa nya'u te'eme, capu ti'itɨ a'ij tyajamuatyava'ɨre'esin sej seyan raata'ijmɨ. Casi'i, matɨj mana'a yeehui pua'amua maj yan huachaatɨme iiyan chaanaca japua, naimi'i mu ra'ajaahuate'e. 20Meenti seica meyan maun a'utyáuuca'a hua'a tzajta'a aɨme ɨ mej aun a'ujnyéj mej mi raatyaanajche ɨ Dioj ajna matɨ'ɨj ti'iyestya. Au mu e'ema'acan aɨme u Grecia. 21Aɨ mu e'ire'enye ɨ Felipe jemi, aɨjna tɨ aun e'ema'acan u Betania, chajta'a tɨ aun a'utacá'a u Galileeya. Ayaa mu tirajhuaviiri'i tɨcɨn: ―Muaa vasta'a, ayaa tu yeehui ti'ijxe'eve'e tyej tyu'uxáj jamuan ɨ Jesús. 22Ajta aɨn Felipe, a pu a'uré'enye tɨ ij ayan tiraata'ixaate'en aɨjna ɨ Andrés. Matɨ'ɨj mi meyan tiraata'ixaa maɨjna ɨ Jesús. 23Jesús pu ayan tyu'utanyúu tɨcɨn: ―Pu'uri yeehui ajna tyaja'ure'enye tɨ Dioj ayan rɨ'ɨ tinaata'an inyeetzi, i nyaj nyajta tyaata'a jetze e'irannyejte. 24Ayaa nu yeehui tyaja'amue'ixaate'e tzaahuati'ira'a cɨme'e tɨ pua'a cai e'ejveti a chuaata'a tɨ ij aun huamɨ'ɨni aɨjna ɨ jatzijra'an ɨ triigu, ayaa pu rusaɨj na'a huatyaturaasin aɨjna ɨ jatzijra'an. Na'ari tɨ pua'a ayan huamɨ'ɨni, eihua pu yeehui jetzen e'iranyejsin seica ɨ jatzi. 25Ayej che'eta na'a een hua'a cɨme'en ɨ tyaɨte. Tɨ pua'a ayan eitze'e jetzen ruxe'eve'e a'atɨ tɨ na'a aɨjna tɨ iiyan ti'iseijre'e iiyan chaanaca japua cai ayan jetzen ruxe'eva'a tɨ ra'ara'astijre'en ɨ Dioj, aɨ pu yeehui yáuujɨsin ɨ ruxaijnyu'uca tɨ auj ruuricaa. Na'ari cai, tɨ pua'a cai ayan a'atzu jetzen tyu'ujxe'eve'e tɨj na'a tɨ iiyan ti'iseijre'e iiyan chaanaca japua silu ayaa pu huataura'an tɨ nain a'ura'ini tɨ iiyan rajcha'ɨ, tɨ ij ayan ra'ara'astijre'en ɨ Dioj, ayaa pu yeehui ruurican cɨn huataura'asin para rusen cɨme'e. 26Tɨ pua'a a'atɨ ayan nyavaɨra'a pu a'ame inyeetzi, ayaa pu ruxe'eve'e tɨ aɨn ayan che'eta na'a rɨjca a'ij nyaj rɨcɨ inyaa. Ajta, a'u tɨ na'a nyej nyeyan a'utyaváa na'ame, aɨ pu ajta inyeetzi jamuan a'utyaváa a'ame aɨjna tɨ nyavaɨre'e. Tɨ pua'a yeehui a'atɨ ayan nyavaɨre'e, aɨ pu ɨ niya'upua ayan rɨ'ɨ tiraata'asin. 27’Pu'uri a'ij pua'a nya'ase yu nyatzajta'a. ¿A'ini nyana'a nij neyan tyu'utaxajta? ¿Ni qui neyan tyu'utaxajta nyaɨjna tɨ cɨme'en yee: “Niya'upua, pata'aj yeehui peyan nu'irajtuaani tɨ ij cai ayan tinaacɨ'ɨti a'ij tɨ ari tyaja'ure'enyejsin”? Me nyajta cai, canu. Canu neyan tyu'utaxajta a'ini ayaa nu yeehui een cɨn yu a'uve'eme nyej neyan ya huacati ijii. 28’Mɨ pej ne'iya'upua, pata'aj tihua'utaseijrate'en ɨ nyaj cɨn rɨ'ɨ timuaata'asin. ―Ayaa pu tyu'utaxajtaca'a aɨjna ɨ Jesús. Aj pu'i ute'e e'icanamuajre tɨ a'atɨ ayan tyu'utaxajtaca'a tɨcɨn: ―Nu'uri yeehui neyan tihua'utaseijrate. Nyajtahua'a nu neyan tihua'utaseijrate'esin. 29Majta aɨme ɨ tyaɨte ɨ maj aun ajtyáxɨɨraca'a, aɨ mu majta raanamuajri'i. Seica mu meyan raataxajtaca'a maj nu'u huatyejnyuu. Majta seica meyan tyu'utaxajtaca'a tɨ saɨj nu'u ayan jamuan tyu'utaxajtaca'a tɨ ute'e ti'ivaɨre'e ɨ Dioj tɨ e'eseijre'e. 30Jesús pu ayan tihua'uta'ixaa tɨcɨn: ―Capu ayan yeehui tyu'utaxajtaca'a aɨjna cɨme'e tɨ ca'anijra'a naata'an inyeetzi silu tɨ ayan ca'anijra'a amuaata'an muejmi. 31’Pu'uri yeehui ayan tyaja'ure'enye ajna xɨcaara'an jetze tɨ Dioj jetzen hua'uxɨjte'en matɨj mana'a pua'amua yan huachaatɨme. Pu'uri ajta ajna tyaja'ure'enye ɨ xɨcaara'an jetze ɨ nyaj jetzen raatamuarite'esin nyaɨjna tɨ yan tie'ijta iiyan chaanaca japua. 32Nyajta inyaa, matɨ'ɨj meri aj nyaja'utavé'en, aj nu ni neyan naijmi'ica huatájeevi ɨ tyaɨte mej mi curá'acɨjxɨ'ɨn inyeetzi jemi. ―Ayaa pu tihua'uta'ixaa. 33Ayaa pu een cɨn ayan tyu'utaxajtaca'a mej mi meyan raamua'aree a'ij tɨ ye'i tí'imɨ'ɨni. 34Matɨ'ɨj meyan tiraata'ixaa aɨme ɨ mej maun ajtyáxɨɨraca'a tɨcɨn: ―Ayaa tu yeehui teyan raanamuajri'i tyaɨjna jetze ɨ nyuucari ɨ maj cɨn ti'ijta tɨ aɨn Cɨriistu'u nu'u ayan rusen cɨn ruuri huatyaturaasin. Aɨj pu yeehui cɨn, a'ini ti'irɨ'ɨri pej peyan ti'ixaj yee tɨ nu'u ayan ruxe'eve'e maj nu'u aj ya'utave'en maɨjna tɨ tyaata'a jetze e'iraujnyejte. A'ataani yeehui pɨrɨcɨ aɨjna tɨ nu'u tyaata'a jetze e'iraujnyejte. 35Aj pu'i Jesús ayan tihua'uta'ixaa tɨcɨn: ―Auche'e pu a'atzu a'ateere muejmi jemi ɨ tatzari tɨ cɨn huanyéeri'icɨ a'ame. Sata'aj yeehui seyan á'ujhua'anye'en a'ij tɨ tiraavijte'e meenti auj muejmi tzajta'a ayan seijre'e ɨ tatzari tɨ cɨn huanyeeri'i, tɨ ij yeehui cai a'amua japua rájveti ɨ tɨ huatɨca'a. Aɨjna tɨ yeehui ayan tɨca'amiste'e a'ucha'acan, capu ramua'aree a'u tɨ á'umej. 36Sata'aj seyan huataujtuiire'en aɨjna jemi tɨ jetzen e'iraninyei ɨ tatzari tɨ cɨn huanyeeri'i sej si seyan saɨjna jetze ajtyama'acanta aɨjna tɨ huanyeeri'i. Tɨ'ɨj raatapua'ajtaca'a tɨ ayan tihua'uta'ixaa, aj pu'i á'uraa aɨjna ɨ Jesús, ajta huatauravaataca'a hua'a jemi. 37Aɨ pu ari eihua tyu'umuarej hua'a jemi ti'itɨ tɨ ayan huapɨ'ɨ ruxe'eve'e. Ma majta aɨme, camuu xɨ rá'ujca'anyajca'a mej meyan huataujtuiire'en ɨ jemin. 38Ayej tyu'urɨj tɨ'i ayan aráurasten a'ij tɨ tiraataxajtaca'a aɨjna ɨ Isaías tyaacan tɨ ajmi'i ti'ixaxa'ata'a ɨ Dioj jetze ma'acan, tɨ ayan tɨcɨn: Nyavastara'a, capu a'atɨ yeehui ayan rá'antzaahua a'ij tyej tihua'uta'ixaa. Capu yeehui a'atɨ ayan yau'eitaa a'araa a'ij tɨ huataujmua'a aɨjna tɨ Dioj rumuare'eri'ira'a cɨn ayan huarɨj. 39- 40Aɨj mu cɨn cai rá'antzaahua aɨjna cɨme'e, a'ij tɨ pua'amuaque ayan raataxajtaca'a aɨjna ɨ Isaías tyaacan tɨcɨn: Aɨ pu nu'u yeehui ayan hua'uruu mej meyan aracucu'unijme'eni mej mi cai atanyéjnye'eri. Aɨ pu yeehui ayan hua'uruu mej mi antaujnaamɨn ɨ rutzajta'a mej mi cai yau'eitaa mua'ara'ani. Na'ari tɨ pua'a pɨ mana'a, aɨ mu saɨque tyu'umua'atíiche'en, nyaj nu'u neyan hua'urújte'enche'e. 41Ayaa pu tyu'utaxajtaca'a aɨjna ɨ Isaías tyaacan aɨjna tɨ ayan raaseij ɨ tɨ Dioj cɨn rɨ'ɨ tiraatá'aniche'en. Aɨ pu ajta ayan tiraataxajtaca'a aɨjna cɨme'en ɨ Jesús. 42Ee xaa nya'u, mui'itɨ ɨ mej maun ti'ijta teyujta'a, aɨme mu meyan rá'antzaahua. Ma majta aɨme, camu raxajtacuca'a hua'a tzajta'a ɨ tyaɨte maɨjna cɨme'e mej hua'atzɨɨnya'acaa ɨ fariseos, majta maɨjna cɨme'e ɨ seica meyan hue'ire'iti maujna u teyujta'a. 43Eitze'e pu hua'aranajchaca'a mej mi tyaɨte meyan rɨ'ɨ tihua'uta'an cai ɨ Dioj. 44Aj pu'i Jesús ayan ruseiirata tyu'utaxajtaca'a tɨcɨn: ―Tɨ pua'a yeehui a'atɨ ayan na'antzaahuate'en inyeetzi, capu nyeetzi na'a a'atzaahuate'e silu ajta pu ra'atzaahuate'e aɨjna tɨ yan nyaja'utaityaca'a. 45Tɨ'ɨj aɨn ayan nyeseij inyeetzi, aɨ pu ajta raseij aɨjna tɨ yan nyaja'utaityaca'a. 46Ayaa nu yeehui een cɨn a'uve'eme iiyan chaanaca japua nyej ni neyan hua'uruuren ɨ tyaɨte tɨj tatzari ɨ tɨ cɨn hua'a tzajta'a huanyeeri'i mej mi cai che'e meyan tɨca'amiste'en á'ujhua'anye'en aɨme ɨ maj meyan na'astijre'e inyeetzi. 47Tɨ pua'a a'atɨ nyanamua a'ij nyej ti'ixa, ajta cai na'astijra'a, canu yeehui ra'axɨjte'en inyaa, a'ini canu nyaɨjna cɨn a'uve'eme nyej ni neyan hua'uxɨjte'en aɨme ɨ mej yan huachaatɨme iiyan chaanaca japua silu nyej ni hue'irajtuaani. 48’Ee xaa nya'u, ti'itɨ pu yeehui pueen tɨ ayan ra'axɨjte'en aɨjna ɨ a'atɨ tɨ ayan naare'iti, tɨ cai ra'astijre'e a'ij nyej ti'ixa. Aɨjna nya'u hui, ɨ nyaj cɨn tyu'utaxajtaca'a, ayaa pu ra'axɨjte'esin ajna xɨcaara'an jetze tɨ jetzen nain te'entipua'ari. 49Ayaa pu'u na'a, a'ini canu hui nyasaɨj a'ij tirajtyau a'ij nyej tyu'uxajtaca'a silu aɨn tɨ niya'upua pueen, aɨ pu ayan tinaataij a'ij nyej ye'i tyu'utaxaj, ajta ɨ nyaj cɨme'en neyan tyu'utaxajta. 50Nyaa nu yeehui neyan ramua'aree tɨ ayan tinaataij tɨ ij ayan tyajamuaacɨ'ɨti sej seyan ruurican huatyaturan para rusen cɨme'e. Aɨj nu cɨn ayaa nu che'eta nyana'a ti'ixa a'ij tɨ aɨn niya'upua ayan aɨjna cɨn tinyeijca nyej ni tyu'utaxaj.

will be added

X\