San Juan 11

1Meenti saɨj ti'icui'icaa tɨ ayan antyahuaaca'a tɨcɨn Lázaro. Au pu e'echajca'a chajta'a tɨ ayan tyaja'arajtyahuaa tɨcɨn Betania. Au mu majta e'echajca'a ɨ juutzajra'an, aɨjna ɨ Mariiya, ajta ɨ Marta tɨ i'i cu'utzaara'an. 2Ajta aɨjna ɨ Mariiya, ai pu aɨn pueen tɨ ra'ava'axɨri'iri'i ɨ tavastara'a aɨjna cɨme'e tɨ naa tyáará'i. Aɨ pu ajta ra'anáhuatzi'iri'i ɨ rucɨpua cɨme'e ɨ ɨɨcajra'an jetze. Ajta aɨn ihuaara'ara'an ti'icui'icaa, aɨjna ɨ Lázaro. 3Matɨ'ɨj mi maɨn juutzimua'ame'en meyan tiraatanyú'uchite ɨ Jesús tɨcɨn: ―Tavastara'a, aɨ pu yeehui ti'icu'i aɨjna ɨ paj raxe'eve'e. 4Ajta aɨn Jesús, tɨ'ɨj ayan raamua'areeri'i, ayaa pu tyu'utaxajtaca'a tɨcɨn: ―Capu yeehui ayan tijcui'inyaca'a tɨ i huamɨ'ɨni silu mej mi rɨ'ɨ tiraata'an ɨ Dioj. Ayaa pu ajta aɨjna cɨn Dioj ayan rɨ'ɨ tinaata'asin inyeetzi, i nyaj yaujra'an pueen. 5Jesús pu hua'axe'eva'acaa aɨjna ɨ Marta, ajta ɨ juutzajra'an, ajta aɨjna ɨ Lázaro. 6Ma ajta aɨn, tɨ'ɨj ayan raamua'areeri'i tɨ nu'u ti'icu'i aɨjna ɨ Lázaro, auche'e pu aun a'utyajturaa hua'apua xɨcaj a'u tɨ a'ij éenya'a a'aye'i. 7Aj pu'i ayan tihua'uta'ixaa aɨme ɨ maj jamuan á'ujhua'anya'a ayan tɨcɨn: ―Tiche'e yeehui tyajtahua'a tyaun a'atanyén u Judea. 8Matɨ'ɨj mi meyan tiraata'ixaa tɨcɨn: ―Maeestru, capu xɨ yeehui a'achu a'atee mej meyan tyu'utyese maj muaatyatu'asixɨ'ɨn tetej cɨme'e. ¿Ni tzaa pajtahua'a paun a'atanyejsin? 9Ayaa pu tyu'utanyúu aɨjna ɨ Jesús tɨcɨn: ―¿Ni yeehui cai ayan á'atɨjtɨ'ɨ tɨ ayan huanyeeri'i ɨ xɨcaj cɨme'e a'achu cumu tamuaamuata'a oora japuan hua'apua? Capu a'atɨ ayan tye'ijcá'acatá a'ame tɨ pua'a auj nyeeriste'e á'ucha'acanye'en a'ini aɨ pu cɨn mauunyee aɨjna cɨme'e tɨ huanyeeri'i iiyan chaanaca japua. 10Tɨ pua'a yeehui aɨn a'atɨ ayan tɨca'ari tzajta'a á'ucha'acanye'en, aɨ pu xaa a'ijcá'acatá a'ame a'ini capu huanyeeri'i. Aɨj pu cɨn huatacɨ'ɨpe tyej tyaun a'atanyén. 11Aj pu'i ayan tihua'uta'ixaa tɨcɨn: ―Aɨ pu yeehui huatacu ɨ ta'amiincu aɨjna ɨ Lázaro. Au nu a'atanyejsin nyej ni ráajɨsten. 12Matɨ'ɨj mi meyan tiraata'ixaa aɨme ɨ maj jamuan á'ujhua'anya'a tɨcɨn: ―Tavastara'a, tɨ pua'a yeehui ayan cutzu, aɨ pu rɨ'ɨ rujni. 13Ayaa pu tihua'amityejtya'acaa aɨme tɨ Jesús aɨjna cɨn ayan tí'ixajtacaa tɨ ayan Lázaro cujcaa tɨ ij huaujsa'upe'en na'a. Ma ajta, aɨjna ɨ tɨ Jesús ayan tí'ixajtacaa, ayaa pu huataujmua'a tɨ ayan huamɨ'ɨ. 14Aj pu'i ayan a'ahuauritaacan cɨn tihua'uta'ixaa tɨcɨn: ―Pu'uri yeehui huamɨ'ɨ aɨjna ɨ Lázaro. 15Nyajta nu neyan huatantyamua'ave nyaj cai nyaun a'utyavaaca'a a'ini aɨ pu tyajamuaatyava'ɨri sej si seyan rá'antzaahuate'en satɨ'ɨj raaseiiran a'ij nyaj huarɨni. Tiche'e yeehui tyaun a'uju'un a'u tɨ a'ij een. ―Ayaa pu tihua'uta'ixaa. 16Ajta aɨn Tomás tɨ ajta ayan antyahuaa tɨcɨn ɨ tɨ hua'apuarí pueen, aɨ pu ayan tihua'uta'ixaa aɨme ɨ seica tɨcɨn: ―Tiche'e yeehui tyajta tyaun a'uju'un tyej ti teyan jamuan huacui'ini. 17Tɨ'ɨj Jesús aun a'ará'a u Betania, ayaa pu raamua'areeri'i tɨcɨn pu'uri ayan a'atee a'achu cumu muaacua xɨcaj mej meyan ra'ava'ana. 18Au pu vejli'i pɨja'arɨcɨ aujna u Jerusalén a'achu cumu hueica kiloometru. 19Mui'itɨ mu aun e'ire'enye aɨme ɨ mej Israel jetze ajtyama'acan a'u mej e'eche aɨjna ɨ Marta, ajta aɨjna ɨ Mariiya mej mi meyan hua'utyapua'arite'en ɨ maj cɨn ruxaamɨste'e tɨ aɨn hue'ihuaara'a huamɨ'ɨ. 20Tɨ'ɨj aɨn Marta ayan raamua'areeri'i tɨ nu'u Jesús e'eve'ema'acaa, aj pu'i u a'umej tɨ ij ra'antinajche. Ajta aɨn Mariiya, au pu a'utyajturaa u chi'ita. 21Aj pu'i Marta ayan tiraata'ixaa tɨcɨn: ―Nyavastara'a, tɨ pua'a yeehui peyan ya huácatijche'e, capu mɨ'ɨniiche'e ɨ nyaja'a. 22Me nyajta inyaa, ayaa nu yeehui ramua'aree tɨ Dioj auche'e ayan muaata'asin tɨj na'a a'ij pej tiraatahuaviira. 23Jesús pu ayan tiraata'ixaa tɨcɨn: ―Aɨ pu yeehui ajtahua'a huatarujsin aɨjna ɨ a'ihuaara'a. 24Aj pu'i ayan tiraata'ixaa aɨjna ɨ Marta tɨcɨn: ―Nyaa nu yeehui neyan ramua'aree tɨ ajtahua'a huatarujsin ajna xɨcajra'an tɨ jetzen nain te'entipua'ari, tɨ ajta Dioj jetzen hua'ajjájpua naijmi'ica ɨ mej meri huacuii. 25Ajta aɨn Jesús ayan tiraata'ixaa tɨcɨn: ―Nyaa nu yeehui nyaɨn pɨrɨcɨ i nyaj hua'ajjá'apuanaj na'aye'i ɨ mej meri huacuii, nyajta nu neyan hua'ata'aca mej mi ruuri mua'ara'ani. A'atɨ tɨ na'a tɨ ayan na'atzaahuate'en inyeetzi, tɨ pua'a aɨn ayan huamɨ'ɨni, auche'e pu ayan ruuri a'ame. 26Ajta a'atɨ tɨ na'a tɨ ayan rɨ'ɨ ti'ityujcha'ɨ, tɨ ajta na'atzaahuate'e inyeetzi, aɨ pu cai a'anaj mɨ'ɨni. ¿Ni qui peyan tya'atzaahuate'e paɨjna cɨme'e? 27Ayaa pu tiraata'ixaa aɨjna ɨ Marta tɨcɨn: ―Ee xaa nya'u, nyavastara'a. Ayaa nu yeehui tya'atzaahuate'e paj paɨn pueen ɨ Cɨriistu'u, pajta paj yaujra'an pueen ɨ Dioj, paj yan chaanaca japua e'icanyejsin. 28Cɨme'en pu'u ayan tyu'utaxajtaca'a, aj pu'i u á'umej u chi'ita. Tɨ'ɨj i aviitzi cɨn ya'utajée ɨ rujuu. Ayaa pu tiraata'ixaa tɨcɨn: ―Pu'uri me e'eve'eme ɨ maeestru. Aɨ pu yeehui muaje'echue'eve'e aujna. 29Cɨme'en pu'u ayan tyu'unamuajri'i aɨjna ɨ Mariiya, aj pu'i ca'anacan ajchee, ajta u a'umej ɨ jemin. 30Ajta aɨn Jesúc, capuu xɨ aun a'utyarutyaca'a u chajta'a silu au pu'u auche'e a'utyavaaca'a a'utɨ Marta ye'entinájchaca'a. 31Majta ɨ maj Israel jetze ajtyama'acantacaa, au mu e'ere'etya'acaa u chi'ita jamuan ɨ Mariiya mej mi meyan raatyapua'arite'en ɨ maj cɨn ruxaamɨstya'acaa. Matɨ'ɨj meyan raaseij tɨ aɨn Mariiya ca'anacan ajchee, tɨ'ɨqui huirajraa u chi'ita, matɨ'ɨj mi maɨn raatavén. Ayaa mu tyu'umuá'a tɨ nu'u aun a'umej a'u maj ya'ava'ana ɨ ihuaara'ara'an tɨ ij aun a'ahuaujyeinixɨ'ɨn. 32Tɨ'ɨj Mariiya aun a'ará'a a'utɨ a'utyaavaaca'a aɨjna ɨ Jesús, aj pu'i raaseij, ajta a'itave a'u tɨ a'araɨɨcajme. Aj pu'i ayan tiraata'ixaa tɨcɨn: ―Nyavastara'a, tɨ pua'a yeehui peyan ya huatyávaacache'e, capu ayan mɨ'ɨníiche'e ɨ nyaja'a. 33Tɨ'ɨj i Jesús ayan raaseij tɨ ruyeinyacaa. Aɨ mu majta ruyeinyacaa aɨme ɨ mej Israel jetze ajtyama'acantacaa, ɨ maj majta jamuan huaju'uncaa. Aɨj pu cɨn eihua pu utyeenye ɨ tzajta'an. Ajta eihua pu a'ij pua'a raata'a. 34Aj pu'i ayan tihua'utaihua'uri'i tɨcɨn: ―¿A'uni jetzera'a yeehui seya'ava'ana? Matɨ'ɨj mi meyan tiraata'ixaa tɨcɨn: ―Mu a'uta'aye'i, tavastara'a, pata'aj yeehui ya'uteeseij. 35Aj pu'i huaujyeinyaca'a ɨ Jesús. 36Matɨ'ɨj mi meyan tyu'utaxajtaca'a aɨme ɨ mej Israel jetze ajtyama'acantacaa tɨcɨn: ―Casi'i yeehui, eihua pu raxe'eva'acaa. 37Majta seica meyan tyu'utaxajtaca'a tɨcɨn: ―Aɨ pu yeehui seij huarujte tɨ arácuuni'i. ¿Ni cai ayan raayɨ'ɨtɨhua'a tɨ ij ayan raata'an aɨjna ɨ Lázaro tɨ cai huamɨ'ɨni? 38Ajtahua'a pu utyeenye ɨ tzajta'an ɨ Jesús. Aj pu'i aun a'ará'a a'u maj ya'ava'ana, a'u tɨ e'etyasta'a. Tete pu e'ityamuaaca'a aujna a'u tɨ a'utyacun. 39Aj pu'i ayan tihua'uta'ixaa tɨcɨn: ―Sata'aj yeehui ra'anta'ɨn mɨ tetej. Aj pu'i ayan tiraata'ixaa aɨjna ɨ Marta, tɨ juutzajra'an pueen aɨjna tɨ huamɨ'ɨ, tɨcɨn: ―Aru tavastara'a, a'ij pu pua'a yeehui tya'aaca, a'ini pu'uri ayan a'atee muaacua xɨcaj tɨ ayun ava'anami'ihuaca'a. 40Aj pu'i Jesús ayan tiraata'ixaa tɨcɨn: ―¿Ni cai yeehui neyan timuaata'ixaa pej peyan raseijran ɨ paj cɨn rɨ'ɨ tiraata'an ɨ Dioj tɨ pua'a peyan na'antzaahuate'en? A'ini ni'ijta nya'u. 41Matɨ'ɨj mi meyan ra'anta'ɨ ɨ tetej. Aj pu'i Jesús ute'e a'unyeeraca'a, ajta ayan tyu'utaxajtaca'a tɨcɨn: ―Dioj pej nye'iya'upua. Ayaa nu yeehui nyaɨjna cɨn rɨ'ɨ timuaata'asin nyaɨjna cɨme'e paj peri náanamuajri'i. 42Nyaa nu yeehui ramua'aree pej peyan a'anaj tɨ na'a nyanamua. Me nyajta neyan tyu'utaxajtaca'a nyaɨjna cɨme'e mej eihua yej re'evee ɨ tyaɨte mej mi meyan rá'antzaahuate'en paj hui yan nyaja'utaityaca'a. 43Tɨ'ɨj ayan tyu'utaxajtaca'a aɨjna ɨ Jesús, aj pu'i ca'anin cɨn raatajé. Ayan tɨcɨn: ―Lázaro hui, pata'aj huirajra'ani iiya pua'aque. 44Aj pu'i huirajraa aɨjna ɨ tɨ huamɨ́'ɨcaa. Auche'e pu ca'ijcatzi'ihuaca'a ɨ jɨɨcajra'an jetze, ajta ɨ muajca'ara'ara'an jetze, aɨjna cɨme'e ɨ cɨɨxuri ɨ maj cɨn hua'acaicata mua'aye'i ɨ mɨ'ɨchite. Ajta paanyu cɨn aránami'ihuaca'a nyeerima'ara'an jetze. Aj pu'i Jesús ayan tihua'uta'ixaa tɨcɨn: ―Sata'aj hui tiracá'ari'i, sajta ra'utáxɨjta. 45Matɨ'ɨj meyan raaseij a'ij tɨ huarɨj ɨ Jesús, mui'itɨ mu meyan huataujtuiiri'i ɨ jemin aɨme ɨ maj Israel jetze ajtyama'acantacaa, aɨme ɨ maj majta e'ire'enye maj ramuáare maɨjna ɨ Mariiya. 46Ma majta seica, aɨme jemi mu a'uju'un ɨ fariseos. Majta mu hua'uta'ixaa a'ij tɨ huarɨj aɨjna ɨ Jesús. 47Matɨ'ɨj mi aɨme ɨ maj maun ti'ijta teyujta'a, majta aɨme ɨ fariseos, ayaa mu hua'utajee ɨ jueesi mej mi naimi'i tyujsaɨre'en. Ayaa mu tyu'urihua'u tɨcɨn: ―¿A'ini yeehui tyarɨni? A'ini aɨ pu tɨ'ɨj pɨ na'a ayan ti'itɨj cɨn rɨcɨ tɨ ayan huapɨ'ɨ ruxe'eve'e, ɨ maj cɨn ava'ujjɨ'ɨsivi'iraxɨ'ɨn ɨ tyaɨte. 48Tɨ pua'a yeehui teyan raata'acare'en tɨ ayan rɨjca, naimi'i mu meyan huataujtuire'esin ɨ jemin. Majta aɨme ɨ mej Roma ajtyama'acan, matɨ'ɨj meyan raamua'aree, aj mu mi yeehui ya uve'enyejsin, mej mi tita'ari'i nain ɨ tyaj cɨn títyatatí, iiyu teyujta'a, ajta iiyan chuejra'a japua, iiya Israel. 49Aj pu'i seij ayan tyu'utaxajtaca'a, tɨ ajna'ɨmɨ aɨjna cɨn ti'ityavaaca'a ti'itɨ cɨme'e tɨ eitze'e ve'e ɨ maj cɨn ti'ivaɨre'e u teyujta'a. Ayaa pu antyahuaaca'a tɨcɨn Caifás. Ayaa pu tihua'uta'ixaa tɨcɨn: ―Muan xu yeehui cai ti'itɨj mua'aree. 50Capu yeehui ayan tyajamua'amitejte'e tɨ ayan eitze'e titaatyava'ɨri tɨ saɨj na'a ayan huamɨ'ɨni hua'a jetze ma'acan ɨ tyaɨte cai tyej naimi'i antipua'are. ―Ayaa pu tihua'uta'ixaa. 51Capu rusaɨj na'a a'ij tirajtyau a'ij tɨ tyu'utaxajtaca'a silu aɨ pu Dioj jetze ma'acan raataxajtaca'a tɨ Jesús ayan nu'u hua'a jetze ma'acan mɨ'ɨni matɨj mana'a Israel jetze maj ajtyama'acan. 52Ajta nu'u, capu aɨme na'a silu aɨ pu nu'u ajta hua'a jetze ma'acan huamɨ'ɨni ɨ yaujmua'ame'en ɨ Dioj ɨ maj nu'u a'ɨmɨ a'ucaitɨme, tɨ ij aɨn nu'u ajta hua'ura'asaɨre'en mej mi seij mana'a tyaɨtejra'a pueenya'a mua'ara'ani. 53Tɨj na'a ajna'ɨmɨ tɨ ayan tyu'utaxajtaca'a, aɨ mu meyan tiraaxa'apɨ'ɨntare a'ij mej ye'i huarɨni mej mi raaje'ica. 54Aɨj pu cɨn, Jesús cai che'e ruseijrata á'ucha'acanya'a hua'a tzajta'a aɨme ɨ mej Israel jetze ajtyama'acantacaa. Tɨ'ɨqui huirajraa aujna Judea. Aj pu'i aun a'ará'a ajna a'ahua'a tɨ a vejli'i a'utacá'a a'u tɨ cai e'e ti'itɨjcaa. Aj pu'i chajta'a a'utyajrupi tɨ ayan tyaja'arajtyahuaa tɨcɨn Efraín. Au pu a'utyajturaa, majta aɨme ɨ maj jamuan á'ujhua'anya'a. 55Tɨ'ɨjta ari vejli'i pɨti'irɨjcaa matɨ'ɨj aɨme ɨ mej Israel jetze ajtyama'acantacaa meyan maɨjna cɨn ti'iyestyahua'a ɨ xɨcajra'an tɨ Dioj jetzen tihua'utauuni'iri'i, mu'itɨ mu maun cura'acɨjxɨ mej mi maun a'ujnyén anti Jerusalén mej mi anacai atyɨ'ɨhuaxɨ'ɨn a'ij tɨ ayan tyu'ujxe'eve'e mej mi meyan tyu'uyesten. 56Aɨ mu mauche'e rahuauca'a. Matɨ'ɨj maun a'utyáuuca'a maujna teyujta'a, ayaa mu tyu'urihua'uraca'a tɨcɨn: ―¿A'ini yeehui timua'amitejte'e mueetzi? ¿Ni cai yaj uve'enyejsin tɨ ye tírámua'ariive'esin ɨ mej ti'iyesten? 57Majta aɨme ɨ maj maun ti'ijta teyujta'a, majta ɨ fariseos, ayaa mu tyu'utaijtaca'a tɨ nu'u ayan huarɨni tɨ pua'a a'atɨ me'e yá'amua'areera a'u tɨ a'ij een ɨ Jesús, tɨ aɨn nu'u ayan tihua'uta'ixaate'en maj nu'u mi raatyeevi'in.

will be added

X\