San Juan 10

1’Ayaa nu yeehui tyaja'amue'ixaate'e tzaahuati'ira'a cɨme'e. Tɨ pua'a a'atɨ aun a'utyarute canya'axɨ hua'acúraa, tɨ pua'a cai aun a'utyarute a'utɨ a'apueerta silu tɨ pua'a ancura'ara'ani ɨ tyajcua jetze, aɨ pu nahua'ari pueen, ajta tɨ ti'ityacui'ica. 2Ma ajta, aɨn tɨ yeehui aun a'utyarute a'u tɨ a'apueerta, ai pu aɨn pueen tɨ hua'ajya'amua ɨ canya'axɨ. 3Ajta aɨn tɨ tí'icha'ɨ a'u tɨ a'apueerta, aɨ pu tira'antacuunye'esin tɨ'i aun a'utyarute aɨjna tɨ hua'ajya'amua. Majta aɨme ɨ canya'axɨ, aɨ mu yeehui ranamua i nyuucara'ara'an. Ajta aɨn a'atɨ ayan hua'ajee a'ij maj antya'aruu seij ajta seij. Aɨ pu ajta hue'irájajpua. 4’Tɨ'ɨj ari naijmi'ica huirájaapuan ɨ ruya'amua, aɨ pu hua'a cujta'a auma'a a'ame. Majta aɨme anacai mu huaju'u mua'aju'un ɨ jemin a'ini aɨ mu ra'aste a'ij tɨ aɨn tihue'ixaate'e. 5Camu a'anaj meyan huaju'u mua'aju'un jemin saɨj ɨ maj cai ramua'ate. Camu xaa nya'u, silu muatauuruuna ɨ jemin a'ini camu yeehui ramua'ate ɨ nyuucara'ara'an aɨjna ɨ a'atɨ ɨ maj cai ramua'ate. 6Ayaa pu tihua'uta'ixaa ɨ Jesús aɨjna cɨme'e ɨ nyuucari. Majta aɨme, camu yau'eitaa mua'araa a'ij tɨ aɨn tihua'uta'ixaa. 7Aɨj pu cɨn, Jesús ayan tihua'uta'ixaa tɨcɨn: ―Ayaa nu tyaja'amue'ixaate'e tzaahuati'ira'a cɨme'e. Nyaa nu yeehui nyaɨn pueen ɨ pueerta ɨ mej jetzen utyarute ɨ canya'axɨ u cúrajta'a. 8Matɨj mana'a mej meyan anacai huataseijre nyacai inyaa, aɨ mu nahua'ari puéenya'a, majta mej ti'ityacui'ica. Ma ajta aɨme ɨ canya'axɨ, camu yeehui hua'unamuajri'i a'ij mej tyu'utaxajtaca'a. 9’Nyaa nu yeehui nyaɨn pueen ɨ pueerta. A'atɨ tɨ na'a tɨ ayan aun a'utyarute aɨjna cɨme'e tɨ na'antzaahuate'en inyeetzi, aɨ pu ruuri huatyaturaasin para rusen cɨme'e. Aɨ pu yeehui ruxaahua huiraye'icaa a'ame, ajta utyaru'ipicha'a a'ame. Ruxaahua pu ratyauni ɨ tɨ cɨn huataujvaɨre'en. 10’Ajta aɨn nahua'ari, ayaa pu'u yeehui een cɨn u a'uve'eme tɨ ij tyu'unahua'an, tɨ ij ajta tityaacui'ini, tɨ ij ajta naijmi'ica antipua'arite'en. Me nyajta inyaa, ayaa nu yeehui een cɨn mu a'uve'eme mej mi ruuri mua'ara'ani, tɨ ij ayan tihua'ucɨ'ɨti nain a'ij tɨ ti'iseijre'e ɨ maj cɨn huataujtyamua'ave'en para rusen cɨme'e. 11’Nyaa nu yeehui nyaɨn pueen i nyej xa'apɨ'ɨn cɨn seijre'e, i nyaj nyajta neyan hua'ajya'amua ɨ canya'axɨ. Nyajta nu neyan huamɨ'ɨni hua'a jetze ma'acan. 12Ajta aɨn ɨ maj raata'a tɨ tyu'umuare'en, capu yeehui aɨn pueen ɨ tɨ hua'ajya'amua ɨ canya'axɨ. Aɨj pu cɨn, tɨ pua'a raaseij tɨ jɨɨra'ave e'eve'eme, aɨ pu an huajáuhua'axɨjsin, ajta huatáuruuna. Aj pu'i aɨn jɨɨra'ave hua'a tzajta'a aun a'utyaruti, ajta huaja'ucuíjxɨ'ɨsin ɨ canya'axɨ. 13Ajta aɨn ɨ a'atɨ ayan huatáuruuna a'ini ayaa mu'u raata'a tɨ tyu'umuare'en na'a, ajta capu yeehui a'atzu jetzen ruxe'eve'e a'ij tɨ tihua'aruuren ɨ canya'axɨ, icu. 14’Me nyajta inyaa, nyaa nu yeehui nyaɨn pueen i nyej rɨ'ɨ ti'itevi, i nyaj nyajta hua'ajya'amua ɨ canya'axɨ. Nyaa nu hua'amuajte nyaɨme ɨ canya'axɨ. Majta aɨme ɨ canya'axɨ aɨ mu yeehui nyamua'ate inyeetzi. 15Ayaa pu che'eta na'a nyamua'ate ɨ niya'upua. Nyajta inyaa, ayaa nu che'eta nyana'a ramua'ate ɨ niya'upua. Nyajta nu huamɨ'ɨni hua'a jetze ma'acan ɨ canya'axɨ. 16’Nyaa nu yeehui nyajta hua'a cujta'a huame'en seica ɨ canya'axɨ ɨ maj cai hua'a jetze ajtyama'acan aɨme ɨ mej iiyu seijre'e cúrajta'a. Ayaa pu yeehui ruxe'eve'e nyej ni neyan hua'uva'ajajpuan. Aɨ mu majta ra'ancura'asin ɨ nyenyuuca. Naijmi'i mu ɨ canya'axɨ matɨj mana'a pua'amua, au mu seira'a mua'aju'un seij tzajta'a ɨ cúraa. Ajta saɨj pu'u yeehui hua'a cujta'a a'uma'a a'ame. 17’Ayaa pu yeehui een cɨn niya'upua nyeetzi xe'eve'e a'ini nyaa nu huamɨ'ɨni nyej ni nyajtahua'a huatarun. 18Capu a'atɨ na'ari'iraj inyeetzi silu nyexe'evi'ira'a nu cɨn mɨ'ɨni. Nyaa nu yeehui nyaɨjna cɨn antinmua'aree nyej ni neyan ahuanca'anye nyej huamɨ'ɨni. Nyajta nyaɨjna cɨn antinmua'aree nyej ni nyajtahua'a huatarun. Ayaa pu aɨjna cɨn tinyeijca ɨ niya'upua. ―Ayaa pu tihua'uta'ixaa. 19Cɨme'en pu'u ayan tyu'utaxajtaca'a ɨ Jesús, aj mu mi e'ita'a a'utacɨj aɨme ɨ mej aun ti'ijta hua'a teyujta'a ɨ maj Israel jetze ajtyama'acan. 20Mui'itɨ mu meyan tyu'utaxajtaca'a tɨcɨn: ―Tiyaaru'u pu yeehui tzajta'an seijre'e, ajta rutɨmue'i. Caxu seyan ra'atzaahuatya'a. 21Majta seica meyan tyu'utaxajtaca'a tɨcɨn: ―Capu yeehui rɨ'ɨri tɨ a'atɨ ayan ti'ixajta tɨ pua'a ayan tiyaaru'u tzajta'an seijra'a. ¿Ni tzaa tiyaaru'u ayan raayɨ'ɨtɨ tɨ ayan yeehui raarujte'en a'atɨ tɨ ayan aracun? Capu xaa nya'u. ―Ayaa mu tyu'utaxajtaca'a. 22Pu'uri a'atzu a'ateevi'ica tɨ'ɨj ari vejli'i pɨti'irɨjcaa matɨ'ɨj meyan maɨjna cɨn ti'iyeste a'anaj maj meyan tyu'utatuii ɨ teyuu. Pu'uri ajta ajna pɨti'irɨjcaa tɨ huaseevi'i a'aye'i. 23Ajta aɨn Jesús, au pu á'ucha'acanya'a aujna teyujta'a, a'u tɨ a'aportaale tɨ Salomón rá'ajtaahuaca'a. 24Majta meyan ajtyáxɨɨraca'a ɨ jemin aɨme ɨ mej maun ti'ijta teyujta'a. Matɨ'ɨj mi meyan tiraata'ixaa tɨcɨn: ―Capaj yeehui peyan ta'aviitza'a. Pata'aj peyan tzaahuati'ira'a cɨn taata'ixaate'en tɨ pua'a paɨn pueen ɨ Cɨriistu'u nusu pacai. 25Jesús pu ayan tihua'uta'ixaa tɨcɨn: ―Nyaa nu hui xaa nyeri amuaata'ixaa. Sajta muan, caxu na'antzaahua. Aɨjna ɨ nyaj cɨn neyan rɨcɨ tɨ huapɨ'ɨ ruxe'eve'e, ayaa nu yeehui nyaɨjna cɨn neyan rɨcɨ nyuucajtze'en ɨ niya'upua. Ajta, aɨ pu aɨjna cɨn ayan tí'inyaxaj. 26Ma sajta muan, caxu yeehui na'atzaahuate'e a'ini caxu hua'a jetze ajtyama'acan ɨ canya'axɨ ɨ nyaj hua'ajya'amua. 27Ajta aɨme ɨ canya'axɨ, ayaa mu nyanamua a'ij nyej tihue'ixaate'e. Nyaa nu yeehui hua'amuajte, majta meyan na'astijre'e inyeetzi. 28Ayaa nu yeehui hua'ata'aca mej meyan ruurican huatyaturan para rusen cɨme'e. Camu a'anaj antipua'ari, capu yeehui rɨ'ɨri tɨ a'atɨ ayan ná'ajajpuani'i. 29Ajta niya'upua, ɨ tɨ ayan naatatui aɨme ɨ canya'axɨ, aɨ pu nain cɨn antyujmua'aree. Capu yeehui ajta rɨ'ɨri tɨ a'atɨ ayan rá'ajajpuani'i. 30’Tyan tu tanaijmi, seij tyana'a pɨrɨcɨ ɨ niya'upua, nyajta inyaa. ―Ayaa pu tyu'utaxajtaca'a aɨjna ɨ Jesús. 31Majta aɨme ɨ maj maun ti'ijta teyujta'a, majtahua'a mu tetej titú'utu mej mi maɨjna cɨn raatyatu'asixɨ'ɨn. 32Aj pu'i Jesús ayan tihua'uta'ixaa tɨcɨn: ―Nyaa nu neri eihua tyajamuaataseijrate a'ij nyej rɨcɨ tɨ i'i xa'apɨ'ɨn. ¿Ti'itajni sij cɨn pɨ naatyátu'asixɨ'ɨsin? ¿Ni qui aɨjna cɨme'e nyaj raarujte, na'ari ti'itɨ cɨn, nya'u? 33Matɨ'ɨj mi meyan tiraata'ixaa tɨcɨn: ―Catu yeehui tyaɨjna cɨn muaatyatu'asixɨ'ɨsin pej peyan ti'itɨj cɨn rɨcɨ tɨ i'i xa'apɨ'ɨn, silu ayaa tu een cɨn muaatyatu'asixɨ'ɨsin pej peyan a'ij pua'a ti'ixa ɨ Dioj jemi, a'ini muaa, tevi pana'a pɨrɨcɨ. Pajta peyan ti'aseijrata paj nu'u Dioj pueen. ―Ayaa mu tiraata'ixaa. 34Jesús pu ayan tihua'uta'ixaa tɨcɨn: ―¿Ni cai ayan te'eyu'usi'i ɨ yu'uxari jetze tɨ nu'u Dioj ayan tihua'uta'ixaa aɨme ɨ mej aɨme jemi raatyajtuaa ɨ runyuuca?, tɨcɨn: “Ayaa pu nu'u yeehui ayan tihua'uta'ixaa tɨ nu'u ayan hua'utamuá'a tɨcɨn: Diosi maj nu'u pueen.” 35Dioj pu ayan hua'utamuá'a aɨjna cɨme'e maj nu'u dioosi pueen. Ajta capu yeehui rɨ'ɨri tej teyan ra'urauuna tyaɨjna tɨ ari te'eyu'usi'i ɨ yu'uxari jetze. 36’Tɨ pua'a Dioj ayan hua'utamuá'a, ¿a'ini tyej teyan raatámua'ati tyaɨjna tɨ niya'upua huataura'ate, ajta yan ya'utaityaca'a iiyan chaanaca japua? ¿Ni qui teyan che'eta tyana'a raatámua'ati a'ij tɨ Dioj ari hua'utamuá'a ɨ seica? A ni'ijta nya'u. Aɨj pu yeehui cɨn, ¿a'ini seyan saɨjna cɨn ti'inyaxajtzi'i saɨjna cɨme'e nyej neyan tyajamuaata'ixaa yee nyaa nu nyaɨn pueen ɨ yaujra'an ɨ Dioj? 37’Sata'aj na'atzaahuatya'a tɨ pua'a yeehui neyan che'eta nyana'a rɨjca a'ij tɨ ajta rɨcɨ ɨ niya'upua, na'ari tɨ pua'a nyacai nyana'a, sata'aj cai na'atzaahuatya'a. 38Ee xaa, tɨ pua'a neyan nyana'a rɨjca a'ij tɨ ajta aɨn rɨcɨ, sajta sacai seyan ahuaujca'anyen sej yeehui na'antzaahuate'en, ayaa nu tyajamuaata'ixaate'e sata'aj seyan sana'a tya'atzaahuatya'a saɨjna cɨme'e a'ij nyaj rɨcɨ sej si seyan yeehui raamua'aree, sajta yau'eitaa xa'ara'ani tyej teyan naijmi'i seij tyana'a pɨrɨcɨ, ɨ niya'upua, nyajta inyaa. ―Ayaa pu tihua'uta'ixaa. 39Majtahua'a mu meyan ti'ityesa'acaa mej mi raatyeevi'i. Ma ajta aɨn, hua'a jetze ajtaraa. 40Aj pu'i au pu antaraa ɨ Jesús u jetze pujme'en ɨ atya'anara'an jetze aujna u Jordán. Au pu a'ará'a a'utɨ anacai aɨ hua'amuaɨ'ɨhuaca'a aɨjna ɨ Juan. Au pu a'utyajturaa. 41Majta mui'itɨ mu u e'ire'enye ɨ jemin. Ayaa mu tyu'utaxajtaca'a tɨcɨn: ―Capu yeehui a'anaj ayan huarɨj aɨjna ɨ Juan ti'itɨ maj cɨn ava'ujjɨ'ɨsijvi'iraxɨ'ɨn aɨjna cɨme'e maj rɨ'ɨ ta'utaséij. Ma ajta, tɨj na'a mej meyan tyu'utaxajtaca'a maɨjna cɨme'e ɨ Jesús, ayaa pu yeehui ayan ti'ayajna. ―Ayaa mu tyu'utaxajtaca'a. 42Majta mui'itɨ mu maun huataujtuiri'i ɨ Jesús jemi.

will be added

X\