1 Jajcua ɨmɨ pu seijra'acaa aɨjna ɨ tɨ jee tɨcɨn ɨ nyuucari. Ajta, aɨjna ɨ nyuucari, aɨ pu seijra'acaa ɨ Dioj jemi. Ajta aɨ pu Dioj puéenya'a aɨjna ɨ nyuucari. 2 Aɨ pu jajcua ɨmɨ seijra'acaa ɨ Dioj jemi tɨ'ɨj cai xɨ ma'ahua'acaa ɨ chaanaca. 3 Nain tɨj na'a tɨ ti'iseijre'e, aɨjna nyuucari jetze pu ayan tyu'utaseijre. Aɨ pu ɨ Dioj, ajta aɨjna ɨ nyuucari, aɨ mu naijmi'i tyu'utaahuaca'a tɨj pua'amua yen ti'iseijre'e. Ajta, capu ti'itɨ ayan ti'iseijra'a a'ame'enche'e tɨ pua'a cai aɨn nyuucari ayan tyu'utaxajtanche'e. 4 Tɨj na'a jajcua ɨmɨ tɨ yu e'ire'enye, aɨj pu jetze e'iráninyeica'a aɨjna tɨ i'iruuri rusen cɨme'e. Ajta aɨj pu cɨn ayan huanyeeri'icɨcaa hua'a tzajta'a ɨ tyaɨte aɨjna cɨme'e tɨ cɨn i'iruuri mej mi meyan raamua'aree a'ij tɨ een ɨ Dioj jemi. 5 Ajta aɨjna tej teyan tyajta ratamua'amua tɨcɨn tatzari, aɨ pu huanyeeri'icɨ a'araa aɨme tzajta'a ɨ tyaɨte ɨ maj á'ujhua'anya'a tɨca'amiste'e. Majta aɨme ɨ mej meyan tɨca'amiste'e á'ujhua'anya'a, camu raayɨ'ɨtɨhua'a maj ra'uje'ica ɨ tatzari tɨ hua'atzajta'a huanyeeri'icɨcaa. 6 Seij pu ayan u a'uve'eme tɨ Dioj ayan ya'utaityaca'a. Ayaa pu antyahuaaca'a tɨcɨn Juan. 7 Ayaa pu een cɨn u a'uve'eme tɨ ij ayan aɨjna cɨn tya'anxájta a'ij tɨ ari ti'ijmua'areeraca'a aɨjna cɨme'en tɨ i'i tatzari, mej mi naimi'i meyan tya'antzaahuate'en a'ij tɨ aɨn ayan tihue'ixaate'e. 8 Ajta aɨjna ɨ Juan, capu aɨn puéenya'a ɨ tatzari silu ayaa pu'u een cɨn a'uve'eme tɨ ij aɨjna cɨn tihua'uta'ixaate'en aɨjna jetze ma'acan aɨjna ɨ tatzari. 9 Ajta aɨn tɨ tzaahuati'ira'a cɨn tatzari pueen, tɨ ajta huatatátza huanyeeri'i a'aye'i hua'a tzajta'a ɨ tyaɨte, a'achu maj pua'amua yen seijre'e, aɨ pu mu a'uvé'ema'acaa iiyan chaanaca japua. 10 Aɨ pu ayan huatyajturaa iiyan chaanaca japua. Ajta, aɨ pu nain tyu'utaahuaca'a tɨj na'a tɨ yan chaanaca japuan ti'iseijre'e. Ma majta maɨn, ɨ mej yan huachaatɨma'acaa iiyan chaanaca japua, camu raamuá'a. 11 Aɨ pu mu a'uvé'ema'acaa, ajta aɨme jemi ɨ rutyaɨtestyamua'a huatyajturaa. Majta aɨme, camu ra'ancure'evi'itɨ. 12 Ma majta, seica mu xaa ra'ancure'evi'itɨ aɨme ɨ tyaɨtestyamua'ame'en. Ajta aɨn, ayej tihua'uta'a aɨmej ɨ maj ra'astijre mej mi yaujmua'ame'en pueenya'a mua'ara'ani ɨ Dioj a'achu maj pua'amuaca. 13 Majta aɨme, camu meyan tyetyaca jetze a'iráninyeica'a maɨjna cɨme'e tɨ tyaata'a ayan ti'ijxe'eva'acaa. Camu a'atzu xaa nya'u, silu ayaa mu'u maɨjna jetze ajtyama'acan ɨ Dioj. 14 Ajta aɨn ɨ nyuucari aɨ pu ayan huataujtevistaca'a. Aɨ pu ajta ityejmi jemi huatyajturaa. Tyan tu tyajta teyan raaseij tyaɨjna ɨ tɨ cɨn rɨ'ɨ tiraata'a ɨ Dioj. Tyan tu raaseij ɨ tɨ cɨn Dioj rɨ'ɨ tyu'uta'a aɨjna cɨme'e tɨ aɨ na'a caj ti'iyaujra'an ɨ Dioj. Aɨ pu e'ema'acan ɨ ruya'upua jemi. Nain pu cɨn rɨ'ɨ titájchaɨca'a ruxé'evi'ira'a cɨme'e. Ajta, nain pu ayan tzaahuati'ira'a cɨn tyu'utaxajtaca'a. 15 Ajta aɨn ɨ Juan, ayaa pu aɨjna cɨn tyu'utaxajtaca'a, ayan ti'ixaata tɨcɨn: ―Ai pu aɨn pueen ɨ nyaj cɨme'en nyeri tyajamue'ixaa yee aɨjna tɨ ye'eve'eme nyaj cujta'an, eitze'e pu va'acan cɨn ti'ityejvee nyacai inyaa, a'ini aɨ pu anacai seijra'acaa nyacai inyaa. ―Ayaa pu tyu'utaxajtaca'a. 16 Naijmi'i ityan tu'uri teyan tyaɨjna cɨn ra'ancura'a tyaɨjna cɨme'e ɨ tɨ nain cɨn rɨ'ɨ naa titata'aca. Ruxe'eve'evi'ira'a pu cɨn rɨ'ɨ titata'aca tɨj na'a tɨ yu auca'itɨ a'ame. 17 A'ini ayaa pu'u, aɨjna ɨ nyuucari ɨ maj cɨn ti'ijta, Dioj pu ayan raatyajtuaa ɨ Moisés jemi. Dioj pu ajta ayan tiréijca aɨjna ɨ Jesús, tɨ ajta Cɨriistu'u pueen, tɨ ij aɨn ruxé'evi'ira'a cɨn rɨ'ɨ titaata'an, tɨ ij ajta tzaahuati'ira'a cɨn titaataseijrate'en a'ij tɨ ti'ijxe'eve'e ɨ Dioj. 18 Capu a'atɨ a'anaj raaseij ɨ Dioj, silu aɨ pu'u tɨ aɨ na'a caj ti'iyaujra'an. Ruxe'eve'evi'ira'a pu cɨn rɨ'ɨ titata'aca tɨj na'a tɨ yu auca'itɨ a'ame. Capu a'atɨ a'anaj raaseij ɨ Dioj, silu aɨ pu'u tɨ saɨj na'a yaujra'an pueen, tɨ ajta Dioj jemi seijre'e, aɨ pu ayan taatamuá'ate a'ij tɨ een. 19 Majta aɨme ɨ maj Israel jetze ajtyama'acan, maj majta teje'ijta maujna Jerusalén, aɨ mu huaja'utaityaca'a ɨ Juan jemi seica ɨ maj ti'ivaɨra'acaa u hua'ateyujta'a, majta seica ɨ maj maɨjna jetze a'iraanye aɨjna ɨ Leví tyaacan mej mi meyan tiraataihua'u tɨ cɨme'en yee: “¿A'ataani paj pɨrɨcɨ?” 20 Ajta aɨjna ɨ Juan, capu hua'uta'ijmɨjri'i maj raamua'ati silu ruxé'evi'ira'a pu cɨn ayan tihua'uta'ixaa mejseiiraca naijmi'i ɨ tyaɨte. Ayan tɨcɨn: ―Canu nyaa nyaɨn pueen ɨ Cɨriistu'u tɨ Dioj ra'antihuau. 21 Matɨ'ɨj mi meyan tiraataihua'uri'i tɨcɨn: ―¿A'ataajni paj pueen? ¿Ni paɨn pueen aɨjna ɨ Elías? Ajta ayan tihua'uta'ixaa tɨcɨn: ―Canu nyaɨn pueen. Majta meyan tɨcɨn: ―¿Ni paɨn pueen ɨ tyaj rachu'eve'e, aɨjna tɨ Dioj jetze ma'acan titaata'ixaate'esin? Ayaa pu tyu'utanyúu tɨcɨn: ―Canu nyaɨn pueen. 22 Matɨ'ɨj mi meyan tiraata'ixaa tɨcɨn: ―¿A'ataani nya'u paj pueen muaa? Pata'aj taata'ixaate'en a'a cɨme'en tej ti tyajta teyan tihua'uta'ixaate'en aɨme ɨ maj taja'utaityaca'a. ¿A'ini peti'ixa a'a cɨme'en? 23 Aj pu'i ayan Juan tyu'utanyúu tɨcɨn: ―Nyaa nu nyaɨn pueen aɨjna tɨ ayan cɨme'en tyu'utaxajtaca'a aɨjna ɨ Isaías tyaacan tɨ nu'u ayan a'atɨ pu a'a avé'ejijhua aujna hua'ɨtzita. Ayan tɨcɨn: “Rɨ'ɨ xu huaujruuren sej si seyan tyamua'a naa ra'ancure'evi'itɨn saɨjna ɨ tavastara'a.” 24 Majta seica ɨ fariseos, ɨ maj tyu'utaijti'ire, ayaa mu tiraataihua'uri'i tɨcɨn: ―Tɨ pua'a peyan muaa cai aɨn pueen aɨjna ɨ Cɨriistu'u, pajta cai muaa aɨn pueen ɨ Elías, pajta cai muaa aɨn pueen aɨjna ɨ tyaj rachu'eve'e tɨ Dioj jetze ma'acan titaata'ixaate'esin, ¿a'ini een cɨn peyan hua'amuaɨ'ɨhua ɨ tyaɨte? 26 Ayaa pu tyu'utanyúu aɨjna ɨ Juan tɨcɨn: ―Nyaa nu a'amuamuaɨ'ɨhua jaj cɨme'e. Ma ajta, seij pu ayan muejmi jemi seijre'e ɨ saj cai ramua'ate. 27 Ai pu aɨn pueen ɨ tɨ auj me e'eve'eme. A'ini inyaa cɨleenya'a nu cɨn ti'ityejvee ɨ jemin, capu ayan tiraavijte'e nyaj ra'ajtaɨ'ɨpɨ'ɨn ɨ ca'acaira'an. 28 Ayaa pu tyu'uruu aujna a'ahua'a tɨ ayan tyaja'arajtyahuaa tɨcɨn Betábara, u jetze pujme'en, ɨ atya'anara'an jetze ɨ Jordán, a'u tɨ aɨn Juan huaja'amuaɨ'ɨhuaca'a. 29 Yaa ru'ijmua'a yee, aɨ pu huaseij aɨjna ɨ Jesús tɨ e'eve'ema'acaa ajna jemin. Aj pu i ayan tyu'utaxajtaca'a aɨjna ɨ Juan tɨcɨn: ―Casi'i xaaseij muan, mɨ canya'a Dioj tɨ raatámuaɨ'ɨvajta. Ai pu aɨn pueen tɨ ruxé'evi'ira'a cɨn ra'urauuna nain cɨme'e a'ij mej titya'utyajturaa ɨ Dioj jemi a'achu maj pua'amua yen seijre'e iiyan chaanaca japua. 30 Ai pu aɨn pueen ɨ nyaj cɨme'en neyan tyu'utaxajtaca'a nyatɨ'ɨj neyan tyajamuaata'ixaa yee: “Saɨj pu ye é'eve'ema'a a'ame nyahuarita'a majca'ihua, tɨ ajta eitze'e va'acan cɨn ti'ityejvee nyacai inyaa, a'ini aɨ pu anacai huataseijre nyacai inyaa.” 31 Canu nyajta inyaa nyasaɨj ramua'atyajcaa. Aru ayaa nu een cɨn mu a'uve'eme nyej ni neyan hua'umuaɨ'ɨhua ɨ jaj cɨme'e tɨ ij aɨn ayan huataseijre'en aɨme jemi ɨ mej Israel jetze ajtyama'acan. 32 Aj pu'i Juan ayan tihua'uta'ixaa tɨcɨn: ―Ayaa nu raaseij nyaɨjna ɨ xaijnyu'ucara'ara'an ɨ Dioj tɨ ute'e e'icáma'acaa. Yaa pu seijra'acaa tɨj cucui'i. Aj pu i an múutze'en a'ujyeijxɨ. 33 Canu a'atzu ramua'atínche'e tɨ pua'a cai ayan tinaata'ixaate'enche'e aɨjna tɨ nyaja'utaityaca'a ayan tɨcɨn: “Tɨ pua'a hui peyan raaseij tɨ aɨn xaijnyu'ucara'ara'an ɨ Dioj ayan e'icaanyen tɨ ij seij japuan huatyaturan, aj paj ramua'ati tɨ aɨn pueen tɨ ayan tiraataijte'esin aɨjna ɨ xaijnyu'ucara'ara'an ɨ Dioj tɨ muejmi tzajta'a huatyaturan sej si saɨjna jetze araujca'anyen.” 34 Nyaa nu neyan raaseij. Nyajta nu neyan tyajamuaata'ixaate'esin tɨ aɨn pueen ɨ yaujra'an ɨ Dioj. ―Ayaa pu tihua'uta'ixaa. 35 Yaa ruijmua'a yee, ajtahua'a pu aun a'utyavaaca'a aɨjna ɨ Juan. Ajta aɨme ɨ tɨ hua'uvi'itɨjma'a, hua'apua mu jamuan á'ujhua'anya'a. 36 Tɨ'ɨj raaseij tɨ aun a'atama'acaa aɨjna ɨ Jesús, ayaa pu tyu'utaxajtaca'a tɨcɨn: ―Xaaseij muan, ɨ canya'a Dioj tɨ raatamuaɨ'ɨvajta. 37 Matɨ'ɨj meyan tiraanamuajri'i aɨme ɨ maj hua'apua, matɨ'ɨj mi Jesús huataven. 38 Ajta aɨn Jesús, tɨ'ɨj pɨ a'ure'eve, aj pu'i hua'useij maj raavájrajme'e. Aj pu'i ayan tihua'utaihua'uri'i tɨcɨn: ―¿A'ini seti'ijxe'eve'e muan? Aj mu meyan tyu'utanyúu tɨcɨn: ―Rabí, ¿a'uni pe'eche muaa? Aijna i nyuucari tɨcɨn Rabí, ayaa pu huataujmua'a tɨcɨn Tevi tɨ Tihua'amua'ate. 39 Aj pu i Jesús ayan tihua'uta'ixaa tɨcɨn: ―Sata'aj ya va'aju'un sata'aj ya'useij. Matɨ'ɨj mi a'ucɨj jamuan. Majta u ya'useij a'utɨ e'echajca'a. Majta mu jamuan aun a'utyajturaa a'achu pua'an oora ti'ituraaca'a aɨjna xɨcajra'a jetze. Yaa pu tyauuma'aca tya'acáará'a tacuarixpua. 40 Ajta, saɨj tɨ hua'ajetze ajtyama'acantacaa ɨ maj hua'apua ɨ maj Jesús jamuan a'ucɨ́j, ayaa pu antyahuaaca'a tɨcɨn Andrés. Aɨ pu juutzajra'an pɨrɨcɨ aɨjna ɨ Simón, tɨ ajta i'i Pedro. 41 Aj pu'i aɨn Andrés anacai ra'antinajchaca'a aɨjna ɨ ruja'a, ɨ Simón. Aj pu'i ayan tiraata'ixaa tɨcɨn: ―Tu'uri ráatyau tyaɨjna ɨ Mesías. (Mesías, ayaa pu huataujmua'a aɨjna ɨ nyuucari tɨcɨn Cɨriistu'u tɨ Dioj Ra'antihuau.) 42 Tɨ'ɨqui ya'araavi'itɨ aɨjna ɨ Simón ɨ Jesús jemi. Ajta aɨn Jesús, tyamua'a pu tira'araaseij. Ayaa pu tiraata'ixaa tɨcɨn: ―Muaa paj aɨn pueen ɨ yaujra'an ɨ Jonás. Ayaa paj antyahuaa pua'ame tɨcɨn Cefas. (Cefas, ayaa pu huataujmua'a tɨcɨn Pedro, tɨ ajta tetej pueen.) 43 Yaa ruijmua'a yee, Jesús pu aun á'uye'imɨjcaa. Ayaa pu tiraaxa'apɨ'ɨntare tɨ aun á'ume'en aujna ajtyapua, Galileeya a'ahua'a. Tɨ'ɨj i aɨn ra'antinajchaca'a aɨjna ɨ Felipe. Ayaa pu tiraata'ixaa tɨcɨn: ―Pata'aj nya jamuan á'ucha'acanye'en. 44 Aɨjna ɨ Felipe, au pu e'ema'acantacaa, aujna chajta'a tɨ ayan tyaja'arajtyahuaa tɨcɨn Betsaída. Au mu majta e'ema'acan aɨjna ɨ Andrés, ajta aɨjna ɨ Pedro. 45 Aj pu'i aɨn Felipe aɨn huátyau ɨ Natanael. Ayaa pu tiraata'ixaa tɨcɨn: ―Tu'uri ráatyau tyaɨjna tɨ cɨme'en Moisés tyaacan ayan ra'uyu'uxaca'a aɨjna jetze ɨ yu'uxari, ɨ nyuucari ɨ maj cɨn ti'ijta. Ai pu hui ajta aɨn pueen ɨ maj majta cɨme'en ra'uyu'uxaca'a aɨme ɨ mej Dioj jetze ma'acan ti'ixaxa'ata'a. Ai pu aɨn pueen aɨjna ɨ Jesús, Nazaret tɨ e'ema'acan. Aɨ pu yaujra'an pueen ɨ José. 46 Ajta aɨjna ɨ Natanael, ayaa pu tiraataihua'uri'i tɨcɨn: ―¿Ni qui Nazaret e'ema'acan? ¿Ni ayan ti'irɨ'ɨri tɨ aun Nazaret ti'itɨ a'iraanyen tɨ ti'ire'en? Aj pu'i ayan tiraata'ixaa aɨjna ɨ Felipe tɨcɨn: ―Che'ere, pata'aj ya'useij. 47 Tɨ'ɨj Jesús raaseij tɨ e'eve'ema'acaa aɨjna ɨ Natanael, ayaa pu tyu'utaxajtaca'a cɨme'en aɨjna tɨcɨn: ―Xaaseij, pu'uri e'eve'eme seij tɨ tzɨte'e Israel jetze ajtyama'acan. Capu ti'ihue'itzi aɨjna jemi. Capu a'anaj ti'ihue'itaca. 48 Aj pu'i aɨn Natanael ayan tiraataihua'uri'i tɨcɨn: ―¿A'uni pe nyaja'umuá'a? ¿A'ini pej pi een cɨn nyamua'ate? Jesús pu ayan tyu'utanyúu tɨcɨn: ―Nyaa nu nyaun muaja'useij patɨ'ɨj paun e'iracatii jeten aɨjna ɨ huarej, tɨ'ɨj cai xɨ muaatajeeva aɨjna ɨ Felipe. 49 Aj pu'i ayan tiraata'ixaa aɨjna ɨ Natanael tɨcɨn: ―Rabí, muaa paj paɨn pueen pej i'i yaujra'an ɨ Dioj. Muaa paj aɨn pueen ɨ pej titaataijte'esin ityejmi i tyej Israel jetze ajtyama'acan. 50 Aj pu'i Jesús ayan tiraata'ixaa tɨcɨn: ―Muaa paj peyan tya'atzaahuate'e paɨjna cɨme'e nyej neyan timuaata'ixaa yee nyaj nyaun muaja'useij patɨ'ɨj paun e'iracatii ɨ huarej jete. Ayaa nu ti'imue'ixaate'e pej pauj peyan ti'iseiran ti'itɨ cɨme'e tɨ eitze'e ruxe'eve'e cai aɨjna. 51 Ajta ayan tiraata'ixaa tɨcɨn: ―Ayaa nu ti'imue'ixaate'e tzaahuati'ira'a cɨme'e pej peyan raseijran tɨ ayan antacúuni'ihua a'ame u tajapua. Majta aɨme ɨ mej maun ti'ivaɨre'e Dioj tɨ e'eseijre'e, aɨ mu yava'acaninyeica'a mua'aju'un inyeetzi jemi, i nyaj nyajta tyaata'a jetze a'iraanye. Majta mu aun a'ujninyeica'a mua'aju'un maujna u tajapua.
