Santiago 5

1Rɨ'ɨ xu'u muan, mɨ sej chijtyaani pueen. Sata'aj huaujyeine, sajta ruxaamɨstya'a huajijhua saɨjna cɨme'e tɨ tɨn ari ajna tyaja'ure'enyejsin ajna xɨcajra'an jetze sej jetzen rajpueiitzi xa'aju'un. 2Pu'uri tí'ipeti tɨj na'a ɨ saj seri tí'ijsaɨj a sej e'eche. Ajta, ɨ tyaja'amuacɨɨxu, mu'uri raráacɨ'ɨxɨ aɨme ɨ jatzipu'use. 3Ajta pu'uri tyu'utyáujchuitaamua aɨjna ɨ ooro ɨ sej eihua rajcha'ɨ; ajta aɨjna ɨ plaata ɨ saj sajta tí'ijsaɨj, ayaa pu che'eta na'a tyu'utyáujchuitaamua. Ajta aɨjna tɨ cɨn tyu'utyáujchuitaamua, aɨ pu rusaɨj amuaatyaxajta, ajta tɨ'ɨj ayan a'amua'axɨjtya'a, ayaa pu che'eta na'a á'amuaruuren tɨj taij tɨ raatyataira ɨ a'amuahue'ira'a. Ayaa xu saɨjna cɨn tí'ijsaɨj tɨ eihua huapɨ'ɨ ti'ijnajchi sej si saɨjna cɨn huataujtyamua'ave'en ijii tɨ nain ari te'entipua'ari. 4Ma sajta muan, ayaa xu hue'itzi cɨn hua'ari'iri'i ɨ maj raamue'itɨ ɨ tetyaca, ɨ maj tyu'ure'eveijchaca'a ɨ a'amuavi'ira'ata'a. Ajta aɨn tavastara'a pu'uri ramua'aree a'ij sej huarɨj a'ini aɨn tɨ nain cɨn antyujmua'aree pu'uri hua'unamuajri'i ɨ mej maɨjna cɨn runyuuste'e aɨme ɨ mej ti'imuara'acaa muejmi jemi. 5Ayaa pu cai ti'itɨj tyajamuá'aturaatya'a, seyan ruxaahua tí'itechajca'a iiyan chaanaca japua. Ayaa xu che'eta sana'a ruxaahua ti'icua'acara'a. Cu xuee saj tyu'ujcɨ'ɨmite'e mej mi amuaacui'ini tɨj visaaru'u tɨ tyaruu. 6Muan xu sajta ra'uxɨjte, sajta raaje'ica saɨjna tɨ rɨ'ɨ ti'ityújchaɨca'a. Ajta aɨn, capu a'atzu amuaata'ijmɨjra. 7Aɨj xu cɨn ne'ihuaamua'a, sata'aj tyamua'a naa tya'utaviicue'i asta na'a cai ya uvé'enyen ɨ tavastara'a. Casi'i, autamua'areeri'i a'ij tɨ rɨcɨ aɨjna tɨ chuej japua ti'imɨjhuaca. Ayaa pu rachu'eve'e asta na'a cai tyu'ucɨɨre aɨjna tɨ ajninyei a chuaata'a, tɨ ij ayan ra'ancura'an ɨ taca'ira'an tɨ eihua huapɨ'ɨ ruxe'eve'e. Ayaa pu rachu'eve'e maj autyajhuiini maj huateviiye ajna viita'ari tzajta'a, ajta matɨ'ɨj atacheni. 8Sata'aj seyan che'eta sana'a raachu'eve'en. Sata'aj huatyaujca'anyen ɨ a'amua tzajta'a, a'ini pu'uri tɨn ya uve'enyejsin aɨjna ɨ tavastara'a. 9Caxu a'ij pua'a tyu'ujxajta seij sajta seij, ne'ihuaamua'a, tɨ ij cai Dioj ayan che'eta na'a amua'uxɨjte'en muejmi. Rɨ'ɨ xu'u muan, a'ini pu'uri tɨn ya uve'enyejsin aɨjna tɨ ayan ti'ixa'apɨ'ɨntare'e. 10Sata'aj seyan hua'utamua'aree saɨme ɨ mej ti'ixaxa'ata'a ɨ tavastara'a jetze ma'acan. Sata'aj seyan tiraarɨ'ɨren saɨme jemi a'ij mej huarɨj maɨjna cɨme'e maj tya'utaviicue'iri'i ɨ maj cɨn rajpueijtzica'a. 11Casi'i, autamua'areeri'i muan. Ayaa pu tita'amitejte'e tɨ Dioj rɨ'ɨ tihua'uta'a aɨme ɨ maj ti'itɨj cɨn tya'utaviicue'iri'i. Xu'uri raamua'areeri'i saɨjna ɨ tɨ cɨn tya'utaviicue'iri'i aɨjna ɨ Job tyaacan. Sajta, xu'uri raamua'areeri'i a'ij tɨ ti'itɨ cɨn tavastara'a ayan tiraaxa'apɨ'ɨntari'iri'i aɨjna jemi, tɨ aɨn tavastara'a ayan rɨ'ɨ tirajchaɨ́ a'araa, ajta ayan rá'ancu'uvajxɨ. 12Ajta, ai pu aɨn pueen tɨ eitze'e ruxe'eve'e, ne'ihuaamua'a, saj cai ti'itɨj cɨn tya'ataujratzi'iracare'en, caxu seyan rɨjca ɨ tajapua tɨ e'ema'acan cɨme'e, nusu ɨ chaanaca cɨme'e, ni caxu ti'itɨ cɨme'e silu che'e ayan eenya'a a'ara'ani. Tɨ pua'a seyan raataxaj yee jee, che'e ayan tyaja'ure'enyen. Na'ari, tɨ pua'a seyan raataxaj yee capu, che'e ajta ayan tyaja'ure'enyen. Ayaa xu aɨjna cɨn huarɨni tɨ ij cai Dioj ayan ama'uxɨjte'en. 13Tɨ pua'a saɨj tɨ muejmi jetze ajtyama'acan ayan rajpueijtzi, che'e aɨn ayan huatejnyuuni ɨ Dioj jemi tɨ'ij Dioj ayan ra'ancu'uvajxɨ'ɨn. Na'ari tɨ pua'a seij ayan rutyamua'ava'a, che'e aɨn chuiicari cɨn rɨ'ɨ tiraata'acare'en ɨ Dioj. 14Tɨ pua'a saɨj tɨ muejmi jetze ajtyama'acan ayan ti'icui'icaa, che'e aɨn hua'utajeeve aɨme ɨ vaujsi ɨ mej teyujta'a ti'ivaɨre'e mej mi maɨjna cɨn huatejnyuuni, mej mi majta nyuucajtze'en ɨ tavastara'a meyan ra'ava'ahuaate'en maɨjna ɨ a'ara'ara'an aɨjna ɨ aceituuna. 15Tɨ pua'a meyan tya'atzaahuatya'a muaatejnyuuni, ayaa pu aɨjna cɨn Dioj ayan ru'iratuaasin aɨjna tɨ ti'icui'icaa. Tavastara'a pu xaa rarujte'en, ajta ayan tiraatauuni'ira tɨ pua'a aɨn a'atɨ ti'itɨj cɨn autyajturaa ɨ jemin. 16Aɨj pu cɨn sata'aj seyan a'ij tyu'utaxaj seij sajta seij ɨ saj cɨn autyajturaa ɨ Dioj jemi, sajta seyan huatejnyuuni seij cɨme'e sajta seij tɨ ij Dioj ayan amuaarujte'en. Ee xaa nya'u, eecan pu ti'ivaɨre'e ti'itɨj cɨme'e tɨ pua'a a'atɨ tɨ urare'enya'acan cɨn seijra'a ayan huatejnyuuni ɨ Dioj jemi. 17Ajta aɨjna ɨ Elías, ayaa pu che'eta na'a tí'ityaataca'a tyatɨj ityan. Ajta, ca'anin pu cɨn huatejnyuu maj cai huateviiye. Aɨj pu cɨn, ayan a'atee a'achu cumu hueica ninye'ira'a japuan e'ita'a maj cai huaviiyaca'a. 18Tɨ'ɨqui ajtahua'a huatejnyuu. Majta e'eyan huateviiyaca'a. Ajta aɨn tɨ tyu'uhuásti'ihuaca'a a chuaata'a ayan tyu'ucɨɨraca'a. 19Ne'ihuaamua'a, ayaa nu tyaja'amue'ixaate'e. Tɨ pua'a a'atɨ ayan ruhuarita'a ti'icaame tɨ ij cai che'e ayan tya'atzaahuatya'a, ayaa pu te'eme tɨ pua'a saɨj ayan raatyaamue'itɨn tɨ'ij ajtahua'a tya'atzaahuatya'a. 20A'atɨ tɨ na'a tɨ ayan raatyamue'itɨn aɨjna tɨ autyajturaa ɨ Dioj jemi tɨ ij aɨn ayan raatapua'ajta aɨjna tɨ cɨn ata'ɨtza'ara, aɨ pu ayan raatavaɨre'esin aɨjna cɨme'e tɨ cai ya'uraini ɨ ruxaijnyu'uca tɨ cɨn ruuri. Aɨ pu ajta aɨjna cɨn ayan huarɨni tɨ eihua huapɨ'ɨ tiraatauuni'i aɨjna ɨ Dioj aɨjna tɨ cɨn autyajturaa ɨ jemin. Ayaa pu'u xaa. Antipua'araca'a.

will be added

X\