Santiago 4

1Ayaa pu ti'irɨnyaca muejmi tzajta'a. Xu'uri e'ita'a a'utacɨ́'ɨca, sajta runya'usi'ite'e. ¿A'uni jetze e'iraaye'i aɨjna tɨ ca'anijra'a amuata'aca sej si seyan rɨcɨ? ¿Ni cai aun e'iraaye'i ɨ a'amua tzajta'a? Ee xaa nya'u, aɨ pu pɨrɨcɨ ɨ á'amuamua'atziira'a tɨ ayan ca'anijra'a amuata'aca saj runya'usi'ite'e. 2Ayaa xu raxe'eve'e saj eihua tí'ijchaɨca. Ma sajta cai, caxu seyan tí'ijcha'ɨ. Aɨj xu cɨn seyan ti'ityacui'ica. Sajta eihua huapɨ'ɨ ti'inyacua'atze. Ma sajta muan, caxu seyan ráacu'uvijre'e. Aɨj xu cɨn seyan autyajhuiica saj runya'usi'ite'en, sajta rujaaxaijvi'i. Ayaa xu een cɨn sacai tí'ijcha'ɨ saɨjna cɨme'e saj cai seyan rahuavii ɨ Dioj jemi. 3Na'ari cai, tɨ pua'a seyan raatahuavii, capu ayan tyajamuaata'aca aɨjna cɨme'e saj cai seyan huataujnyátacan cɨn raatahuaviiri'i, a'ini ayaa xu eenye'eque'en raxe'eva'acaa sej si cha'a sana'a raaxɨjte'en a'ij tɨ tyajamua'amitejtya'acaa, sej si saɨjna cɨn huataujtyamua'ave'en. 4Mɨ sej seyan ruxana'acɨre'e, ¿ni tzaa sacai seyan ramua'aree a'ij tɨ seijre'e ɨ Dioj jemi? Tɨ pua'a a'atɨ ayan hua'ajtyájaahuate'en aɨme ɨ maj iiyan chaanaca japua huachaatɨme, tɨ pua'a ayan che'eta na'a huarɨni a'ij mej ti'ijrɨ'ɨre, aɨ pu ajta ayan eenye'eque'en huatyaturaan ɨ Dioj jemi tɨ saɨj tɨ rajchaɨre'e. Aɨj pu cɨn, tɨ pua'a a'atɨ ayan raxe'eve'e tɨ hua'ajtyájaahuate'en tyamua'a naa aɨme ɨ maj iiyan seijre'e ɨ chaanaca japua, aɨ pu ajta ayan eenya'a a'ame tɨj saɨj tɨ rajchaɨre'e ɨ Dioj. 5Ee xaa nya'u ayaa pu ti'ayajna. Na'ari cai, capu ti'itɨ cɨn a'ij huataujmua'a aɨjna ɨ nyuucari tɨ ari a'ayu'usi'i ayan tɨcɨn: “Eecan pu chueere aɨjna jemi ɨ xaijnyu'ucara'ara'an tɨ ayan raatyajtuaa itejmi tzajta'a.” 6Ma ajta aɨn Dioj, ayaa pu eitze'e rɨ'ɨ titata'aca tej ti teyan ra'ara'astijre'en. Aɨj pu cɨn, ayan te'eyu'usi'i tɨcɨn: “Dioj pu ayan hua'ajchaɨre'e aɨme ɨ maj á'ujtzaahuate'e. Ma ajta, aɨ pu rɨ'ɨ tihua'ata'aca aɨme ɨ maj ruxaamɨste'e ɨ jemin.” 7Aɨj pu cɨn, sata'aj seyan ra'ara'astijre'en ɨ Dioj. Sata'aj sajta rajchaɨ́ɨra'a saɨjna ɨ tiyaaru'u. Tɨ pua'a seyan huarɨni, aj pu xaa tichesin muejmi jemi. 8Sata'aj ajtyaxɨɨre vejli'i ɨ Dioj jemi. Tɨ pua'a seyan huarɨni, aj pu i Dioj ajta huatyaturaasin vejli'i muejmi jemi. Sata'aj cai che'e ti'itɨ cɨn a'ij rɨjca tɨ a'ij pua'a seijre'e, mɨ sej ata'ɨtza'ara ɨ Dioj jemi. Sajta, sata'aj raatatuire'en ɨ a'amuaxaijnyu'uca ɨ Dioj jemi tɨ ij aɨn ayan huataura'ate'en muejmi, mɨ saj seyan ruseijrata saj nu'u cai ti'itɨj cɨn ata'ɨtza'ara ɨ Dioj jemi. 9Sata'aj a'ij pua'a tya'utaujmua'ati saɨjna cɨme'e ɨ saj cɨn autyajturaa ɨ Dioj jemi, sata'aj sajta huataujxaamɨste'en, sajta huaujyeinixɨ'ɨn. Sata'aj cai che'e seyan ti'itɨj cɨn na'anaa silu sata'aj seyan huataujxaamɨste'en saɨjna cɨme'e a'ij sej sejmi'i rɨjcaa. Sata'aj sajta cai che'e hua'a jemi huataujtyamua'ave'en silu che'e ayan a'ij pua'a amuaata'asti. 10Sata'aj seyan ruyeinya setíra'ara'astijre'en ɨ tavastara'a jemi. Tɨ pua'a seyan huarɨni, aj pu ij rɨ'ɨ tyajamuaatyatuaasin. 11Caxu a'ij pua'a tyu'ujxajta seij sajta seij, ne'ihuaamua'a, a'ini tɨ pua'a a'atɨ ayan a'ij pua'a ti'ijxajta ɨ ru'ihuaara'a, na'ari ayan ra'axɨjte'e, aɨ pu ajta a'ij pua'a ti'ijxa aɨjna ɨ yu'uxari ɨ maj cɨn ti'ijta. Aɨ pu ajta ayan rusaɨj raaxa'apɨ'ɨntare tɨ cai che'e ti'itɨ vaɨre'e aɨjna ɨ nyuucari. Sajta muan, tɨ pua'a seyan rujɨɨmua'a sana'a raaxa'apɨ'ɨntare'en tɨ cai che'e ti'itɨ vaɨre'e ɨ nyuucari ɨ maj cɨn ti'ijta, caxu che'e seyan ra'astijre'e a'ij tɨ tiraavijte'e silu xu'uri seyan huaujruu tɨj aɨme ɨ mej ti'ixa'apɨ'ɨntare'e. 12Ma ajta, saɨj pu'u aɨn pueen tɨ ayan raatyajtuaa aɨjna ɨ nyuucari ɨ maj cɨn ti'ijta. Ajta, ai pu aɨn pueen tɨ ajta saɨj na'a ayan ti'ixa'apɨ'ɨntare'e. Aɨ pu'u na'a raayɨ'ɨtɨ tɨ amue'irajtuaani, ajta ayan che'eta na'a, aɨ pu'u na'a raayɨ'ɨtɨ tɨ amua'antipua'arite'en. Tɨ pua'a ayan, ¿a'ini een cɨn peyan ti'imua'atze paj paɨjna cɨn anti'amua'aree paɨjna cɨme'e paj peyan ra'axɨjte'e ɨ a'ihuaara'a? 13Rɨ'ɨ xu'u muan, mɨ sej seyan ti'ixaxa'a tɨcɨn saj nu'u saun a'uju'u xa'aju'un ijii nusu ruijmua'a a'ahua'a chajta'ana jetze, saj nu'u saun seyan e'eteeri a'achu cumu sei ninye'ira'a sej ti'itɨj cɨn tyaja'umuare'en sej si saɨjna cɨn tumin huamué'itɨn. 14Ayaa xu ti'ixaxa'a a'ij sej huarɨni. Ma sajta muan, caxu ramua'aree a'ij tɨ te'eme ruijmua'a, tɨ pua'a sauj ruuri xa'aju'un nusu sacai. Ayaa xu een tɨj aɨjna pɨxcaari tɨ a'atzu a'ateevi'i huataseijre'esin, ajta e'eyan a'upua'arixɨ'ɨsin. 15Aɨj pu cɨn ayan tiraavijte'e saj seyan tyu'utaxaj yee tɨ pua'a nu'u aɨn tavastara'a ayan amuata'acare'en, sej seyan ruuri huatyaturaasin, aj xu si sajta seyan huarɨni ti'itɨ cɨme'e nusu ɨ saɨj cɨme'e. 16Ma sajta muan, caxu seyan ti'ixaxa'a silu ayaa xu á'ujtzaahuate'e saɨjna cɨme'e a'ij tɨ rujɨɨmua'a sana'a ayan tyajamua'amitejte'e. Aɨjna ɨ saj cɨn á'ujtzaahuate'e, tɨj na'a pua'amua tɨ ayan een, ayaa pu a'ij pua'a seijre'e ɨ Dioj jemi. 17Ajta, a'atɨ tɨ na'a tɨ ayan ru'umua'aree a'ij tɨ tiraavijte'e tɨ ayan huarɨni ti'itɨ cɨme'e, aɨ pu autyaturaasin ɨ Dioj jemi tɨ pua'a cai ayan huarɨni.

will be added

X\