Santiago 3

1Sata'aj cai seyan huataura'an saj mui'itɨ saɨjna cɨn te'entyarute saɨjna cɨme'e sej tihua'amua'atyá ɨ seica a'ini xu'uri ramua'aree tɨ eitze'e ca'anin cɨn ta'axɨjte'en ɨ Dioj itejmi, i tej teyan ti'imua'ata cai ayan hua'axɨjte'en aɨme ɨ maj cai meyan ti'imua'ata. 2Ee xaa, naimi'i tu teyan ti'itɨj cɨn titya'utá'ɨtza'ara. Ajta tɨ pua'a a'atɨ cai ayan ti'itɨ cɨn atya'ɨtza'ara'an aɨjna cɨme'e a'ij tɨ aɨn ti'ixa, ayaa tu ti'ijmua'aree tɨ aɨn pueen tɨ urare'enya'acan cɨn seijre'e, ajta tɨ aɨn raayɨ'ɨtɨ tɨ ayan á'ujcu'uve'en ɨ rutevi tɨ'ij cai ti'itɨj cɨn autyaturan. 3Casi'i, ayaa tu hua'ancarujti'iraca hua'atenye'en ɨ cahuaayu'u tyaɨjna ɨ xaachi'in mej mi ta'ara'astijre'en. Aɨj tu cɨn, tyaɨjna cɨn teyan hua'ara'aca'ani. 4Ajta aɨjna ɨ baarcu, tɨ ajta tyamua'a ti'ive'e. Aɨ pu aaca ayan ráatajchi ca'anin cɨme'e. Ma ajta aɨjna cɨn ɨ cɨye tɨ aata'a atejvee, ayaa pu ti'ivaɨre'e tɨ ij aɨn ɨ tɨ ramuare'e ayan raajajsime'en ɨ baarcu a'u tɨ aɨn ayan ye'exe'eve'e. 5Ayaa pu che'eta na'a cɨleenye'en seijre'e ɨ tajetze aɨjna ɨ tanyanuj. Ma ajta, ayaa pu á'ujca'anye tɨ va'acan cɨn ahuaujtzaahuate'en. Tyajta ityan, tyamua'a tu teri teyan ramua'aree tɨ ayan rɨ'ɨri tɨ taij tɨ cɨj na'a tyajtaani, ayaa pu va'acan cɨn tyu'ura'ataasin. 6Ee xaa nya'u, ayaa pu che'eta na'a seijre'e ɨ tanyanuj tɨj taij. Ayaa pu ajta seijre'e tɨj na'a tɨ a'ij pua'a een ɨ maj cɨn a'ij pua'a títyeetyújcha'ɨ aɨme ɨ maj yan japuan huachaatɨme ɨ chaanaca japua. Aɨ pu taja'ujɨpua tɨj na'a ɨ tajetze. Aɨjna tɨ a'ij pua'a een tɨ jetzen e'ijninyei ɨ tanyanuj, aɨ pu ca'anijra'a rata'aca ɨ tiyaaru'u tɨ ayan huarɨni. Aɨ pu ajta aɨjna cɨn ayan ca'anijra'a hua'ata'aca mej mij meyan nyu'ucamɨ'ɨ cɨn a'ij pua'a ti'iteseijra'a matɨj mana'a pua'amua meyan yan japuan huachaatɨme iiyan chaanaca japua. 7Ee xaa nya'u, ayaa mu raayɨ'ɨtɨ ɨ tyaɨte maj huá'umua'acante'en matɨj mana'a pua'amua yen seijre'e aɨme ɨ ti'ityaɨn mej iiyan xuaa, majta ɨ maj rá'ara'ive, majta ɨ maj sinuurave a chuaata'a, majta ɨ maj jaata'a a'axuaa. Mu'uri meyan tihua'umua'acaante naijmi'ica. 8Ma ajta, capu a'atɨ ayan raayɨ'ɨtɨ tɨ rusaɨj ayan ráamua'ajcante'en ɨ runyanu. Ayaa pu een aɨjna ɨ nyanuri tɨj aɨjna tɨ a'ij pua'a een, tɨ cai a'anaj ti'itɨj cɨn tya'astijre'e. Ajta aɨn tɨ jetzen a'ijninyei, ayaa pu che'eta na'a een tɨj hua'ave'eri tɨ tyu'ujé'ica. 9Aɨj tu cɨn tanyanuj teyan rɨ'ɨ cɨn tirata'aca tyaɨjna ɨ tavastara'a, tyaɨjna ɨ tyaj tyajta rajya'upua. Tyajta tyaɨjna cɨn teyan a'ij pua'a tihua'axa tyaɨme ɨ tetyaca ɨ tɨ Dioj ayan hua'utaahuaca'a meyan seira'a tɨj ɨ tevijra'an. 10Ajta, ayaa pu ti'irɨnyaca tɨ aɨj tyana'a cɨn ɨ tanyanuj teyan rɨ'ɨ ti'ita'aca, tyajta teyan tyaɨjna cɨn a'ij pua'a ti'ixa. Ayaa nu tyaja'amue'ixaate'e, ne'ihuaamua'a, tɨ cai ayan tiraavijte'e. 11Niche'e seij cɨn neyan tyajamue'itii. Cɨme'en aɨjna a'u tɨ a'ajaijxa, ¿ni qui rɨ'ɨri tɨ aun mijmu ayan ajnyen aɨjna ɨ jaj tɨ rumua'atɨ jamuan ɨ jaj tɨ antzijvi'i? Capu a'atzu xaa nya'u. 12Ne'ihuaamua'a, ayaa pu che'eta na'a een aɨjna cɨme'e ɨ huarej, a'ini capu rɨ'ɨri tɨ aɨjna jetze ayan huatáca'an aɨjna ɨ aceituuna. Ajta aɨjna jetze ɨ uuva, capu rɨ'ɨri tɨ ayan jetzen huatáca'an aɨjna ɨ huarej. Aɨj pu cɨn, ayan che'eta na'a cai rɨ'ɨri tɨ jaj tɨ rumua'atɨ aun ajnyen a'u tɨ a'ajaijxa tɨ ajta jetzen ajnyen aɨjna ɨ jaj ta'antzijvi'i. 13Tɨ pua'a a'atɨ muejmi jemi seijra'a tɨ rɨ'ɨ metyáumua'aree, tɨ ajta yau'ite tyamua'a naa, che'e aɨn ayan aɨjna cɨn tyajamuaataseijrate'en aɨjna cɨme'e tɨ rɨ'ɨ ti'ityujchaɨɨca, tɨ ajta ayan ruseijrata tɨ cai va'acan cɨn antyujmua'aree. Ayaa xu saɨjna cɨn ramua'aree tɨ aɨn a'atɨ tzaahuati'ira'a cɨn rɨ'ɨ metyáumua'aree. 14Ma sajta muan, tɨ pua'a seyan huapɨ'ɨ chueera'a ɨ rutzajta'a, ajta tɨ pua'a seyan ca'anin cɨn ti'itesa'aca sej seyan ra'antimue'itɨn a'ij sej ti'ijxe'eve'e ɨ ru tzajta'a, caxu seyan saɨjna cɨn a'ujtzaahuatya'a. Caxu sajta ti'ihue'ita saɨjna cɨme'e a'ij saj rɨcɨ. 15Tɨj na'a tɨ ayan een, capu ayan tiraavijte'e. Capu ajta aun a'uve'eme u tajapua Dioj tɨ e'eseijre'e silu yan pu chaanaca japua huataseijre. Au pu e'iraninyei hua'a mua'atziira'a jetze aɨme ɨ mej rujɨɨmua'a mana'a a'ij tirajtyauve a'ij maj rɨcɨ. Ee xaa nya'u, tiyaaru'u pu ayan ca'anijra'a hua'ata'aca mej mi meyan huarɨni. 16A'u tɨ na'a mej meyan chueere, ajta a'u tɨ na'a mej meyan ca'anin cɨn ti'itese'e mej mi meyan ra'antimue'itɨn a'ij mej ti'ijxe'eve'e, au mu meyan cha'a mana'a a'ij pua'a ti'ityujchaɨ mua'aye'i, majta meyan ra'astijre'e ti'itɨ tɨ na'a tɨ a'ij pua'a een. 17Ajta aɨn mua'atziira'a tɨ aun a'uve'eme u tajapua Dioj tɨ e'eseijre'e, ayaa pu ca'anijra'a hua'ata'aca mej meyan urare'enya'acan cɨn seira'a mua'ara'ani, mej mi majta tyamua'a naa tyu'urihuaamua'atan, majta ruxé'evi'ira'a cɨn meyan rɨ'ɨ ti'iteseijra'a. Aɨ pu ajta ayan ca'anijra'a hua'ata'aca mej mi hua'astijra'a aɨme ɨ mej tihue'ijte'e, mej mi majta ruxé'evi'ira'a cɨn hua'ancu'uvajxɨ'ɨn ɨ ruxa'aj tyaɨte. Nain mu cɨn meyan rɨcɨ ti'itɨj cɨme'e tɨ rɨ'ɨ ti'iseijre'e. Tɨ pua'a meyan ti'itɨj cɨn tya'ataujratzii, ayaa pu te'eme mej meyan huarɨni. Camu ti'ihue'itaca. 18Ajta aɨme ɨ maj meyan rahuauhuau a'ij mej huarɨni mej mi hua'utyapua'arite'en ɨ ruxa'a tyaɨte mej mi cai che'e meyan runya'usi'ite'e, ayaa mu tyu'utatuire'esin ɨ Dioj jemi aɨjna tɨ re'enya'acan cɨn seijre'e ɨ jemin maɨjna cɨme'e mej ruxé'evi'ira'a cɨn rɨ'ɨ ti'ityujchaɨɨca, majta ca'anijra'a hua'ata'aca ɨ seica mej mi meyan che'eta mana'a huarɨni.

will be added

X\