Santiago 2

1Ne'ihuaamua'a, a'ini muan xu ra'astijre'e ɨ tavastara'a aɨjna ɨ Jesús tɨ ajta Cɨriistu'u pueen, tɨ ajta nain cɨn antyujmua'aree ɨ Dioj jemi, aɨj pu cɨn, sata'aj seyan ruxa'aj sana'a huaja'useijra naijmi'ica ɨ tyaɨte. Capu amɨn a'ij tɨ pua'a saɨj chijtyaani pueen nusu cai. 2Tiche'e teyan tiraataxaj yee hua'apua mu maun a'utyarute a'u sej e'etyujsa'ɨri. Ajta ɨ saɨj, ayaa pu aniira ucárujtya'a, ajta náa e'enye'en ti'ityecháa. Ajta ɨ saɨj, aɨ pu cai a'ij ti'ijviicue'i, ajta ayan mi'ima'acan ucacháa. 3Sajta muan, ayaa xu tyamua'a naa ra'ancure'evi'itɨn saɨjna tɨ naa e'enye'en ti'itéechan, sajta seyan tiraata'ixaate'en tɨcɨn: “Iiya'a ij, pata'aj ya a'ujyeijxɨ'ɨn ya tɨ eitze'e a'ujxe'eve'e.” Ajta, cɨme'en aɨjna tɨ ayan mi'ima'acan ucacháa, seyan cha'a sana'a tiraata'ixaate'en tɨcɨn: “Pata'aj ma huatyavaaca nusu ya a'ujyeijxɨ'ɨ ye nyaɨ́ɨcata'a.” 4Tɨ pua'a seyan rɨjca, ¿ni qui seyan ruxa'a sana'a tihua'useijra ɨ ruxa'aj tyaɨte? ¿Ni qui sacai seyan ruruure matɨj aɨme ɨ maj a'ij pua'a me tityaumuámua'aree, ɨ maj majta hua'axɨjte'e ɨ ruxa'a tyaɨte? Ayej xaa nya'u ti'ayajna. Tɨ pua'a seyan cai ruxa'aj sana'a tihua'useijra ɨ ruxa'a tyaɨtye, ayaa xu ruruure matɨj aɨme. 5Casi'i, xaanamuajri'i, ne'ihuaamua'a. Dioj pu ayan hua'ava'ajajpuaxɨ aɨme ɨ maj cai a'ij ti'ijviicue'i aɨme tzajta'a ɨ mej yan japuan huachaatɨme ɨ chaanaca japua, mej mi eihua huapɨ'ɨ tí'ijchaɨca ɨ Dioj jemi maɨjna cɨme'e mej tya'atzaahuate'e, tɨ ij ajta ayan tihua'ucɨ'ɨti maj jamuan tyu'utaijta tɨj na'a Dioj ari aɨjna cɨn tya'ataujratziiri'i hua'a jemi ɨ maj raxe'eve'e. 6Ma sajta muan, xu'uri raatyaxaahuataca'a saɨjna tɨ cai a'ij ti'ijviicue'i. Majta aɨme ɨ maj chijtyaani pueen, aɨ mu aɨn pueen ɨ maj pueijtzi amuata'aca. Majta meyan amua'avi'itɨjcɨca hua'a jemi ɨ mej ti'ixa'apɨ'ɨntare'e. 7Aɨ mu majta a'ij pua'a ti'ijxa maɨjna ɨ nyuucajtze'en saj cɨn seyan antya'aruu, ɨ saj sajta rɨ'ɨ tirata'aca. 8Xa'apɨ'ɨn xu rɨcɨ tɨ pua'a seyan tzaahuati'ira'a cɨn ra'ara'astijre'en saɨjna ɨ nyuucari tɨ cɨn Dioj ti'ijta tɨ ayan cɨme'en ti'ixaj ɨ nyuucari jetze tɨcɨn: “Pata'aj peyan raxe'eva'a ɨ axa'aj tevi patɨj asaɨj ti'axe'eve'e.” 9Ma ajta, tɨ pua'a sacai seyan ruxa'aj sana'a tihua'useijra ɨ tyaɨte, ayaa xu seri autyajturaa ɨ Dioj jemi. Ajta aɨn ɨ nyuucari tɨ cɨn Dioj ti'ijta, ayaa pu ari ayan ama'uxɨjte aɨjna cɨme'e saj cai ra'aste saɨjna ɨ nyuucari. 10Ayaa pu'u na'a a'ini tɨ pua'a a'atɨ ayan nain cɨn tya'ara'aste aɨjna ɨ nyuucari maj cɨn ti'ijta, ajta tɨ pua'a ayan seij cɨn autyaturan ɨ nyuucari jemi, ayaa mu ra'axɨjte'e tɨ nain cɨn autyajturaa, 11A'ini aɨn tɨ ayan raataxajtaca'a tɨcɨn: “Capej ti'ixana'acɨra'a”, aɨ pu ajta ayan raataxajtaca'a tɨcɨn: “Capej ti'ityacui'ica.” Aɨj pu cɨn, tɨ pua'a peyan cai tyu'uxana'acɨre, ma pajta peyan xaa tyu'ujé'ica, aɨj paj cɨn peri autyajturaa aɨjna jemi ɨ nyuucari ɨ maj cɨn ti'ijta. 12Aɨj pu cɨn, sata'aj seyan ti'ixajta, sajta seyan rɨ'ɨ ti'ityujcha'ɨ a'ij tɨ tiraavijte'e aɨjna cɨme'e tɨ Dioj ayan aɨjna cɨn amuá'axɨjte'en aɨjna jemi ɨ nyuucari tɨ cɨn amue'irajtuaani. 13Ee xaa nya'u, tɨ pua'a a'atɨ cai ayan hua'acu'uve ɨ ruxa'aj tyaɨte, capu Dioj ayan rá'ancu'uvajxɨ'ɨsin ajna xɨcajra'an tɨ jetzen titya'axɨjte'en. Na'ari cai, tɨ pua'a a'atɨ ayan hua'acu'uve ɨ ruxa'aj tyaɨte, Dioj pu rɨ'ɨ tiraata'asin ajna xɨcajra'an jetze. 14Ne'ihuaamua'a, ¿a'ini ti'itɨ cɨn tiratyava'ɨri seij ɨ a'atɨ tɨ pua'a ayan na'a ti'ixajta yee tɨ tya'atzaahuate'e, ajta cai ayan ti'itɨ cɨn rɨjca ɨ maj cɨn raamua'aree tɨ ayan ti'ayajna tɨ aɨn a'atɨ tya'atzaahuate'e? ¿Ni rɨ'ɨri tɨ aɨn ayan ru'irajtuaani tɨ ayan na'a tya'atzaahuate'e? Capu xaa nya'u. 15- 16Tiche'e teyan tiraataxaj yee tɨ a'atɨ ayan huarɨni tɨ a'amua jetze ajtyama'acan. Capu amɨn a'ij, tɨ pua'a tyaata'a pɨrɨcɨ na'ari jɨita'a. Aɨ pu ayan cai ti'itéechan, ajta cai ti'itɨ ticha'ɨ tɨ raacua'ani tɨj na'a sei xɨcaj jetze. Ajta aɨn a'atɨ ayan a'iré'enyen seij jemi tɨ ajta muejmi jetze ajtyama'acan. Aj pu i ayan tiraata'ixaate'en aɨjna tɨ tira'aturaate'e. Ajta aɨjna ɨ a'atɨ, ayaa na'a tiraata'ixaate'en yee “Aricu, che'e rɨ'ɨ mu'u timuajá'avaɨra'a.” Ajta cai ti'itɨ raata'an tɨ cɨn huataujvaɨre'en. ¿A'ini na'aqui te'eme aɨjna jemi tɨ cai ti'itɨ tihua'uta'a, aɨjna ɨ a'atɨ tɨ ayaa na'a tya'atzaahuate'e? ¿Ni qui tyamua'a naa? Capu a'atzu xaa nya'u. 17Aɨj pu cɨn, tɨ pua'a a'atɨ ayaa na'a tya'atzaahuatya'a, ajta cai ti'itɨ cɨn ayan rɨcɨ tɨ cɨn raataseijrate'esin yee ayej ti'ayajna tɨ aɨn a'atɨ tya'atzaahuate'e, capu a'atzu a'ij ti'ityava'ɨri. 18Ma ajta, a'atɨ pu ayan tyu'utaxajta tɨcɨn: “Seij pu ayaa na'a tya'atzaahuate'e, ajta ɨ saɨj, aɨ pu ayan ti'itɨ cɨn tɨ xa'apɨ'ɨn een rɨcɨ.” Me nyajta inyaa, ayaa nu ti'imue'ixaate'e yee pata'aj naataseijrate'en ɨ paj cɨn tya'atzaahuate'e pacai peyan ti'itɨ tɨ xa'apɨ'ɨn een cɨn tí'iruuraa. Me nyajta inyaa, ayaa nu timuaataseijrate'esin tɨ ayan ti'ayajna nyaj tya'atzaahuate'e nyaɨjna cɨme'e ɨ nyaj ti'itɨ cɨn neyan rɨcɨ tɨ xa'apɨ'ɨn een. 19Ayaa papu'u tya'atzaahuate'e tɨ saɨj na'a pueen ɨ Dioj. Xa'apɨ'ɨn paj rɨcɨ. Ayaa mu che'eta mana'a tya'atzaahuate'e aɨme ɨ tiyaaru'use, majta ruvive. 20Mɨ paj cai rɨ'ɨ metyáumua'aree, ¿ni tzaa peyan raxe'eve'e nyej neyan tyamua'a naa timuaataseijrate'en tɨ cai ti'itɨ a'ij ti'ityava'ɨri tɨ pua'a a'atɨ ayaa na'a tya'atzaahuate'e, ajta cai ti'itɨ cɨn ayan rɨcɨ tɨ xa'apɨ'ɨn een? 21Aɨjna ɨ taya'upuacɨ'ɨ aɨjna ɨ Abraham tyaacan, urare'enya'acan pu cɨn huatyajturaa ɨ Dioj jemi aɨjna cɨme'e tɨ raatamuaɨ'ɨvajtaca'a ɨ ruyauj ɨ tetej japua, aɨjna ɨ Isaac. ¿Ni cai ayan ti'ayajna? Ee xaa nya'u. 22Aɨj pu cɨn ayaa tu ramua'aree tɨ aɨjna a'ij tɨ huarɨj, ayaa pu jamuan ti'ityava'ɨri aɨjna tɨ ajta tya'atzaahuate'e. Ajta, ayaa pu raanaijmi'ire tɨ tya'atzaahuatya'acaa aɨjna ɨ Abraham aɨjna cɨme'e a'ij tɨ huarɨj. 23Tɨ'ɨqui ayan arauraste aɨjna tɨ ayan te'eyu'usi'i ɨ yu'uxari jetze tɨcɨn: “Abraham pu rá'antzaahua aɨjna ɨ Dioj, ajta ayaa pu tiraaxa'apɨ'ɨntari'iri'i tɨ aɨn ayan urare'enya'acan cɨn huatyajturaa ɨ Dioj jemi.” Matɨ'ɨj mi meyan raatamuá'a tɨcɨn: “Tɨ amiincura'an pueen ɨ Dioj.” 24Aɨj pu cɨn, ayaa pu amiteere'e tɨ saɨj ayan urare'enya'acan cɨn huatyaturaasin ɨ Dioj jemi aɨjna cɨme'e a'ij tɨ ajta rɨcɨ, capu aɨ na'a cɨn tɨ tya'atzaahuate'e. 25Ayaa pu che'eta na'a tiraaruu aɨjna ɨ Rahab tyaacan, aɨjna ɨ jɨita'a tɨ ramue'itɨcɨjca ɨ tumin ɨ rutevi cɨme'e. Tɨ'ɨj aɨn ayan rɨ'ɨ hua'ancure'evi'itɨ aɨme ɨ mej re'eeva'acaa, aj pu'i seij jetze ɨ juye hua'utaityaca'a. Tɨ'ɨj ayan aɨjna cɨn huarɨj, aj pu'i ayan urare'enya'acan cɨn huatyajturaa ɨ Dioj jemi. 26A'ini capu rɨ'ɨri tɨ a'atɨ ruuri a'ara'ani tɨ pua'a cai uráxaijnyu'uca, ayaa pu che'eta na'a cai ti'itɨj vaɨre'e tɨ pua'a a'atɨ ayaa na'a tya'atzaahuate'e, ajta cai ti'itɨ a'ij ruura tɨ xa'apɨ'ɨn een.

will be added

X\