Santiago 1

1Inyaa Santiago, i nyaj ti'ivaɨre'e ɨ Dioj jemi, nyajta nyaɨjna ɨ tavastara'a jemi, aɨjna ɨ Jesús tɨ ajta Cɨriistu'u pueen, ayaa nu nyeijna jetze tyaja'amuataujte'e, mɨ saj hua'a jetze ajtyama'acan aɨme ɨ tyaɨtejra'a ɨ maj hua'a jetze a'iraujneijte aɨme ɨ hua'avaujsimua'acɨ'ɨ ɨ maj tamuaamuata'a japuan hua'apua ara'ase, sajta mɨ tɨ Dioj amuaare'itixɨ a'u tɨ na'a seij chuejra'a japua. 2Tɨ pua'a ayan tyajamuaacɨ'ɨti tɨj na'a aɨjna ɨ saj cɨn á'aviicue'ire'e, sata'aj seyan tyu'umua'ati tɨ xa'apɨ'ɨn een, sata'aj sajta saɨjna cɨn huataujtyamua'ave'en. 3Ayaa xu huarɨni, a'ini xu'uri ramua'aree tɨ pua'a ayan aɨjna cɨn amuaaruuren tɨ ij Dioj ayan amuaateeseij tɨ pua'a seyan ra'astijre'e nusu sacai, aɨ pu ajta ayan á'amuaruuren sej si tya'utaviicue'i. 4Sata'aj sajta seyan rɨ'ɨ raaruuren sej si nain cɨn tya'utaviicue'i, a'ini satɨ'ɨj seyan saɨjna cɨn huarɨn, ayaa xu nain cɨn araurastejsin ɨ Dioj jemi, sajta seyan runaijmi'ire'en. Capu ti'itɨ tyajamua'utyáturaate'esin. 5Tɨ pua'a ra'aturaate'e seij tɨ ij naa tiru'umua'areera a'ij tɨ ye'i huarɨni, che'e aɨn ayan raatahuavii ɨ Dioj. Ajta aɨn Dioj, ayaa pu aɨjna cɨn raata'asin, a'ini aɨ pu ruxé'evi'ira'a cɨn eihua huapɨ'ɨ tihua'ata'aca ɨ rutyaɨtestyamua'a. Ajta, aɨ pu cai hua'ajtya'axɨ'ɨsin. 6Ma ajta, che'e aɨn ɨ a'atɨ ayan aɨjna tiraatahuavii aɨjna cɨme'e tɨ ayan ti'ayajna tɨ xaa tya'atzaahuate'e icu. Che'e aɨn cai a'ij me'e tyejé'eti'itɨɨtan, a'ini aɨjna ɨ a'atɨ tɨ xaa a'ij pu pua'a na'a tira'amitejte'e, ayaa pu che'eta na'a een tɨj ajta een ɨ jaj tɨ aujruuréjvee ɨ aaca cɨme'e. 7- 8Capu a'atzu xa'apɨ'ɨn metyáumua'aree aɨjna ɨ a'atɨ aɨjna cɨme'e tɨ hua'apuaca cɨn á'ujca'anye tɨ ij ayan huarɨni. Capu a'atzu ayan tira'amitejte'e a'ij tɨ huarɨni ti'itɨj cɨme'e. Ajta a'atɨ tɨ ayan een, capu a'atzu ra'ancura'asin ɨ tavastara'a jemi. 9Ajta aɨn ɨ ta'ihuaara'a tɨ cai a'ij ti'ijviicue'i, che'e aɨn aɨjna cɨn huataujtyamua'ave'en aɨjna cɨme'e tɨ Dioj ayan eihua huapɨ'ɨ rɨ'ɨ tiraata'asin. 10Ajta aɨn ɨ ta'ihuaara'a tɨ ajta chijtyaani pueen, che'e aɨn ayan rɨ'ɨ tirata'acare'en ɨ Dioj aɨjna cɨme'e tɨ ayan tiraacɨ'ɨti aɨjna tɨ raatatyevi'iraste'esin. Aɨ pu xaa ayan che'eta na'a tyu'utyapua'ari tɨj ajta aɨjna ɨ xuuxu'u tɨ tu'upi jetze xuta'a. 11Ee xaa, tɨ'ɨj u e'ijnyen ɨ xɨcaj, aɨ pu'i aɨn tu'upi ayan huatyáhuasin ɨ xɨcaj cɨme'e. Ajta aɨn xuuxu'ura'an, aɨ pu cávatzɨjsin. Ayaa pu'i tyu'utyapua'ari ɨ tɨ cɨn naa seijra'acaa. Ayaa pu che'eta na'a ti'ijruuren aɨjna ɨ chijtyaani. Aɨ pu á'apua'aren nain cɨme'e tɨ eihua huapɨ'ɨ tí'ijchaɨca'a. 12Rɨ'ɨ pu tirata'aca aɨjna ɨ a'atɨ tɨ pua'a ayan ra'aviicue'i aɨjna tɨ ca'anijra'a rata'aca tɨ ayan huarɨni tɨ a'ij pua'a een ɨ Dioj jemi, a'ini tɨ'ɨj ari ayan tya'utaviicue'i aɨjna tɨ cɨn raatamuáre'eristen, Dioj pu ayan tiraata'asin aɨjna tɨ ayan raamue'itɨ, tɨ ayan ruurican huatyaturan a'u tɨ Dioj e'eseijre'e tɨj na'a rusen cɨme'e. Ayaa pu aɨjna cɨn tya'ataujratziiri'i ɨ Dioj tɨ ayan hua'uta'asin naijmi'ica aɨme ɨ maj meyan raxe'eve'e maɨjna ɨ Dioj. 13Tɨ pua'a ayan ca'anijra'a tirata'aca seij ɨ a'atɨ tɨ ayan raaruuren aɨjna tɨ a'ij pua'a een ɨ Dioj jemi, che'e cai aɨn ayan tyu'utaxaj yee Dioj pu ayan ca'anijra'a rata'aca tɨ'ij ayan huarɨni a'ini capu rɨ'ɨri tɨ Dioj ayan ca'anijra'a raata'an tɨ i aɨn a'atɨ ayan a'ij pua'a huarɨni. Ee xaa nya'u, capu ajta a'atzu rɨ'ɨri tɨ a'atɨ ayan ca'anijra'a raata'an ɨ Dioj tɨ'ij aɨn Dioj ayan huarɨni aɨjna tɨ a'ij pua'a een. Ajta aɨn ɨ Dioj, capu a'anaj ayan ca'anijra'a tirata'aca ɨ a'atɨ tɨ'ij aɨn a'atɨ ayan huarɨni aɨjna tɨ a'ij pua'a een. 14Ma ajta, tɨ pua'a ayan ca'anijra'a raata'an ɨ a'atɨ tɨ ayan huarɨni aɨjna tɨ a'ij pua'a een ɨ Dioj jemi, ayaa pu xaa aɨjna jetze á'ujca'anye aɨjna jetze ɨ ruxé'evi'ira'a tɨ jetzen a'iráninyei ɨ rutzajta'a. Aɨ pu aɨjna cɨn á'ujca'anye tɨ ayan tira'amitejtya'a tɨ naa seijre'e aɨjna ɨ ti'itɨ tɨ a'ij pua'a een. 15Cɨme'en pu'u ayan raaxa'apɨ'ɨntare tɨ ayan huarɨni, aj pu'i ayan autyaturaasin ɨ Dioj jemi. Ajta, tɨ pua'a ari huataujnaijmi'ire'en aɨjna tɨ a'ij pua'a een ɨ Dioj jemi, aj pu'i mɨ'ɨni aɨjna ɨ a'atɨ tɨ a'uta'ɨtzee ɨ Dioj jemi. 16Ne'ihuaamua'a, mɨ nyaj eihua huapɨ'ɨ a'amuaxe'eve'e, caxu huataura'an tɨ a'atɨ ti'itɨ cɨn amuaacuanamuan. 17Tɨj na'a tɨ xa'apɨ'ɨn een, tɨ ajta cai ti'itɨ cɨn a'atura tɨ ayan rɨ'ɨ tyajamuaacɨ'ɨti a'anaj tɨ na'a, au pu e'ema'acan u tajapua, aɨjna jemi ɨ tej rajya'upua, aɨjna tɨ nain tyu'utaahuaca'a aɨjna tɨ ayan ti'itatzave'e tɨ ute'e e'eseijre'e. Ma ajta, aɨjna jemi, a'anaj tɨ na'a pu ayan che'eta na'a ti'iseijre'e itejmi jemi. Capu a'atzu saɨque ruruurajca, capu ajta ayan raaruurejsin tɨ'ij ayan huatyatɨca'are itejmi jemi. 18Ruxe'evi'ira'a pu cɨn, ayan taata'a tej teyan huataseijre'en ɨ chaanaca japua aɨjna cɨme'e tɨ tejmi jemi raatyajtuaa ɨ runyuuca tɨ tzaahuati'ira'a cɨn seijre'e. Ayaa pu een cɨn huarɨj tej ti teyan che'eta tyana'a eenye'eque'en seijra'a tya'ara'ani tɨj ajta aɨjna tɨ anacaican cɨn huataseijre ɨ ilooti ɨ maj majta ratatú'irihua'a mua'aye'i ɨ Dioj jemi. 19- 20Aɨj pu cɨn, sata'aj seyan raamua'aree a'ij sej ye'i huarɨni, ne'ihuaamua'a, mɨ nyaj ja'amuaxe'eve'e. Rɨ'ɨ xu'u sej si raanamua tyamua'a naa. Ma sajta, caxu ca'anacan tihua'uta'ixaate'esin ɨ tyaɨte. Caxu sajta ca'anacan huatanínyu'ucacu, a'ini capu rɨ'ɨri tɨ a'atɨ ayan raaruuren aɨjna tɨ xa'apɨ'ɨn een ɨ Dioj jemi tɨ pua'a ayan nyu'ucamɨ'ɨ cɨn ti'ityujcha'ɨ. 21Aɨj pu cɨn, sata'aj seyan raatapua'ajta nain cɨme'e tɨ a'ij pua'a een, tɨ ajta xana'avisi'i seijre'e. Ma sajta muan, sata'aj seyan ruxaamɨstya'a ra'ancura'an saɨjna ɨ nyuucari tɨ muejmi jemi huatyatuiihuaca'a, tɨ ajta cɨn Dioj ayan raayɨ'ɨtɨ tɨ amue'irajtuaani. 22Sajta muan, caxu seyan sana'a ranamuajra a'ij tɨ ti'ixa ɨ nyuucari silu sajta seyan huarɨni a'ij tɨ tyaja'amue'itii. Na'ari cai, ayaa xu rucuanamuáa xa'aju'un rujɨɨmua'a sana'a. 23Ayaa pu een aɨjna ɨ a'atɨ tɨ cai ayan rɨcɨ a'ij tɨ ti'ixa ɨ nyuucari silu ayaa na'a rusaɨj ranamuajra. Ayaa pu een tɨj aɨjna ɨ a'atɨ tɨ ruqueenima'a seij ɨ astya'ahua jetze. 24Cɨme'en pu'u ruseij, aj pu i tichesin ajta e'iyan yá'uhua'axɨjsin a'ij tɨ seijra'acaa ɨ queenima'ara'an. 25Ajta aɨn tɨ tyamua'a naa tira'aseij aɨjna ɨ nyuucari tɨ cɨn Dioj ti'ijta, tɨ ajta cai ti'itɨ cɨn a'atura, tɨ ajta Dioj cɨn ru'irajtuaani, ayaa pu Dioj rɨ'ɨ tiraata'asin tɨ pua'a aɨn pueenya'a a'ame saɨj tɨ ayan rɨ'ɨ ti'ityujcha'ɨ a'ij tɨ aɨn nyuucari ti'ixa. Na'ari cai tɨ pua'a ayan pueenya'a a'ame saɨj tɨ ayaa na'a ranamuajra, ajta ca'anacan yá'uhua'axɨn, capu re'enye'en huatyaturan ɨ Dioj jemi. 26Tɨ pua'a a'atɨ ayan tyu'ujxajta ɨ rutzajta'a yee tɨ tyamua'a naa tira'astijre'e ɨ ruye'ira, ajta tɨ pua'a aɨn a'atɨ cai raatapua'ajta tɨ a'ij pua'a tihua'axajta ɨ ruxa'a tyaɨte, aɨ pu ayan rucuanamua ɨ rutzajta'a. Capu ti'itɨ vaɨre'e aɨjna ɨ ye'irajra'an aɨjna ɨ a'atɨ. 27Ayaa mu rɨcɨ aɨme ɨ mej meyan ra'ara'astijre'e ɨ ye'ira tɨ re'enye'en cɨn seijre'e ɨ Dioj jemi, tɨ ajta cai ti'itɨj cɨn a'atura jemin ɨ tyaj rajya'upua. Miche'e ayaa mana'a rɨjca: mej mi meyan hua'umuaare aɨme ɨ mej ti'itɨ cɨn rajpueijtzi maɨjna cɨme'e ɨ maj xa'ajcanta mua'araa nusu maj antyujsaɨjtaraca'a; mej mi majta ahuaujcu'uven mej mi cai huataujxana'acɨre'en aɨme jamuan ɨ mej chaanaca japua huachaatɨme.

will be added

X\