Hebreos 9

1Ajta cɨme'en ɨ nyuucari tɨ anacai aɨme jemi raatyajtuaa, ayaa pu jetzen te'eyu'usi'ihuaca'a a'ij mej ye'i huarɨni mej mi rana'amiche'en ɨ Dioj, ajta a'ij tɨ eenya'a seira'a a'ame aɨjna ɨ ɨnaamua. 2Ajta aɨn ɨ ɨnaamua, hua'apua pu cɨn ájtaavijhuaca'a ɨ maj tzajta'an te'irá'a ɨ maj cɨn ti'ina'amicha'a. Ajta tzajta'an ɨ tɨ a jeijre'e ájtaavijhuaca'a, au pu a'utyaavaaca'a aɨjna tɨ antitátzajmee, ajta aɨjna ɨ meesa tɨ ajta japuan e'etyá'a aɨjna ɨ pan tɨ Dioj jemi huatyatuiihuaca'a. Ayaa pu tyaja'arajtyahuaa tɨ nu'u “ajna a'u tɨ Dioj huataura'ate”. 3Ajta, huarita'an aɨjna cɨɨxuri tɨ e'ita'a a'acáavɨj tɨ hua'apua, au pu seij a'utyavaaca'a ɨ ɨnaamua. Ayaa mu tya'atamua'amua tɨcɨn “Aɨjna tɨ Dioj huapɨ'ɨ huataura'ate.” 4Au pu tzajta'an seijra'acaa aɨjna tɨ ooro cɨn taavijhuaca'a, maj majta japuan ti'imuaɨ'ɨvajtacara'a cɨtzive'eri cɨme'e. Au mu majta ru'utyajtua aɨjna ɨ chi'ira'an tɨ ooro cɨn nain japua cámeijri'ihuaca'a, tɨ ajta uramuaaca'a aɨjna tetej tɨ jetzen te'eyu'usi'ihuaca'a aɨjna ɨ nyuucari tɨ cɨn Dioj anacai tya'ataujratziiri'i. Au pu ajta huiiracatii aɨjna ɨ xa'ari tɨ ooro cɨn taavijhuaca'a, tɨ ajta tzajta'an uramuaanica'a aɨjna ɨ cue'ira, aɨjna ɨ mej meyan ratamua'amua tɨcɨn maná. Au pu ajta huiiraca'atii aɨjna ɨ Aarón itzɨj tɨ jetzen tya'ajtanyajxɨ. 5Majta aɨme ɨ maj tajapua ti'ivaɨre'e, ɨ maj majta huapɨ'ɨ naa seijre'e, au mu japuan utyi'uuca'a aɨme ɨ maj hua'apua. Aɨ mu ru'anaj cɨn ra'ava'anajca'a aujna a'u tɨ Dioj tihua'utauuni'iracara'a. A'ini ti'imui'i ɨ mej maun te'irá'a, capu cɨ'ɨpe tej ijii tyu'utaxaj saxuijme'en nain tɨj na'a. 6Matɨ'ɨj meri nain rɨ'ɨ tyu'uruu, a'anaj tɨ na'a mu maun a'utyaru'ipicha'a tzajta'an ɨ tɨ anajca ɨ ɨnaamua aɨme ɨ maj va'acan cɨn ti'ivaɨra'acaa ɨ Dioj jemi mej mi meyan huarɨni a'ij mej maɨjna cɨn tite'entyujmua'aree a'ij tɨ tyu'ujxe'eve'e. 7Ajta ɨ seij jetze ɨ ɨnaamua, seij pu'u aun a'utyaru'ipi tɨj na'a sei ninye'ira'a cɨme'e. Aɨ pu aɨn pueenya'a aɨjna tɨ eitze'e va'acan cɨn ti'ivaɨra'acaa ɨ Dioj jemi. Ajta aɨjna huajajsima'a aɨjna ɨ xuure'e tɨ cɨn tyu'utamuaɨ'ɨvajta ɨ rucɨme'en ɨ tɨ cɨn autyajturaa ɨ Dioj jemi, ajta aɨme cɨme'en ɨ tyaɨte, ɨ maj cɨn Dioj jemi autyajturaa. 8Ajta aɨn ɨ xaijnyu'ucara'ara'an ɨ Dioj, ayaa pu cɨme'en ti'ita'ixaate'e tɨ ayan huataujmua'a tɨ cai xɨ tya'antacuuni'i tej ti tyaun a'utyarute ajna tɨ eihua huapɨ'ɨ huataura'ate ɨ Dioj tɨ pua'a auj aun a'utyavaaca aɨjna ɨ ɨnaamua tɨ a eijre'e e'eseijre'e. 9Ajta aɨn tɨ a eijre'e e'eseijre'e, ayaa pu huataujmua'a ɨ hua'aye'ira ɨ maj ijii huatyaɨte. Ayaa mu ti'ijrɨ'ɨre aɨme ɨ mej meyan aráurasten maɨjna ɨ ye'ira. Aɨ mu ti'itatu'ire ɨ Dioj jemi ti'itɨ tɨ na'a maj ti'ipueijve'e, majta ɨ maj raatamuaɨ'ɨvajta. Ma ajta, tɨj na'a tɨ ayan een ɨ maj raatamuaɨ'ɨvajta, capu aɨn pueen ɨ tɨ xaa raanaijmi'ire'en ɨ mua'atziira'ara'an aɨjna tɨ rana'amiche ɨ Dioj. 10Capu xaa nya'u, a'ini ayaa pu'u aɨjna cɨn ti'ivaɨre'e ɨ maj racua'aca nusu maj raya'aca na'ari ɨ maj cɨn huatyaɨ'ɨhuaxɨ'ɨn, naijmi'i tɨj na'a pu aɨn pueen ɨ maj mana'a cɨn ti'ijta a'ij tɨ huarɨni ɨ rucɨme'en. Ayaa pu ti'ihuaujxa'apɨ'ɨntare mej meyan rɨcɨ asta na'a cai Dioj ayan raanaijmi'ire'en tɨj na'a tɨ ti'iseijre'e. 11Ajta ijii, Cɨriistu'u pu ayan huataseijre itejmi jemi a'ini aɨ pu va'acan cɨn ti'itejvee ɨ Dioj jemi tɨ ij ayan aɨjna cɨn rɨ'ɨ titaata'an tɨj na'a tɨ i'ixa'apɨ'ɨn een tɨ auj ayan tyaja'ure'enyejsin. Au pu e'ita'a a'utyajrupi ɨ ɨnaamua jete tɨ eitze'e ti'ivaɨre'e, tɨ ajta eihua eitze'e huataujnaijmi'ire, a'ini capu ayan ájtaavijhuaca'a muajca'a cɨme'e. 12Seij pu'u aun a'utyajrupi aujna tɨ Dioj ayan huataura'ate. Ajta, capu aɨn huajajsima'a aun a'utyajrupi ɨ hua'axuure'e aɨme ɨ caurasi nusu aɨme ɨ visaaru'utzi, silu ruxuure'e pu cɨn aun a'utyajrupi tɨ ij raatahuauni tɨ tyu'utanajchita hua'a jetze ma'acan ɨ tyaɨte tɨj na'a rusen cɨme'e ɨ maj cɨn autyajturaa ɨ Dioj jemi. 13Ee xaa nya'u, cɨj pu caj ti'ivaɨra'acaa mej meyan hua'aruuren aɨme ɨ maj ti'itɨj cɨn autyajturaa ɨ Dioj jemi, maj meyan hua'utyaɨɨraxɨ'ɨn maɨjna cɨme'e ɨ hua'axuure'e ɨ caurasi, ajta ɨ hua'axuure'e ɨ tuuru'use. Majta mu cɨn hua'acavivaaraca ɨ nasijra'an ɨ visaaru'u tɨ huáàcaj ɨ maj raatyaatai. 14Aɨj pu cɨn eihua huapɨ'ɨ eitze'e jamuaatyaɨɨraxɨ'ɨn ɨ a'amua mua'atziira'a jetze aɨjna cɨme'e ɨ xuure'e tɨ Cɨriistu'u ra'iraaxɨre. Ajta, aɨjna jetze ɨ xaijnyu'ucara'ara'an ɨ Dioj tɨ rusen cɨn seijre'e, aɨj pu jetze huatyaujca'anyajca'a tɨ ij ayan cai ti'itɨ cɨn a'aturaa tɨ'ɨj huataujmuaɨ'ɨvajtaca'a ɨ Dioj jemi. Ayaa pu een cɨn huarɨj sej si seyan raatapua'ajta sej ra'astijre'e saɨjna ɨ ye'ira tɨ cai che'e ti'itɨj vaɨre'e, sej si tyu'utyavaɨre'en saɨjna jemi ɨ Dioj tɨ i'iruuri. 15Aɨj pu cɨn, aɨ pu aɨn pueen tɨ ayan tiraaxa'apɨ'ɨntare tɨ Dioj jajcuacan cɨn tya'ataujratziira hua'a jemi tɨ hua'utajée mej mi meyan ra'ancura'an aɨjna tɨ tihua'acɨ'ɨti tɨj na'a rusen cɨme'e a'ij tɨ Dioj tya'ataujratziiri'i. Ayaa pu te'eme, a'ini Cɨriistu'u pu huamɨ'ɨ aɨjna cɨme'e tɨ ij huá'ari'i ɨ maj cɨn autyajturaa ɨ Dioj jemi matɨ'ɨj mauj ra'astijra'acaa maɨjna ɨ nyuucari ɨ tɨ anacai cɨn tya'ataujratziiri'i ɨ Dioj. 16Ayaa pu ti'en, tɨ pua'a ayan seijra'a ɨ papee tɨ jetzen te'eyu'usi'i tɨ nu'u ayan tiraacɨ'ɨti seij ɨ a'atɨ, anacaican pu ayan ruxe'eve'e tɨ aɨjna ɨ ja'atɨ huamɨ'ɨni tɨ ayan papee cɨn tya'ataujratziiri'i. 17Ee xaa nya'u, aj pu xaa ayan ti'ivaɨre'e aɨjna ɨ papee tɨ pua'a ayan huamɨ'ɨni aɨjna ɨ ja'atɨ tɨ aɨjna cɨn tya'ataujratziiri'i. Ajta, tɨ pua'a auj ruuri aɨjna ɨ a'atɨ, capu a'atzu tiratyava'ɨri ɨ saɨj aɨjna ɨ papee tɨ ayan tiraacɨ'ɨti. 18Aɨj pu cɨn, ayaa pu ajta ayan ruxe'eva'acaa tɨ aɨn nyuucari tɨ anacaican cɨn tya'ataujratziiri'i ɨ Dioj, aɨ pu ajta aɨjna cɨn ti'ihuaujxa'apɨ'ɨntari'iri'i aɨjna cɨme'e tɨ ti'itɨ ruxuure'e airáaxɨre. 19Tɨ'ɨj aɨn Moisés tyaacan ayan tihua'utanamuajriste naijmi'ica ɨ tyaɨte tɨj na'a tɨ ayan te'eyu'usi'ihuaca'a jetzen ɨ nyuucari ɨ maj cɨn ti'ijta, aɨ pu tírajnájchi aɨjna ɨ hua'axuure'e ɨ visaaru'u, ajta jamuan ɨ hua'axuure'e ɨ caurasi aɨjna ɨ jaj jamuan, ajta jamuan aɨjna ɨ muxa tɨ pa'u, ajta jamuan aɨjna ɨ hisopo pi'ista. Aj pu ij, aɨjna cɨn, ayan raatyátzutijraxɨ ɨ yu'uxari tɨ íri'i, ajta hua'utyatzutijraxɨ naijmi'ica ɨ tyaɨte. 20Ayaa pu aɨjna cɨn huarɨj, aj pu'i ayan tihua'uta'ixaa tɨcɨn: “Ai pu aɨn pueen ɨ xuure'e tɨ cɨn ayan tyu'uxa'apɨ'ɨntari'ihuaca'a aɨjna ɨ nyuucari tɨ cɨn Dioj ayan tya'ataujratziiri'i muejmi jemi. Ayaa nu nyaɨjna cɨn huarɨj a'ij tɨ aɨn titaataij.” 21Ajta aɨn Moisés tyaacan, ayan che'eta na'a xuure'e cɨn raatyátzutijraxɨ aɨjna ɨ ɨnaamua, ajta tɨj na'a ti'ipua'amua ɨ xa'ari, ajta ɨ tuxa'a ɨ maj cɨn ti'iva'ɨri aujna ɨnaamua jete. 22Ee xaa nya'u, ayan ti'ayajna. Cɨme'en ɨ aɨjna ɨ nyuucari ɨ maj cɨn ti'ijta, tɨmua'a mu tɨn nain huatyaɨɨraxɨ xuure'e cɨme'e. Ajta, tɨ pua'a cai ti'itɨ ra'iraxɨre'en ɨ ruxuure'e, capu a'ij ti'irɨ'ɨri tɨ ayan tihua'utauuni'i ɨ tyaɨte ɨ maj cɨn autyajturaa ɨ Dioj jemi. 23Aɨj pu cɨn ayan ruxe'eva'acaa mej meyan raatyaɨɨraxɨ'ɨn tɨj na'a tɨ ayan seijra'acaa tɨj queenima'ara'an pueen aɨjna tɨ ute'e e'eseijre'e. Ajta ayan ruxe'eva'acaa tɨ a'atɨ ayan raatyaɨɨraxɨ'ɨn aɨjna tɨ ute'e e'eseijre'e aɨjna cɨme'e ɨ muaɨ'ɨvejri tɨ eitze'e re'en cai ɨ maj cɨn meyan ti'ijrɨ'ɨre iiyan chaanaca japua. 24Ajta aɨn Cɨriistu'u, capu aun a'utyajrupi ɨnaamua jete tɨ muajca'a cɨn ájtaavijhuaca'a, tɨ ajta ayan een tɨj queenima'ara'an aɨjna tɨ ute'e e'eseijre'e, silu au pu u tajapua a'utyajrupi ɨ Dioj jemi ta jetze ma'acan. 25Ajta, capu aun a'utyajrupi tɨ ij mui'itɨ huataujmuaɨ'ɨvajta tɨj ajta aɨn tɨ va'acan cɨn ti'ivaɨre'e iiyan chaanaca japua. Ayaa pu tɨj na'a seij ninye'ira'a jetze aɨ pu utyaru'ipi ajna tɨ Dioj huataura'ate tɨ ij raatyátzutijraxɨ'ɨn xuure'e cɨme'e tɨ aɨn rusaɨj cai ra'iraaxɨre, silu seij pu'u aun a'utyajrupi aɨjna ɨ Cɨriistu'u. 26Na'ari cai, ayaa pu ruxe'eva'a a'ame'enche'e tɨ aɨn mui'itɨ rajpueitzi a'ame'enche'e tɨj na'a tɨ huataseijre ɨ chaanaca tyaj japuan yan seijre'e. Ma ajta, ayaa pu xaa nya'u ti'ayajna tɨ aɨn seij na'a ayan huataseijre ijii tɨ ari nain te'entipua'ari tɨ ij ra'antipua'arite'en ɨ maj cɨn atya'ɨtza'ara ɨ Dioj jemi. Ayaa pu een cɨn ra'antipua'ari aɨjna tɨ rusaɨj huataujmuaɨ'ɨvajtaca'a. 27- 28Ajta, ayaa pu ti'ihuaujxa'apɨ'ɨntari'iri'i aɨme jemi ɨ tyaɨte tɨ seij na'a ayan tiraacɨ'ɨti ɨ tyaata'a tɨ huamɨ'ɨni, ajta e'eyan Dioj ra'axɨjte'en. Ayaa pu che'eta na'a een tɨ aɨn Cɨriistu'u seij na'a huataujmuaɨ'ɨvajtaca'a hua'a jetze ma'acan ɨ tyaɨte tɨ ij huá'ari'i ɨ maj cɨn mui'itɨ autyajturaa ɨ Dioj jemi. Ajta, aɨ pu ajtahua'a huataseijre'esin hua'a jemi ɨ maj a'ujca'anyaacan cɨn rachu'eve'e. Capu che'e pueijtzi hua'uta'asin aɨjna cɨme'e ɨ maj cɨn a'atura ɨ tyaɨte silu aɨ pu'icu hue'iratuaasin.

will be added

X\