1 Ajta aɨjna ɨ tyaj cɨme'en ti'ixaj, ayaa pu huataujmua'a. Pu'uri seij ayan va'acan cɨn ti'itejvee ɨ Dioj jemi tɨ ayan ta japua nyuuca. Aɨ pu ari aun a'ujyeijxɨ ɨrɨɨta'an a'u tɨ a'acajca aɨjna tɨ huapɨ'ɨ naa seijre'e aujna ute'e. 2 Au pu ti'ivaɨre'e u teyujta'a, aɨjna jetze ɨ ɨnaamua tɨ tzaahuati'ira'a cɨn a'utyejvee a'u tɨ Dioj e'eseijre'e. Capu tevi rá'ajtaahuaca'a silu tavastara'a pu'u. 3 Ayaa pu ti'ijcɨ'ɨcɨpua a'atɨ tɨ na'a tɨ va'acan cɨn ti'itejvee ɨ Dioj jemi tɨ aɨn raatyajtuaani ɨ meesa japua aɨjna tɨ tyu'utapueijve'en, ajta ɨ ti'ityaɨn maj hua'utamuaɨ'ɨvajtaca'a. Aɨj pu cɨn ayan ruxe'eve'e tɨ aɨn Jesús ajta ti'itɨ huatamuaɨ'ɨvajta. 4 Tɨ pua'a aɨn ayan huatyávaacache'en iiyan chaanaca japua, capu a'atzu rɨ'ɨríistanche'e tɨ aɨn ayan va'acan cɨn tyu'utyavaɨre'en ɨ Dioj jemi, a'ini mauche'e mu seica meyan seijre'e ɨ mej meyan maɨjna cɨn ti'imuaɨ'ɨvajtaca ɨ maj cɨn tyu'utapueijve ɨ Dioj jemi, a'ij tɨ te'eyu'usi'i aɨjna jetze ɨ nyuucari ɨ maj cɨn ti'ijta. 5 Majta aɨme, ayaa mu ti'ivaɨre'e aɨjna tɨ ayan seijre'e tɨj queenima'ara'an aɨjna tɨ ute'e e'eseijre'e. Majta, matɨ'ɨj meyan aráurasten ɨ hua'aye'ira, ayaa mu ra'ijchu a'ij tɨ tzaahuati'ira'a cɨn seijre'e ɨ ute'e ɨ Dioj jemi. Aɨj pu cɨn, tɨ'ɨj Moisés tyaacan ayan a'utecheniiche'en tɨ ra'ajtaahua aɨjna ɨ ɨnaamua tɨ Dioj ayan tiraata'itiiri'i, ayaa pu tiraata'ixaa tɨcɨn: “Pata'aj hui peyan nain cɨn huarɨni a'ij nyej timuaataseijrate patɨ'ɨj paun a'utyavaaca'a ɨ jɨri japua.” 6 Ma ajta ijii, Cɨriistu'u pu'uri ayan ra'ancura'a tɨ ayan aɨjna cɨn tyu'utyavaɨre'en aɨjna cɨme'e tɨ eitze'e re'en ɨ Dioj jemi cai aɨjna ɨ maj cɨn ti'ivaɨre'e iiyan chaanaca japua. Ayaa pu che'eta na'a eitze'e re'en aɨjna ɨ nyuucari ɨ tɨ cɨn ta japua huanyúu. Ayaa pu een cɨn eitze'e re'en a'ini eitze'e re'en aɨjna ɨ nyuucari tɨ Dioj ayan raata'a, tɨ ajta jeitze'e re'en aɨjna tɨ tya'ataujratziiri'i tɨ titáacɨ'ɨti. 7 Ajta aɨn nyuucarijra'a ɨ tɨ cɨn anacai Dioj tya'ataujratziiri'i, tɨ pua'a ayan cai ti'itɨj cɨn tya'utyaturaanche'e, capu a'atzu huataujcɨ'ɨpuáache'e tɨ seij ayan huatyauuni ɨ tɨ cɨn Dioj ayan tya'ataujratziira. 8 Ma ajta Dioj, ayaa pu hua'a jetze tya'ujpuá'ari maj cai a'atzu arauraste maɨjna cɨme'e ɨ nyuucari tɨ anacai raatyajtuaa hua'a jemi. Aɨj pu cɨn ayan tyu'utaxajtaca'a tɨcɨn: Ayaa pu ti'ixa ɨ tavastara'a yee ma'acui xaa, nya'u. Pu'uri ajna xɨcajra'a jetze tyaja'ure'enyejsin nyej jetzen jajcuacan cɨn nyuucari tihua'uta'asin ɨ nyaj cɨn tya'atanratziira nyaɨme jemi ɨ mej Israel jetze ajtyama'acan, nyajta hua'a jemi ɨ tyaɨtyejmua'ame'en pueen aɨjna ɨ Judá. 9 Canu neyan che'eta nyana'a eenye'eque'e ɨ nyuucari hua'uta'asin nyatɨj tihua'uta'a aɨme ɨ hua'avaujsimua'acɨ'ɨ, ajna xɨcajra'an nyej jetzen hua'utavaɨ, nyajta hue'iraavi'itɨ aujna u Egipto, a'ini camu a'atee mej meyan huarɨni a'ij nyej nyaɨjna cɨn tihuéijca nyaɨjna jetze ɨ nyuucari nyaj raatyajtuaa aɨme jemi. Ma ajta, capu che'e nyej jetze ruxe'eva'acaa nyaj rɨ'ɨ tihua'uchaɨn. 10 Ai pu aɨn pueen ɨ nyuucari tɨ jajcua ɨ nyaj cɨn tya'atanratziira aɨme jemi ɨ maj Israel jetze ajtyama'acan. Ayaa pu ajta ti'ixa ɨ tavastara'a tɨcɨn: Tɨ'ɨj te'entipua'are ajna xɨcajra'an jetze, ayaa nu ca'anijra'a hua'uta'asin mej mi ra'utamua'aree ɨ rutzajta'a ɨ nyuucari ɨ nyaj cɨn ti'ijta. Ayaa nu raatyatuaasin ɨ nyenyuuca hua'axaijnyu'uca jetze, seij nyajta seij tyamua'a naa. Nyajta nu inyaa hua'a Dioj pueenya'a na'ame. Majta aɨme, aɨ mu nyetyaɨtestyamua'a mua'aju'un. 11 Majta aɨme, camu che'e meyan tihua'utá'itiira ɨ ruxa'a tyaɨte yee sata'aj raamua'ati ɨ tavastara'a. Camu xaa nya'u, a'ini naimi'i mu meyan nyamua'atyaa mua'aju'un, matɨj mana'a pua'amua ɨ tyaɨte, aɨme ɨ maj cɨleenya'a cɨn títyatatí, majta aɨme ɨ maj va'acan cɨn títyatatí. 12 Nyajta inyaa, nyaa nu neyan tihua'utauuni'ira ɨ maj cɨn a'ij pua'a ti'ityújchaɨca'a inyeetzi jemi. Nyajta, canu che'e a'anaj neyan ra'utamua'areera ɨ maj cɨn nyeetzi jemi autyajturaa. 13 Ayaa pu'u na'a, a'ini tavastara'a pu ayan cɨme'en ti'ixaj yee jajcuacan nu cɨn nyuucari huatyatuaasin, ayaa pu een cɨn ajta ayan tiraaxa'apɨ'ɨntare tɨ ari mi'ima'acan aɨjna ɨ nyuucari tɨ anacai hua'a jemi raatyajtuaa. Ajta aɨn tɨ ari mi'ima'acanta a'araa, ajta cai che'e ti'itɨj vaɨre'e, pu'uri tɨn antipua'ari nain cɨme'e.
