Hebreos 7

1- 3Ajta aɨn Melquisedequi, capu tíya'upuajcaa, ajta capu tinaanacaa. Capu ajta amiteere'e a'atɨ tɨ jetzen airaujneijte, capu ajta ayan amiteere'e a'anaj tɨ huanu'eihuaca'a na'ari a'anaj tɨ huamɨ'ɨ. Aɨj pu cɨn, ayaa pu che'eta na'a huaujruu tɨj ajta saɨj tɨ yaujra'an pueen ɨ Dioj. Ajta aɨ pu ayan va'acan cɨn ti'ityavaa a'ame ɨ Dioj jemi tɨj na'a rusen cɨme'e. Ajna'ɨmɨ aɨ pu ajta aɨjna cɨn ti'ityavaaca'a ɨ rey cɨme'e aɨme jemi ɨ maj Salem e'echajca'a, ajta va'acan cɨn ti'ityavaaca'a aɨjna jemi ɨ Dioj tɨ nain cɨn antyujmua'aree. Ajta aɨjna ɨ maj cɨn meyan ratamua'amua tɨcɨn Melquisedequi, ayaa pu huataujmua'a tɨcɨn “Rey tɨ rɨ'ɨ naa ti'ijta”. Ajta aɨjna tɨ rey pueen tɨ Salem e'ema'acan, ayaa pu huataujmua'a tɨcɨn “Rey tɨ rɨ'ɨ tihua'ajcha'ɨ mej mi ruxaahua tí'iteseijra'a”. Aɨ pu ra'antinajchaca'a aɨjna ɨ Abraham tyaacan tɨ'ɨj aun pɨjé'ejve a'u tɨ huaja'ucuii aɨme ɨ reeyejte. Ajta, aɨn Melquisedequi ayan rɨ'ɨ tiraatyajtuaa. Tɨ'ɨqui Abraham ayan raatapueijve tamuaamuata'a pua'amua tɨ aɨjna jetze ajtyama'acantaca'a tɨj na'a tɨ ayan tihua'ari'iri'i. 4Sata'aj seyan saɨjna jetze tyu'umua'ati tɨ huapɨ'ɨ va'acan cɨn ti'ityavaaca'a ɨ Dioj jemi aɨjna tɨ tayaaxúj pueen. Ajta aɨjna ɨ Abraham tyaacan, aɨ pu ayan raatapueijve a'achu cumu tamuaamuata'a pua'amua tɨ aɨjna jetze ajtyama'acantaca'a tɨj na'a tɨ ayan tihua'ari'iri'i. 5Ee xaa nya'u, aɨme ɨ maj Leví jetze airaujneijte ɨ maj majta ti'itɨj cɨn títyatatí ɨ Dioj jemi, ayaa mu tyu'utaijti'ire mej meyan hua'utahuavii ɨ tyaɨte a'achu cumu tamuaamuata'a pua'amua ɨ mej tí'ijcha'ɨ a'ij tɨ te'eyu'usi'i aɨjna jetze ɨ yu'uxari ɨ maj cɨn ti'ijta. Ayaa mu xaa nya'u hua'ahuaviiraca'a ɨ ru'ihuaamua'a. Capu amɨn a'ij tɨ pua'a aɨ mu majta Abraham jetze airaujneijte aɨme ɨ ihuaamua'ame'en. 6Ma ajta amɨn, ɨ tɨ cai hua'a jetze ajtyama'acan, aɨ pu ra'ancura'a aɨjna Abraham jemi a'achu cumu tamuaamuata'a pua'amua. Aɨ pu ajta rɨ'ɨ raatyajtuaa aɨjna ɨ Abraham. Ajta Dioj pu ti'itɨj cɨn tya'ataujratziiri'i aɨjna jemi ɨ Abraham. 7Ajta, naimi'i mu meyan ramua'aree tɨ ayan ti'ayajna tɨ aɨn tɨ eitze'e va'acan cɨn ti'itejvee ayan rɨ'ɨ tirata'aca ɨ Dioj jetze ma'acan aɨjna tɨ cɨleenya'a cɨn ti'itejvee. 8Ajta ayaa pu ti'irɨnyaca iiyan chaanaca japua mej mi meyan ra'ancura'an maɨjna ɨ tamuaamuata'a tɨ pua'amua aɨme ɨ tyaɨte ɨ maj majta cui'ica. Ma ajta, ayaa pu ti'ityaujxajta tɨ ajna'ɨmɨ, aɨ pu ayan ra'ancura'a aɨjna tɨ auj cɨn ruuri. 9- 10Aɨj pu cɨn, rɨ'ɨri tej teyan raataxaj yee aɨ pu Leví ajta ayan tyu'unajchitaca'a a'achu cumu tamuaamuata'a pua'amua aɨjna cɨme'e tɨ auche'e huataseijre'esin aɨjna jetze ɨ ruyaaxu, aɨjna ɨ Abraham tyaacan. Leví pu xaa tyu'unajchitaca'a ajna tɨ'ɨj Melquisedequi ayan ra'antinajchaca'a aɨjna ɨ Abraham tyaacan. 11Ajta, tɨ pua'a rɨ'ɨrístanche'e tɨ hua'unaijmi'ire'en ɨ tyaɨte ɨ Dioj jemi aɨjna cɨme'e mej va'acan cɨn títyatatí aɨme ɨ maj Leví jetze ajtyama'acan, capu a'atzu ruxe'eva'a a'ame'enche'e tɨ seij ayan huataseijre'en tɨ ayan che'eta na'a va'acan cɨn tyu'utyavaɨre'en tɨj ajta tyu'utyavaɨ aɨjna ɨ Melquisedequi, tɨ ajta cai Leví jetze ajtyama'acantaca'a. Capu xaa nya'u ayan ruxe'eva'a a'ame'enche'e a'ini aɨn nyuucari ɨ maj cɨn ti'ijta, aɨ pu ayan huataseijre hua'a jemi ɨ mej Leví jetze ajtyama'acantaca'a. 12Ma ajta xaa, tɨ pua'a ayan ruxe'eve'e maj saɨque huarɨni mej mi hua'antihuauni aɨme ɨ mej tye'entyaruti ɨ Dioj jemi, ayaa pu che'eta na'a ruxe'eve'e maj saɨque raaruuren ɨ nyuucari ɨ maj cɨn tyu'utaijta. 13Ee xaa nya'u ayaa pu ti'ayajna, a'ini aɨjna ɨ tyaj cɨme'en raxaj, seij pu tyaɨtejra'a jetze ajtyama'acan, ajta capuuxɨ a'anaj a'atɨ ayan ti'itɨ cɨn tyu'utyavaɨ ɨ Dioj jemi, tɨ ajta aɨjna tyaɨtejra'a jetze ajtyama'acan. 14Ee sein, aɨn tavastara'a ayan Judá jetze airaujneijte. Ajta aɨn Moisés tyaacan capu a'anaj ti'itɨ huataxajtaca'a aɨjna cɨme'en ɨ tyaɨtejra'a, tɨ hua'a jetze huataseijre'enche'e aɨme ɨ maj va'acan cɨn ti'ityavaa mua'aju'unche'e ɨ Dioj jemi. 15Ee xaa, ayaa pu ti'ayajna xaa nya'u, tɨ seij ayan huataseijre tɨ ayan che'eta na'a va'acan cɨn ti'itejvee ɨ Dioj jemi tɨj ajta aɨjna ɨ Melquisedequi. 16Ajta aɨn, capu ayan aɨjna cɨn tiraijca aɨjna cɨme'e tɨ ayan aráurasten a'ij mej tira'uyu'uxaca'a aɨme ɨ tetyaca ɨ maj cui'ica a'ij tɨ tyu'ujxe'eve'e tɨ seij jetzen airaanyen tɨ'ij ti'itɨ cɨn te'entyarute ɨ Dioj jemi. Capu xaa nya'u ayaa na'a, silu aɨ pu aɨjna cɨn ayan te'entyajrupi aɨjna cɨme'e tɨ ayan ruurican seira'a a'ame tɨj na'a rusen cɨme'e. Ajta, capu rɨ'ɨri tɨ ja'atɨ ra'upua'arite'en. 17Ajta, ayan cɨme'en tyu'utaujxajtaca'a tɨcɨn: Muaa pa peyan che'eta pana'a va'acan cɨn ti'ityavaa pua'ame ɨ Dioj jemi tɨj na'a rusen cɨme'e tɨj ajta aɨjna ɨ Melquisedequi. 18Ayaa pu te'eme, a'ini Dioj pu ari ayan ra'uraúu aɨjna ɨ nyuucari tɨ anacai raatyajtuaa aɨme jemi ɨ mej Israel jetze ajtyama'acantaca'a. Ayaa pu aɨjna cɨn huarɨj a'ini camu té'eviicue'iracaa aɨme ɨ maj va'acan cɨn títyatatyá'acaa, ajta capu ti'itɨ tyu'utyavaɨ aɨjna ɨ nyuucari. 19Ee xaa, capu ti'itɨ huanaijmi'ire aɨjna ɨ nyuucari ɨ maj cɨn ti'ijtaca'a, silu aɨ pu xaa tɨ'ɨj Dioj ayan raatyajtuaa itejmi jemi aɨjna tɨ eitze'e re'en ɨ tyaj rachu'eve'e, ɨ tyaj tyajta cɨn vejli'i ajtyaxɨ'ɨren jemin ɨ Dioj. 20Ayaa pu ajta een cɨn eitze'e ti'ivaɨre'e aɨjna ɨ tyaj rachu'eve'e aɨjna cɨme'e tɨ Dioj ayan runyuuca tyu'uta'an, ayan raatyajtua itejmi jemi. Majta aɨme ɨ seica, ayaa pu Dioj cai runyuuca cɨn tyu'uta'a aɨme cɨme'e. Capu amɨn a'ij mauche'e mu va'acan cɨn te'entyajrupi ɨ Dioj jemi. 21Ma ajta aɨjna ɨ Jesús, aɨ pu aɨjna cɨn ayan te'entyajrupi nyuucajtze'en aɨjna tɨ cɨme'en tyu'utaxajtaca'a tɨcɨn: Tavastara'a pu runyuuca huata'a, muaa paj va'acan cɨn ti'ityavaa pua'ame ɨ Dioj jemi tɨj na'a rusen cɨme'e, ajta aɨ pu cai a'anaj ruhuarita'a acaame. 22Aɨj pu cɨn, ayan éenya'a a'araa tɨ aɨn Jesús aɨn pueenya'a ɨ tyaj cɨn raamua'aree tɨ eihua huapɨ'ɨ eitze'e re'en aɨjna ɨ nyuucari tɨ jajcua tɨ cɨn Dioj tya'ataujratziiri'i itejmi jemi. 23Majta aɨme ɨ mej mejmi'i va'acan cɨn tyu'utyavaɨ ɨ Dioj jemi, mui'itɨ mu meyan ara'asicaa maɨjna cɨme'e maj cai a'achu a'atee maj meyan maɨjna cɨn tyu'utyavaɨre'en aɨjna cɨme'e maj cui'icaa. 24Ma ajta amɨn ɨ Jesús, a'ini amɨ pu ayan seira'a a'ame tɨj na'a rusen cɨme'e, aɨ pu ajta va'acan cɨn ti'ityavaa a'ame ɨ Dioj jemi tɨj na'a rusen cɨme'e. 25Aɨj pu cɨn, aɨ pu raayɨ'ɨtɨ tɨ nain cɨn hue'irajtuaani aɨme ɨ maj huataujtuire'en ɨ Dioj jemi maɨjna cɨme'e maj ra'astijre'e maɨjna ɨ Jesús. Ayaa pu'u xaa nya'u, a'ini ayaa pu een cɨn ruurican huatyaturaasin tɨ ij hua'a japua huanyuuni. 26Aɨj pu ajta cɨn, ayaa pu tiraavijtya'acaa tɨ ayan ta japua huanyuuni seij tɨ ayan een tɨj aɨjna tɨ ayan va'acan cɨn ti'itejvee ɨ Dioj jemi. Aɨ pu urare'enya'acan cɨn huatyajturaa ɨ Dioj jemi. Ajta, capu a'atzu ti'itɨj cɨn a'ij pua'a hua'aruuren ɨ tyaɨte. Capu ajta ti'itɨ cɨn atya'ɨtza'ara ɨ Dioj jemi. Ajta, capu ayan ti'ityujcha'ɨ matɨj ɨ seica ɨ mej a'ij pua'a seijre'e ɨ Dioj jemi. Dioj pu ajta ayan rɨ'ɨ raatyajtuaa tɨ ij aɨn ayan jemin a'utyaturan utya'ɨmɨ u tajapua. 27Ajta, capu ayan ruxe'eve'e tɨ aɨjna Jesús ayan tyu'utamuaɨ'ɨvajta ɨ ru cɨme'en nain xɨcaj tzajta'a, capu ajta hua'a cɨme'en ɨ tyaɨte matɨj ti'ijrɨ'ɨre aɨme ɨ seica ɨ maj va'acan cɨn títyatatí ɨ Dioj jemi. Capu xaa nya'u, a'ini ayaa pu seij na'a huarɨj nain cɨme'e tɨ'ɨj aɨn rusaɨj huataujmuaɨ'ɨvajtaca'a. 28Ajta, aɨjna ɨ nyuucari ɨ maj cɨn ti'ijta, ayaa pu hua'antihuauca mej mi va'acan cɨn tyu'utyavaɨre'en aɨme ɨ tyaɨte ɨ maj cai te'eviicue'i ɨ rutzajta'a. Ma ajta, aɨjna ɨ nyuucari ɨ tɨ cɨn Dioj tya'ataujratziiri'i, aɨ pu ayan ra'antihuau aɨjna ɨ yaujra'an tɨ ari huataujnaijmi'ire tɨj na'a rusen cɨme'e.

will be added

X\