Hebreos 6

1Aɨj pu cɨn, tiche'e teyan ma rúuhua'axɨn tyaɨjna ɨ maj cɨn anacai tita'itiiri'i cɨme'en ɨ Cɨriistu'u tej ti teyan eitze'e huavaujse'en ɨ Dioj jemi. Tiche'e cai che'e tyaɨjna jetze ucaaju'un, aɨjna ɨ nyuucari tɨ cɨme'en raxaj tyaj saɨque tyu'umua'ati tyaɨjna cɨme'e ɨ ye'ira tɨ cai che'e ti'itɨj vaɨre'e ɨ Dioj jemi, nusu tɨ cɨme'en raxaj tyaj rá'atzaahuate'en ɨ Dioj. 2Ajta seica tɨ ayan ti'itaijte'e tyaj nu'u huá'atamuaɨ'ɨvijhua na'ari tyaj nu'u hua'avá'amuare'en ca'ɨn tɨ cɨme'en raxaj ajna xɨcajra'a ɨ mej jetzen a'itaju'un aɨme ɨ maj meri huacuii. Ajta, aɨjna ɨ nyuucari tɨ cɨme'en raxaj tɨ Dioj ayan hua'axɨjte'en seij ajta seij a'ij tɨ tiraacɨ'ɨti tɨj na'a rusen cɨme'e. Naijmi tɨj na'a ɨ tyaj tyauchan tiraataxajtaca'a, ayaa pu'u een ɨ maj cɨn anacai tita'itiiri'i. Pu'uri ruxe'eve'e tyej eitze'e huavaujse'en ɨ Dioj jemi. 3Ayaa tu tyaɨjna cɨn rɨni tɨ pua'a Dioj ayan titaata'acare'en. 4Ma majta seica, ayaa mu meri huarɨj. Seij pu a'anaj ayan tihua'amitejtya'acaa tɨ ayan ti'ayajna aɨjna ɨ nyuucari. Mu'uri a'anaj raamuá'a aɨjna tɨ Dioj hua'utapueijve tɨ ajta ute'e a'uve'eme. Ajta aɨn xaijnyu'ucara'ara'an ɨ Dioj ayan hua'a tzajta'a huatyajturaa. 5Aɨ mu majta raataxe'eve aɨjna ɨ nyuucari tɨ i'ire'en, tɨ ajta Dioj jemi u a'uve'eme. Majta mu ra'ancura'a maɨjna ɨ muare'eri'ira'a tɨ cɨn Dioj ayan tyu'utaijta tɨj na'a rusen cɨme'e. 6Matɨ'ɨj mi ma ruurai. Aɨj pu cɨn capu a'atzu a'ij ti'irɨ'ɨri tɨ ayan hua'ujajcuare'en mej mi majtahua'a saɨque tyu'umua'ati. Capu xaa nya'u, a'ini aɨ mu majtahua'a rujɨɨmua'a rá'utatan ɨ curuu jetze maɨjna tɨ yaujra'an pueen ɨ Dioj. Majtahua'a mu a jeijre'e hua'a tzajta'a ɨ tyaɨte, aɨ mu majta rá'axaahuari'i. 7Ayaa pu che'eta na'a ti'irɨnyaca hua'a tzajta'a ɨ tyaɨte tɨj ajta ayan ti'irɨnyaca ɨ chuej japua matɨ'ɨj huateviiye. Dioj pu ayan rɨ'ɨ tirata'aca aɨjna ɨ chuej tɨ pua'a matɨ'ɨjta huateviiye, ayan japuan tyu'unyén aɨjna tɨ tihua'atyava'ɨri aɨme ɨ maj japuan ti'ihua'astya. 8Ma ajta, tɨ pua'a japuan tyu'unyén aɨjna ɨ tyetzicare'e, ajta aɨjna tɨ tyú'uxu'uhua'ate'e matɨ'ɨj huateviiye, capu ti'itɨ vaɨre'e aɨjna ɨ chuej. Ee xaa nya'u, ayaa pu ti'irɨ'ɨri tɨ ayan te'eme tɨ Dioj a'ij pua'a raruuren, ajta ayan tiratyátairan. 9Capu amɨn a'ij tej teyan tyaja'amue'ixaate'e, mɨ tej ja'amua'axe'eve'e, a'ini ayaa pu tita'amitejte'e muejmi cɨme'en tɨ cai ayan tyajamuaacɨ'ɨti aɨjna tɨ a'ij pua'a een, silu sej seyan ra'ancura'asin tɨj na'a tɨ ayan ti'iseiira'a a'ame ajna xɨcajra'an tɨ jetzen Dioj amue'irajtuaani. 10Dioj pu xaa ra'utamua'areera a'ij tɨ tiraavijte'e ɨ saj cɨn tyu'umuarej, saj sajta hua'utaxe'eve ɨ Dioj jetze ma'acan aɨme ɨ tɨ hue'iravi'itɨcɨ ɨ Dioj. Capu a'atzu yá'uhua'ana ɨ Dioj sej seri cɨn tihua'utyavaɨ, saj sajta sauche'e ti'itɨ cɨn tihua'atyava'ɨri. 11Ayaa tu ti'ijxe'eve'e muejmi cɨme'en sej si seyan che'eta sana'a a'araujca'anyaacan cɨn seyan rɨjca seica cɨme'e tɨ ij Dioj ayan amuaanáijmi'ire'en aɨjna cɨme'e ɨ saj cɨn rachu'eve'e asta na'a cai nain te'entipua'are. 12Sata'aj cai seyan hua'ɨna'asa'a silu seyan che'eta sana'a huarɨni matɨj aɨme ɨ maj ra'ancura'asin maɨjna tɨ cɨn Dioj tya'ataujratziiri'i tɨ ayan tihua'ucɨ'ɨti aɨjna cɨme'e mej tya'atzaahuate'e, majta maj tya'utaviicue'iri'i. 13Tɨ'ɨj Dioj ayan tya'ataujratziiri'i aɨjna ɨ Abraham jemi, aɨ pu ayan rusaɨj tiraata'ixaa ɨ runyuuca cɨme'e, a'ini capu ma'a hua'acaa a'atɨ tɨ eitze'e va'acan cɨn ti'ityavaaca'a tɨ ij ayan nyuucara'ara'an cɨn tiraata'an. 14Ayaa pu tiraata'ixaa tɨcɨn: “Huapɨ'ɨ nu rɨ'ɨ timuaatyatuaasin. Eihua nu huapɨ'ɨ hua'utamui'irejsin ɨ a'ayaujmua'a.” 15Ajta aɨn Abraham, tɨ'ɨj a'ateevi'i tɨ ayan rachu'eve'e ruxé'evi'ira'a cɨme'e, aj pu'i ayan ra'ancura'a aɨjna tɨ cɨn Dioj tya'ataujratziiri'i. 16Ee xaa nya'u, a'ini ayaa mu ti'ijrɨ'ɨre ɨ tetyaca maj runyuuca ti'ita'aca aɨjna cɨme'e ɨ nyuucajtze'en aɨjna tɨ eitze'e va'acan cɨn ti'itejvee macai aɨme. Ajta a'anaj tɨ na'a maj ti'itɨj cɨn tyújtya'axɨ'ɨn, ayaa mu ramua'aree tɨ ari rɨ'ɨ ti'ihuaujxa'apɨ'ɨntare tɨ'ɨj saɨj runyuuca cɨn ayan ti'itá'aca. 17Aɨj pu cɨn, tɨ'ɨj Dioj ayan tiraaxa'apɨ'ɨntare tɨ ayan tihua'utaseijrate'en tyamua'a na'a aɨme ɨ tɨ tihua'acɨ'ɨti mej mi raamua'aree tɨ cai a'atzu rɨ'ɨri tɨ saɨque huarɨni aɨjna cɨme'e a'ij tɨ aɨn ari tiraaxa'apɨ'ɨntare, aɨ pu ajta ayan runyuuca cɨn tiraataxajtaca'a. 18Aɨj pu cɨn, ti'ihua'apua pu ti'iseijre'e tɨ cai ja'atɨ raayɨ'ɨtɨ tɨ saɨque tyu'uruuren ɨ tatzajta'an, tɨ cɨme'en cai rɨ'ɨri tɨ Dioj ayan tyu'utyaahue'ita: ai pu aɨn pueen, aɨjna ɨ tɨ cɨn tya'ataujratziiri'i, ajta runyuuca tɨ cɨn tyu'utaxajtaca'a. Aɨj tu cɨn huatyataca'anyen tyamua'a naa, ityan i tyaj jemin ajtyáxɨɨraca'a tɨ ij aɨn tachaɨj a'ara'ani, tej ti teyan ra'ancura'an ɨ tej rachu'eve'e, aɨjna tɨ ajta ayan raatyajtuaa itejmi jemi. 19Ajta aɨn ɨ tyaj rachu'eve'e, ayaa pu ca'anijra'a tata'aca tɨ ij cai ti'itɨj tya'ɨtziitya'a ɨ tatzajta'an, tɨ ij cai ti'itɨj ta'antimue'itɨn. Cu xuee aɨ pu ari aun a'utyajrupi u tajapua, huarita'an aɨjna ɨ cɨɨxuri tɨ e'ita'a a'acáavɨj. 20Ajta aɨn ɨ Jesús, aɨ pu anacai a'utyajrupi tɨ ij aɨn tajapua huanyuuni, aɨjna cɨme'e tɨ Dioj ayan aɨjna cɨn tiraijca tɨ i aɨn ayan che'eta na'a va'acan cɨn tyu'utyavaɨre'en ɨ Dioj jemi tɨj na'a rusen cɨme'e tɨj ajta aɨjna ɨ Melquisedequi.

will be added

X\