Hebreos 4

1Auche'e pu ayan ti'ivaɨre'e ɨ nyuucari tɨ cɨn Dioj ayan tya'ataujratziiri'i tɨ í'irɨni tyej tyaun a'utyarute a'u tɨ aɨn taata'asin tyej tyaun a'ahuátasa'upe'en. Aɨj pu cɨn, tiche'e rɨ'ɨ tyana'a tɨ ij cai ayan te'irajra'ani tɨ saɨj muan ti'itɨj cɨn auta'ɨtzen tɨ ij cai raacɨ'ɨti tɨ aun a'utyarute. 2Ayaa pu'u, ayaa pu che'eta na'a taacɨ́'ɨ ɨ nyuucari tɨ cɨn Dioj tu'irajtuaani, tɨj ajta tihua'ucɨ'ɨ aɨme. Ma ajta, capu a'atzu a'ij tihua'utyavaɨ ɨ maj raanamuajri'i aɨjna cɨme'e maj cai tya'antzaahua matɨ'ɨj raanamuajri'i. 3Ajta ijii, ityan i tyaj tya'antzaahua, tyan tu tyaun a'utyaruti a'u tyej a'ahuátasa'upe'en. Ayaa pu huataujmua'a tɨ ayan titáacɨ'ɨti a'ini ayaa pu Dioj tyu'utaxajtaca'a hua'a cɨme'en tɨcɨn: Nyenyu'ucamɨ'ɨ nu cɨn tya'atanratziiri'i maj cai a'anaj maun a'utyaruti a'u maj a'ahuaujsa'upe'en inyeetzi jamuan. Ma ajta, tɨj na'a ajna'ɨmɨ tɨ raatyataahuaca'a ɨ chaanaca tɨ yu e'ire'enye, pu'uri cɨ'ɨpiihuaca'a ɨ tɨ cɨn Dioj tyu'umuarej. 4Ee xaa nya'u, a'ini ma a'ahua'a pu ayan tyu'utaxajtaca'a aɨjna cɨme'en ɨ xɨcajra'a ta'arahua'apua. Ayan tɨcɨn: Ajta ajna xɨcajra'a jetze ɨ ta'arahua'apua, Dioj ayan raatapua'ajtaca'a ɨ tɨ cɨn tyu'umuarej. Tɨ'ɨqui huaujsa'upe. 5Ajta, tyauuche'e tu tyaɨjna cɨme'en ti'ixa ɨ nyuucari tɨ cɨme'en tiraataxajtaca'a ɨ Dioj tɨcɨn: Camu nu'u a'anaj maun a'utyaruti mej mi nyeetzi jamuan a'ahuaujsa'upe'en. 6Aɨj pu cɨn, mauche'e mu meyan seijre'e seica ɨ maj xaa maun a'utyarute mej mi jamuan ɨ Dioj a'ahuaujsa'upe'en. Ma majta aɨme, ɨ tɨ anacai hua'a jemi raatyajtuaa ɨ nyuucari tɨ cɨn Dioj hue'irátuaaníiche'en, camu maun a'utyajrupi maɨjna cɨme'e maj cai ra'ara'astijre. 7Aɨj pu cɨn, pu'uri eihua a'ateevi'i tɨ'ɨj aɨn Dioj raata'a aɨjna ɨ David tyaacan tɨ ayan tyu'utaxaj tɨ Dioj ayan raaxa'apɨ'ɨntare a'anaj tɨ ayan tyaja'ure'enyejsin ajna xɨcajra'an tɨ ayan raatamuá'a tɨcɨn: “ijii”. Ayaa pu aɨjna cɨn tyu'utaxajtaca'a tɨcɨn: Tɨ pua'a ijii saraanamua a'ij tɨ ti'ixa ɨ Dioj, caxu ra'antanaamɨn ɨ a'amuatzajta'a. 8Ajta, tɨ pua'a aɨn Josué tyaacan ayan hua'uta'aniche'en maj huaujsa'upe'enche'e, capu ayan raataxájtanche'e ɨ Dioj aɨjna cɨme'e ɨ seij jetze ɨ xɨcaj. 9- 10Aɨj pu cɨn, auche'e pu tura hua'a jemi ɨ tyaɨtestyamua'ame'en pueen ɨ Dioj mej mi jamuan huaujsa'upe'en, a'ini a'atɨ tɨ na'a tɨ ayan aun a'utyarute tɨ ij a'ahuáujsa'upe'en ɨ Dioj jamuan, aɨ pu ayan che'eta na'a raatapua'ajta ɨ tɨ cɨn ti'imuare'e tɨj ajta Dioj tiraatapua'ajtaca'a ɨ tɨ cɨn tyu'umuarej. 11Aɨj pu cɨn tiche'e teyan ahuataca'anyen nain cɨme'e taca'anijra'a tej ti tyaun a'utyarute, tɨ ij cai a'atɨ ayan che'eta na'a huarɨni a'ij mej mejmi'i huarɨj aɨme, ɨ maj cai tya'ara'aste maɨjna cɨme'e maj cai tya'antzaahua. 12Ajta aɨn ɨ nyuucari tɨ Dioj jetze airáninyei, aɨ pu e'ihuarujte'en, ajta ti'imɨjhuaca huapɨ'ɨ. Tyamua'a pu tya'uru'ipi ɨ tatzajta'an. Eitze'e pu ti'ivaɨre'e cai ɨ chun tɨ hua'apua cɨn ajcamɨɨmɨ, tɨ ajta huapɨ'ɨ antamɨɨmɨ, ɨ maj majta cɨn rasi'ichaca ɨ carij tɨ ruvi'i, majta cɨn ra'utasi'iche ɨ tu'utanaj. Au pu xaa uru'ipi aɨjna ɨ nyuucari ɨ xaijnyu'ucara'ara'an jetze ɨ tevi, ajta ɨ mua'atziira'ara'an jetze. Tyamua'a pu raayɨ'ɨtɨ tɨ ayan raatamitejte'en a'ij tɨ seij ti'imua'atze, ajta a'ij tɨ seij ti'ijxe'eve'e tɨ ayan huarɨni. 13Ti'itɨ tɨ na'a tɨ ayan ti'iseijre'e, tɨ ajta aɨjna jetze ajtyama'acan aɨjna tɨ Dioj ayan tyu'utaahuaca'a, tɨj na'a ti'ijpua'amua, ayaa pu eijre'e seijre'e ɨ jemin. Ajta ayan ruxe'eve'e tyaj naimi'i teyan tyu'utáseijrata ɨ jemin. Ajta capu ti'itɨ ru'avaa ɨ jemin. 14Ayaa nu tyaja'amue'ixaate'e. Pu'uri seijre'e ɨ ta jemi seij tɨ va'acan cɨn ti'ivaɨre'e ta jetze ma'acan ɨ Dioj jemi. Ajta aɨ pu ari aun a'ujnyéj u tajapua. Aɨj pu cɨn, tiche'e teyan taca'anijra'a cɨn tyauj ra'astijra'a tyaɨjna ɨ tyaj tya'atzaahuate'e. 15A'ini aɨ pu va'acan cɨn ti'ivaɨre'e tajetze ma'acan ɨ Dioj jemi, aɨ pu raayɨ'ɨtɨ tɨ ayan tá'ancu'uvajxɨ'ɨn aɨjna cɨme'e tyaj cai tacaca'anyej ɨ ta tzajta'a. Aɨ pu che'eta na'a nain cɨn tirajpueijtzica'a tyatɨj ityan tirajpueiitzi. Ajta, aɨ pu cai ti'itɨj cɨn ata'ɨtza'ara. 16Aɨj pu cɨn, tiche'e teyan taxe'evi'ira'a cɨn ajtyaxɨɨre tyajna vejli'i a'u tɨ a'utyejvee ɨ ɨpuari a'u tɨ aɨn a'acajca ɨ Dioj tɨ ij aɨn ayan tá'ancu'uvajxɨ'ɨn, tɨ'ij ajta rɨ'ɨ titaata'an, tɨ ij ajta taatavaɨre'en a'anaj tɨ na'a tɨ'ɨj ayan ruxe'eve'e.

will be added

X\