1 Aɨj pu cɨn, ayaa xu huarɨni, nye'ihuaamua'a, mɨ tɨ Dioj amue'itévi'itɨcɨ, a'ini muejmi pu huata'inee aɨn tɨ ute'e e'eseijre'e sej si naimi'i seyan huatyaturan ɨ jemin. Sata'aj seyan saɨjna jetze tyu'umua'ati saɨjna jetze ɨ Jesús tɨ Dioj ayan aɨjna cɨn tiraijca tɨ titaata'ixaate'en cɨme'en aɨjna ɨ nyuucari ɨ tyaj ra'astijre'e. Aɨ pu Jesús ajta nain cɨn ti'ivaɨre'e ɨ Dioj jemi tɨ ij taatyavaɨre'en itejmi. 2 Ayaa pu che'eta na'a Jesús pu nain cɨn arauraste aɨjna jemi tɨ ayan ra'antihuau tɨj ajta aɨn Moisés ayan nain cɨn arauraste tɨ'ɨj ajmi'i ti'ivaɨra'acaa ɨ chi'ira'an jetze ɨ Dioj. 3 Ma ajta, Dioj pu ayan tiraaxa'apɨ'ɨntari'iri'i tɨ ayan tiraavijte'e tɨ eitze'e rɨ'ɨ tiraatyajtuaani aɨjna ɨ Jesús cai aɨjna ɨ Moisés. Ee xaa nya'u, eitze'e tu rɨ'ɨ tirata'aca tyaɨjna tɨ chi'i ta'ahuaca tyacai tyaɨjna ɨ chi'i. 4 Ayaa pu ti'ayajna a'ini tɨj na'a tɨ ti'iseijre'e ɨ chi'i, a'atɨ pu rá'ajtaahuaca'a. Ma ajta Dioj, aɨ pu nain tyu'utaahuaca'a tɨj na'a tɨ ti'iseijre'e. 5 Ajta aɨn Moisés, nain pu cɨn arauraste tɨ'ɨj auj ti'ivaɨra'acaa ɨ chi'ira'an jetze ɨ Dioj. Ayaa pu een cɨn huarɨj, aɨ pu ajta ayan tya'anxájtaca'a a'ij mej majca'i huayee tyu'utaxajtanche'e. 6 Ma ajta aɨn Cɨriistu'u, aɨ pu ayan nain cɨn arauraste tɨ'ɨj ti'ivaɨra'acaa ɨ ruche. Ee xaa, aɨ pu yaujra'an pueenya'a aɨjna tɨ huatyeechi'i. Tyajta ityan, tyan tu tyaɨtestyamua'ame'en pueen, tyan tu tyajta tyaun a'ujti ɨ chi'ira'an jetze, tɨ pua'a teyan tya'utaviicue'i tyaj tyaxaahua tyajá'uxajtanye'en tyaɨjna ɨ tyaj cɨn tatyamua'ave'e tyaɨjna cɨme'e ɨ tyaj rachu'eve'e. 7 Aɨj xu cɨn, sata'aj raanamua tyamua'a naa a'ij tɨ ti'ixaj aɨjna ɨ xaijnyu'ucara'ara'an ɨ Dioj, ayan tɨcɨn: Tɨ pua'a ijii saraanamua tɨ ayan tyaja'amue'ixaate'e ɨ xaijnyu'ucara'ara'an ɨ Dioj. 8 Caxu seyan che'eta sana'a ra'antanaamɨn ɨ a'amua tzajta'a matɨj aɨme ɨ maj ajca'ihua'ɨmɨ naatatyése inyeetzi. Ajna xɨcajra'a mej jetzen rájhuau mej mi naatyeeseij ajna a'u tɨ cai e'eti'itɨjcaa. 9 Au mu meyan rájhuau mej mi naatyeeseij, majta meyan maun e'etee a'achu cumu hua'apuate ninye'ira'a mej ti'iseij nyatɨj nyana'a rɨjcaa. 10 Aɨj nu cɨn hua'utajaaxaijvi'iri'i nyaɨme ɨ tyaɨtejra'a. Nyajta neyan tyu'utanixaa yee a'anaj tɨ na'a aɨ mu a'ij pua'a ti'imua'atze ɨ rutzajta'a. Majta, camu a'atzu ramua'aree a'ij nyej ti'ijxe'eve'e. 11 Aɨj nu cɨn, nyenyu'ucamɨ'ɨ nu cɨn neyan tya'atyanratziiri'i maj cai a'anaj maun a'utyaruti a'u maj ahuaujsa'upe'en inyeetzi jamuan. Ayaa pu xaa tyu'utaxajtaca'a aɨjna ɨ Dioj. 12 Rɨ'ɨ xu'u, nye'ihuaamua'a, tɨ ij cai ayan huataseijre'en muejmi jemi seij tɨ a'ij pua'a ti'ityujcha'ɨ ɨ rutzajta'a, tɨ ajta cai tya'atzaahuate'e. Caxu raata'acare'en seij tɨ ayan een tɨ aɨn ayan á'ujca'anye tɨ ma ruuraini aɨjna ɨ Dioj tɨ i'iruuri. 13 Sajta muan, sata'aj ca'anijra'a huataura'an seij sajta seij tɨj na'a nain xɨcajra'a tzajta'a sej sauj ruuri tɨ ij cai seij muan ayan ra'antanaamɨn ɨ rutzajta'a aɨjna cɨme'e tɨ ayan raacuanamua aɨjna tɨ a'ij pua'a een. 14 Ee xaa nya'u, ayaa pu ruxe'eve'e sej seyan huarɨni, a'ini ayaa pu ti'itɨ titáacɨ'ɨti jamuan ɨ Cɨriistu'u tɨ pua'a teyan tyauj tya'utaviicue'i tɨj na'a rusen cɨme'e ɨ tyaj cɨn tatyamua'ave'e tyaɨjna cɨme'e ɨ tyaj rachu'eve'e tyatɨj titya'utyajhuii. 15 Ayaa pu xaa a'ij tɨ tya'uyu'usi'ihuaca'a ɨ yu'uxari jetze tɨcɨn: Tɨ pua'a ijii saraanamua tɨ ayan tyaja'amue'ixaate'e ɨ xaijnyu'ucara'ara'an ɨ Dioj. Caxu seyan che'eta sana'a ra'antanaamɨn ɨ a'amua tzajta'a matɨj aɨme ɨ mej ajca'ihua'ɨmɨ naatatyése inyeetzi. 16 Majta aɨme, ɨ maj raanamuajri'i, majta ra'utaxaahuari'iri'i, ai mu aɨn pueen ɨ tɨ Moisés tyaacan hue'iraavi'itɨ aujna u Egipto. 17 Ajta aɨme, ɨ tɨ Dioj ayan a'atee hua'apuate ninye'ira'a tɨ hua'ajaaxaijvi'i aɨme, ai mu aɨn pueen ɨ maj autyajturaa ɨ Dioj jemi, majta á'upua'araca'a maujna a'ahua'a a'u tɨ cai e'eti'itɨjcaa. 18 Aɨ mu majta aɨn pueen ɨ tɨ hua'a cɨme'en Dioj ayan tya'ataujratziiri'i maj nu'u cai a'anaj maun a'utyaruti a'u maj ahuaujsa'upe'en aɨjna cɨme'e maj cai ra'ara'astijre. 19 Ee xaa nya'u ayaa pu ti'ayajna tɨ ayan tita'amitejte'e tɨ cai ayan hua'ucɨ́'ɨ maj maun a'utyarute a'u maj ahuaujsa'upe'en aɨjna cɨme'e maj cai tya'antzaahua.
