Hebreos 2

1Aɨj pu cɨn ayan ruxe'eve'e tej eitze'e tyamua'a naa ra'ara'astijre'en tyaɨjna ɨ tyaj raanamuajri'i, tej ti cai yá'uhua'axɨn. 2- 3Ee xaa nya'u, aɨjna ɨ nyuucari ɨ mej mejmi'i raataxajtaca'a aɨme ɨ maj tajapua ti'ivaɨre'e, aɨ pu xaa ti'ivaɨra'acaa. Ajta a'atɨ tɨ na'a tɨ cai ti'itɨj cɨn ra'ara'astijre, ayaa pu pueijtzi ancura'a a'ij tɨ tiraavijtya'acaa. Tɨ pua'a ajmi'i ayan tihua'uruu, ¿a'ini auj ti'irɨ'ɨri tɨ cai pueijtzi taata'an tɨ pua'a teyan raatyaxaahua tyaɨjna ɨ nyuucari tɨ cɨn Dioj tu'irajtuaasin, tɨ ajta eihua huapɨ'ɨ ruxe'eve'e? Anacaican, tavastara'a pu ayan raataxajtaca'a. Ajta e'eyan, seica mu taata'ixaa aɨme ɨ maj raanamuajri'i. 4Dioj pu ajta tya'anxájtaca'a aɨjna cɨme'e tɨ ayan huarɨj ti'itɨj cɨme'e tɨ huapɨ'ɨ ruxe'eve'e, ajta ti'itɨ ɨ tyaj cɨn rɨ'ɨ tya'utaseij. Aɨ pu ajta raatyajtuaa ɨ ruxaijnyu'uca hua'a jemi a'ij tɨ tira'aranajchaca'a tɨ ij aɨn xaijnyu'ucara'ara'an ayan hua'uta'an a'ij mej ye'i tiraayɨ'ɨtɨhua'an. 5Ajta, capu Dioj ayan aɨjna cɨn tihuéijca aɨme ɨ mej tajapua ti'ivaɨre'e mej mi maɨjna cɨn antyujmua'aréera mua'ara'ani ɨ chaanaca maj japuan huachaatɨma'a mua'aju'un, aɨjna ɨ chaanaca ɨ tyaj cɨme'en ti'ixa. 6Ayaa pu a'atɨ a'anaj ayan tya'anxájtaca'a tɨcɨn: Muaa Dioj, mueetzi jemi cai a'atzu ti'itɨ cɨn ruxe'eve'e ɨ tyetyaca, matɨj mana'a pua'amua. ¿A'ini een cɨn peyan ra'utámua'areeri'i? Ajta, aɨn tɨ jetzen airaujneijte ɨ tyaata'a, ¿a'ini een cɨn peyan rɨ'ɨ tirata'aca pej peyan rɨ'ɨ tirajchaɨ? 7Ayaa paj raaruu tɨ ij a'atzu a'ateevi'in tɨ eitze'e cɨleenya'a cɨn ti'ityavaa a'ara'ani cai aɨme ɨ mej tajapua ti'ivaɨre'e. Ma pajta muaa, rɨ'ɨ paj tiraata'a paɨjna cɨme'e paj ra'antihuau tɨ eihua huapɨ'ɨ tiraacɨ'ɨti mej mi naimi'i naa rɨ'ɨ tira'utaseij. 8Pajta peyan ti'itɨj cɨn tiraijca tɨ'ij aɨn ayan tihueitya'a a'ame ɨ tyaɨte mej mi naimi'i ca'anyejri cɨn ra'ara'astijre'en. Tɨ pua'a ayan aɨjna cɨn tiraijcatache'e mej mi naimi'i ra'ara'astijre'en, capu me'e je'e ti'itɨjtaca'a tɨ cai ra'ará'astijra'acaa. Ma ajta ijii, ayaa pu japɨ'ɨn seijre'e maj cai xɨ naimi'i meyan ra'astijre'e. 9Ma ajta ityejmi, ayaa pu japɨ'ɨn seijre'e cɨme'en aɨjna ɨ Jesús. Dioj pu ayan raaruu tɨ ij a'atzu a'ateevi'in eitze'e cɨleenya'a cɨn ti'ityavaa a'ara'ani macai aɨme ɨ maj tajapua ti'ivaɨre'e. Ajta ijii, Dioj pu ayan rɨ'ɨ raatyajtuaa, ajta va'acan cɨn tiraijca, aɨjna cɨme'e tɨ aɨn Jesús ayan rajpueitzi a'araa aɨjna cɨme'e tɨ huamɨ'ɨ. Dioj pu ayan rɨ'ɨ tihua'uta'a ɨ tyaɨte aɨjna cɨme'e tɨ aɨn Jesús ayan naijmi'ica jetze ma'acan huamɨ'ɨ. 10Nain pu tiraacɨ́'ɨ aɨjna, ajta nain pu ayan jemin ti'iseijre'e aɨjna cɨme'e tɨ ayan nain tyu'utaahuaca'a. Ayaa pu'u xaa ruxe'eva'acaa tɨ aɨn hue'irajtuaani mui'icaca ɨ ruyaujmua'a mej mi jemin huatyaturan tɨj na'a rusen cɨme'e. Aɨj pu cɨn ayan tiraavijte'e tɨ ayan raanaijmi'ire'en aɨjna tɨ e'ita'a ve'ejvee aɨjna cɨme'e tɨ ayan rajpueitzi a'araa, aɨjna tɨ hue'iratuaasin ɨ ruyaujmua'a. 11Ajta aɨn tɨ huataura'ate aɨme, ajta aɨme tɨ aɨn ari hue'itevi'itɨcɨ, naimi'i mu seij mana'a jetze ajtyama'acan. Aɨj pu cɨn, capu ratevi'iraste'e tɨ aɨn ayan hua'atamua'amuate'en tɨcɨn: “Nye'ihuaamua'a mu pueen.” 12Ajta ayan tɨcɨn: Nyaa nu hua'utanamuajriste'esin a'ij pej antyahuaa hua'a jemi ɨ nye'ihuaamua'a. Nyaa nu rɨ'ɨ timuaata'asin hua'a tzajta'a aɨme ɨ mej e'etyujsa'ɨri. 13Ajtahua'a ayan tɨcɨn: Nyaa nu a'anca'anye ɨ jemin. Ajtahua'a rujajcuatze'en, ayan tɨcɨn: Yaa nu huatejvee hua'a jamuan ɨ yaujmua'ame'en tɨ Dioj naatávi'itɨste. 14- 15Majta aɨme ɨ yaujmua'ame'en a'ini meyan che'eta mana'a eenye'en tyahue'ira'a, majta meyan eenye'en tyáxuure'e, aɨj pu cɨn Jesús ayan huaujruu tɨ'i ayan che'eta na'a eenye'en tyáhue'ira'acaa, ajta ayan eenye'en tyáxuura'acaa matɨj aɨme. Ayaa pu een cɨn huarɨj tɨ'ij ayan ra'antipua'arite'en aɨjna tɨ aɨjna cɨn antyujmua'aree ɨ maj cɨn huacui'ini ɨ tyaɨte. Ai pu aɨn pueen ɨ tiyaaru'u. Aɨj pu cɨn Jesús hua'a jetze ma'acan huamɨ'ɨ, tɨ ij ajta hue'irajtuaani aɨme ɨ mej ca'anyejri cɨn seijra'acaa tɨj na'a maj auj ruuri mej meyan ti'itzɨɨnya'acaa maj huacui'ini. 16Ee xaa nya'u ayan ti'ayajna, capu ayan huaujruu matɨj aɨme ɨ mej tajapua ti'ivaɨre'e tɨ'ij hua'utyavaɨre'en silu ayaa pu huaujruu matɨj aɨme ɨ mej Abraham jetze airaujneijte. 17Aɨj pu cɨn, ayan ruxe'eva'acaa tɨ aɨn ayan saɨque huaujruuren tɨ ij ayan eenye'en seijra'a matɨj aɨme ɨ ihuaamua'ame'en nain cɨme'e tɨ ij ayan aɨjna cɨn te'entyarute ɨ Dioj jemi, tɨ ij ayan nain cɨn tyu'utyavaɨre'en ɨ Dioj jemi, tɨ ij ajta ayan hua'ancu'uvajxɨ'ɨn ɨ tyaɨte tɨ ij ajta cai a'anaj ti'itɨj cɨn atya'ɨtza'ara'an, tɨ ij ajta huá'ari'i ɨ maj cɨn autyajturaa ɨ Dioj jemi. 18Pu'uri xaa nya'u rɨ'ɨri tɨ aɨn ayan hua'utyavaɨre'en aɨme ɨ maj á'aviicue'ire'e ti'itɨ cɨme'e, a'ini aɨ pu ari rajpueiitzi a'araa, ajta rá'uviicue'iri'i.

will be added

X\