Hebreos 13

1Sata'aj sauj huaujxe'eve'en tɨj ru'ihuaamua'a. 2Caxu yá'uhua'anan saj tyamua'a naa hua'ancure'evi'itɨn ɨ ta'ihuaamua'a ɨ saj cai hua'amuajte a'ini matɨ'ɨj seica meyan huarɨj, ayaa pu te'irajraa maj cai ramua'areeraca'a meyan hua'ancure'evi'itɨ aɨme ɨ maj tajapua ti'ivaɨra'acaa. 3Sata'aj hua'utamua'aree saɨme ɨ maj a'ityanami'i yaa cumu muan xu sajta hua'a jamuan a'ityanami'i. Sata'aj sajta hua'utamua'aree saɨme ɨ mej a'ij pua'a hua'aruure a'ini naimi'i tu seij tyana'a jetze ajtyama'acan. 4Miche'e naimi'i meyan ti'imuajca tɨ i'ixa'apɨ'ɨn mej huanyejnyaɨche ɨ tyaɨte. Caxu hua'ata'acare'en mej meyan ti'ixana'acɨre'e ɨ maj meri nyejnya'ɨche a'ini Dioj pu xaa hua'axɨjte'en aɨme ɨ maj a'ij pua'a ti'ityujcha'ɨ, majta aɨme ɨ mej ti'ixana'acɨre'e. 5Caxu seyan huataura'an sej seyan eitze'e raxe'eva'a ɨ tumin sacai maa ti'itɨ. Sata'aj seyan saɨjna cɨn huataujtyamua'ave'en saɨjna cɨme'e saj caj tí'ijcha'ɨ, a'ini ayaa pu tyu'utaxajtaca'a aɨjna ɨ tavastara'a tɨcɨn: “Canu a'anaj ma'a muajáujɨsin. Canu nyajta a'anaj muájá'uhua'axɨjsin.” 6Aɨj pu cɨn, rɨ'ɨri tej teyan taxaahua tyu'utaxaj yee: Tavastara'a pu nyavaɨre'e, aɨj nu cɨn cai ti'itzɨɨnye'e a'ij mej nyaruuren ɨ tyaɨte. 7Sata'aj hua'utamua'aree aɨme tyaaca, ɨ mej tyajamue'itiiri'i maɨjna cɨme'e ɨ nyuucari tɨ Dioj jetze a'uve'eme. Sata'aj saɨjna jetze tyu'umua'ati a'ij tɨ hua'a jemi te'irajraa sej si seyan che'eta sana'a ra'ara'astijre'en saɨjna ɨ Jesús matɨj aɨme. 8Ajta aɨn Jesús tɨ ajta Cɨriistu'u pueen, ayaa pu che'eta seijre'e ijii, tɨj ajta seijra'acaa jajcua jɨmɨ, tɨj ajta ayan seira'a a'ame tɨj na'a rusen cɨme'e. 9Caxu huataura'an tɨ a'atɨ ayan amuaacuanamuan aɨjna cɨme'e ɨ nyuucari maj cha'a mana'a cɨn tyaja'amue'itii tɨ saɨque huataujmua'a a'ij tyaj tyajamue'itiiri'i ityan. Ma sajta muan, Sata'aj seyan huatyaujca'anyen ɨ ja'amua tzajta'a saɨjna cɨme'e tɨ Dioj ti'itɨj cɨn rɨ'ɨ tyajamuaata'a. Capu a'atzu a'ij ti'irɨ'ɨri saj huatyaujca'anen ɨ a'amua tzajta'a saɨjna cɨme'e ɨ ye'ira tɨ ayan tihue'ijte'e ti'itɨ cue'ira maj raacua'ani. Capu a'atzu hua'utyavaɨ aɨme ɨ maj maɨjna cɨn ra'ara'astijre'e. 10Ajta ayaa pu Dioj raatyajtuaa itejmi jemi ɨ maj japuan ti'imuaɨ'ɨvajtaca tɨ cɨme'en cai ayan hua'ata'aca mej jetzen tyu'ucua'ani aɨme ɨ maj maun ti'ivaɨre'e ɨ ɨnaamua jete. 11Ayaa pu che'eta na'a tiraaruu aɨjna ɨ Jesús tɨj ajta aɨn tɨ va'acan cɨn ti'itejvee ɨ Dioj jemi ayan hua'aruurajcaa aɨme ɨ ya'amuaate ɨ maj hua'atamuaɨ'ɨvajtaca'a maɨjna jetze ma'acan ɨ maj cɨn autyajturaa ɨ Dioj jemi ɨ tyaɨte. Tɨ'ɨj ari hua'ucuii, aj pu'i aun raatyatuaaracara'a ɨ hua'axuure'e aujna ɨnaamua jete. Ajta ɨ hua'a hue'ira'a, aɨ pu aun raatyatuaaracara'a a pua'aque a'u mej a'uchaatɨma'acaa ɨ tyaɨte, tɨ ij aun raatyataira. 12Ajta aɨn Jesús, ayaa pu che'eta na'a tirajpueijtzica'a a pua'aque ɨ chajta'ana jetze tɨ ij ayan urare'enya'acan cɨn hue'iravi'itɨn ɨ rutyaɨtestyamua'a aɨjna cɨme'e tɨ ra'iraaxɨre ɨ ruxuure'e. 13Aj pu cɨn, tiche'e teyan jemin ajtyaxɨɨre a pua'aque a'u tej tejmí'i a'uchaatɨma'acaa tej ti teyan che'eta tyana'a tya'utaviicue'i tyaɨjna cɨme'e tɨ tyu'utevi'iraste'e tɨj ajta aɨn tya'utaviicue'iri'i. 14Ayej xaa nya'u ayan tiraavijte'e a'ini capu ayan raatyajtuaa itejmi jemi chajta'a tɨ iiyan seijre'e chaanaca japua tɨ a'ateevi'in silu tyauche'e tu raahuausin tyaɨjna tɨ ayan auj huataseijre'esin. 15A'ini Jesús pu ayan tajapua huanyúu, tiche'e teyan a'anaj tɨ na'a nyuucajtze'en rɨ'ɨ tiraatyajtuaani ɨ Dioj jemi. Ai pu aɨn pueen ɨ tyaj cɨn ti'imuaɨ'ɨvajtaca, aɨjna ɨ nyuucari ɨ tyaj cɨn huatatatyamua'ave'en, ɨ tyaj tyajta cɨn ra'utamua'aree. 16Caxu yá'uhua'anan saj seyan rɨjca saɨjna tɨ i'ixa'apɨ'ɨn, sajta seyan tihua'utyavaɨre'en ɨ seica saɨjna cɨme'e ɨ sej tí'ijcha'ɨ, a'ini tyamua'a pu ra'araanajchi ɨ Dioj sej seyan saɨjna cɨn rɨ'ɨ tiraata'acare'en a'ij saj rɨcɨ. Tij seyan tyu'utámuaɨ'ɨvejta ɨ Dioj jemi. 17Sata'aj hua'ara'astijre'en saɨme ɨ mej meyan antyujmua'aree teyujta'a. Sata'aj seyan huarɨni a'ij mej tyaja'amue'ijte'e, a'ini aɨ mu a'amuacha'ɨj mua'aye'i maɨjna cɨme'e sej si seyan ra'ara'astijre'en ɨ Dioj. Majta mu meyan ramua'aree tɨ ayan ruxe'eve'e maj raatanamuajriste'en ɨ Dioj a'ij mej ti'itɨj cɨn huarɨj. Miche'e meyan ruxaahua tyajamuaata'itii, a'ini capu a'atzu a'ij tyajamuatyava'ɨri tɨ pua'a meyan huataujxaamɨste'en maɨjna cɨme'e saj muare'eri hua'uta'a. 18Ayaa pu tita'amitejte'e yu tatzajta'a tyaj nain cɨn xa'apɨ'ɨn rɨcɨ, tyajta teyan ti'ijxe'eve'e tej teyan huarɨni a'ij tɨ tiraavijte'e. Aɨj xu cɨn, sata'aj sauj rahuavíira ɨ Dioj jemi itejmi cɨme'e. 19Nyajta nu neyan á'amuajee ca'anín cɨme'e sej si eitze'e seyan huarɨni saj rájhuavii ɨ Dioj jemi tɨ ij ajtahua'a naata'an nyej ca'anacan muejmi jemi a'utyavaaca. 20- 21Tiche'e teyan rɨ'ɨ tiraata'acare'en tyaɨjna ɨ Dioj tɨ a'ij huatyapua'arite'en, tɨ ajta ra'ajjáj hua'a tzajta'a ɨ mɨ'ɨchite aɨjna ɨ tavastara'a aɨjna tɨ Jesús pueen. Ai pu aɨn pueen tɨ ayan va'acan cɨn antyujmua'aree aɨjna cɨme'e tɨ hua'achaɨ a'ara'ani ɨ rutyaɨtestyamua'a tɨj saɨj tɨ hua'a cujta'a huamé'en ɨ canya'axɨ. Ayaa pu éenye'eque'e seijre'e aɨjna cɨme'e tɨ ra'iraaxɨre ɨ ruxuure'e tɨ ij ayan raaxa'apɨ'ɨntare'en aɨjna ɨ nyuucari tɨ cɨn Dioj tya'ataujratziiri'i tɨj na'a rusen cɨme'e. Che'e aɨn Dioj ayan amuaanáijmi'ire'en nain cɨme'e tɨ xa'apɨ'ɨn een sej si seyan huarɨni a'ij tɨ aɨn ti'ijxe'eve'e. Che'e aɨn ayan amuaaruuren sej si seyan e'enye'en seijra'a a'ij tɨ tira'araanajchi aɨjna cɨme'e tɨ aɨn Jesús tɨ ajta Cɨriistu'u pueen ayan a'amua japua huanyúu. Aɨj pu cɨn, tiche'e teyan rɨ'ɨ tirata'acare'en tɨj na'a rusen cɨme'e. 22Nye'ihuaamua'a, ayaa nu tyaja'amuahuavii sej seyan rá'uviicue'i saɨjna ɨ nyuucari ɨ nyaj cɨn ca'anijra'a amuata'aca, a'ini cɨj nu'u caj neyan tyajamuaata'itiiri'i. 23Sata'aj raamua'aree mej meri raatátuaa ɨ ta'ihuaara'a aɨjna ɨ Timuteeyu. Tɨ pua'a ca'anacan ye ra'asti, nyaa nu ra'avi'itɨn nyeetzi jamuan, aj nu ni a'uma'a na'ame muejmi jemi tej ti naimi'i jamuaaseij. 24Sata'aj hua'utataujte'en aɨme ɨ mej nain cɨn antyujmua'aree muejmi jemi, sajta naijmi'ica ɨ tɨ Dioj huataura'ate. Majta aɨme ɨ maj meyun Italia e'ema'acan, aɨ mu naijmi'i ya á'amuataujte'e. 25Che'e aɨn Dioj rɨ'ɨ tyajamuaata'acare'en naijmi'ica muejmi. Yaa pu'u xaa. Che'e ayan tya'ara'ani.

will be added

X\