Hebreos 12

1A'ini eihua mu ta jemi huatyáuu ɨ mej ti'iseij, tiche'e teyan raatyaxaahua tyaɨjna cɨme'e tɨ ayan tamuare'eriste'e, tiche'e tyajta raatapua'ajta tyaɨjna ɨ tyaj cɨn atya'ɨtza'ara ɨ Dioj jemi, tyaɨjna tɨ a'anaj tɨ na'a tatyajɨ'ɨqui. Tiche'e teyan tya'utaviicue'i tyamua'a naa tej ti xa'apɨ'ɨn rɨjca tyaɨjna cɨme'e ɨ tɨ cɨn Dioj titaijca tej ra'antipua'arite'en iiyan chaanaca japua. 2Tiche'e tyamɨjna jetze arataca'anyen ɨ Jesús, aɨjna tɨ anacai taataseijrate a'ij tɨ ti'ijxe'eve'e ɨ Dioj. Aɨ pu ajta ayan taanaijmi'ire'en ɨ Dioj jemi aɨjna cɨme'e tej teyan tya'antzaahuate'en. A'ini aɨ pu ayan ramua'areeraca'a tɨ ayan tiraacɨ'ɨti aɨjna tɨ cɨn huataujtyamua'ave, aɨj pu cɨn ayan rá'uviicue'iri'i maj rá'utatan ɨ curuu jetze. Capu jetzen ruxe'eva'acaa mej meyan maɨjna cɨn pueijtzi raata'an tɨ ayan ratevi'irastya'acaa. Ajta ijii, an pu a'acajca aɨjna japua ɨ ɨpuari ɨrɨɨta'an a'u tɨ Dioj a'acajca. 3Sata'aj seyan saɨjna jetze tyu'umua'ati a'ij tɨ aɨn huarɨj tɨ ayan tya'utaviicue'iri'i tyamua'a naa aɨme ɨ maj eihua huapɨ'ɨ rajchaɨra'acaa ɨ Dioj jemi. Sata'aj seyan saɨjna jetze ra'utamua'aree sej si cai cua'ana, tɨ i cai utyavatzɨn ɨ a'amua tzajta'a. 4Caxuu xɨ seyan tyu'utése asta sana'a cai ra'iraaxɨre ɨ a'amuaxuure'e saɨjna cɨme'e saj saɨjna jamuan á'aviicue'ire'e tɨj na'a tɨ a'ij pua'a een ɨ Dioj jemi. 5Sajta seyan ya'uhua'axɨ saɨjna ɨ nyuucari tɨ cɨme'en Dioj ayan ca'anijra'a a'amuata'aca, tɨj hua'ataata ayan tihue'ixaate'e ɨ ruyaujmua'a tɨcɨn: Niyauj, capaj raxaahuata tɨ tavastara'a ayan ti'imue'itii, capaj pajta peyan axaamɨstya'a tɨ pua'a aɨn pueijtzi muaata'an. 6Capaj xaa nya'u huarɨni, a'ini tavastara'a pu ayan ti'ira'itii aɨjna tɨ raxe'eve'e, ajta ayan pueijtzi rata'aca a'atɨ tɨ na'a tɨ ayan ra'ancure'evi'itɨ tɨj ruyauj. 7Ruxe'eve'e sej seyan tya'utaviicue'i a'ini Dioj pu a'amue'itii. Ayaa pu che'eta na'a a'amuaruure tɨj saɨj tyaata'a ayan hua'aruure ɨ ruyaujmua'a. A'atɨ tɨ na'a tɨ ya'upuaara'an pueen ayan ti'ihue'itii ɨ ruyaujmua'a a'achu ma pua'amua. 8Tɨ pua'a ayan tihua'acɨ'ɨti matɨj mana'a pua'amua ɨ mej yaujmua'ame'en pueen tɨ hua'aya'upua ayan tihué'itii, ajta tɨ pua'a cai a'atɨ ayan tyajamue'itii, aɨj xu cɨn cai yaujmua'ame'en pueen, silu aɨme xu pueen ɨ mej cha'a mana'a huanunu'eihuaca'a, ɨ maj cai tíya'upua. 9Ajta i'i, naimi'i tu tyatɨj tyana'a pua'amua teyan tíya'upuajcaa, tyajta tu teyan hua'astijra'acaa tyaɨjna cɨme'e maj tita'itiiri'i. Aɨj pu cɨn, eihua pu eitze'e ayan tiraavijte'e tej teyan ra'ara'astijre'en tyaɨjna ɨ taya'upua tɨ rusen cɨn seijre'e, tej ti jemin ruuri ta'ara'ani. 10Aɨme ɨ taya'upua, ayaa mu a'atzu mana'a a'ateevi'i meyan tita'itiiri'i a'ij tɨ tihua'aranajchaca'a. Ma ajta aɨn Dioj, ayaa pu een cɨn ayan ti'ita'itii tɨ ij rɨ'ɨ taaruuren, tej ti teyan urare'enya'acan cɨn huatyaturan tɨj ajta aɨjna. 11Ee xaa, capu naa tyu'ase tɨ pua'a auj ti'ita'itiira, silu tyaj tu rajpueijtzi. Ma ajta, tɨ'ɨj ajtahua'a rɨ'ɨ titaatyápua'arite'en tyej ti rɨ'ɨ ti'itachaɨ ta'ara'ani tyaɨjna cɨme'e tɨ ayan titaata'itiiri'i aɨjna cɨme'e ɨ tyaj rajpueijtzica'a. 12Aɨj pu cɨn, sata'aj huatyaujca'anyen. Caxu seyan seijra'a tɨj a'atɨ tɨ ruxaamɨste'e, tɨ cai ruca'anye ɨ rumuajca'a jetze, ajta rutunuj jetze. 13Sata'aj rɨ'ɨ huaujruuren nain cɨme'e sej si tyamua'a naa tityaaju'un ɨ Dioj jemi, sej si cai che'e a'ij pua'a huatzúna'iche'en, silu sej si huarún tyamua'a naa. 14Sata'aj saɨjna cɨn tyu'utatese'en saj ruxaahua ti'iteseijra'a naijmi'ica jemi ɨ tetyaca. Sata'aj sajta sej seyan urare'enya'acan cɨn huatyaturan ɨ a'amua tzajta'a, a'ini tɨ pua'a a'atɨ cai ayan uraré'en ɨ rutzajta'a, capu a'anaj raseijran ɨ tavastara'a. 15Caxu raata'acare'en tɨ saɨj muan ayan ti'itɨj cɨn autyaturan tɨ ij cai che'e Dioj ayan rɨ'ɨ tiraata'an. Rɨ'ɨ xu'u muan tɨ cai ayan huataseijre'en muejmi jemi a'atɨ tɨ ayan saɨque amuaaruuren tɨ ij ayan tyajamuaɨ'ɨtziite'en, tɨ ajta ayan ca'anijra'a hua'uta'an eihua ɨ tyaɨte mej mi meyan ti'itɨ cɨn autya'ɨtzen ɨ Dioj jemi. 16Rɨ'ɨ xu'u sajta, tɨ'ij cai a'atɨ ayan tyu'uxana'acɨre'en na'ari raatyaxaahua aɨjna tɨ Dioj raatyajtuaa itejmi jemi tɨj aɨjna ɨ Esaú. Aɨ pu ayan raatuaa aɨjna tɨ raacɨ'ɨtiiche'en, tɨ a'ara'an pueenya'a aɨjna cɨme'e tɨ Israel jetze ajtyama'acan. Aɨ pu ajta aɨn pueenya'a tɨ anacai huanu'eihuaca'a. Ajta ayaa pu een cɨn raatuaa aɨjna cɨme'e tɨ huata'icuataca'a. 17Sajta seri ramua'aree a'ij tɨ te'irajraa. Tɨ'ɨj ajtahua'a ayan raataxe'eve tɨ ayan tiraacɨ'ɨti aɨjna tɨ cɨn Dioj ayan rɨ'ɨ tiraatyajtuaani, ayaa pu raara'ityaca'a aɨjna ɨ ya'upuaara'an. Capu che'e huatarɨ'ɨristaraca'a tɨ caujxaahuata. Capu amɨn a'ij tɨ ajta ruyeinyaj rájhuau. 18Ajta, caxu seyan che'eta sana'a ajtyáxɨɨraca'a ɨ Dioj jemi matɨj aɨme ɨ maj maun a'atanye jɨri jetze a'u tɨ cai hua'uta'a maj japuan á'ujhua'anye'en, a'u tɨ jetzen eihua á'ataaca'a, a'u tɨ a'utɨca'acaa. Huapɨ'ɨ pu xaa huatɨca'acaa, ajta é'ecan mu viiyacaa apuutzari cɨme'e. 19Ajta ayan a'atɨ ucájijhuaca'a trompeeta jetze. Aj pu i seij ayan tyu'utaxajtaca'a. Huapɨ'ɨ pu tzɨɨni'ira'acaa tɨ namuajra'acaa. Aɨj mu cɨn meyan rájhuaviiri'i ɨ tyaɨte tɨ aɨn cai che'e ayan tihue'ixaatya'a. 20Ayaa mu huarɨj a'ini camu a'atzu ra'aviicue'iraca'a maɨjna tɨ ayan tihua'utaij tɨcɨn: “Tɨ pua'a ti'itɨ ayan japuan á'ucha'acanye'en ɨ jɨri, capu amɨn a'ij ti'itɨ tɨ pɨrɨcɨ, sata'aj seyan raatyatu'asixɨ'ɨn tetej cɨme'e.” 21Ee xaa nya'u, huapɨ'ɨ pu tzɨɨnisi'i seijra'acaa ɨ tɨ raaseij aɨjna ɨ Moisés tyaacan. Aɨj pu ayan tyu'utaxajtaca'a tɨcɨn: “Nenvivej nyaɨjna cɨme'e nyaj ti'itzɨɨnye'e.” 22Ma ajta, caxu seyan saujna ajtyáxɨɨraca'a, silu seij xu'u jetze, aɨjna ɨ jɨri tɨ ayan tyaja'arajtyahuaa tɨcɨn Sión, a'u tɨ e'eseijre'e aɨjna ɨ chajta'a a'u tɨ á'ucaj ɨ Dioj tɨ ruuri, aujna u Jerusalén tɨ ute'e e'eseijre'e. Au mu majta e'etyujsaɨre mui'itɨ ɨ mej tajapua ti'ivaɨre'e mej mi maujna tyu'uyesten. Majta ayaa mu pua'amua tɨ cai rɨ'ɨri tɨ a'atɨ ayan hua'uté'iten a'achu maj ara'ase. 23Muan xu sajta hua'a jamuan ajtyáxɨɨraca'a ɨ mej meyan e'etyujsaɨre maɨjna cɨme'e tɨ ayan che'eta tihua'acɨ'ɨti tɨj ayan tiraacɨ'ɨti aɨjna ɨ yaujra'an tɨ anacai huanu'eihuaca'a. Aɨ mu majta meri a'ayu'usi'i maujna u tajapua. Sajta muan, ayaa xu jemin ajtyáxɨɨraca'a saɨjna jemi tɨ hua'axɨjte'e ɨ tyaɨte. Ai pu aɨn pueen ɨ Dioj tɨ naijmi'ica ti'ijte'e. Muan xu sajta hua'a jamuan e'etyujsaɨ ɨ hua'axaijnyu'uca aɨme ɨ tetyaca ɨ maj urare'enya'acan cɨn huatyajturaa ɨ Dioj jemi, aɨme tɨ ajta Dioj hua'unáijmi'ire. 24Xu'uri sajta ajtyáxɨɨraca'a saɨjna jemi ɨ Jesús, aɨjna tɨ ayan raaxa'apɨ'ɨntare aɨjna cɨme'e ɨ nyuucari tɨ eitze'e re'en, tɨ ajtahua'a cɨn tya'ataujratziiri'i ɨ Dioj. Ajta aɨn ɨ xuura'ara'an tɨ aɨn ra'iraaxɨre, eitze'e pu re'enya'acan cɨn seijre'e ɨ Dioj jemi cai ɨ tɨ Abel tyaacan ya'urai, a'ini aɨjna tɨ Jesús ayan ra'iraaxɨre, ai pu aɨn pueen tɨ cɨn Dioj rɨ'ɨ titaatá'a itejmi. 25Rɨ'ɨ xu'u muan, sej si cai seyan raatyaxaahua saɨjna tɨ tyaja'amue'ixaate'e. Ee xaa nya'u, camu huataujvaɨ aɨme matɨ'ɨj raatyaxaahuataca'a aɨjna tɨ iiyan chaanaca japua tihua'utajée. Aɨj pu cɨn, capu a'atzu a'ij huatarɨ'ɨristari tej teyan huatyatavaɨre'en tɨ pua'a teyan raatyaxaahua tyaɨjna tɨ ayan ti'itajee tɨ ute'e e'eseijre'e. 26Ajna'ɨmɨ, aɨ pu raataruurajxɨ ɨ chaanaca tɨ'ɨj tyu'utaxajtaca'a. Ma ajta ijii, pu'uri ajtahua'a ayan tya'ataujratziiri'i tɨcɨn: “Nyajtahua'a nu neyan raataruurajxɨ'ɨsin nyaɨjna ɨ chaanaca, nyajta naijmi'i tɨj na'a tɨ e'eseijre'e u tajapua.” 27Aɨjna ɨ nyuucari tɨ cɨme'en yee “nyajtahua'a nu raataruurajxɨ'ɨsin”, ayaa pu huataujmua'a tɨ anacai raataruurajxɨ'ɨsin tɨj na'a tɨ tyu'utaavijhuaca'a. Aj pu'i ti'ityí'asin tɨ ij ayan huatyaturan aɨjna tɨ cai rɨ'ɨri tɨ a'atɨ ayan raataruurajxɨ'ɨn. 28- 29Aɨj pu cɨn, tiche'e tyaɨjna cɨn huatatatyamua'ave'en tyaɨjna cɨme'e tɨ ayan titáacɨ'ɨti tej tyaun a'utyaturan seij chuejra'a japua tɨ cai a'atɨ raayɨ'ɨtɨ tɨ raataruurajxɨ'ɨn. Aɨj pu cɨn, tiche'e tyajta teyan rana'amiche'en tyaɨjna ɨ Dioj a'ij tɨ tira'araanajchi. Tiche'e teyan ratzɨɨnya'a ra'ara'astijre'en, a'ini aɨjna ɨ Dioj ɨ tyaj rana'amiche, ayaa pu een tɨj taij tɨ nain ti'ita'iraca.

will be added

X\