Hebreos 11

1Ayaa pu ti'en tej teyan tya'atzaahuate'e, aɨj tu cɨn teyan ramua'aree tɨ ayan te'eme aɨjna ɨ tyaj cɨn ti'ichu'eve'e. Aɨj tu ajta cɨn ramua'aree tɨ ayan ti'ayajna ɨ tyaj cai rasise'ij. 2Aɨjna cɨn mej tya'antzaahua aɨme ɨ mej mejmi'i seijra'acaa ɨ tavaujsimua'acɨ'ɨ. Aɨj pu cɨn Dioj ayan rɨ'ɨ tihua'utyáxajtaca'a. 3Aɨjna cɨn tej tya'atzaahuate'e, aɨj pu cɨn ayan tita'amitejte'e tɨ naijmi'i tɨj na'a jiiji tɨ ti'iseijre'e, ayaa pu een cɨn huataseijre aɨjna cɨme'e tɨ cai seijra'acaa, a'ini Dioj pu ayan raataxajtaca'a. 4Aɨjna cɨn tɨ ayan tya'antzaahua aɨjna ɨ Abel tyaacan, aɨj pu cɨn ayan tyu'utamuaɨ'ɨvajtaca'a ɨ Dioj jemi ti'itɨ cɨme'e tɨ eitze'e re'enya'acan cɨn seijra'acaa ɨ Dioj jemi cai aɨjna tɨ cɨn tyu'utamuaɨ'ɨvajtaca'a aɨjna ɨ Caín tyaacan. Aɨj pu cɨn Dioj ayan cɨme'en tiraatyáxajtaca'a tɨ aɨn Abel urare'enya'acan cɨn huatyajturaa ɨ jemin aɨjna cɨme'e tɨ ra'ancura'a aɨjna tɨ cɨn tyu'utamuaɨ'ɨvajtaca'a. Ajta aɨn ɨ Abel, aɨ pu xaa huamɨ'ɨ. Ma ajta, auche'e pu ti'ita'ixaate'e aɨjna cɨme'e tɨ tya'antzaahua. 5Aɨjna cɨn tɨ tya'antzaahua aɨjna ɨ Enóc, aɨj pu cɨn Dioj ayan ya'uvi'itɨ u tajapua tɨ ij cai raacɨ'ɨti ɨ tɨ huamɨ'ɨni. Majta ɨ seica, camu me'e yá'utyau aɨjna cɨme'e tɨ Dioj ya'uvi'itɨ. Ayaa mu cɨme'en tyu'utyaxajtaca'a tɨ nu'u ra'aranajchaca'a ɨ Dioj a'ij tɨ ti'ityújchaɨca'a. 6Ajta tɨ pua'a a'atɨ cai tya'atzaahuatya'a, capu a'atzu rɨ'ɨri tɨ aɨn a'atɨ ayan huarɨni a'ij tɨ tira'araanajchi ɨ Dioj. Ayaa pu ti'en, a'ini tɨ pua'a a'atɨ ayan raxe'eva'a tɨ vejli'i ajtyaxɨɨre ɨ Dioj jemi, anacai pu ayan ruxe'eve'e tɨ aɨn a'atɨ ayan tya'antzaahuate'en tɨ Dioj seijre'e, ajta tɨ aɨn Dioj ayan rɨ'ɨ tihua'ata'aca aɨme ɨ maj a'ujca'anyaacan cɨn rahuauhuau. 7Aɨ pu ajta tya'antzaahua aɨjna ɨ Noé tyaacan. Aɨj pu cɨn, tɨ'ɨj Dioj ayan tiraatányuuche aɨjna cɨme'e tɨ nu'u ayan tyaja'ure'enyejsin, aj pu'i aɨn Noé rá'antzaahua, ajta e'eyan raatyataahuaca'a aɨjna ɨ canuuhua'a tɨ ve'e, tɨ'ij ajta cɨn hua'utavaɨ ɨ rutyaɨtestyamua'a maj cai huacui'ini. Ayaa pu aɨjna cɨn huarɨj, aɨ pu hua'uta'a aɨme ɨ mej iiyan japuan seijra'acaa ɨ chaanaca maj raamua'aree maj cai xa'apɨ'ɨn rɨjcaa ɨ Dioj jemi. Aɨj pu cɨn, ayaa pu tiraacɨ́'ɨ aɨjna ɨ Noé tyaacan tɨ'ij ayan urare'enya'acan cɨn huatyaturan ɨ Dioj jemi aɨjna cɨme'e tɨ tya'antzaahua. 8Ayaa pu che'eta na'a tya'antzaahua aɨjna ɨ Abraham tyaacan. Aɨj pu cɨn ayan ra'ara'astijre tɨ'ɨj Dioj ayan raataityaca'a tɨ aun a'ura'ani aujna a'u tɨ ya'acɨ'ɨti. Aɨj pu cɨn, aɨn cai ramua'areeraca'a a'u tɨ a'umej, aɨ pu aun á'uraa. 9Aɨjna cɨme'e tɨ tya'antzaahua, aɨ pu a'ucatii a'u tɨ cai e'ema'acan, aɨjna seij chuejra'a japua tɨ cɨme'en Dioj ayan tya'ataujratziiri'i tɨ ayan ya'acɨ'ɨti. Au pu a'ucatii navij chi'ira'a jete aɨjna jamuan ɨ Isaac tyaacan, ajta aɨjna ɨ Jacobo tyaacan, ɨ tɨ hua'a jemi Dioj ayan che'eta na'a aɨjna cɨn tya'ataujratziiri'i tɨ ayan tihua'ucɨ'ɨti tɨj ajta ti'ijcɨ'ɨti aɨjna ɨ Abraham tyaacan. 10Aɨj pu cɨn ayan huarɨj a'ini ayaa pu ti'ijchu'eva'acaa tɨ aun a'utyarute ajna chajta'a tɨ cai ja'atɨ a'anaj ratyáuuna aɨjna cɨme'e tɨ Dioj rusaɨj ráasɨɨmua'a a'ij tɨ seira'a a'ame, ajta rá'ajtaahuaca'a. 11Aɨjna cɨme'e tɨ tya'antzaahua aɨjna ɨ Sara tyaacan, aɨj pu cɨn Dioj ayan tiraata'a tɨ ayan pa'arɨ'ɨ huataseijre'en ɨ jetzen, capu amɨn a'ij tɨ ari huapɨ'ɨ ucaristaca'a. Ayaa pu aɨjna cɨn ayan tiraacɨ́'ɨ aɨjna cɨme'e tɨ ayan tira'amitejtya'acaa tɨ aɨn Dioj ayan araurastejsin aɨjna cɨme'e ɨ tɨ cɨn tya'ataujratziiri'i. 12Aɨj mu cɨn meyan a'iráanye mui'itɨ maɨjna jetze saɨj tɨ ari á'ame'erajcaa. Ayaa mu mui'itɨ huataseijre ɨ yaujmua'ame'en matɨj mana'a pua'amua ɨ xu'ura'ave ɨ maj ute'e e'eseijre'e, nusu matɨj majta meyan a'asica'a tɨj ɨ sej tɨ aun a'ajca a'u tɨ a'avastɨme ɨ jaj tɨ ve'e. Ayaa mu mui'icaa tɨ cai rɨ'ɨri tɨ a'atɨ hua'uté'iten. 13Naimi'i aɨme maj cai xɨ ra'ancura'acaa maɨjna tɨ cɨn Dioj tya'ataujratziiri'i aɨjna cɨme'e mej tya'antzaahua, aɨ mu huacuii. Cu xuee mu'uri a'ɨmɨ raseira, majta a'ɨmɨ a'utyáuu maraatataujte maɨjna tɨ tihua'acɨ'ɨti aɨjna cɨme'e mej tya'antzaahua. Ayaa mu maɨjna cɨn huarɨj, ayaa mu majta maɨjna cɨn raataxajtaca'a yee maj cai hua'a jetze ajtyama'acantacaa aɨme ɨ mej iiyan huachaatɨme chaanaca japua, majta ca'anyejri cɨn u a'araacɨ ɨ ruche. 14Ajta, tɨ pua'a meyan ti'ixajta ɨ tyaɨte matɨj aɨme, ayaa pu huataujmua'a aɨjna ɨ mej meyan ti'ixa tɨcɨn mu'uri seij chuejra'a úuhuaumen a'u maj a'uté'en. 15Ajta aɨjna ɨ seij chuejra'a ɨ maj nu'u rúuhuaumen, capu ajna pɨtyaja'arɨcɨ a'u maj u ja'aráacɨ, a'ini tɨ pua'a meyan ra'utamua'aréeranche'e maɨjna ɨ chuejra'a ɨ maj japuan a'araacɨ, ayaa pu rɨ'ɨrístaca maj huara'acɨɨne. 16Ma majta aɨme, mu'uri meyan raxe'eva'acaa maj aun a'uté'en seij chuejra'a japua tɨ eitze'e re'en. Ayaa pu huataujmua'a aɨjna ɨ nyuucari tɨcɨn seij chuejra'a mu uhuauumen tɨ tajapua e'eseijre'e. Aɨj pu cɨn, capu ratevi'iraste'e ɨ Dioj mej meyan raatámua'ati tɨcɨn hua'a Dioj pu pueen, a'ini aɨ pu ari rɨ'ɨ raaruu seij chajta'a a'u mej a'utyaturan tɨj na'a rusen cɨme'e. 17- 18Aɨjna cɨme'e tɨ tya'antzaahua aɨjna ɨ Abraham tyaacan, aɨj pu cɨn tɨ'ɨj Dioj ayan raateeseij, aɨ pu raatamuaɨ'ɨvajtaca'a ɨ ruyauj aɨjna ɨ Isaac tyaacan. Aɨjna ɨ a'atɨ tɨ ra'ancura'a aɨjna tɨ cɨn tya'ataujratziiri'i ɨ Dioj, aɨ pu ajta ayan titauura'acara'a tɨ raatamuaɨ'ɨvajta ɨ ruyauj tɨ saɨj na'a pueen, tɨ ajta cɨme'en Dioj ayan raataxajtaca'a tɨcɨn: “Naimi'i ɨ mej a'iranyejsin mueetzi jetze, ayaa mu raatámua'atzi tɨcɨn hua'aya'upua pu pueen aɨjna ɨ Isaac.” 19Aɨj pu cɨn ayan tira'amitejtya'acaa aɨjna ɨ Abraham tɨ aɨn Dioj raayɨ'ɨtɨhua'a tɨ hua'ajjajpuan aɨme ɨ tetyaca ɨ mej meri huacuii. Ajta, tɨ'ɨj Dioj ayan raatatui ɨ yaujra'an, ayaa pu tiraatamitejte tɨ aɨn Isaac a'itáraa hua'a tzajta'a ɨ mej meri huacuii. 20Aɨjna cɨme'e tɨ ajta tya'antzaahua aɨjna ɨ Isaac tyaacan, aɨj pu cɨn ayan rájhuaviiri'i ɨ Dioj tɨ aɨn rɨ'ɨ tihua'utyajtuaani majca'ihua yee ɨ yaujmua'ame'en aɨjna ɨ Jacobo tyaacan, ajta aɨjna ɨ Esaú tyaacan. 21Aɨjna cɨme'e tɨ tya'antzaahua aɨjna ɨ Jacobo tyaacan, aɨj pu cɨn tɨ'ɨj ari á'ame'erajcaa, aicaujtutá japuan ɨ ru'itzɨj, rɨ'ɨ tihua'utyajtuaa seij ajta seij ɨ yaujmua'ame'en aɨjna ɨ José tyaacan. Aɨ pu ajta rana'amicha'a ɨ Dioj. 22Aɨjna cɨme'e tɨ tya'antzaahua aɨjna ɨ José tyaacan, aɨj pu cɨn, tɨ'ɨj ari vástacɨra'icaa, ayaa pu tihua'uta'ixaa aɨjna cɨme'en maj nu'u meyan huiiraaju'un aɨme ɨ mej Israel jetze ajtyama'acantacaa mej mi seij chuejra'a japua a'uté'en. Ajta pu ayan tihua'utaij a'u maj tyaja'ava'anan ɨ ti'icariira'an. 23Aɨjna cɨme'e mej tya'antzaahua ɨ vaujsimua'ame'en aɨjna ɨ Moisés tyaacan, aɨj pu cɨn, tɨ'ɨj huanu'eihuaca'a, aɨ mu raatya'avaataca'a hueica maxcɨra'i cɨme'e a'ini ayaa pu tihua'amitejtya'acaa tɨ naa seijra'acaa aɨjna ɨ pa'arɨ'ɨ. Majta, camu raatatzɨn aɨjna ɨ tɨ cɨn tyu'utaijtaca'a aɨjna ɨ rey maj nu'u hua'ucui'ini ɨ tɨ'ɨri mej tetyaca. 24Aɨjna cɨme'e tɨ tya'antzaahua aɨjna ɨ Moisés tyaacan, tɨ'ɨj ari vástacaa, capu huataura'a mej meyan raatámua'ati tɨcɨn yaujra'an pu pueen aɨjna ɨ jɨita'a ɨ rey tɨ rape'eri. 25Ayaa pu tiraaxa'apɨ'ɨntare tɨ ayan rajpueitzi a'ara'ani aɨme jamuan ɨ tyaɨtestyamua'ame'en pueen ɨ Dioj. Ajta, capu a'atzu ra'aranajchaca'a tɨ ayan a'atzu a'ateevi'in huataujtyamua'ave'en aɨjna cɨme'e tɨ ayan huarɨni aɨjna tɨ a'ij pua'a een ɨ Dioj jemi. 26Ayaa pu tira'amitejtya'acaa tɨ ayan eitze'e ratyava'ɨri mej meyan tirá'uxaahuari'i Cɨriistu'u jetze ma'acan cai tɨ ayan tiratyava'ɨri tɨj na'a tɨ huapɨ'ɨ ti'ijnajchi ɨ mej tí'ijcha'ɨ aɨme ɨ mej tí'ijtacaa aujna u Egipto. Ayaa pu een cɨn ayan rachu'eva'acaa aɨjna tɨ tiraacɨ'ɨti ɨ Dioj jemi. 27Aɨjna cɨme'e tɨ tya'antzaahua, aun pu a'arajraa u Egipto. Ajta, capu raatatzɨn tɨ pua'a eihua huapɨ'ɨ huatanyu'ucan aɨjna ɨ rey, silu tyamua'a pu tya'utaviicue'iri'i. Cu xuee tɨ cuj a'ɨmɨ raseiraca aɨjna ɨ Dioj tɨ cai seijre'e. 28Aɨjna cɨme'e tɨ tya'antzaahua, aɨj pu cɨn ayan tya'ara'aste aɨjna xɨcajra'a tɨ jetzen Dioj tihua'utauuni'i. Ayaa pu een cɨn ra'ajtyapɨtijraxɨ xuure'e cɨme'e tɨ i cai ayan tihua'ucɨ'ɨti aɨjna tɨ hua'acui'ini aɨme ɨ maj anáatyá'a huanunu'eihuaca'a. 29Aɨjna cɨme'e mej tya'antzaahua ɨ tyaɨte, aɨj mu cɨn meyan antacɨj ɨ jaj japua tɨ ve'e tɨ ayan tyaja'arajtyahuaa tɨcɨn Jaj tɨ Pa'u. Ayaa mu japuan antacɨj tɨj chuej tɨ huachi. Ma majta, aɨme ɨ maj Egipto e'ema'acantacaa, matɨ'ɨj meyan raataxe'eve mej meyan che'eta mana'a huarɨni, matɨ'ɨj mi auujamɨj. 30Aɨjna cɨme'e mej tya'antzaahua ɨ mej Israel jetze ajtyama'acantacaa, aɨj pu cɨn matɨ'ɨj meri arahua'apua xɨcaj pua'amua ataujnajchaca'a aujna chajta'ana, aj pu'i a'avatzɨ ɨ jaxu'u ɨ tɨ cɨn ra'anami'ihuaca'a aujna chajta'ana, u Jericó. 31Aɨjna cɨme'e tɨ tya'antzaahua aɨjna ɨ Rahab tyaacan, aɨjna ɨ jɨita'a tɨ huá'ajijva'aca'a mej mi jamuan ji'ipitya'a, a'ini aɨ pu tyamua'a naa hua'ancure'evi'itɨ aɨme ɨ mej meyan tyu'iré'ixe'ere'en ɨ chajta'ana, aɨj pu cɨn cai huamɨ'ɨ hua'a jamuan ɨ maj cai ra'ara'astijre ɨ Dioj. 32¿Ti'itajni nyajtahua'a jamuaata'ixaate'en? Capu ti'icɨ'ɨpe nyej neyan tyajamuaata'ixaate'en a'ij mej huarɨj aɨjna ɨ Gedeón tyaacan, ajta aɨjna ɨ Barac tyaacan, ajta aɨjna ɨ Sansón tyaacan, ajta aɨjna ɨ Jefté tyaacan, ajta aɨjna ɨ David tyaacan, ajta aɨjna ɨ Samuel tyaacan, majta aɨme ɨ maj Dioj jetze ma'acan ti'ixaxa'ata'a. 33Ayaa mu hua'utyaamue'itɨ aɨme ɨ maj títyatatyá'acaa ɨ rey cɨme'e seij chuejra'a japua, majta rɨ'ɨ tyu'utaijtaca'a, majta ra'ancura'a aɨjna tɨ cɨn Dioj tya'ataujratziiri'i. Majta seica meyan hua'ancaanajxɨ hua'ateni'itze'en ɨ muajyete. Matɨj mana'a mej meyan huarɨj, ayaa mu maɨjna cɨn huarɨj aɨjna cɨme'e mej tya'antzaahua. 34Majta seica meyan ra'uje'ica ɨ taij tɨ ij cai hua'utyataira, majta seica huatauruu mej mi cai hua'ucui'ini. Ayaa pu tihua'uruu aɨme ɨ maj cai rucaca'anyajcaa. Ca'anijra'a pu xaa hua'uta'a mej mi meyan huatyaujca'anyen tyamua'a naa. Matɨ'ɨj mi meyan hua'utyaamue'itɨ matɨj mana'a maj cɨn huanya'use, majta hua'utamuari aɨme ɨ xantaaru'u ɨ mej seij chuejra'a japua e'ema'acantacaa. 35Majta aɨme ɨ juuca, ayaa mu majtahua'a hua'ancure'evi'itɨ ɨ rutyaɨtestyamua'a ɨ maj majtahua'a a'itacɨj hua'a tzajta'a ɨ mej meri huacuii. Majta seica, ayaa mu rajpueiitzi mua'araa maɨjna cɨme'e maj cai hua'ata'acara'a maj hue'irajtuaani a'u maj hua'ityaana. Ayaa mu een cɨn huarɨj maɨjna cɨme'e mej meyan rachu'eva'acaa maj majtahua'a huatarun mej mi maun ruuri a'utyaturan seij chuejra'a japua tɨ eitze'e re'en. 36Majta seica meyan rajpueiitzi mua'araa maɨjna cɨme'e maj hua'uxaahuari'iri'i nusu maj hua'utyaavajxɨ na'ari maj hua'anaajɨ'ɨca'axɨ cadeena cɨme'e na'ari maj hue'ityaana. 37Ayaa mu majta hua'uruu. Mahua'utyatu'asixɨ tetej cɨme'e. Majta e'ita'a hua'utáveichixɨ. Majta hua'ucuii chun cɨme'e tɨ ruxa'ajta'a camɨɨmɨjmee. Ayaa mu e'enye'en ti'itechajca'a maɨjna cɨme'e ɨ hua'anavij ɨ canya'axɨ nusu ɨ hua'anavij ɨ caurasi. Camu a'ij ti'ijviicue'iracaa. Eihua mu rajpueijtzica'a. Majta a'ij mu pua'a tihua'ajchaɨca'a. 38Camu huatyéechi'icaa. A'u tɨ na'a mu a'ujhua'anya'acaa a'u tɨ cai e'eti'itɨjcaa, majta a'u tɨ huájɨrima'acaa. Majta au mu e'echajca'a a'u tɨ e'etyasta'a, majta maujna cuuni'istya'a, ajta a'u tɨ a'ucucu'unijmee tɨj na'a iiyan chaanaca japua. Ma majta aɨme, eihua mu huapɨ'ɨ eitze'e ti'ivaɨra'acaa ɨ Dioj jemi macai aɨme ɨ maj cai hua'axe'eva'acaa. 39- 40Dioj pu ayan rɨ'ɨ tihua'utyajtuaa naijmi'ica aɨjna cɨme'e mej tya'antzaahua. Ma majta aɨme, camu xɨ ra'ancura'a aɨjna tɨ cɨn Dioj tya'ataujratziiri'i aɨjna cɨme'e tɨ Dioj ari titaaxa'apɨ'ɨntari'iri'i itejmi jemi aɨjna tɨ eitze'e re'en tɨ aɨn ayan tejmi jamuan hua'unaijmi'ire'en aɨme.

will be added

X\