Hebreos 1

1Ayaa pu jajcua ɨmɨ Dioj mui'itɨ tihua'uta'ixaa ɨ tavaujsimua'acɨ'ɨ, mui'icaca cɨme'e ɨ nyuucari. Ajna'ɨmɨ Dioj pu ayan seica huataityaca'a mej mi tyu'utaxaj Dioj jetze ma'acan. 2Ma ajta ijii, tyaj huatyaɨte, tɨj na'a tɨ nain araurastejsin, aɨn Dioj ayan tiraijca ɨ ruyauj tɨ ij aɨn titaata'ixaate'en ɨ Dioj jetze ma'acan. Aɨ pu ajta ayan ra'antihuau tɨ'ij nain ti'ijcɨ'ɨti aɨjna ɨ ruyauj. Dioj pu ajta jamuan tyu'utaahuaca'a ɨ chaanaca ɨ tyaj japuan yan seijre'e. 3Ajta aɨn ɨ yaujra'an, ayaa pu nain cɨn che'eta na'a rɨ'ɨ huapɨ'ɨ naa seijre'e tɨj ajta ɨ Dioj. Ajta ɨ tevijra'an, ayaa pu che'eta na'a seijre'e tɨj ajta ɨ Dioj. Aɨ pu ajta ravi'i tɨj na'a tɨ iiyan ti'iseijre'e ɨ chaanaca japua, ajta u tajapua. Runyuuca pu cɨn huapɨ'ɨ antyujmua'aree, aɨ pu ayan rɨcɨ tɨ'ij a'ateevi'in. Tɨ'ɨj aɨn yaujra'an tihua'aca'ari'iri'i ɨ maj cɨn autyajturaa ɨ Dioj jemi, aj pu'i aun a'ujyeijxɨ ɨpuari japua ɨrɨɨta'an aɨjna tɨ nain cɨn antyujmua'aree, tɨ ute'e e'eseijre'e. 4Ayaa pu een cɨn huarɨj, ajta ayan te'irajraa tɨ aɨn ayan huapɨ'ɨ eitze'e re'enya'a a'araa macai aɨme ɨ xaijnyu'ucari ɨ maj tajapua ti'ivaɨre'e. Ajta eihua pu eitze'e ti'ivaɨre'e ɨ Dioj jemi aɨjna ɨ nyuucari tɨ cɨn Dioj ari raatamuá'a ɨ ruyauj cai aɨjna ɨ nyuucari tɨ ajta cɨn hua'utamuá'a aɨme ɨ mej tajapua ti'ivaɨre'e. 5Ayaa pu'u xaa, Dioj capu a'anaj ayan tiraata'ixaa seij tɨ hua'a jetze ajtyama'acan tɨj ayan tiraata'ixaa ɨ ruyauj tɨcɨn: Muaa paj niyauj pueen. Nyajta inyaa, ijii nu mua'antíhuau. Ajta ayan tɨcɨn: Nyaa nu ya'upuaara'an pueenya'a na'ame. Ajta amɨn, amɨ pu niyauj pueenya'a a'ame. 6Ajta, tɨ'ɨj ayan ya'araavi'itɨ iiyan chaanaca japua aɨjna tɨ jajcua ɨmɨ seijra'acaa, ayaa pu tyu'utaxajtaca'a tɨcɨn: Miche'e maɨn raatyaanajche matɨj mana'a pua'amua ɨ mej ti'ivaɨre'e ɨ Dioj jemi. 7Ajta, ayaa pu hua'a cɨme'en ti'ixa aɨme ɨ maj tajapua ti'ivaɨre'e tɨcɨn: Ayaa pu hua'aruure aɨme ɨ mej ti'ivaɨre'e u tajapua mej mi meyan seijra'a tɨj aaca, majta mej mi meyan seijra'a tɨj taij tɨ a'ataa aɨme ɨ tɨ tihue'ijte'e. 8Ma ajta, cɨme'en ɨ ruyauj, ayaa pu ti'ixa tɨcɨn: Muaa, mɨ paj Dioj pueen, muaa paj anti'amua'areera pua'ame tɨj na'a rusen cɨme'e. Papu'uri icu ru'iteechui ɨ ’itzɨj ɨ maj cɨn raamua'aree paj uraré'en cɨn seijre'e, paj pajta xa'apɨ'ɨn ti'ijta a'ij tɨ tiraavijte'e. 9Muaa paj raataxe'eve maj rɨ'ɨ ti'ityujcha'ɨ tzaahuati'ira'a cɨme'e. Ajta, capu a'atzu mua'aránajchaca'a maj a'ij pua'a ti'ityújchaɨca. Aɨj pu cɨn, aɨn Dioj ɨ paj jemin seijre'e, aɨ pu ayan rɨ'ɨ timuaatyajtuaa pata'aj eitze'e huata'atyamua'ave'en macai aɨme ɨ mej mueetzi jamuan seijre'e. 10Ajta ayan tɨcɨn: Muaa, nyavastara'a, jajcua ɨmɨ paj raatyataahuaca'a ɨ chaanaca. Ajta, tɨj na'a tɨ iiyan seijre'e u tajapua, amuajca'a paj cɨn raatyataahuaca'a. 11Aɨ pu te'entipua'ari tɨj na'a pua'amua tɨ ti'iseijre'e. Ma pajta muaa, pauche'e paj huatyavaa pua'ame. Ajta tɨj na'a tɨ tyu'utaavijhuaca'a, ayaa pu tyu'utémí'ima'acantari tɨj cɨɨxuri tɨ cai che'e ti'itɨj vaɨre'e. 12Ayaa paj raatyáxu'uta'inaxɨ'ɨsin tɨj cɨɨxuri tɨ mi'ima'acan, ɨ maj raatyajtutzi. Naimi'i pu saɨque ruruuren. Ma pajta muaa, pauche'e peyan che'eta pana'a seijre'e tɨj na'a rusen cɨme'e. Capaj a'anaj á'apua'aren. 13Dioj capu a'anaj ayan tiraata'ixaa seij tɨ tajapua ti'ivaɨre'e silu ruyauj pu xaa ayan tyu'uta'ixaa tɨcɨn: Pata'aj ye a'ujyéijxɨ'ɨn nya'ɨrɨɨta'a. Pata'aj peyan huacati asta nyana'a cai hua'antimue'itɨn aɨme ɨ maj muájchaɨre'e mej mi meyan timua'ara'astijre'en mueetzi. 14Capu xaa nya'u ayan tihua'uta'ixaa aɨme ɨ mej tajapua ti'ivaɨre'e a'ini aɨ mu aɨn pueen ɨ xaijnyu'ucari tɨ Dioj ayan tihue'ijte'e mej mi meyan ti'ivaɨra'a ma'ujhua'anye'en, mej mi hua'utyavaɨre'en aɨme ɨ tɨ hua'acɨ'ɨti tɨ Dioj hue'irajtuaani.

will be added

X\