Gálatas 6

1Nye'ihuaamua'a, tɨ pua'a saɨj muan autyaturan ti'itɨj cɨme'e, sata'aj seyan huarɨni. Che'e saɨj muan rɨ'ɨ raaruuren. Ajta aɨn tɨ rɨ'ɨ raaruurejsin, che'e aɨn pueenya'a ɨ tɨ eitze'e araujca'anye aɨjna jetze ɨ xaijnyu'ucara'ara'an ɨ Dioj. Che'e ajta rɨ'ɨ ti'ityujchaɨcan cɨn ayan rɨ'ɨ raaruuren, ajta cai yá'uhua'anan tɨ í'irɨni tɨ ti'itɨ ca'anijra'a raata'an tɨ ij ayan che'eta na'a autyaturan tɨj ajta ɨ saɨj. 2Sej si ra'ara'astijre'en ɨ nyuucari tɨ Cɨriistu'u jetze ma'acan. Ruxe'eve'e sej seyan huataujvaɨre'en seij ajta seij saɨjna cɨme'e tɨ a'atɨ tya'utaviicue'i aɨjna tɨ raatamuáre'eriste'e. 3Ayaa pu'u, a'ini tɨ pua'a a'atɨ ayan tiraatamitejtya'a tɨ aɨ pu mijmu eihua ruxe'eve'e, tɨ pua'a cai ti'itɨ, aɨ pu rucuanamuan rusaɨj ɨ rutzajta'a. 4Ma ajta, che'e ayen eenye'en tɨ a'atɨ tɨ na'a ayan tiraamua'ati a'ij tɨ ti'imɨjhuaca rusaɨj. Tɨ'ɨjta ayan huarɨn, aj pu xaa rɨ'ɨriista a'ame tɨ ahuaujtzaahuate'en, aru aɨ pu'u na'a aɨjna cɨme'e tɨ ari tyu'uruu rusaɨj. Capu che'e ruxe'eva'a a'ame tɨ aɨn ayan ahuaujtzaahuate'en aɨjna cɨme'e tɨ ayan nu'u eitze'e ruxe'eve'e cai ɨ ruxa'a tevi. 5Che'e ayan eenye'en a'ini ayaa pu ruxe'eve'e tɨ a'atɨ tɨ na'a ayan ra'aviicue'iran aɨjna cɨme'e tɨ raatamuáre'eriste'en. 6Ajta aɨme tɨ a'atɨ ayan tihua'amua'ate a'ij tɨ te'eyu'usi'i ɨ yu'uxari jetze, miche'e maɨn cɨj tiraata'an ɨ tɨ cɨn huataujvaɨre'en aɨjna tɨ tihua'amua'ate. 7Caxu seyan rucuanamua. Capu rɨ'ɨri saj ra'utaxaahuari'i ɨ Dioj, a'ini aɨ pu tyu'utanajchita a'ij tɨ tiraavijte'e. A'achu saj caj tyu'uta'an, ayaa pu che'eta na'a tyaja'amuacɨ'ɨti. 8Aɨjna ɨ a'atɨ tɨ ayan ti'ityujcha'ɨ tɨ ij ayan rɨ'ɨ tiraata'an ɨ ruxé'evi'ira'a tɨ a'ij pua'a een tɨ huiiraninyei ɨ tzajta'an, ayaa pu tiraacɨ'ɨti tɨ tyaja'uraiini aɨjna cɨme'e ɨ ruxé'evi'ira'a tɨ a'ij pua'a een. Ajta aɨn ɨ a'atɨ tɨ ayan rɨ'ɨ ti'ityujcha'ɨ tɨ ayan rɨ'ɨ tiraata'an aɨjna ɨ xaijnyu'ucara'ara'an ɨ Dioj, ayaa pu tiraacɨ'ɨti tɨ ayan ruurican huatyaturan ɨ Dioj jemi para rusen cɨme'e. 9Tiche'e cai taxaamɨstya'a tyaɨjna cɨme'e tej teyan raruure ɨ tɨ i'i xa'apɨ'ɨn, a'ini tɨ'ɨj ajna tyaja'ure'enyen a'anaj tɨ huaujxa'apɨ'ɨntare, tɨ pua'a tyacai anacaican raataxaahuata, ajna xɨcajra'a jetze pu xaa titáacɨ'ɨti nain a'ij tɨ tiraavijte'e. 10Aɨj pu cɨn, tɨj na'a tɨ ayan titáacɨ'ɨti tej teyan huarɨni, tiche'e teyan rɨ'ɨ tihua'uchaɨn ɨ taxa'a tyaɨte. Tyata'aj eitze'e rɨ'ɨ tihua'uchaɨn aɨme ɨ maj majta tajamuan tya'atzaahuate'e. 11Rɨ'ɨ xu'u muan tiraaseij a'ij nyaj va'acan cɨn tira'uyu'uxaca'a ɨ nyamuajca'a cɨme'e. 12Ma majta, aɨme ɨ maj a'amua'ɨtziite'e, ayaa mu'u een cɨn ti'ityese'e sej si ca'anyejri cɨn ra'antisijchixɨ'ɨn ɨ runavij mej mi rujɨɨmua'a mana'a huataujvaɨre'en. Camu raxe'eve'e tɨ pueijtzi hua'uta'an aɨjna cɨme'e maj nu'u majta ra'ara'astijre'en maɨjna ɨ Cɨriistu'u ɨ tɨ áutataihuaca'a ɨ curuu jetze. 13Aɨ mu huataura'a mej mi ra'antisijche ɨ runavij, ma majta cai camu ra'ara'astijre'e ɨ nyuucari ɨ maj cɨn tie'ijta. Ayaa mu'u raxe'eve'e mej mi amuaataseijrate'en aɨme ɨ maj Israel jetze ajtyama'acan mej mi maɨjna cɨn ahuaujtzaahuate'en aɨme jemi ɨ saj nu'u ra'antisijchaca'a ɨ runavij. 14Me nyajta inyaa, che'e nyaj cai a'anaj ahuantzaahuate'en ti'itɨj cɨme'e silu che'e aɨ pu'u na'a tɨ Cɨriistu'u nyej jetze ma'acan rajpueijtzi a'araa ɨ curuu jetze. Aɨj pu cɨn nyacai che'e ra'ara'astijre'en ɨ tihua'aye'ira aɨme ɨ maj yan chaanca japua huachaatɨme. Aɨj mu majta cɨn nyeijchaɨre'e inyeetzi. 15Ayaa nu tyaja'amue'ixaate'e a'ini capu che'e ti'itɨj nyejetze ruxe'eve'e tɨ pua'a a'atɨ ra'antisijchaca'a ɨ runavij nusu cai. Ai pu'u xaa Dioj jetze ruxe'eve'e tɨ aɨn a'atɨ saɨque tyu'umua'ati tɨ ij rujajcuatze'en huatyaturan jemin ɨ Dioj. 16Che'e Dioj hua'utyapua'arite'en, ajta hua'ancu'uvajxɨ'ɨn a'achu maj mana'a pua'amua ra'ara'astijre'en aɨjna ɨ nyuucari, a'ini ai mu aɨn pueen ɨ maj Israel jetze ajtyama'acan, ɨ tyaɨtejra'an ɨ tɨ Dioj hua'antihuau. 17Aɨj pu cɨn ijii tɨ yu auca'itɨ a'ame, che'e cai che'e a'atɨ nya'ɨtziitya'a, a'ini tyamua'a nu neri nicu ti'icapita'inara'a nyaɨjna cɨme'e ɨ nyaj rajpueijtzi ɨ Jesús jetze ma'acan. 18Che'e aɨn tavastara'a, aɨjna ɨ Jesús tɨ ajta i'i Cɨriistu'u, che'e aɨn rɨ'ɨ tyajamuaata'an ɨ a'amua tzajta'a, mɨ sej nye'ihuaamua'a pueen. Ayaa pu'u, che'e ayan tya'ara'ani.

will be added

X\