Gálatas 5

1Cɨriistu'u pu tu'irajtuaa tej ti taxaahua á'ujhua'anye'en. Aɨj xu cɨn, caxu che'e taura'acare'en sej seyan ca'anyejri cɨn ti'imuara'a. Aɨ pu xaa a'amuamuare'eristaa a'ame. 2Nyajta inyaa, i nyaj i'i Pablo, ayaa nu tyaja'amue'ixaate'e. Tɨ pua'a seyan huataura'an maj ra'antisijchixɨ'ɨn ɨ a'amua navi jetze, capu che'e a'atzu jamuaatyavaɨre'esin ɨ Cɨriistu'u. 3Nyajta nu neyan tiraata'ixaate'esin tzaahuati'ira'a cɨme'e a'atɨ tɨ na'a tɨ ayan huataura'an maj ra'antisijche ɨ naviira'an jetze, ayaa pu ajta ruxe'eve'e tɨ aɨn nain cɨn ra'ara'astijre'en tɨj na'a a'ij tɨ te'eyu'usi'i jetzen ɨ nyuucari ɨ maj cɨn tie'ijta. 4Muan, mɨ saj nu'u seyan rahuauhuau sej si urare'enya'acan cɨn huatyaturan ɨ Dioj jemi, muan xu seri ma ruurai saɨjna ɨ Cɨriistu'u. Muan xu ajtacɨ́j jemin aɨjna ɨ tɨ rɨ'ɨ tyajamuaata'a. 5Me tyajta ityan, tyan tu tyaɨjna jetze arataca'anye ɨ xaijnyu'ucara'ara'an ɨ Dioj tyaɨjna cɨme'e tej tya'atzaahuate'e. Ayaa tu een cɨn ta'ataca'anyaacan cɨn rachu'eve'en tɨ ayan titáacɨ'ɨti tej ti teyan urare'enya'acan cɨn huatyaturan ɨ Dioj jemi a'ij tej ti'ijxe'eve'e. 6Ayaa pu'u ti'en, a'ini ɨ Cɨriistu'u jemi, capu a'atzu jetzen ruxe'eve'e tɨ pua'a a'atɨ ari ra'antisijchaca'a ɨ runavij nusu cai. Ma ajta, aɨ pu xaa jetzen ruxe'eve'e tɨ a'atɨ ayan hua'utaxe'eve'en ɨ tyaɨte aɨjna cɨme'e tɨ tya'atzaahuate'e tzaahuati'ira'a cɨme'e. 7Tyamua'a xu sejmi'i seyan ti'ijrɨ'ɨrajcaa. ¿A'ataani tyájámua'antyú'uuni'iri'i sej si cai che'e seyan ra'astijre'e saɨjna ɨ nyuucari tɨ ayan ti'ayajna? 8Capu xaa nya'u ayan ca'anijra'a amuaata'aca aɨjna tɨ á'amuajee, silu seij pu a'atɨ jetze ma'acan. 9Ayej nya'ase tɨ ayan che'eta na'a a'amuaruure tɨj ajta ayan raruure ɨ pan ɨ maj rajnaachitya maɨjna ɨ levaduura ti'itɨ. Aj pu'i rarutixɨ'ɨn nain japua ɨ pan tzajta'a. 10Ayaa pu tina'amitejte'e tɨ tavastara'a cai amuaata'a saj saɨque tyu'umua'ati. Ajta aɨn ɨ a'atɨ tɨ tyajamua'antyu'uuni'i, tavastara'a pu pueijtzi raata'asin, a'atɨ tɨ na'a tɨ ayan rɨcɨ. 11Ayaa nu tyaja'amue'ihua'u, nye'ihuaamua'a, tɨ pua'a neyan nyana'a tyaja'amue'ixaate'e tɨ ayan nu'u ruxe'eve'e maj ra'antijsiche ɨ runavij, ¿a'ini een cɨn meyan mauj a'ij pua'a nyaruure? Tɨ pua'a neyan tyaja'amue'ixaatya'a, capu che'e a'atɨ nyajaaxaitya'a a'ame aɨjna cɨme'e nyej neyan tyaja'amue'ixaate'e tɨ Cɨriistu'u huamɨ'ɨ ɨ curuu jetze. 12Ajta cɨme'en aɨme ɨ mej tyajamua'antyu'uuni'i, ayaa pu tina'araanajchi inyeetzi, tɨ ru'uraxuaahua ɨ nahuaa tɨ ij nain cɨn hua'atyasijchixɨ'ɨn. 13Ma sajta muan, nye'ihuaamua'a, Dioj pu ayan amuaatajée sej si'i ruxaahua á'ujhua'anye'en, sicu. Ayaa pu i éenya'a, caxu huataura'an sej si seyan cha'a sana'a ti'ijrɨ'ɨraa a'ij tɨ tyajamua'amitejte'e ɨ tɨ a'ij pua'a een cɨme'e, silu sata'aj huataujvaɨre'en rujɨɨmua'a saɨjna cɨme'e saj huaujxe'eve'en. 14Sata'aj seyan rɨ'ɨ titetyujchaɨ a'ini tɨj na'a tɨ tya'axa jetzen ɨ nyuucari ɨ maj cɨn ti'ijta, nain pu araurastejsin seij cɨme'e ɨ nyuucari tɨ ayan yee: “Pata'aj yee raxe'eva'a paɨjna ɨ axa'aj tevi patɨj asaɨj ti'axe'eve'e.” 15Tɨ pua'a sauj seyan a'ij pua'a tyú'uxajta, na'ari sauj seyan titetyújchaɨra'a saɨjna cɨme'e saj chueere, rɨ'ɨ xu'u muan sej si cai ahuaujpua'arite'en rujɨɨmua'a. 16Aɨj nu cɨn, ayaa nu tyaja'amue'ixaate'e, sata'aj seyan ti'ijrɨ'ɨraa saj saɨjna jetze araujca'anya'a ɨ xaijnyu'ucara'ara'an ɨ Dioj sej si cai seyan ra'ara'astijre'en saɨjna ɨ tɨ a'ij pua'a een tɨ huiraninyei ɨ a'amua tzajta'a. 17Ayaa pu'u, a'ini ɨ xe'evi'ira'ara'an tɨ a'ij pua'a een tɨ huiraninyei ɨ tzajta'an ɨ a'atɨ, aɨ pu rajchaɨre'e ɨ xe'evi'ira'ara'an ɨ xaijnyu'ucara'ara'an ɨ Dioj. Aɨ mu meyan tyujchaɨre'e. Aɨj xu cɨn cai a'anaj a'aturaaven ti'itɨj cɨme'e sej si cai seyan huarɨni a'ij sej rɨniiche'en. 18Ma ajta, tɨ pua'a aɨn xaijnyu'ucara'ara'an ɨ Dioj ayan ca'anijra'a amuaata'an sej si seyan ra'ara'astijre'en a'ij tɨ aɨn ti'ijxe'eve'e, capu che'e muejmi jetze tya'upuá'ajte'en ti'itɨj cɨme'e aɨjna ɨ nyuucari ɨ maj cɨn tie'ijta. 19Tyamua'a pu tira'amitejte'e a'ij tɨ rɨcɨ tɨ pua'a a'atɨ ayan ra'ara'astijre'en ɨ ruxé'evi'ira'a tɨ a'ij pua'a een tɨ huiraninyei ɨ tzajta'an. Ayaa mu rɨcɨ ɨ tyaɨte, meti'ixana'acɨre'e, majta a'ij pua'a tityajá'ujhua'ane'en, cha'a na'a mu taura'aca seica jamuan ɨ tyaɨte. 20Aɨ mu majta hua'anajche aɨme ɨ maj cai dioosi pueen, majta mu hua'achyahue'iraca ɨ ruxa'a tyaɨte. Eecan mu tyujchaɨra'a mua'aye'i seica jamuan. Camu majta rɨ'ɨ tyu'urixaate'e. Majta mu a'ujchueere mua'aye'i. Eecan mu majta runya'usi'itya'a mua'aye'i maɨjna cɨme'e maj tyu'utaura'ate'en nain. E'ita'a mu a'utacɨ́'ɨca mua'aye'i. Majta tihuiicara'a mua'aye'i seica jemi maɨjna cɨme'e maj saɨque ti'imua'atze. 21Eecan mu majta ti'inyacua'atze ɨ tihuá'a ɨ seica, majta ruta'arujve'e. Mata'aruj mu ruxaahua a'uhua'anya'a mua'aye'i jamuan ɨ mej ti'iyeste ti'itɨj cɨme'e. Tɨj na'a tɨ ayan a'ij pua'a een, ayaa mu rɨcɨ aɨme ɨ maj ra'ara'astijre'en ɨ ruxé'evi'ira'a tɨ a'ij pua'a een tɨ huiraninyei ɨ hua'a tzajta'a. Ayaa nu tyaja'amue'ixaate'e tzaahuati'ira'a cɨme'e, aɨme ɨ mej meyan a'ij pua'a titetyújcha'ɨ, capu xaa nya'u ayan tihua'acɨ'ɨti mej maun a'utyarute a'u tɨ Dioj e'eseijre'e. 22Ma majta aɨme ɨ mej jetzen araujca'anye maɨjna jetze ɨ xaijnyu'ucara'ara'an ɨ Dioj, ayaa mu rɨ'ɨ titetyújcha'ɨ. Mahuaujxe'eva'a mu mua'aye'i ɨ seica ɨ tyaɨte. Maujtyamua'ava'a mu mua'aye'i. Tyamua'a pu naa rɨ'ɨ huatyapua'araca'a ɨ hua'a tzajta'a. Majta raayɨ'ɨtɨ maj tya'utaviicue'i maɨjna cɨme'e tɨ hua'amuare'eriste'e. Rɨ'ɨ mu majta tihua'acha'ɨ mua'aye'i ɨ ruxa'a tyaɨte. Rɨ'ɨ mu ti'itetyaɨte aɨme. Camu ti'itɨj cɨn a'uta'ɨtza'ara ɨ seica jemi. 23Rɨ'ɨ mu titetyujchaɨcan cɨn maja'ujhua'an. Camu majta rɨ'ɨ a'ij rɨj mua'aye'i. Ajta aɨme cɨme'e ɨ tyaɨte mej meyan e'en, capu ma a'ahua'a seij ɨ nyuucari tɨ ayan hua'a jetze ti'itɨj cɨn tya'upuá'ajte'en. 24Majta aɨme, ɨ maj jetzen ajtyama'acan ɨ Cɨriistu'u, mu'uri nain tityacá'a maɨjna cɨme'e ɨ ruxé'evi'ira'a tɨ a'ij pua'a een tɨ huiraninye'i ɨ hua'a tzajta'a mej mi cai che'e a'ij pua'a titetyújcha'ɨ. 25Tɨ pua'a teyan ruurican huatyaturan ɨ Dioj jemi tyaɨjna cɨme'e tej jetzen arataca'anyen tyaɨjna jetze ɨ xaijnyu'ucara'ara'an ɨ Dioj, tiche'e tyajta teyan rɨ'ɨ ti'ititacha'ɨ tyaɨjna cɨme'e tyaj tyajta jetzen arataca'anyen tyaɨjna ɨ xaijnyu'ucara'ara'an jetze. 26Tiche'e cai á'atatzaahuatya'a ti'itɨj cɨme'e. Tiche'e tyajta cai ca'anijra'a tata'acare'en tej ti huatatyenya'usi'ite'en tajɨɨmua'a. Tiche'e tyajta cai tihua'anyacua'atzi'ira ɨ tihuá'a ɨ tyaxá'a tyaɨte.

will be added

X\