Gálatas 4

1Niche'e neyan nyajta seij tyu'utaxaj. Aɨjna ɨ a'atɨ tɨ ayan nain tiraacɨ'ɨti, meenti auj pa'arɨ'ɨsta, ayaa pu che'eta na'a een tɨj ajta saɨj tɨ ca'anyejri cɨn ti'imuare'e. Capu amɨn a'ij tɨ ari nain tia'ara'an pueen. 2Ruxe'eve'e tɨ aɨn hua'ara'astijre'en aɨme ɨ maj rachaɨ́, ɨ maj maɨjna cɨn antyujmua'aree mej tyu'uchaɨn nain ɨ tia'ara'an asta na'a cai ari ayan aráurasten a'achu pua'an ninye'ira'a tɨ ari pɨti'ihuaujxa'apɨ'ɨntari'iri'i ɨ taatajra'an jemi. 3Ayaa pu che'eta na'a eenya'a a'araa itejmi jemi. Tɨ'ɨj cai xɨ tyaja'ure'enye ajna xɨcajra'a tɨ jetzen titáacɨ'ɨti aɨjna ɨ tɨ ari pɨti'ihuaujxa'apɨ'ɨntari'iri'i, ayaa tu eenye'eque'e seijra'acaa matɨj aɨme ɨ mej ca'anyejri cɨn ti'imuare'e a'ini tyauche'e tu ra'astijra'acaa ɨ tihua'aye'ira ɨ maj rujɨɨmua'a mana'a rajtyau ɨ maj Israel jetze ajtyama'acan. 4- 5Ma ajta Dioj, tɨ'ɨj ari tyaja'ure'enyen ajna xɨcajra'a tɨ jetzen ayan tiraaxa'apɨ'ɨntare, aɨ pu ruyauj a'utaityaca'a tɨ yava'acáanyen. Ajta aɨn yaujra'an, aɨ pu huanu'eihuaca'a ɨ jɨita'a jetze, ajta ayan tiraacɨ́'ɨ tɨ ayan ra'ara'astijre'en ɨ nyuucari ɨ maj cɨn tie'ijta, tɨ ij aɨn hue'irajtuaani aɨme ɨ maj ca'anyejri cɨn ra'astijra'acaa maɨjna ɨ nyuucari ɨ maj cɨn ti'ijta, tej ti teyan ra'ancura'an nain a'ij tɨ tiraavijte'e tɨ titáacɨ'ɨti aɨjna cɨme'e tɨ Dioj ayan taateya'upuataca'a. 6A'ini muan xu yaujmua'ame'en pueen ɨ Dioj, Dioj pu ya'utaityaca'a ɨ ruyauj xaijnyu'uca tɨ'ij aɨn xaijnyu'ucara'ara'an huatyaturan ɨ a'amuatzajta'a. Ai pu aɨn pueen ɨ xaijnyu'ucari tɨ ayan rájee tɨcɨn: “Abba, mɨ pej ni'iya'upua.” 7Aɨj xu cɨn cai che'e ca'anyejri cɨn ti'imuare'e silu seri yaujmua'ame'en pueen. A'ini muan xu'uri yaujmua'ame'en pueen, Dioj pu ajta ayan amuaaruu tɨ ti'itɨj tyajamuaacɨ'ɨti. 8Jajcua ɨmɨ, satɨ'ɨj cai xɨ ramua'atyajcaa ɨ Dioj, muan xu ca'anyejri cɨn tihua'avaɨra'acaa aɨme ɨ maj cai meyan huataseijre mej mi dioosi pueenye'en mua'ara'ani silu tyaɨte mu'u meyan ti'ijxe'eva'acaa. 9Aru ijii, saj seri ramua'ate ɨ Dioj nusu ijii tɨ Dioj rɨ'ɨ tyajamuaata'a aɨjna cɨme'e tɨ a'amuamua'ate muejmi, ¿a'ini auj ti'irɨ'ɨri tɨ ti'itɨ ca'anijra'a amuaata'an sej si'i sajtahua'a ra'ara'astijre'en ɨ tihua'aye'ira tɨ cai ti'itɨj vaɨre'e, ɨ tɨ cai amuata'acara'a saj rɨ'ɨ metityaumuámua'are'en? ¿Ni qui seyan huataura'an saj sajtahua'a ca'anyejri cɨn tyu'utyavaɨre'en saɨjna cɨme'e ɨ nyuucari? 10Muan xu seyan ra'utamua'areera saɨjna cɨme'e tɨ ari ajna tyaja'ure'enye ɨ xɨcaj tɨ jetzen ti'itɨ a'ij huarɨj na'ari ɨ maxcɨra'i tɨ jetzen ti'itɨ tyaja'ure'enyejsin nusu ajna tɨ'ɨj ari pɨti'irɨcɨ viita'ari tzajta'a ca'ɨn xɨjcata'a. Sajta saɨjna autamua'areera ɨ ninye'ira'a mej jetzen meyan ti'ijrɨ'ɨre ti'itɨj cɨme'e. 11Aɨj nu cɨn neyan ti'itzɨɨnye'e muejmi cɨme'e. Ayej nya'ase capu ti'itɨj huatyavaɨ nain ɨ nyaj cɨn tyu'umuarej muejmi tzajta'a. 12Nye'ihuaamua'a, ayaa nu tyaja'amuahuavii sej seyan rɨjca nyatɨj inyaa. Ayaa nu nyajta ti'itinchaɨca'a satɨj muan, satɨ'ɨj cai xɨ ramua'ajcaa ɨ nyuucari ɨ maj cɨn tie'ijta. Nyatɨ'ɨj nyaun a'ucatii a'amua jamuan, caxu ti'itɨj cɨn autyajturaa inyeetzi jemi. 13Nyatɨ'ɨj anacaican tyajamuaata'ixaa ɨ nyuucari tɨ cɨn Dioj amue'irajtuaani, ayaa nu ti'icui'ican cɨn neyan huarɨj. 14Eihua pu huapɨ'ɨ amuaatamuare'eristaraca'a aɨjna cɨme'e nyej neyan ti'icui'icaa. Ma sajta muan, caxu naataxána'ave. Caxu sajta naatyaxaahuataca'a, silu tyamua'a xu naa tina'ancure'evi'itɨ yaa cumu nyaj aɨn pueenye'en seij tɨ ti'ivaɨre'e u tajapua na'ari nyaj inyaa aɨn pueenye'en ɨ Cɨriistu'u rusaɨj tɨ ajta i'i Jesús. 15¿Ai ta'uj tzaa huarɨj sej si cai che'e seyan rɨ'ɨ naa tyu'ujtyamua'ave'e satɨj sejmi'i eenya'a nyatɨ'ɨj nyaun a'ucatii a'amua jamuan? Ee xaa nya'u, rɨ'ɨri nyej neyan raataxaj tzaahuati'ira'a cɨme'e yee tɨ pua'a rɨ'ɨrístanche'e ajna'ɨmɨ sej seyan huarɨni, ayaa xu ra'itatu'utu'unche'en ɨ a'amuajɨ'ɨsi, sajta naatatu'utu'ute'enche'e inyeetzi. 16¿A'ini na'a qui? ¿Ni seri nyejchaɨre'e saɨjna cɨme'e nyej neyan tzaahuati'ira'a cɨn tyaja'amue'ixaate'e? 17Majta aɨme ɨ tyaɨte, eihua mu á'aviicue'ire'e mej mi amuaatyamue'itɨn mej mi'i rujɨɨmua'a muejmi cɨme'e huaujtyamua'ave'en. Ayaa mu ti'ijxe'eve'e tej ti e'ita'a a'utácɨɨnye sej si cai che'e á'aviicue'ira'a tejmi jamuan silu sej si'i seyan sicu rɨ'ɨ tihua'axe'eva'a aɨme. 18Naa pu xa'apɨ'ɨn tɨ pua'a a'atɨ á'aviicue'ira'a sej si rɨ'ɨ tiraataxe'eve'en. Ajta capu ayan ruxe'eve'e nyej nyaun a'ucatii a'amua jamuan. Aɨ pu'u che'e aɨn a'utyeviicue'ire'en a'ij tɨ tiraavijte'e aɨjna cɨme'e tɨ i'ixa'apɨ'ɨn. 19Mɨ sej nye'itɨ'ɨrijmua'a, eihua nu tirajpueiitzi na'ame muejmi cɨme'e, ayan cumu ɨ jɨita'a tɨ ra'utacui'ini pa'arɨ'ɨ cɨme'e. Ayaa pu te'eme asta sana'a cai seyan che'eta sana'a rɨ'ɨ titetyújcha'ɨ tɨj aɨjna ɨ Cɨriistu'u. 20Canu a'atzu ramua'aree a'ij nyej ye'i huarɨni muejmi cɨme'e. Ojala cu nyej nyaun a'ucatiiche'e muejmi jemi nyej ni'i cai che'e tyaja'amuayu'use'e nyana'a, silu nyej ni tyajamue'ixaate'en senyeseíiraca. 21Sata'aj seyan tinaata'ixaate'en muan mɨ sej seyan raxe'eve'e sej si ra'ara'astijre'en saɨjna ɨ nyuucari ɨ maj cɨn tie'ijta, ¿ni tzaa sacai seyan tiraanamuajri'i a'ij tɨ tya'axa aɨjna jetze ɨ nyuucari? 22Ayaa pu te'eyu'usi'i tɨ nu'u hua'apuaca tipe'eristyamua'a ɨ mej tyetyaca aɨjna ɨ Abraham tyaacan. Seij pu nu'u jetzen huanu'eihuaca'a aɨjna ɨ jɨita'a tɨ nu'u ca'anyejri cɨn ti'imuara'acaa, ajta ɨ saɨj, aɨ pu nu'u jetzen huanu'eihuaca'a aɨjna ɨ jɨita'a tɨ nu'u ruxaahua á'ucha'acanya'a. 23Aɨjna tɨ huanu'eihuaca'a aɨjna jetze ɨ jɨita'a tɨ ca'anyejri cɨn ti'imuara'acaa, aɨ pu nu'u che'eta na'a ayana eenye'en huanu'eihuaca'a matɨj ɨ tɨ'ɨrii. Ajta nu'u ɨ saɨj, aɨjna tɨ nu'u huanu'eihuaca'a jetzen ɨ jɨita'a tɨ nu'u ruxaahua á'ucha'acanya'a, aɨ pu aɨjna cɨn huanu'eihuaca'a tɨ nu'u Dioj ayan cɨn tya'ataujratziiri'i. 24Rɨ'ɨri tej teyan raataxaj tɨ ayan huataujmua'a aɨjna ɨ nyuucari tɨ ayan te'eyu'usi'i. Aɨme ɨ juuca ɨ maj hua'apua, ayaa mu huataujmua'a ɨ nyuucari tɨ hua'apua tɨ cɨn Dioj tihuaurijca ɨ tyetyaca jemi. Seij nyuucari pu aun e'ema'acan ɨ jɨri japua tɨ ayan tyaja'arajtyahuaa tɨcɨn Sinaí. Aɨj mu jetzen e'iranyejsin aɨme ɨ tɨ'ɨrii ɨ maj tyu'utyavaɨre'esin ca'anyejri cɨme'e. Ajta aɨjna ɨ nyuucari, aɨj pɨrɨcɨ aɨjna ɨ jɨita'a tɨ ayan antyahuaa tɨcɨn Hagar. 25Aɨjna ɨ Hagar, ayaa pu huataujmua'a aɨjna ɨ jɨri ɨ Sinaí, tɨ aun a'utacá'a u Arabia. Ayaa pu ajta huataujmua'a chajta'a tɨ e'eseijre'e u Jerusalén, a'ini auche'e pu ca'anyejri cɨn ti'imuare'e jamuan ɨ yaujmua'ame'en. 26Ajta aɨjna ɨ Jerusalén tɨ tajapua e'ema'acan, aɨ pu ruxaahua a'ucha'acan. Ajta aɨ pu pueen ɨ tanaanaj. 27Ayaa pu'u na'a a'ini ayaa pu te'eyu'usi'i tɨcɨn: Pajta muaa, tɨ cai che'e mua'utacui'ini, pata'aj ca'anin cɨn huá'ayeinixɨ'ɨn. Ayaa paj huarɨni, a'ini papu'uri eitze'e tiyaujmua'a pua'ame mɨ paj cai a'anaj autájucataca'a cai aɨjna ɨ jɨita'a tɨ rucɨn jamuan huahuii. 28Sajta muan, nye'ihuaamua'a, ayaa xu che'eta sana'a seijre'e tɨj aɨjna ɨ Isaac tɨ aɨjna cɨn e'iraanye tɨ cɨn Dioj ayan tya'ataujratziiri'i. 29Ajna'ɨmɨ aɨjna ɨ yaujra'an tɨ ayan che'eta na'a eenye'en huanu'eihuaca'a matɨj ɨ tɨ'ɨrii, aɨ pu a'ij pua'a tiraaruu aɨjna ɨ yaujra'an tɨ ayan huanu'eihuaca'a aɨjna cɨme'e ɨ ti'imuare'eri'ira'ara'an ɨ xaijnyu'ucara'ara'an ɨ Dioj. Ajta ijii, ayaa pu che'eta ti'irɨnyaca. 30Ma ajta, ¿a'ini tya'axa ɨ yu'uxari jetze? ¿Ni qui ayan tɨ cɨme'en yee: “Pata'aj yeehui raatamuarite'en paɨjna ɨ jɨita'a tɨ ca'anyejri cɨn ti'imuare'e, pajta yeehui ɨ yaujra'an, a'ini capu yee a'anaj ti'itɨ ti'ijcɨ'ɨti aɨjna ɨ yaujra'an ɨ jɨita'a tɨ ca'anyejri cɨn ti'imuare'e, silu nain pu yee ti'ijcɨ'ɨti icu aɨjna ɨ yaujra'an ɨ jɨita'a tɨ ruxaahua a'ucha'acan”? 31Aɨj pu cɨn, nye'ihuaamua'a, catu tyaɨjna jetze e'iraanye aɨjna ɨ jɨita'a tɨ ca'anyejri cɨn ti'imuara'acaa. Catu xaa nya'u, silu aɨj tu jetzen e'iraanye aɨjna ɨ jɨita'a tɨ ruxaahua á'ucha'acanya'a.

will be added

X\