Gálatas 3

1Muan, mɨ sej Galacia a'uchaatɨme, caxu a'atzu a'uumua'aree muan. ¿A'ataani amuaaxainyaraca'a sej si seyan a'ij pua'a me tityáumua'aren? Muejmi jemi tu tyamua'a naa tyajamuaata'ixaa maj rá'utatai maɨjna ɨ Jesús tɨ ajta i'i Cɨriistu'u. 2Niche'e seij tyajamuaataihua'u. ¿A'ini sej eenye'eque'e ra'ancura'a ɨ xaijnyu'ucara'ara'an ɨ Dioj? ¿Ni qui saɨjna cɨn saj ra'astijra'acaa ɨ nyuucari ɨ maj cɨn tie'ijta na'ari saɨjna cɨn saj ra'atzaahuatya'acaa ɨ sej raanamuajri'i itejmi jemi? 3¿Ni tzaa seyan rɨ'ɨ huapɨ'ɨ cai mauumuámua'aree? Ayaa xu ra'utyajhuii sej seyan araujca'anye saɨjna jetze ɨ xaijnyu'ucara'ara'an ɨ Dioj. ¿Ni tzaa ayan tyajamua'amitejte'e sej si seyan raanaijmi'ire'en saj ra'ara'astijre'en ɨ tavastara'a saɨjna cɨme'e saj ru jetze a'ij tirajtyau rujɨɨmua'a sana'a? Capu xaa nya'u a'ij ti'irɨ'ɨri. 4Naijmi'i tɨj na'a ɨ tɨ Dioj cɨn rɨ'ɨ tyajamuaata'a, ¿ni qui ayan tyajamuaaruu tɨ ij ayan eenya'a a'ara'ani tɨ nain tyaja'uveti? Ma ajta, capu xaa nya'u a'ij amiteere'e tɨ pua'a nain tyaja'uveti nusu cai. 5¿A'ini een cɨme'e Dioj raataityaca'a ɨ ruxaijnyu'uca tɨ aɨn muejmi jemi huatyaturan? Ajta, ¿a'ini een cɨme'e Dioj ayan tyu'umuarej muejmi jemi aɨjna cɨme'e tɨ ra'ará'an ɨ ti'imuari'i tɨ huapɨ'ɨ ruxe'eve'e? ¿Ni qui ayan huarɨj aɨjna cɨme'e saj ra'ara'astijre saɨjna ɨ nyuucari ɨ maj cɨn tie'ijta? Capu a'atzu xaa nya'u, silu ayaa pu huarɨj aɨjna cɨme'e saj ra'atzaahuatya'acaa ɨ tej teri tyajamue'ixaa. 6Ayaa pu che'eta na'a tya'atzaahuatya'acaa aɨjna ɨ Abraham tyaacan a'ij tɨ Dioj tiraata'ixaa. Aɨj pu cɨn, Abraham urare'enya'acan cɨn huatyajturaa ɨ Dioj jemi. 7Sata'aj seyan raamua'aree saɨjna tɨ cɨme'en yee matɨj mana'a pua'amua ɨ mej tya'atzaahuate'e, ai mu nu'u aɨn pueen ɨ mej jetzen e'iraanye aɨjna ɨ Abraham tyaacan. 8Ajta, jajcua ɨmɨ, aɨ pu ayan te'eyu'usi'ihuaca'a ɨ yu'uxari jetze tɨ Dioj ayan tihua'ata'acare'en aɨme ɨ maj cai Israel jetze ajtyama'acan mej mi urare'enya'acan cɨn huatyaturan ɨ jemin aɨjna cɨme'e ɨ mej tya'atzaahuate'e, micu. Ajta aɨn ɨ Dioj, anacaican pu ayan tiraata'ixaa aɨjna ɨ Abraham tyaacan aɨjna ɨ nyuucari tɨ cɨme'en Dioj hue'irajtuaani, ayan tɨcɨn: “Naijmi'ica ɨ tyaɨte ɨ maj huachaatɨme iiyan chaanaca japua, nyaa nu yee rɨ'ɨ tihua'uta'asin mueetzi cɨme'e.” 9Aɨj pu cɨn, naijmi'ica ɨ maj tya'atzaahuate'e, Dioj pu rɨ'ɨ tihua'uta'asin jamuan aɨjna ɨ Abraham tyaacan tɨ ajta ra'atzaahuatya'acaa ɨ Dioj. 10Ma ajta aɨme ɨ mej ra'ara'astijre maɨjna ɨ nyuucari ɨ maj cɨn tie'ijta, naijmi'ica pu pueijtzi hua'ata'asin ɨ Dioj, a'ini ayaa pu te'eyu'usi'i tɨcɨn: “Pueijtzi pu yee tiraata'asin a'atɨ tɨ na'a tɨ cai nain cɨn ra'ara'astijre'en a'ij tɨ ye'i tya'axa jetzen ɨ nyuucari ɨ maj cɨn tie'ijta.” 11Ajta aɨjna ɨ nyuucari ɨ maj cɨn tie'ijta, capu rɨ'ɨri tɨ aɨn ayan raaruuren ɨ a'atɨ tɨ'ij ayan urare'enya'acan cɨn huatyaturan ɨ Dioj jemi. Ayaa pu'u eenya'a a'araa a'ini ayaa pu ajta te'eyu'usi'i tɨcɨn: “Aɨ pu yee tɨ urare'enya'acan cɨn huatyajturaa ɨ Dioj jemi, aɨ pu yee ruuri a'ame aɨjna cɨme'e, icu, tɨ aɨn ayan tya'atzaahuate'e.” 12Tɨ pua'a a'atɨ ayan ra'ara'astijre'en ɨ nyuucari ɨ maj cɨn tie'ijta, capu ayan ruxe'eve'e tɨ aɨjna a'atɨ tya'antzaahuate'en, silu che'e ra'ara'astijre'en pu'u aɨjna ɨ nyuucari a'ini ayaa pu te'eyu'usi'i tɨcɨn: “Aɨjna tɨ yee ayan ra'ara'astijre'en a'ij tɨ te'eyu'usi'i ɨ nyuucari jetze, aɨ pu yee aɨjna cɨn rɨ'ɨ ti'ityújchaɨ́ a'ame.” 13Ajta aɨjna ɨ Cɨriistu'u, aɨ pu tu'irajtuaa tɨ ij cai pueijtzi taacɨ'ɨti aɨjna cɨme'e tyaj cai ra'astijre'e ɨ nyuucari ɨ maj cɨn tie'ijta. Pueijtzi pu xaa raacɨ́'ɨ ta jetze ma'acan a'ini ayaa pu te'eyu'usi'i tɨcɨn: “Pueijtzi pu yee raata'asin a'atɨ tɨ na'a maj ra'atatan ɨ cɨye jetze.” 14Ayaa pu aɨjna cɨn tiraaruu tɨ ij ayan tihua'ucɨ'ɨti aɨme ɨ maj cai Israel jetze ajtyama'acan eijna ɨ tɨ cɨn Dioj rɨ'ɨ tiraata'a aɨjna ɨ Abraham tyaacan, tɨ ij ajta tyaj tyaɨjna cɨn tya'atzaahuatya'a tej tij ra'ancura'an tyaɨjna ɨ xaijnyu'ucara'ara'an ɨ Dioj a'ij tɨ aɨn ari tya'ataujratziiri'i. 15Casi'i, nye'ihuaamua'a, tiche'e tyaɨjna cɨn tyu'utaxaj a'ij tɨ ti'irɨnyaca tej ti tyauj yan huachaatɨme iiyan chaanaca japua. Tɨ pua'a a'atɨ ari ra'uyu'uxaca'a ɨ papee jetze ɨ maj cɨn ra'ancura'an ɨ ti'ara'an a'atɨ tɨ huamɨ'ɨ, tɨ pua'a ari ayan te'eyu'usi'ihua a'ij tɨ tiraavijte'e, capu rɨ'ɨri tɨ a'atɨ ti'itɨ maa jetzen tira'uyu'uxan. Ruxe'eve'e maj ra'ara'astijre'en a'ij tɨ te'eyu'usi'ihua. 16Ma'acui xaa, Dioj pu ayan ajmi'i tya'ataujratziiri'i ti'itɨj cɨme'e aɨjna jemi ɨ Abraham tyaacan ajta aɨme jemi ɨ mej jetzen e'iranyejsin. Arú, capu ayan te'eyu'usi'i ɨ yu'uxari jetze tɨ ayan tihua'ucɨ'ɨtinche'e ɨ maj mui'itɨ e'iranyejsin aɨjna ɨ Abraham tyaacan jetze, silu tɨ ayan tiraacɨ'ɨtinche'e ɨ tɨ saɨj na'a e'iranyejsin. Ajta aɨn tɨ saɨj na'a, ai pu aɨn pueen ɨ Cɨriistu'u. 17Ayaa pu huataujmua'a eijna. Anacaican, Dioj pu ayan raata'a ɨ runyuuca ɨ Abraham jemi a'ij tɨ tyaja'ure'enyejsin. Tɨ'ɨjta ari tyauma'aca a'achu cumu muaacuacientos ninye'ira'a japuan seite japuan tamuaamuata'a, aj pu'i Dioj hua'uta'a aɨjna ɨ nyuucari ɨ maj cɨn tie'ijta. Aɨj pu cɨn, capu rɨ'ɨri tɨ aɨn nyuucari ra'urauuna aɨjna tɨ cɨn Dioj anacaican tihuaurijca ɨ Abraham tyaacan jemi. Aɨj pu cɨn auche'e ti'ivaɨre'e aɨjna ɨ tɨ cɨn tihuaurijca. 18Ayaa pu'u ti'en, a'ini tɨ pua'a ti'itɨ ayan tiraacɨ'ɨti saɨj ɨ a'atɨ aɨjna cɨme'e tɨ aɨn nyuucari ɨ maj cɨn tie'ijta ayan tiraata'aca, capu che'e ayaa na'a eenya'a a'ame tɨ ayan tiraacɨ'ɨti aɨjna cɨme'e tɨ a'atɨ ayan tya'ataujratziiri'i tɨ ayan nu'u tyaja'ure'enyejsin. Ajta aɨn Dioj, aɨ pu ruxé'evi'ira'a cɨn ayan rɨ'ɨ tiraata'a aɨjna ɨ Abraham tyaacan a'ini ayaa pu tihuaurijca. 19Tɨ pua'a ayan een, ¿a'ini tɨ i Dioj hua'uta'a aɨjna ɨ nyuucari ɨ maj cɨn tie'ijta? Ayej xaa nya'u, ayaa pu een cɨn raatyajtuaa hua'a jemi mej mi'i raamua'aree nain cɨme'e ɨ maj cɨn autyajturaa ɨ Dioj jemi. Ayaa pu eenya'a a'ame'enche'e asta na'a cai huataseijre'enche'e aɨjna tɨ jetzen huanyej aɨjna ɨ Abraham tyaacan a'ij tɨ ayan Dioj tihuaurijca tɨ ayan te'eme'enche'e. Ajta aɨn ɨ nyuucari ɨ maj cɨn tie'ijta, capu Dioj rusaɨj raatyajtuaa hua'a jemi, silu aɨme ɨ mej ti'ivaɨre'e ɨ tajapua, aɨ mu majta raaxa'apɨ'ɨntare mej mi hua'a jemi raatyajtuaani maɨjna ɨ nyuucari. 20Ayaa pu'u na'a, tɨ pua'a ayan seijre'e saɨj tɨ i'ixa'apɨ'ɨntaca'a, aɨ pu tihua'utyavaɨre'esin naijmi'ica ɨ mej tyu'urixaate'e, mej mi ra'antipua'arite'en. Ma ajta, seij pu'u pueen ɨ Dioj. Rusaɨj pu ayan tihuaurijca, ajta rusaɨj pu raanaijmi'ire'en. 21¿A'ini na'aqui? ¿Ni qui ayan huataujmua'a tɨ saɨque tya'axa aɨjna jetze ɨ nyuucari ɨ maj cɨn tie'ijta, ajta saɨque tya'axa aɨjna tɨ cɨn Dioj tya'ataujratziiri'i? Capu xaa nya'u, a'ini tɨ pua'a ayan ti'irɨ'ɨriistache'e tɨ taata'acare'en tyaj ruuristache'e ɨ Dioj jemi aɨjna ɨ nyuucari tɨ huatyajturaa aɨme jemi, aj pu xaa, icu, rɨ'ɨrístaca tyaj urare'enya'acan cɨn huatyaturan ɨ Dioj jemi aɨjna cɨme'e tyaj ra'astijre'e tyaɨjna ɨ nyuucari ɨ maj cɨn tie'ijta. 22Ma ajta, aɨjna ɨ nyuucari jetze, ayaa pu tya'axa tɨ nu'u naimi'i meyan autyajturaa ɨ Dioj jemi, a'achu maj mana'a pua'amua yan huachaatɨme iiyan chaanaca japua. Ayaa pu een cɨn tya'axa tɨ ij aɨjna cɨn rɨ'ɨristan tɨ aɨn Dioj tya'ataujratziiri'i tɨ tihua'ucɨ'ɨti aɨjna cɨme'e maj ra'ara'astijre'en maɨjna ɨ Jesús tɨ ajta i'i Cɨriistu'u. Ee xaa nya'u, ayaa pu'u na'a tɨ aɨjna tɨ cɨn Dioj tya'ataujratziiri'i, aɨme pu ti'icɨ'ɨti aɨme ɨ maj meyan tya'atzaahuate'e. 23Tɨ'ɨj cai xɨ huataseijre ɨ Cɨriistu'u tej ti teyan ra'ara'astijre'en, ayaa pu eenye'eque'e seijra'acaa cumu tej a'ityanami'ihuaca'a aɨjna cɨme'e tɨ ca'anin cɨn taachaɨ aɨjna ɨ nyuucari ɨ maj cɨn tie'ijta. Ayaa tu eenya'a huatyajturaa ajna'ɨmɨ tɨj na'a tɨ yu e'ire'enye tɨj ijii ayan huataseijre aɨjna ɨ tyaj teri ticu ra'atzaahuate'e. 24Aɨj pu cɨn, ayaa pu taachaɨ aɨjna ɨ nyuucari asta na'a cai huataseijre'en ɨ Cɨriistu'u tej ti teyan urare'enya'acan cɨn huatyaturan aɨjna cɨme'e tej ra'ara'astijre tyaɨjna ɨ Cɨriistu'u. 25Ma'acui xaa nya'u, a'ini ari huataseijre ɨ tej jemin ra'astijre'e, capu che'e tachaɨj aɨjna ɨ nyuucari ɨ maj cɨn tie'ijta. 26- 27Naimi'i xu yaujmua'ame'en pueen ɨ Dioj saɨjna cɨme'e saj ra'astijre'e saɨjna ɨ Cɨriistu'u tɨ ajta i'i Jesús, a'ini Cɨriistu'u pu a'amuanyeere'e sej si'i seyan eenya'a xa'ara'ani tɨj aɨjna, satɨj sana'a pua'amua huamuaɨ'ɨvijhuaca'a ɨ jemin. 28Aɨj pu cɨn, cai che'e ma a'ahua'a ɨ tɨ ee Israel jetze ajtyama'acan, na'ari tɨ ee ɨ Griego. Capu ajta ma a'ahua'a ɨ Cɨriistu'u jemi ɨ tɨ ee saɨj tɨ ca'anyejri cɨn ti'imuare'e nusu ɨ tɨ ee ruxaahua cɨn ti'imuare'e. Capu ajta jetzen ruxe'eve'e ɨ Cɨriistu'u tɨ pua'a a'atɨ tyaata'a pueen nusu jɨita'a na'a, a'ini naijmi'i xu Cɨriistu'u jetze ajtyama'acan. Muan xu xaa seij tyaɨtyejra'an pueen ɨ jemin. 29Ajta, tɨ pua'a seyan Cɨriistu'u jetze ajtyama'acan, aɨj xu cɨn sajta yaujmua'ame'en pueen aɨjna ɨ Abraham tyaacan, ajta aɨ pu tyaja'amuacɨ'ɨti aɨjna tɨ cɨn Dioj tya'ataujratziiri'i.

will be added

X\