Gálatas 2

1Tɨ'ɨj arí ayan tyauma'aca a'achu cumu tamuaamuata'a japuan muaacua ninye'ira'a, nyajtahua'a nu nyaun a'ujnyéj anti Jerusalén nyaɨjna jamuan ɨ Bernabé. Nyajta nu nyaɨn a'uví'itɨ ɨ Tito. 2Au nu a'ujnyéj nyaɨjna cɨme'e tɨ Dioj ayan ca'anijra'a naata'a. Au nu tihua'uta'ixaa nain cɨme'e ɨ nyuucari a'ij nyej ye'i tihue'ihue'ixaate'esin nyaɨme ɨ maj cai Israel jetze ajtyama'acan. Aru aviitzi nu cɨn neyan huarɨj hua'a jemi ɨ mej ee tihue'ijte'e. Ayaa nu een cɨn huarɨj tɨ ij cai a'atɨ tina'antyu'uuni'i aɨjna cɨme'e a'ij nyaj rɨcɨ. Tɨ pua'a ayan tina'antyu'uuni'i, capu che'e ti'itɨ huatyavaɨre'esin a'ij nyaj rɨcɨ. 3Ma ajta cai, capu ayan tye'irájraa a'ij mej ɨ seica ti'ijxe'eva'acaa a'ini aɨme ɨ mej tihue'itya'acaa, camu meyan raataityaca'a aɨjna cɨme'e ɨ maj ra'antisijchixɨ'ɨn ɨ runavij, a'ini hua'a jetze pu ajtyama'acan ɨ griego aɨjna ɨ Tito. 4Ayaa pu een cɨn huataseijre itejmi jemi a'ini seica mu aviitzi cɨn utyajrupi itejmi tzajta'a mej mi taajeeve'en a'ij tej ti'ititacha'ɨ ityan ɨ Cɨriistu'u jemi tɨ aɨn ari tu'irajtuaa. Aɨ mu meyan ruseijrataca'a maj nu'u tejmi jemi jetze ajtyama'acan. Ma majta cai, camu. Meti'ihue'itaca mu'u. Ayaa mu'u raxe'eva'acaa micu mej mi titaataijte'en ca'anyejri cɨme'e. 5Catu a'atzu hua'uta'a mej mi meyan titaatyamue'itɨn, a'ini ayaa tu ti'ijxe'eva'acaa tɨ auj rɨ'ɨrista a'ara'ani sej raanamua tzaahuati'ira'a cɨme'e ɨ nyuucari tɨ cɨn Dioj amue'iratuaasin. 6Majta aɨme, ɨ mej jee huapɨ'ɨ mu ruxe'eve'e, camu maa a'ij tirajtyau mej mi majta maɨn raanaijmi'ire'en a'ij nyej tihue'ihue'ixaa ɨ tyaɨte ɨ maj cai Israel jetze ajtyama'acan. Ajta, capu nyejetze ruxe'eve'e tɨ pua'a mej meyan huapɨ'ɨ ruxe'eve'e nusu macai, a'ini Dioj pu ruxa'a na'a hua'ancure'evi'itɨcɨ ɨ tyaɨte, matɨj mana'a pua'amua. 7Ma majta maɨn, tɨ'ɨjta'ij ayan tihua'amityejtya'acaa tɨ aɨn Dioj ayan che'eta na'a tinaataityaca'a inyeetzi tɨj ajta ayan aɨj tyu'utaityaca'a aɨjna ɨ Pedro. Tihua'amityejtya'acaa tɨ Dioj ayan tinaataityaca'a nyej ni tihua'uta'ixaate'en aɨme ɨ maj cai Israel jetze ajtyama'acan nyaɨjna ɨ nyuucari tɨ cɨn Dioj hue'irajtuaani. Ma ajta aɨn, ɨ Pedro, Dioj pu ayan tiraataityaca'a tɨ ayan tihua'uta'ixaate'en aɨme ɨ maj Israel jetze ajtyama'acan. 8Ayaa pu'u na'a, a'ini aɨn tɨ ti'imuara'acaa ɨ Pedro jamuan tɨ ij tiraataijte'en tɨ aɨn hua'a jamuan u á'ume'en ɨ maj Israel jetze ajtyama'acan, aɨ pu ayan che'eta na'a ti'imuara'acaa inyeetzi jamuan nyej ni hua'a jamuan u á'ume'en ɨ maj cai Israel jetze ajtyama'acan. 9Majta maɨn ɨ maj hueica, aɨjna ɨ Jacobo, ajta aɨjna ɨ Pedro, ajta aɨjna ɨ Juan, ai mu aɨn pueenya'a ɨ mej jee antyujmua'aree aɨme jemi ɨ seica ɨ maj Dioj jemi seijre'e. Tɨ'ɨj ari ayan tihua'amityejtya'acaa tɨ Dioj ayan rɨ'ɨ tinaata'a, aj mu mi tyamua'a naa tina'ancure'evi'itɨ, majta maɨn tyamua'a naa ra'ancure'evi'itɨ maɨjna ɨ Bernabé. Aɨ mu xaa meyan tiraaxa'apɨ'ɨntare itejmi cɨme'e tyaj nu'u hua'a jamuan u á'uju'un aɨme ɨ maj cai Israel jetze ajtyama'acan tej ti teyan tihua'uta'ixaate'en, majta meyan ru jetze maj nu'u aɨme jemi u a'uju'un ɨ maj Israel jetze ajtyama'acan. 10Aɨ mu'u tajhuaviiri'i tyaj nu'u aɨme autamua'aree tyauche'e ɨ maj cai a'ij te'eviicue'i tyaj nu'u hua'utavaɨre'en. Nyajta inyaa, nyaa nu xaa ahuanca'anye nyej ni nyexe'evi'ira'a cɨn neyan huarɨni. 11Ajta aɨn ɨ Pedro, tɨ'ɨj aun a'atanye u Antioquía, nyaa nu ra'ajtya'axɨ ɨ jemin, a'ini aɨ pu a'uta'ɨtzee ti'itɨj cɨme'e. 12Matɨ'ɨj cai xɨ a a'atanye seica ɨ tyetyaca jamuan aɨjna ɨ Jacobo, ayaa pu rɨjcaa aɨjna ɨ Pedro. Hua'a jamuan pu ti'icua'acara'a aɨme ɨ maj cai Israel jetze ajtyama'acan. Ma ajta aɨn, matɨ'ɨj e'ire'enye aɨme ɨ seica, Pedro pu ayan autyejche tɨ ajtara'ani hua'a jemi ɨ maj cai Israel jetze ajtyama'acan. Capu che'e hua'ajaahuatya'acaa a'ini hua'atzɨɨnya'acaa aɨme ɨ maj hua'a jetze ajtyama'acan aɨme ɨ maj meyan ra'antisi'iche ɨ runavij. 13Majta ɨ seica ɨ maj Israel jetze ajtyama'acan, camu majta meyan huarɨj huataujnyátacan cɨme'e silu meyan hue'itzi cɨn ruseijrataca'a a'ij tɨ ajta huarɨj aɨjna ɨ Pedro. Aɨj pu cɨn tya'utyaujhue'itze ajta aɨjna ɨ Bernabé. 14Tɨ'ɨj ayan tina'amitejtya'acaa maj cai meyan rɨ'ɨ titetyújchaɨca'a tzaahuati'ira'a cɨme'e a'ij tɨ ti'itamua'atya ɨ nyuucari, nyatɨ'ɨj ni meseíraca ɨ tyaɨte neyan tiraata'ixaa nyaɨjna ɨ Pedro tɨcɨn: “Muaa paj hua'a jetze ajtyama'acan ɨ mej Israel jetze huanyej. Ma pajta muaa, ayaa papu'u ti'itiá'acha'ɨ matɨj aɨme ɨ maj cai Israel jetze ajtyama'acan. Capaj xaa nya'u peyan ti'itiá'acha'ɨ. ¿A'ini een cɨme'e peyan hua'aruure paɨme ɨ maj cai Israel jetze ajtyama'acan mej mi meyan aráurasten tihua'aye'ira aɨme ɨ mej Israel jetze ajtyama'acan?” 15Tyan tu hua'a jetze ajtyama'acan tyaɨjna cɨme'e tyej Israel jetze huanyej. Catu hua'a jetze ajtyama'acan aɨme ɨ maj a'uta'ɨtza'ara ɨ Dioj jemi. 16Tyan tu teyan ramua'aree a'ij tɨ een ɨ Dioj jemi tɨ a'atɨ urare'enya'acan cɨn huatyaturan ɨ jemin. Capu xaa nya'u ti'itɨ a'ij tiraatyavaɨre'en aɨjna ɨ a'atɨ tɨ pua'a nain cɨn aráurasten aɨjna ɨ nyuucari ɨ maj cɨn tie'ijta, silu aɨ pu xaa urare'enya'acan cɨn huatyaturan ɨ Dioj jemi tɨ pua'a aɨn ra'ara'astijre'en ɨ Jesús tɨ ajta i'i Cɨriistu'u. Tyajta ityan, ayaa tu tyajta ityan teri ra'atzaahuate'e tyaɨjna ɨ Cɨriistu'u tɨ ajta i'i Jesús tej ti teyan urare'enya'acan cɨn huatyaturan ɨ Dioj jemi aɨjna cɨme'e tyaj ra'ara'astijre'en tyaɨjna ɨ Cɨriistu'u. Catu xaa nya'u ra'ara'astijre'e tyaɨjna ɨ nyuucari ɨ maj cɨn tie'ijta a'ini capu a'atɨ urare'enya'acan cɨn huatyaturaasin ɨ Dioj jemi tɨ pua'a ra'ara'astijre'en aɨjna ɨ nyuucari ɨ maj cɨn ti'ijta. 17Ari tɨ pua'a ayan te'irajra'ani tej teyan a'ij pua'a eenya'acan cɨn huatyaturan matɨj aɨme ɨ maj cai Israel jetze ajtyama'acan tyaɨjna cɨme'e tej teyan raahuausin tej ti teyan urare'enya'acan cɨn huatyaturan jemin ɨ Cɨriistu'u, ¿a'ini na'aqui huataujmua'a? ¿Ni qui ayan huataujmua'a tɨ Cɨriistu'u ca'anijra'a tata'aca tej ti teyan a'ij pua'a ti'ititacha'ɨ? Capu xaa nya'u, capu a'atzu. 18Me nyajta inyaa, tɨ pua'a nyajtahua'a nyana'a ra'utyejcheni nyaj ra'ara'astijre'en ɨ nyej nyejmi'i raatapua'ajtaca'a nyej neyan ra'astijra'acaa, tɨ pua'a neyan huarɨni nyajtahua'a, ayaa pu huataujmua'a tɨcɨn yee nya'uta'ɨtze ti'itɨj cɨme'e nyatɨ'ɨj anacaican raatapua'ajtaca'a. 19Aɨj pu cɨn, nyatɨ'ɨj ra'astijra'acaa ɨ nyuucari ɨ maj cɨn tie'ijta, ayaa pu tyaja'ure'enye tɨ cai huatarɨ'ɨristaraca'a nyaj nain cɨn aranrastijre'en. Aɨj pu cɨn ayaa pu huataujmua'a, cu xuee nyaj huamɨ'ɨ jemin aɨjna ɨ nyuucari ɨ maj cɨn tie'ijta nyej ni ruurican huatyaturan ɨ Dioj jemi. 20Naacɨ'ɨ ajta inyeetzi mej mi meyan naaruuren matɨ'ɨj rá'utatai ɨ Cɨriistu'u ɨ curuu jetze. Aɨj nu cɨn cai che'e nyana'a ruurican huatyajturaa silu ruurican nu huatyajturaa a'ini Cɨriistu'u pu ruurican seijre'e nyeetzi jetze. Ajta a'ij nyej rɨ'ɨ ti'itincha'ɨ ijii nyej nyau ratyáhue'ira'a, ayaa nu aranca'anye nyaɨjna cɨme'e nyaj ra'ara'astijre'en nyaɨjna tɨ i'i yaujra'an pueen ɨ Dioj. Aɨ pu icu naataxe'eve, ajta huataura'a tɨ huamɨ'ɨni nyeetzi jetze ma'acan. 21Aɨj nu cɨn cai ma rúujɨsin nyaɨjna ɨ tɨ Dioj cɨn rɨ'ɨ tinaata'a ruxé'evi'ira'a cɨme'e. Ayej xaa nya'u, tɨ pua'a rɨ'ɨrístanche'e tɨ a'atɨ ayan urare'enya'acan cɨn huatyaturan ɨ Dioj jemi aɨjna cɨme'e tɨ nain cɨn aráurasten aɨjna cɨme'e ɨ nyuucari ɨ maj cɨn tie'ijta, capu che'e ti'itɨ huatyavaɨɨre'enche'e tɨ huamɨ'ɨ ɨ Cɨriistu'u.

will be added

X\