Gálatas 1

1Inyaa, i nyaj i'i Pablo, naijmi'ica jamuan ɨ nye'ihuaamua'a ɨ mej nyaa jamuan ya huati, 2tyan tu ye tyaja'amuayu'use'e muejmi mɨ sej e'etyujsa'ɨri mui'icaque u Galacia. Nyaa nu nyaɨn pueen saɨj ɨ tɨ Dioj nyaja'utaityaca'a. Capu tevi na'a nyaja'utaityaca'a, capu a'atɨ ajta na'antihuau silu aɨ pu'u nya'u aɨjna ɨ Jesús tɨ i'i Cɨriistu'u, ajta ɨ taatajra'an tɨ aɨn pueen ɨ Dioj tɨ ra'ajjáj hua'atzajta'a ɨ mɨ'ɨchite. 3Che'e aɨn ɨ Dioj ɨ tyaj rajya'upua, ajta aɨn ɨ tavastara'a aɨjna ɨ Jesús tɨ ajta i'i Cɨriistu'u, miche'e maɨn rɨ'ɨ tyajamuaata'an ruxé'evi'ira'a cɨme'e, miche'e majta rɨ'ɨ tyajamuaatyápua'arite'en ɨ a'amuatzajta'a. 4Che'e ayen éenye'en, a'ini aɨn ɨ tavastara'a huataura'a tɨ huamɨ'ɨni ta jetze ma'acan tɨ ij aɨn tu'irajtuaani aɨme tzajta'a ɨ mej a'ij pua'a titetyújcha'ɨ ɨ mej yan japuan huachaatɨme iiyan chaanaca japua. Ayaa pu ti'ijxe'eve'e ɨ Dioj ɨ tyaj rajya'upua tɨ aɨn Jesús ayan huarɨni. 5Aɨj pu cɨn tiche'e teyan rɨ'ɨ tiraata'an para rusen cɨme'e. Ayaa pu'u, che'e ayan tyaja'ure'enyen. 6Eecan nu a'ij pua'a tya'utanmua'a nyaɨjna cɨme'e sej seyan ca'anacan ma rúuhua'ana saɨjna tɨ amuaatajée sej si ra'ara'astijre'en seij a'ini Cɨriistu'u pu a'amua japua huanyúu ruxé'evi'ira'a cɨme'e. Muan xu ma rúuhua'ana sej si saɨque tira'ancura'an seica ɨ nyuucari ɨ saj nu'u cɨn huataujtyamua'ave'en. 7Ma ajta cai, capu a'atzu aɨn pueen seij ɨ nyuucari ɨ tɨ cɨn Dioj amue'iratuaasin. Ayej nya'ase seica mu a'amua'ɨtziite'e sej si cai che'e rɨ'ɨ tityá'ujmua'atya. Tij macai meyan ti'ityese'e mej saɨque raaruuren ɨ nyuucari tɨ xaa a'ij ti'itɨj cɨme'en raxa ɨ Cɨriistu'u. 8Aru tɨ pua'a a'atɨ ayan saɨque tyaja'amue'ixaatya'a ɨ nyuucari tɨ cai ayan namuajre'e a'ij tej teri tyajamue'ixaa, che'e Dioj pueijtzi raata'an. Capu amɨn a'ij a'atɨ tɨ pueen tɨ ayan saɨque tyaja'amue'ixaate'e, tɨ pua'a inyaa na'ari seij tɨ ti'ivaɨre'e u tajapua. 9Tu'uri teyan tyaja'amue'ixa. Tyajta tyajtahua'a tu teyan tyaja'amue'ixaate'e yee tɨ pua'a a'atɨ ayan saɨque tyaja'amue'ixaatya'a seica ɨ nyuucari tɨ cai ayan namuajre'e a'ij tej teri tyajamue'ixaa, che'e Dioj pueijtzi raata'an. 10¿A'ini seti'imua'atze muan nyeetzi cɨme'en? ¿Ni qui yee nyej neyan raahuausin ɨ tyaɨte tzajta'a mej mi rɨ'ɨ tinaaseij nusu nyej neyan raahuausin ɨ Dioj jemi tɨ aɨn xaa rɨ'ɨ tinaaseij? ¿Ni qui ayan tyajamua'amitejte'e nyaj nyaɨjna cɨn neyan ti'ityese'e nyej ni rɨ'ɨ tihua'uta'an ɨ tyaɨte? Tɨ pua'a ayan tya'ame'enche'e nyej nyaɨjna cɨn ti'ityese'e, capu che'e rɨ'ɨrista a'ame'enche'e nyej neyan nicu ti'ijvaɨre'e ɨ Cɨriistu'u. 11Ayaa nu ti'ijxe'eve'e, nye'ihuaamua'a, sej si tiraamua'ati tɨ cai a'atɨ rusaɨj a'ij tirajtyau ɨ nyuucari ɨ nyaj cɨn tyajamue'ixaa. 12Canu ra'ancura'a tyaɨte jemi. Capu a'atɨ ayan tinaamua'ate, silu aɨn Cɨriistu'u, aɨ pu tinaataseijrate aɨjna tɨ avítzi'ihuaca'a ɨ Dioj jemi. 13Sajta muan, xu'uri raamua'areeri'i a'ij nyej ti'ijrɨ'ɨrajcaa ɨ jajcua'ɨmɨ nyatɨ'ɨj nyauj ra'astijra'acaa ɨ hua'aye'ira aɨme ɨ maj Israel jetze ajtyama'acan. Na'aranca'anyaacan nu cɨn a'ij pua'a hua'aruurajcaa aɨme ɨ mej Cɨriistu'u jemi seijra'acaa. Nyaa nu ti'ityesa'acaa nyaj hua'antipua'arite'en naijmi'ica. 14Eitze'e nu ra'astijra'acaa ɨ nyavaujsimua'a tyaacan tihua'aye'ira cai aɨme ɨ nyaxa'aj tyaɨte, ɨ maj Israel jetze ajtyama'acan, ɨ maj majta meyan tí'ityeta nyatɨj inyaa. Naijmi'ica nu huatyaamue'itɨ nyaɨjna cɨme'e ɨ nyaj raayɨ'ɨtɨhua'a ɨ taye'irá. 15- 16Ma ajta Dioj, aɨ pu na'antihuau nyatɨ'ɨj cai xɨ huanu'eihuaj. Aɨ pu ajta naatajée aɨjna cɨme'e tɨ ná'ancu'uvajxɨ ruxé'evi'ira'a cɨme'e. Tɨ'ɨj i ra'aranajchaca'a nyej raamua'ati aɨjna tɨ i'i yaujra'an nyej ni neyan tihua'uta'ixaate'en hua'a tzajta'a aɨme ɨ maj cai Israel jetze ajtyama'acan. Tɨ'ɨj Dioj ayan naaruu, canu a'atɨ jemi a'atanye tɨ ij aɨn tinaamua'aten a'ij nyej ti'itɨ cɨn neyan huarɨni. 17Canu nyajta nyaun a'ujnyéj anti Jerusalén nyej ni hua'umuaare aɨme ɨ maj anacai antíhuaviihuaca'a nyatɨ'ɨj cai xɨ inyaa, silu e'eyan nu nyaun a'atanye u Arabia. Aj nu ni'ijta nyaun á'umej u Damasco. 18Hueica ninye'ira'a nu nyaun e'etee. Aj nu ni nyaun a'ujnyéj anti Jerusalén nyej ni raamua'ati nyaɨjna ɨ Pedro. Nyajta nu jamuan a'ucatii a'achu cumu hua'apua iteeri. 19Seij nu nyajta nyaun a'useij nyaɨjna ɨ Jacobo tɨ i'i juutzajra'an ɨ tavastara'a. Canu maa a'atɨ a'useij tɨ hua'a jetze ajtyama'acantacaa aɨme ɨ maj antíhuaviihuaca'a. 20Ayaa nu tyaja'amue'ixaate'e tzaahuati'ira'a cɨme'e tɨ aɨn Dioj ajta ramua'aree nyaj cai hue'itzi cɨn tyaja'amuayu'use'e. 21Nyajta e'eyan, nyaun u a'ará'a nyaujna ɨ seij chuejra'a japua u Siria, nyajta nyaujna u Cilisia. 22Majta aɨme ɨ maj maun a'uchaatɨme ɨ maj majta Cɨriistu'u jemi seijre'e, capu a'atɨ nyamua'ajcaa. 23Aɨ mu'u nyuucari namuajraca'a tɨcɨn: “Aɨ pu yeehui aɨn pueen ɨ tɨ ajmi'i a'ij pua'a taruurajca'a. Ma ajta aɨn, ijii pu yeehui ayan tihue'ixaate'e a'aye'i ɨ tyaɨte mej mi meyan tira'ara'astijre'en ɨ ye'ira tɨ ajmi'i ra'antipua'aritya'amɨ'ɨcaa.” 24Majta aɨme, rɨ'ɨ mu tiraata'acaa ɨ Dioj inyeetzi cɨme'e.

will be added

X\