Efesios 6

1Sajta muan, mɨ sej i'i tɨ'ɨrii, sata'aj hua'ara'astijre'en ɨ a'amuavaujsimua'a a'ini ayaa pu tiraavijte'e ɨ tavastara'a jemi. 2Ayan tɨcɨn: “Pata'aj nu'u rɨ'ɨ tihua'uta'an ɨ ataata, ajta anaana.” Ai pu aɨn pueen ɨ nyuucari tɨ cɨn Dioj tya'ataujratziiri'i ti'itɨj cɨme'e tɨ pua'a a'atɨ ayan ra'ara'astijre'en. 3Ajta ayan tɨcɨn: “Tɨ ij tyamua'a naa timuaavaɨre'en, pej pi pajta nu'u a'ateevi'in paj ruuri pua'ara'ani iiyan chaanaca japua.” 4Sajta muan, mɨ sej hua'aya'upua pueen, caxu muare'eristan ɨ a'amuayaujmua'a jemi mej mi cai huatanyu'ucan, silu rɨ'ɨ xu tihua'uchaɨn. Sej si tihua'umua'aten, sajta tihua'uta'ixaate'en tyamua'a naa a'ij tɨ ti'ijxe'eve'e ɨ tavastara'a. 5Sajta muan, mɨ saj ca'anyejri cɨn ti'ivaɨre'e seij jemi, sata'aj hua'ara'astijre'en aɨme ɨ mej iiyan chaanaca japua tyaja'amue'ijte'e. Sata'aj seyan che'eta sana'a hua'ara'astijre'en satɨj sajta tira'astijre'e tzaahuati'ira'a cɨme'e saɨjna ɨ Cɨriistu'u, aɨjna cɨme'e saj rɨ'ɨ huataujseijrata, sajta seyan ti'itzɨɨnye'e tɨ pua'a sacai nain cɨn tya'ara'asten. 6Sata'aj seyan a'ujca'anyaacan cɨn tihua'utyavaɨre'en aɨme ɨ mej tyaja'amue'ijte'e tɨ pua'a meyan tyaja'amuaseij nusu macai. Sata'aj che'eta sana'a tihua'utyavaɨre'en satɨj sajta tiraatyavaɨre'en saɨjna ɨ Cɨriistu'u. Sata'aj seyan saɨjna cɨn aráurasten a'ij tɨ ti'ijxe'eve'e ɨ Dioj nain cɨme'e a'achu saj caj á'ujca'anye ɨ a'amua tzajta'a. 7- 8Sata'aj seyan che'eta sana'a ruxé'evi'ira'a cɨme'e tihua'utyavaɨre'en yaa cumu tavastara'a jemi xu ti'ivaɨre'e. Ee xaa nya'u, caxu tetyaca sana'a jemin ti'ivaɨre'e a'ini ayaa xu ramua'aree tɨ aɨn tavastara'a ayan tiraatapueijve'esin naijmi'ica a'ij tɨ ti'itɨ huáruu tɨ i'i xa'apɨ'ɨn. Capu amɨn a'ij tɨ pua'a a'atɨ ca'anyejri cɨn ti'imuare'e nusu ayan ruxé'evi'ira'a cɨn ti'ivaɨre'e. 9Sajta muan, mɨ sej tihue'ijte'e, ayaa xu che'eta sana'a rɨ'ɨ tihua'ajchaɨ aɨme ɨ mej muejmi jemi ti'ivaɨre'e. Caxu hua'anyeeche a'ini xu'uri ramua'aree tɨ aɨn tɨ aun e'eseijre'e u tajapua, aɨj pu tɨ tihue'ijte'e aɨme ɨ mej muejmi jemi ti'ivaɨre'e. Aɨ pu ajta tyaja'amue'ijte'e muejmi. Ajta ɨ jemin, naimi'i xu ruxa'aj e'en, mɨ sej tihue'ijte'e, sajta mɨ sej ca'anyejri cɨn ti'imɨjhuaca. 10Ajcaahui, sata'aj seyan huataujca'anyen aɨjna cɨme'e sej jetzen araujca'anen ɨ tavastara'a saj nain cɨn tyu'utyamue'itɨn ɨ muáre'eri'ira'ara'an cɨme'e. 11Sata'aj rɨ'ɨ tityacaujnan nain cɨme'e ɨ tɨ Dioj raatyajtuaa muejmi jemi ɨ saj cɨn ti'ityese'e tɨj ajta xantaaru'u tɨ nainjapua caujnan, sej si tya'utaviicue'i nain cɨme'e tɨ tiyaaru'u aviitzi cɨn tiraaxa'apɨ'ɨntare a'ij tɨ huarɨni tɨ amuaatyamue'itɨn. 12Ayaa xu huarɨni a'ini catu xaa nya'u aɨme jamuan ti'itesa'aca ɨ tyetyaca silu hua'a jamuan aɨme ɨ mej ti'itɨj cɨn antyujmua'aree, majta aɨme ɨ mej tie'ijta, aɨme ɨ xaijnyu'ucari ɨ maj a'ij pua'a e'en, ɨ maj majta títyatatí ti'itɨj cɨme'e tɨ tɨca'amiste'e seijre'e iiyan chaanaca japua, ajta ɨ mej e'eseijre'e u tajapua. 13Aɨj xu cɨn nainjapua caujnan saɨjna cɨme'e tɨ Dioj raatyajtuaa muejmi jemi sej si cɨn ti'ityesa'a tɨ'ɨj ajna tyaja'ure'enyen ɨ xɨcaj tɨ jetzen huataseijre'en aɨjna tɨ a'ij pua'a een. Ayaa xu huarɨni tɨ ij cai aɨn amauutaxɨn aujna u saj a'utyáuuca, sajta muan, satɨ'ɨj seri raatyamue'itɨ, ayaa xu huarɨni, sata'aj saun a'utyáuu xa'ara'ani. 14Ayaa xu seiira'a xa'aju'un, nain ɨ sej seyan tyu'utaxaj, huataujnyátacan xu cɨn seyan raataxaj. Ajta nain a'ij sej rɨcɨ, ayaa xu seyan raruuren a'ij tɨ tiraavijte'e ɨ Dioj jemi. Aɨj pu xaa ayan tyajamuaatyavaɨre'esin tɨj ajta ti'ivaɨre'e aɨjna ɨ puaasi tɨ cɨn ava'ujjɨ'ɨqui ɨ xantaaru'u, ajta aɨjna tɨ cɨn antyaujnaamɨ ɨ rutaviitze'e. 15Sata'aj seyan che'eta sana'a rɨ'ɨ huaujruuren tɨj ajta saɨj tɨ re'enya'a cɨn ajtaujca'acaite'e tɨ i aun japuan e'eye'iva a'u tɨ a'ij pua'a hue'en. Sata'aj seyan huatyaujca'anyen sej si seyan tya'utaviicue'i saj tihua'uta'ixaate'en ɨ tyaɨte saɨjna cɨme'e ɨ nyuucari tɨ cɨn Dioj hua'utyapua'arite'esin. 16Sajta saɨjna cɨme'e, sata'aj seyan huarɨni, sata'aj nain cɨn rá'antzaahuate'en ɨ tavastara'a. Ayaa xu een cɨn huarɨn, muan xu raayɨ'ɨtɨhua'an saj huatyaujnan tɨ'ij cai ti'itɨj cɨn amua'antipua'arite'en aɨjna ɨ tiyaaru'u. 17Sata'aj sajta ra'ancura'an aɨjna tɨ cɨn Dioj amue'iratuaasin. Ayaa pu tyajamuaatyava'ɨri tɨj ajta tiraatyava'ɨri ɨ xantaaru'u aɨjna tɨ cɨn utyamuucu'u. Ajta i'i, sata'aj seyan ru'ityechuaaca aɨjna ɨ chun tɨ ruxa'ajta'a ajcamɨɨmɨjmee tɨ amuaatachuiite'esin aɨjna ɨ xaijnyu'ucara'ara'an ɨ Dioj. Aɨjna tɨ ruxa'ajta'a ajcamɨɨmɨjmee, ai pu aɨn pueen ɨ nyuucari tɨ jetzen raxa ɨ Dioj. 18Sata'aj seyan araujca'anyen saɨjna jetze ɨ xaijnyu'ucara'ara'an ɨ Dioj sej si rahuauca ɨ Dioj jemi tɨ'ɨj pɨ na'a saɨjna cɨme'e nain ti'itɨ tɨ a'ij tyajamua'aturaate'e. Aɨj xu cɨn, sauche'e xu atanyéjnye'eri. Caxu raxaahuata sej seyan hua'a cɨme'e rahuauca ɨ Dioj jemi naijmi'ica aɨme ɨ mej huatyáuu ɨ Dioj jemi. 19Sata'aj seyan rahuauca ɨ Dioj jemi nyeetzi cɨme'en tɨ ij aɨn Dioj ayan naata'an a'ij nyej neyan tyu'utaxaj a'anaj tɨ na'a, nyej ni neyan tihua'uta'ixaate'en ɨ tyaɨte, nyej ni neyan cai ti'itzɨɨnya'a ti'itɨ cɨme'e nyej neyan tihua'uta'ixaate'en nyaɨjna cɨme'e tɨ a'aviitzi'i aɨjna cɨme'e a'ij tɨ Cɨriistu'u tajapua huanyúu. 20Aɨj nu cɨn nyeri aityanami'i nyaɨjna cɨme'e nyej tihue'ixaate'e ɨ tyaɨte ɨ Jesús jetze ma'acan. Sata'aj seyan ti'ihuaviira ɨ Dioj jemi nyej ni cai ti'itzɨɨnya'a ti'itɨj cɨme'e nyej tihua'uta'ixaate'en a'ij tɨ ayan tinaavijte'e inyeetzi nyej neyan huarɨni. 21Ajta aɨn Tíquico, ɨ nye'ihuaara'a ɨ nyaj raxe'eve'e tɨ ayan che'eta na'a tya'atzaahuate'e ɨ tavastara'a jemi nyatɨj inyaa, aɨ pu cai ti'itɨj cɨn atya'ɨtza'ara ɨ Dioj jemi. Aɨ pu nain tyajamuaata'ixaate'esin sej si raamua'aree a'ij tɨ ti'inyavaɨre'e, sej si sajta raamua'aree a'ij nyej rɨcɨ. 22Ayaa nu een cɨn muejmi jemi raatáiti sej si raamua'aree a'ij tɨ ti'itavaɨre'e, tɨ ij ajta aɨn rɨ'ɨ tyajamuaata'an. 23Che'e Dioj hua'utyapua'arite'en naijmi'ica ɨ sej ru'ihuaamua'a. Ajta aɨn ɨ Dioj ɨ tyaj rajya'upua, ajta aɨn ɨ tavastara'a, aɨjna ɨ Jesús tɨ ajta i'i Cɨriistu'u, miche'e maɨn amuaataxe'eve'en a'ini muan xu tya'atzaahuate'e. 24Che'e a'ij tihuá'avaɨɨra'a naijmi'ica ɨ maj rusen cɨn raxe'eve'e maɨjna ɨ tavastara'a, aɨjna ɨ Jesús tɨ ajta i'i Cɨriistu'u.

will be added

X\