Efesios 5

1Aɨj xu cɨn seyan tityahuaujca'anyen sej si seyan rɨ'ɨ titya'urare'enye'en ɨ a'amua tzajta'a a'ij tɨ tya'urare'en ɨ Dioj, a'ini xu'uri yaujmua'ame'en pueen ɨ Dioj tɨ a'amuaxe'eve'e. 2Sata'aj seyan rɨ'ɨ titetyujchaɨ saɨjna cɨme'e saj huaujxe'eve'en a'ini Cɨriistu'u pu ayan che'eta na'a taataxe'eve. Aɨ pu huataujmuaɨ'ɨvajtaca'a tajetze ma'acan ɨ Dioj jemi. A'ini aɨ pu aɨjna cɨn rɨ'ɨ tiraata'a ɨ Dioj, aɨj pu cɨn ayan eenya'a seijre'e tɨj muaɨ'ɨvejri tɨ naa tyáará'i u tajapua aɨjna cɨme'e tɨ aɨn ayan tajetze ma'acan huanyúu. 3Caxu a'atzu raata'acare'en tɨ ayan huarɨni muejmi tzajta'a maj huataxana'acɨre'en na'ari maj ti'itɨ cɨn a'ij pua'a huarɨni nusu maj huapɨ'ɨ ranyacua'atze ɨ tumin. Capu xaa nya'u ayan tiraavijte'e mej meyan huarɨni aɨme ɨ mej tyaɨtestyamua'ame'en pueen ɨ Dioj, ɨ tɨ hua'utyahuii ɨ rujemin. 4Caxu sajta hua'ata'acare'en mej meyan ti'ixajta nyuucari cɨme'e tɨ a'ij pua'a namuajre'e na'ari tɨ cai ti'itɨj vaɨre'e nusu ɨ maj cɨn titya'axaahuari'i. Capu a'atzu i'i xa'apɨ'ɨn mej meyan a'ij pua'a ti'ijeeva silu miche'e rɨ'ɨ tiraata'an ɨ Dioj. 5Jee xaa nya'u, ayaa pu ti'ayajna, tɨ pua'a a'atɨ ayan a'ij pua'a ti'itevista aɨjna cɨme'e tɨ tyu'uxana'acɨre'en nusu aɨjna cɨme'e tɨ a'ij pua'a me tyauumua'aree ca'ɨn aɨjna cɨme'e tɨ huapɨ'ɨ raxe'eve'e tɨ eihua ti'ijcha'ɨ, capu a'anaj racɨ'ɨti tɨ aɨjna aun a'utyarute Dioj tɨ e'eseijre'e ajna ɨ xɨcajra'a tɨ jetzen tyu'utaijta aɨjna ɨ Cɨriistu'u, a'ini aɨn tɨ huapɨ'ɨ raxe'eve'e tɨ eihua ti'ijcha'ɨ, ayaa pu seijre'e ɨ Dioj jemi tɨj saɨj tɨ ayan rana'amiche ti'itɨ tɨ cai Dioj pɨrɨcɨ. 6Caxu raata'acare'en tɨ a'atɨ amuaacuanamua aɨjna cɨme'e ɨ nyuucari tɨ hue'itzi na'a pueen, a'ini Dioj pu eihua huapɨ'ɨ pueijtzi hua'uta'asin aɨme ɨ mej meyan ti'ihue'itaca. Ai mu aɨn pueen ɨ maj cai ra'astijre'e ɨ Dioj. 7Aɨj xu cɨn, caxu hua'ajtyanaxcan aɨme. 8Ana'ɨmɨ xu sajta seyan titetyujchaɨca'a matɨj aɨme ɨ maj tɨca'amiste'e á'ujhua'an. Ma sajta ijii, ayaa xu e'en matɨj aɨme ɨ mej nyeeriste'e á'ujhua'an. Ayaa xu seri e'en aɨjna cɨme'e tɨ Cɨriistu'u a'amua japua huanyúu. Aɨj xu cɨn, sauj seyan rɨ'ɨ huarɨni matɨj aɨme ɨ mej nyeeriste'e á'ujhua'an. 9Ayaa mu xaa nya'u rɨ'ɨ titetyujchaɨ ɨ mej nyeeriste'e á'ujhua'an mej meyan nain cɨn rɨcɨ tɨ xa'apɨ'ɨn cɨme'e, majta meyan rɨcɨ a'ij tɨ tiraavijte'e, ajta tɨ tzaahuati'ira'a cɨme'e seijre'e. 10Sata'aj sajta raahuauni saj yau'eitaa xa'ara'ani a'ij sej rɨ'ɨ tiraata'an ɨ Dioj. 11- 12Caxu a'atzu hua'ajtyanaxcan hua'a jemi ɨ mej meyan a'ij pua'a titetyujchaɨ ɨ maj tɨca'amiste'e á'ujhua'an, silu ayaa xu hua'utaseijrate'en tɨ cai ti'itɨj vaɨre'e a'ij mej rɨcɨ, a'ini ayaa pu tyu'utevi'iraste'e tɨ a'atɨ ayan ti'ixajta a'ij maj aviitzi cɨn rɨcɨ aɨme ɨ maj cai a'atɨ a'astijre'e. 13- 14Ma ajta, naijmi'i pu huataseijre'esin a'ij tɨ een tɨ pua'a a'atɨ raatyatátzavi'i, a'ini aɨjna ɨ tatzari, nain pu cɨn ti'iseijrata a'ij tɨ een. Aɨ pu cɨn, ayan te'eyu'usi'i tɨcɨn: Huatajɨsi mɨ pej i'i cutzu, ajta ajchesi amajna hua'a tzajta'a ɨ mɨ'ɨchite. Ajta aɨn Cɨriistu'u pu muatyatátzavi'ira. 15Rɨ'ɨ xu'u muan, sej si seyan rɨ'ɨ titetyujchaɨ matɨj aɨme ɨ mej rɨ'ɨ metityaumuámua'aree. Caxu seyan e'enye'en matɨj aɨme ɨ maj saɨque metityaumuámua'aree. 16Sata'aj seyan ahuaujca'anyen sej si nain cɨn seyan huarɨni a'ij tɨ ti'ixa'apɨ'ɨn ijii tɨ auj huaxa'apɨ'ɨn a'ini a'ij pua'a mu meyan rɨcɨ ɨ maj huátyaamua ijii. 17Aɨj xu cɨn, caxu saɨque metityaumuámua'ara silu ayaa xu ahuaujca'anyen sej si seyan yau'eitaa xa'ara'ani a'ij tɨ ti'ijxe'eve'e ɨ tavastara'a. 18Caxu seyan ta'aruu a'ini tɨ pua'a seyan huarɨni, a'ij pu pua'a á'amuaruuren asta sacai nain cɨn a'uveti. Ma sajta muan, sata'aj nain cɨn araujca'anyen saɨjna jetze ɨ xaijnyu'ucara'ara'an ɨ Dioj. 19Satɨ'ɨj u e'etyujsaɨre'en, sata'aj seyan tihuaurixaate'en saɨjna cɨme'e ɨ chuiicari ɨ saj sajta cɨn ti'icuiina, sajta ɨ saj cɨn rɨ'ɨ tiraata'an ɨ Dioj. Sata'aj seyan tyu'utachuiica, sajta tyu'utacuiina ɨ a'amua tzajta'a sej si seyan rɨ'ɨ tiraata'an ɨ tavastara'a. 20Sajta, sata'aj seyan huarɨni a'anaj tɨ na'a saj ti'ijtáujtzi'ira'a ɨ Dioj ɨ tyaj rajya'upua nain cɨme'e tɨ ti'iseijre'e nyuucajtze'en ɨ tavastara'a, aɨjna ɨ Jesús tɨ ajta i'i Cɨriistu'u. 21Sata'aj seyan huarɨni sej seyan huataura'an saj huaujvaɨre'en seij sajta seij saɨjna cɨme'e saj ra'astijre'e saɨjna ɨ Cɨriistu'u. 22Sajta muan, mɨ sej víche'ejmee, sata'aj seyan huataura'an saj seyan che'eta sana'a hua'ara'astijre'en ɨ a'amuacɨna'astyamua'a satɨj seri tira'astijre'e saɨjna ɨ tavastara'a. 23Ayaa xu een cɨn huarɨni a'ini aɨn ɨ cɨna'ara'an, ayaa pu che'eta na'a mu'ucan pueen aɨjna jemi ɨ tɨ raatyevi'itɨn tɨj ajta aɨn Cɨriistu'u hua'amu'ucan pueen naijmi'ica jemi ɨ mej e'etyujsa'ɨri ɨ jemin. Ajta Cɨriistu'u pu hue'iratuaasin. 24Ma'acui xaa, a'ini aɨ mu ra'astijre'e maɨjna ɨ Cɨriistu'u aɨme ɨ mej e'etyujsa'ɨri ɨ jemin, ayaa pu che'eta na'a ruxe'eve'e mej mi aɨme ɨ mej víche'ejmee mej mi hua'ara'astijre'en aɨme ɨ rucɨna'astyamua'a nain cɨme'e. 25- 26Sajta muan, mɨ saj hua'acɨnastyamua'a pueen, sata'aj seyan che'eta sana'a hua'axe'eva'a ɨ ru'ɨstya'amua'aca tɨj ajta aɨn Cɨriistu'u tíhua'utaxé'eve aɨme ɨ mej e'etyujsa'ɨri ɨ jemin. Aɨ pu ajta huataura'a tɨ huamɨ'ɨni hua'a jetze ma'acan tɨ ij ajta rujɨme'e hua'utyahuii ɨ rutyaɨtestyamua'a. Aɨ pu hua'ujajcuare aɨjna cɨme'e tɨ hua'ari'iri'i ɨ maj cɨn autyajturaa ɨ jemin. Aɨ pu ajta rɨ'ɨ hua'uruu ɨ hua'a tzajta'a aɨjna cɨme'e maj rá'antzaahua maɨjna ɨ nyuucari tɨ aɨn raatyajtuaa hua'a jemi. 27Aɨ pu Cɨriistu'u ajta hua'utatuiire'esin ɨ rujemi. Ayaa mu seira'a mua'aju'un tɨj a'atɨ tɨ siicu'uri cɨn ucaujchejte tɨ cai a'atzu ti'itɨj cámeijri'i, tɨ cai a'atzu huatyatzu'uta, tɨ cai ti'itɨ tira'aturaate'e. Ayaa mu naa seira'a mua'aju'un tɨj ti'itɨj tɨ tyámaxcɨva'ara'a. Naa mu uraré'enya'a mua'aju'un, majta camu ti'itɨj cɨn a'aturaa mua'aju'un tɨ'ij cai a'atɨ ti'itɨj cɨn hua'a jetze tya'upuá'ajte'en. 28Ayaa pu ruxe'eve'e mej mi aɨme ɨ mej nyaɨche'ejmee meyan che'eta mana'a tihua'axe'eva'a ɨ ru'ɨstya'amua'aca matɨj majta tyu'ujxe'eve'e ɨ rujetze. Aɨn tɨ ayan raxe'eve'e ɨ ru'ɨj, aɨ pu ajta ayan ruxe'eve'e rusaɨj. 29Ayaa pu'u ti'en, a'ini capu a'atɨ a'anaj ayan rajchaɨra'acaa ɨ rutevi, silu aɨ pu ti'ijmicua, ajta rɨ'ɨ pu ayan che'eta na'a raaxa'apuei tɨj ajta aɨn Cɨriistu'u rɨ'ɨ tihua'axa'apuei aɨme ɨ mej e'etyujsa'ɨri ɨ jemin. 30Tyan tu xaa títavi'iraxɨ jamuan aɨjna ɨ Cɨriistu'u. 31Ayan tɨcɨn: “Aɨj pu nu'u cɨn, a'atɨ pu ayan ma rúujɨsin ɨ rutaata, ajta ɨ runaana tɨ ij nu'u huatyenyaɨche aɨjna jamuan ɨ ru'ɨj. Majta nu'u aɨme ɨ maj hua'apua, ayaa mu nu'u seij mana'a tyaɨtejra'a puéenya'a mua'ara'ani.” Yaa pu'u xaa nya'u. 32Ai pu pueen ti'itɨj tɨ huapɨ'ɨ ruxe'eve'e tɨ ajta aviitzi cɨn ayan ti'en. Me nyajta inyaa aij nu cɨme'en ti'ixa nyaɨjna ɨ Cɨriistu'u, nyajta nyaɨme cɨme'en ɨ maj e'etyujsa'ɨri ɨ jemin. 33Ma sajta muan, satɨj sana'a saj nyaɨche'ejmee, ayaa pu ruxe'eve'e sej seyan che'eta sana'a hua'axe'eva'a ɨ a'amua'ɨjstya'amua'aca satɨj sajta tyu'ujxe'eve'e ɨ rutevi jetze. Ajta aɨme ɨ maj víche'ejmee, ayaa pu ajta ruxe'eve'e maj hua'ara'astijre'en ɨ hua'acɨnastyamua'a.

will be added

X\