Efesios 4

1Aɨj nu cɨn, inyaa, i nyaj aityanami'i aɨjna cɨme'e nyaj ravaɨre'e ɨ tavastara'a, ayaa nu tyaja'amuahuavii sej si seyan rɨ'ɨ titetyujchaɨ a'ij tɨ tiraavijte'e a'ini Dioj pu amuaatajée. 2Sej si cai ti'itɨ cɨn a'ujtzaahuatya'a silu ayaa xu'u cumu saj cai ti'itɨj cɨn ti'ityejvee. Sej si hua'ancu'uvajxɨ'ɨn sej si tya'utaviicue'i seij sajta seij aɨjna cɨme'e sej huaujxe'eve'en. 3Sata'aj huatyaujca'anyen sej si sauj seij sana'a tyaɨtestyamua'ame'en pueenye'en a'ini aɨn xaijnyu'ucara'ara'an ɨ Dioj, aɨ pu rɨ'ɨ tyaja'amuasaɨre'esin aɨjna cɨme'e tɨ ari amuaatyapua'ari. 4Ayaa pu'u ti'en, a'ini seij mu'u ɨ tyaɨtestyamua'ame'en ɨ mej yen seijre'e, ajta seij pu'u ɨ xaijnyu'ucara'ara'an ɨ Dioj. Ayaa pu che'eta na'a een tɨ seij na'a aɨjna sej jetzen rachu'eve'e aɨjna tɨ cɨn amuaatajée ɨ Dioj. 5Seij pu'u ɨ tavastara'a, ajta seij pu'u aɨn pueen ɨ tyaj ra'atzaahuate'e, ajta seij pu'u cɨn ɨ nyuucajtze'en ɨ maj cɨn muaɨ'ɨvijhuaca. 6Ajta seij pu'u ɨ Dioj, ɨ tyaj naimi'i rajya'upua. Aɨ pu nain cɨn antyujmua'aree. Aɨ pu ajta nain cɨn ti'imuare'e tɨ'ij nain tyu'unáijmi'ire'en. Aɨ pu ajta naijmi'i jemi seijre'e ityejmi jemi. 7Ajta ityejmi, ayaa pu titaatapueijve ɨ Cɨriistu'u seij ajta seij aɨjna ɨ tɨ cɨn rɨ'ɨ titajcha'ɨca'a a'ij tɨ aɨn titaaxa'apɨ'ɨntari'iri'i. 8Aɨj pu cɨn ayan te'eyu'usi'i tɨcɨn: Tɨ'ɨj nu'u aɨn a'ujnyéj u tajapua, aɨ pu nu'u huaja'uvi'itɨ aɨme tɨ ij hue'ityaanan naijmi'ica ɨ tɨ hua'utyaamue'itɨ. Aɨ pu ajta nu'u hua'ure'epijte aɨme ɨ rutyaɨtestyamua'a aɨjna tɨ cɨn rɨ'ɨ tihua'ajchaɨca'a. 9Ajta eijna i nyuucari tɨ ayan raxaj yee aɨ pu nu'u a'ujnyéj u tajapua, ¿a'ini huataujmua'a aijna? ¿Ni qui ayen huataujmua'a yee aɨ pu ajta anacai ya va'acaanye iiyan chaanaca japua? Ee xaa nya'u, ayaa pu ti'ayajna tɨ ayan huataujmua'a. 10Aɨjna tɨ ya va'acaanye, ai pu aɨn pueen ɨ tɨ aun a'ujnyéj anna'ɨmɨ u tajapua tɨ ij raanaijmi'ire'en tɨj na'a tɨ ti'ityapua'amua tɨ nainjapua ti'iseijre'e. 11Ai pu aɨn pueen ɨ tɨ seica antihuau, mej mi te'entyarute maɨjna cɨme'e ɨ maj tamuaamuata'a japuan hua'apua ara'ase, ajta seica, mej mi meyan tyu'utyavaɨre'en maɨjna cɨme'e mej tyu'utaxaj Dioj jetze ma'acan. Aɨ pu ajta seica antihuau mej mi meyan á'ujhua'anye'en mej tihua'uta'ixaate'en ɨ tyaɨte ɨ nyuucari tɨ cɨn Dioj hue'iratuaasin, ajta seica, mej mi meyan maɨjna cɨn antyujmua'aréera mej mi rɨ'ɨ tihua'uchaɨn ɨ mej e'etyujsa'ɨri. Ajta seica, aɨ pu ayan tihua'uta'a mej mi tihua'umua'aten ɨ tyaɨte. 12Ayaa pu een cɨn hua'antihuau mej mi rɨ'ɨ hua'uruuren ɨ hua'a tzajta'a ɨ mej huatyáuu ɨ Dioj jemi, mej mi aɨme majta tyu'utyavaɨre'en aɨjna cɨme'e mej mi tyújvi'iraxɨ'ɨn jamuan ɨ Cɨriistu'u. 13Ayaa tu een cɨn huarɨn, aj tu xaa a'ara'asti tej ti seij tyana'a cɨn rá'antzaahuate'en, tej ti teyan che'eta tyana'a raamua'ati tyaɨjna tɨ yaujra'an pueen ɨ Dioj. Aj tu xaa, nain cɨn teri huavaujse aɨjna cɨme'e tej teri tyu'unáijmi'ire a'ij tɨ Cɨriistu'u titaaxa'apɨ'ɨntari'iri'i tej ti teyan e'enye'en tɨj ajta aɨn een. 14Ayaa tu tyajta tyaɨjna cɨn huarɨn, catu che'e teyan é'enya'a ta'aju'un matɨj ɨ tɨ'ɨrii maj mana'a tyaja'unamuajran, maɨjna cɨme'e maj cai xɨ ramua'aree yee ayaa pu ti'ixa'apɨ'ɨn o capu ayan ti'ixa'apɨ'ɨn. Catu che'e teyan cha'a tyana'a tityaaju'un tɨj ɨ jaitɨri tɨ aɨn aaca ayan ráatajchi a'u tɨ na'a pujme'en. Capu che'e rɨ'ɨriista a'ame mej mi meyan cha'a mana'a titaacuanamuan maɨjna cɨme'e a'ij tɨ tihua'araanajchi mej tita'ixaate'en aɨme ɨ tyetyaca ɨ maj raayɨ'ɨtɨ tyamua'a naa maj cɨn e'ihuacuanamuan maɨjna cɨme'e tɨ hue'itzi na'a pueen. 15Me tyajta ityan, ayaa tu ti'ixaata ta'aju'un huataujnyátacan cɨme'e a'ini tyátaxe'eve'e. Ayaa tu een cɨn huarɨn, aj tu xaa nain cɨn títavi'iraxɨ'ɨsin jamuan ɨ tɨ tamu'ucan pueen, tɨ i'i Cɨriistu'u. 16Ajta aɨjna jetze, naijmi'ica pu ayan vaujsi'i ɨ rutyaɨtestyamua'a, ajta naijmi'i mu tyújvi'iraxɨ'ɨsin nainjapua tɨj mana'a maj antyújna'amiche. Ayaa pu te'eme aɨjna cɨme'e mej huaujxe'eve'en seij majta seij, ajta aɨjna cɨme'e matɨj mana'a pua'amua meyan ti'imuare'e maɨjna cɨme'e a'ij tɨ tihua'ucɨ'ɨ seij ajta seij. 17Aɨj nu cɨn, neyan tyaja'amue'ixaate'e. Ayaa nu tyaja'amueijcate'e ɨ tavastara'a jetze ma'acan sej si cai che'e seyan titetyujcha'ɨ matɨj aɨme ɨ maj cai Israel jetze ajtyama'acan. Capu ti'itɨj vaɨre'e ɨ hua'amua'atziira'a. 18Camu rɨ'ɨ tiyau'eite, majta a'ɨmɨ mu a'utyajturaa a'u tɨ cai e'eseijre'e ɨ Dioj tɨ i'i ruuri, aɨjna cɨme'e maj cai ramua'aree a'ij tɨ een ɨ Dioj jemi maɨjna cɨme'e mej ra'antaná ɨ ruxaijnyu'uca. 19Camu che'e rutevi'ira'a. Aɨj mu cɨn meyan huataura'a mej meyan huarɨni a'ij tɨ tihua'amityejte'e, ti'itɨ tɨ hua'araanajchi ɨ rutzajta'a mej mi nain cɨn tyu'uxana'acɨre'en. Majta maɨn, mauche'e mu cai á'ujcu'uváa raahuausin maj majtahua'a meyan a'ij pua'a huarɨni. 20Ma sajta muan, caxu seyan raamuá'a saɨjna jemi ɨ Cɨriistu'u, sej si seyan che'eta sana'a a'ij pua'a huarɨni matɨj aɨme. 21Ayej nya'ase xu'uri raamua'areeri'i, tɨ ajta aɨn tyajamuaamuá'ate tzaahuati'ira'a cɨme'e a'ij tɨ een aɨjna jemi ɨ Jesús. 22Ayaa pu tyajamuaamuá'ate aɨjna cɨme'e a'ij sej sejmi'i titetyujchaɨca'a, sej si yá'uhua'axɨn a'ij sej sejmi'i titetyujchaɨca'a, a'ini ayaa pu a'ij pua'a á'amuaruurajca'a aɨjna cɨme'e tɨ á'amuacuanamuajca'a aɨjna ɨ á'amuamua'atziira'a tɨ ti'ihue'itaca. 23- 24Ajta, sej si seyan huaujjajcuare'en saɨjna cɨme'e a'ij sej me tityaumuámua'aree sej si seyan rɨ'ɨ titetyujchaɨ a'ij tɨ tyajamuaaxa'apɨ'ɨntari'iri'i sej si seyan e'enya'a xa'ara'ani tɨj ɨ Dioj tɨ nain cɨn ayan rɨcɨ tzaahuati'ira'a cɨme'e a'ij tɨ tiraavijte'e, ajta aɨ pu uraré'en. 25Aɨj pu cɨn, ayan ruxe'eve'e sej raatapua'ajta saj cai seyan tyu'ujcuanamua, silu ayaa xu huataujnyátacan cɨn tiraata'ixaate'en ɨ ruxa'aj tevi, a'ini naimi'i tu seij tyana'a jetze ajtyama'acan ɨ tyaɨtestyamua'ame'en. 26- 27Tɨ pua'a seyan ti'itɨj cɨn huatanínyu'ucacu, caxu saɨjna cɨn ti'itɨj cɨn autyaturaave'en ɨ Dioj jemi. Caxu sajta seyan a'atyeevi'in sej seri nínyu'ucacu ti'itɨj cɨme'e. Ayaa nu tyajamuéijcate'e saj cai raata'asin tɨ aɨn tiyaaru'u ayan aviitzi cɨn huataseijre'en muejmi tzajta'a. 28Ajta aɨjna tɨ ti'inahua'ara'a, ayaa pu ruxe'eve'e tɨ cai che'e ti'inahua'a silu che'e rumuajca'a cɨn tyu'umuare'en ti'itɨj tɨ a'ij tiratyava'ɨri tɨ ij ayan ti'itɨ huamué'itɨn ɨ tɨ cɨn hua'utyavaɨre'en aɨme ɨ maj cai a'ij ti'ijviicue'i. 29Caxu ti'itɨ xajta tɨ a'ij pua'a namuajre'e, ajta tɨ cai ti'itɨj vaɨre'e silu aɨj xu'u huataxaj ɨ nyuucari tɨ i'i xa'apɨ'ɨn aɨjna cɨme'e tɨ hua'atyava'ɨri mej mi eitze'e yau'eitaa mua'ara'ani a'ij tɨ tihua'aturaate'e, tɨ ij ajta rɨ'ɨ tihua'uta'an aɨme ɨ maj ranamua. 30Caxu sajta a'ij pua'a tiraata'an ɨ xaijnyu'ucara'ara'an ɨ Dioj, aɨjna tɨ rujɨme'e amuatyahuii asta na'a cai tyaja'ure'enyen ajna xɨcajra'a tɨ jetzen Dioj amue'iratuaasin. 31Sata'aj raatapua'ajta nain cɨme'e ɨ saj cɨn a'ij pua'a me tityaumuámua'aree, na'ari ɨ saj cɨn ti'ijaaxaijte'e nusu ɨ saj cɨn nínyu'ucacu ca'ɨn ɨ saj cɨn hua'ataji'ivi ɨ tyaɨte o saj cɨn a'ij pua'a tihua'axa. Nain tɨj na'a tɨ a'ij pua'a een, sata'aj seyan raatapua'ajta. 32Sata'aj rɨ'ɨ titetyujchaɨ, sajta ahuaujcu'uven seij sajta seij. Sata'aj seyan tyu'utauruuni'i seij sajta seij a'ini Dioj pu ajta tyajamuaatauuni'iri'i aɨjna cɨme'e tɨ Cɨriistu'u a'amua japua huanyúu.

will be added

X\