Efesios 3

1Aɨj nu cɨn neyan huarɨni inyaa, i nyaj i'i Pablo, i nyaj nyajta aityanami'i nyaɨjna cɨme'e nyej ti'ivaɨre'e jemin ɨ Cɨriistu'u tɨ ajta i'i Jesús nyaɨjna cɨme'e nyej tyaja'amue'ixaate'e muan mɨ saj cai Israel jetze ajtyama'acan. 2Tij sacai seri raanamuajri'i saɨjna cɨme'e tɨ Dioj ayan rɨ'ɨ tinaatyajtuaa aɨjna cɨme'e tɨ ayan tinyeijca nyej ni tyajamuaata'ixaate'en muejmi. 3Nu'uri cɨj caj tyajamuaataiti'iri'i aɨjna cɨme'e tɨ Dioj naataseijrate me eijre'e ti'itɨ tɨ pɨrɨcɨ ɨ tɨ ru'avaataca'a ɨ jemin. 4Satɨ'ɨj ra'ujiiven a'ij nyej tyajá'amuayu'use'e nyeijna jetze i yu'uxari, aj xu xaa yau'eitaa xa'aju'un a'ij nyej tiyau'eite tyamua'a naa nyaɨjna cɨme'e tɨ ru'avaataca'a aɨjna jetze ɨ Cɨriistu'u. 5Capu xaa nya'u hua'utaseijrate aɨme ɨ seica ɨ tyaɨte ɨ maj cai che'e ya'ahua'acaa, ɨ maj jajcua ɨmɨ seijra'acaa. Ma ajta ijii, aɨn xaijnyu'ucara'ara'an ɨ Dioj ayan hua'utaseijrate aɨme ɨ maj huatyáuu ɨ Dioj jemi mej mi meyan tiraatyavaɨre'en. Aɨ pu ajta ayan tihua'utaseijrate aɨme ɨ mej ti'ixaxa'ata'a ɨ Dioj jetze ma'acan. 6Ai pu aɨn pueen ɨ tɨ ru'avaataca'a tɨ aɨme ɨ maj cai Israel jetze ajtyama'acan, ayaa pu tihua'acɨ'ɨti jamuan aɨme ɨ maj Israel jetze ajtyama'acan, mej mi naimi'i antyaujsaɨre'en mej mi meyan e'enye'en maj saɨj mana'a tyaɨtestyamua'ame'en pueenya'a mua'ara'ani, mej mi naimi'i ra'ancura'an aɨjna tɨ tya'ataujratziiri'i tɨ ayan rɨniiche'en aɨjna ɨ Cɨriistu'u tɨ ajta i'i Jesús. 7Aɨj nu cɨn neyan te'entyajrupi nyaɨjna cɨme'e nyej neyan ti'ivaɨre'e nyej tihua'uta'ixaate'en ɨ nyuucari cɨme'e tɨ cɨme'en raxa ɨ Dioj. Aɨ pu ayan rɨ'ɨ tinaachaɨ aɨjna cɨme'e tɨ ayan naatapueijve ruxé'evi'ira'a cɨme'e nyej ni neyan tyu'umuare'en nyaɨjna cɨme'e ɨ muáre'eri'ira'ara'an ɨ Dioj. 8- 9Ayaa pu een, nyaa nu nyaɨn pueen ɨ tɨ eitze'e cai ruxe'eve'e macai ɨ seica ɨ maj cɨle'en cɨn ti'itátyatyá'upu'u ɨ Dioj jemi. Capu amɨn a'ij, auche'e pu Dioj ayan rɨ'ɨ tinajcha'ɨ tɨ aɨjna cɨn tinyeijca nyej ni tihua'uta'ixaate'en nyaɨme ɨ maj cai Israel jetze ajtyama'acan mej mi raamua'aree a'ij tɨ een Cɨriistu'u jemi tɨ ti'iseijre'e, tɨ cai amiteere'e naijmi'i tɨj na'a ti'ipua'amua tɨ titáacɨ'ɨti aɨjna jemi para rusen cɨme'e, nyej ni tihua'uta'ixaate'en naijmi'ica tyamua'a naa a'ij tɨ Dioj tiraaxa'apɨ'ɨntare a'ij tɨ te'eme aɨjna cɨme'en ɨ tɨ ru'avaa. Jajcua ɨmɨ tɨj na'a tɨ yu e'ire'enye, aɨ pu ru'avaataca'a ɨ Dioj jemi, ɨ tɨ nain tyu'utaahuaca'a tɨj na'a ti'ipua'amua tɨ ti'iseijre'e. 10- 11Ayaa pu tiraaxa'apɨ'ɨntarej mej mi meyan ra'anticuuna aɨjna ɨ tɨ ru'avaataca'a aɨme jemi ɨ maj e'etyujsa'ɨri u teyujta'a mej mi aɨme hua'useij ɨ maj tie'ijta u tajapua, majta aɨme ɨ maj ti'itɨj cɨn antyujmua'aree aun tɨ Dioj e'eseijre'e, mej mi meyan raamua'aree tɨ cai ti'iseicaj na'a ɨ tɨ cɨn Dioj ayan huarɨj ɨ rumua'atziira'a cɨme'e, aɨjna tɨ jajcua ɨmɨ ayan tiraaxa'apɨ'ɨntare para rusen cɨme'e. Aɨ pu ari ra'anticɨ'ɨ aɨjna cɨme'e tɨ aɨn Cɨriistu'u, aɨjna ɨ Jesús tɨ ajta i'i tavastara'a pueen, aɨ pu tajapua huanyúu. 12A'ini tu'uri ra'atzaahuate'e tyaɨjna, ajta aɨjna cɨme'e tɨ aɨn Cɨriistu'u huamɨ'ɨ tajetze ma'acan, aɨj pu cɨn ari rɨ'ɨri tyej ti cai ti'itzɨɨnya'a a'anaj tɨ na'a tyaun a'ara'asti ɨ Dioj jemi. 13Aɨj nu cɨn neyan tyaja'amuahuavii, saj cai ruxaamɨstya'a aɨjna cɨme'e nyej neyan tirajpueiitzi muejmi jetze ma'acan, a'ini eihua pu huapɨ'ɨ tyajá'amuacɨ'ɨti tɨ ayan ti'inyaruure. 14- 15Aɨj nu cɨn neyan titunuta jemin ɨ tyaj rajya'upua ɨ tyaj jetzen ra'ancura'a a'ij tɨ huataujmua'a seij ajta seij ɨ tyaɨtestyamua'ame'en, ɨ mej u ute'e e'eseijre'e, majta ɨ mej yan chaanaca japua huachaatɨme, matɨj mana'a pua'amua ɨ tyaɨtestyamua'ame'en ɨ Dioj. 16- 17Ayaa nu ti'ijhuavii tɨ aɨn Dioj ca'anijra'a amuaata'an ɨ a'amua tzajta'a sej si seyan saɨjna jetze araujca'anyen ɨ xaijnyu'ucara'ara'an ɨ Dioj. Che'e aɨn Dioj ajta ayan rɨ'ɨ tyajamuájchaɨ aɨjna cɨme'e tɨ aɨn amuaare'epijte aɨjna tɨ naa e'icaj ti'iseijre'e ɨ jemin, tɨ ij aɨn Cɨriistu'u aun a'utyaturan muejmi jemi, aɨjna cɨme'e sej seyan ra'astijre'e. 18Ayaa nu nyajta ti'ijhuavii sej si seyan anacai huaujxe'eve'en nain cɨme'e, sej si sajta seyan nain cɨn tya'utaviicue'i saɨjna cɨme'e sej huapɨ'ɨ huaujxe'eve'en, sej si sajta e'eyan saɨjna jetze araujca'anyen ɨ xaijnyu'ucara'ara'an ɨ Dioj sej si raamua'aree nain cɨme'e ɨ tɨ cɨn Cɨriistu'u a'amuaxe'eve'e. Tɨj na'a a'u tɨ e'eseijre'e aatya'ɨmɨ, ajtyapua'ɨmɨ, aacɨ'ɨmɨ, aɨ pu xaa aun a'ara'asti tɨ ij aun amuaaxe'eve'en. 19Ee xaa nya'u, ayaa nu ti'ijhuavii muejmi cɨme'e sej si seyan raamua'aree ɨ tɨ cɨn Cɨriistu'u a'amuaxe'eve'e, aɨjna tɨ cai amiteere'e nain cɨme'e, tɨ'ij aun a'utyaturan muejmi jemi naijmi'i tɨj na'a ɨ tɨ cɨn Dioj a'amuanaijmi'ire'en. 20- 21Ajta aɨn ɨ tɨ eihua huapɨ'ɨ raayɨ'ɨtɨ tɨ ayan huarɨni aɨjna cɨme'e ɨ tyaj cai raayɨ'ɨtɨ tyaj rahuavii nusu tɨ cai ayan tita'amitejte'e aɨjna cɨme'e tɨ aɨn ti'imuare'e ɨ ta tzajta'a ɨ rumuare'eri'ira'a cɨme'e, tiche'e teyan rɨ'ɨ tiraata'an a'u tyaj e'etitasa'ɨri ɨ jemin. Jamuan aɨjna ɨ Cɨriistu'u tɨ ajta i'i Jesús, tiche'e teyan che'eta tyana'a rɨ'ɨ tiraata'an tɨj na'a tɨ yu auca'itɨ a'ame para rusen cɨme'e. Yaa pu'icu. Che'e ayan tyaja'ure'enyen.

will be added

X\