Efesios 2

1Sajta muan, ayaa xu é'enya'a saj mɨ'ɨchica'a ɨ Dioj jemi aɨjna cɨme'e ɨ saj cɨn autyajturaa ɨ jemin, ajta aɨjna ɨ saj a'ij pua'a rɨjcaa. 2Ayaa xu a'ij pua'a titetyujchaɨca'a satɨ'ɨj sauj seyan rɨjcaa a'ij mej rɨcɨ ijii aɨme ɨ mej yan japuan seijre'e ɨ chaanaca japua. Ajna'ɨmɨ aɨ xu seyan a'astijra'acaa saɨjna tɨ a'ij pua'a een tɨ ajta aɨjna cɨn antyujmua'aree tɨ ayan tihua'utaijte'en aɨme ɨ maj xaijnyu'ucari pueen ɨ maj seijre'e aaca tzajta'a. Ai pu aɨn pueen ɨ xaijnyu'ucari tɨ ari ti'imuare'e hua'a tzajta'a aɨme ɨ maj hua'a jetze ajtyama'acan aɨme ɨ maj cai a'atɨ a'astijre'e. 3Tyajta ityan, anacaican tu naimi'i teyan hua'a jetze ajtyama'acantaca'a aɨme. Ayaa tu che'eta tyana'a ra'astijra'acaa a'ij tɨ tita'amityejtya'acaa aɨjna cɨme'e ti'itɨ tɨ huanyej ɨ tajetze nusu ti'itɨ tɨ huataseijre ɨ tamua'atziira'a cɨme'e. Tɨj na'a tɨ seijra'acaa ɨ tajetze, tyan tu raata'acara'a tɨ aɨn titaataijte'en. Ayaa tu é'enya'aca'a matɨj ɨ seica ɨ tɨ Dioj pueijtzi hua'uta'asin. 4Ma ajta Dioj, aɨ pu eihua huapɨ'ɨ taataxe'eve. Aɨj pu cɨn, naa pu tá'ancu'uvajxɨ'ɨ ruxé'evi'ira'a cɨme'e. 5Tyatɨ'ɨj tyauj teyan é'enya'a tyaj mɨ'ɨchica'a aɨjna cɨme'e ɨ tyaj cɨn autyajturaa ɨ jemin, aɨ pu taatarujte jamuan ɨ Cɨriistu'u. Aɨ pu amue'irajtua aɨjna cɨme'e tɨ huapɨ'ɨ rɨ'ɨ tyajamuájchaɨ ruxé'evi'ira'a cɨme'e. 6Ajta, Dioj pu taajɨste jamuan ɨ Cɨriistu'u. Aɨ pu ajta aɨjna jamuan an taja'urá'atzaca'a aujna u ute'e a'u tɨ tie'ijta aɨjna ɨ Cɨriistu'u tɨ ajta i'i Jesús. 7Ayaa pu een cɨn huarɨj tɨ ij ayan éenya'a a'ara'ani tɨj na'a tɨ yu auca'itɨ a'ame para rusen cɨme'e, aɨ pu taataseijrate'esin tɨ rɨ'ɨ huapɨ'ɨ titájcha'ɨ aɨjna cɨme'e tɨ aɨn tajapua huanyúu aɨjna ɨ Cɨriistu'u tɨ ajta i'i Jesús. 8Aɨ pu amue'irajtuaa aɨjna cɨme'e tɨ aɨn rɨ'ɨ tyajamuájchaɨ aɨjna cɨme'e saj rá'antzaahua. Dioj pu ayan amuaata'a ruxé'evi'ira'a cɨme'e. Caxu rujɨɨmua'a sana'a a'ij tirajtyau. 9Tɨ'ij cai a'atɨ a'ujtzaahuatya'a, aɨj pu cɨn cai rɨ'ɨri tɨ a'atɨ rusaɨj raamue'itɨn aɨjna cɨme'e a'ij tɨ xa'apɨ'ɨn cɨn rɨcɨ. 10Ayaa pu'u na'a, a'ini tyan tu tyaɨn pueen ɨ tɨ Dioj ayan rusaɨj táaruurejsin a'ij tɨ tira'amitejte'e. Jajcuacan pu ayan taaruu ɨ tatzajta'a jamuan aɨjna ɨ Cɨriistu'u tɨ ajta i'i Jesús tej ti teyan huarɨni aɨjna cɨme'e tɨ i'i xa'apɨ'ɨn a'ij tɨ aɨn anacaican rɨ'ɨ tiraaruu tyejmi cɨme'e. 11- 12Aɨj pu cɨn caxu seyan yá'uhua'anan tɨ ajna'ɨmɨ ayaa xu e'enya'a saj cai Cɨriistu'u jemi huatyáuuca. Ajta muan xu cai hua'a jetze ajtyama'acantaca'a aɨme ɨ mej Israel jetze ajtyama'acan. Ayej xaa nya'u ti'ayajna, aɨme ɨ mej meyan huataujmua'a tɨcɨn: “I tyaj ra'antisi'iche ɨ tanavi”, ayaa mu amuaatamua'a muejmi tɨcɨn: “Mɨ saj cai seyan ra'antisi'iche ɨ runavij.” Ayaa mu tyaja'amuaxa maɨjna cɨme'e sej seij chuejra'a japua e'ema'acan. Caxu sajta yá'uhua'anan tɨ ajna'ɨmɨ, ayaa xu cai ajtyama'acantaca'a aɨme jetze ɨ tɨ Dioj hua'a jemi raatyajtuaa ɨ nyuucari ɨ tɨ cɨn tya'ataujratziiri'i tɨ ayan rɨ'ɨ tihua'uta'an. Capu ajta ma'ahua'acaa ɨ saj cɨn rachu'eve'en. Ajta, capu huataseijre muejmi jemi ɨ Dioj iiyan chaanaca japua. 13Ma ajta ijii, mɨ saj a'ɨmɨ huatyáuuca a'u tyaj tyajta ityan e'eseijra'acaa, xu'uri vejli'i huatyáuu tyejmi jemi aɨjna cɨme'e tɨ aɨn Cɨriistu'u ayan a'amua japua huanyúu aɨjna cɨme'e tɨ ruxuure'e airaaxɨre. 14Ai pu aɨn pueen ɨ tɨ taatyapua'ari ɨ tatzajta'a naijmi'ica muejmi, ajta ityejmi. Aɨ pu ayan taaruu tej ti teyan seij tyana'a tyaɨtestyamua'ame'en pueenya'a ta'ara'ani. Aɨ pu raatyáuunite aɨjna tɨ tya'antanaamɨɨ, aɨjna ɨ tyaj cɨn tanya'usi'itya'acaa. 15Aɨ pu ra'antipua'arite ɨ rutevi cɨme'e aɨjna ɨ nyuucari ɨ maj cɨn tie'ijta, nain cɨme'e ɨ maj cɨn tyui'imɨjra. Ayaa pu een cɨn huarɨj tɨ ij ayan hua'uruuren ɨ rujetze aɨme ɨ maj hua'apua mej mi seij mana'a tyaɨtestyamua'ame'en pueenya'a mua'ara'ani. Ayaa pu aɨjna cɨn huarɨj, aɨ pu hua'utyápua'ari ɨ maj hua'apua. 16Aɨj pu ajta cɨn ayan huarɨj tej ti tyajtahua'a a'utyáuu ta'ara'ani ɨ Dioj jemi ɨ tyaj hua'apua aɨjna cɨme'e ɨ rutevi ɨ maj rá'utatai ɨ curuu jetze. Ayaa pu een cɨn huarɨj, aɨ pu ra'antipua'arite ɨ tyaj cɨn tanya'usi'itya'acaa. 17Aɨ pu mu a'uve'eme tɨ i ayan tyajamuaata'ixaate'en aɨjna cɨme'e ɨ nyuucari ɨ tɨ cɨn amuaatyápua'arite'en mɨ saj a'ɨmɨ a'utyáuuca. Ayaa pu che'eta na'a tihua'uta'ixaa aɨme ɨ mej vejli'i seijra'acaa aɨjna cɨme'e ɨ nyuucari ɨ tɨ cɨn ajta hua'utyápua'ari aɨme. 18Ayaa pu'u, Cɨriistu'u tajapua huanyúu, tej ti, i tyaj hua'apua, seij tyana'a cɨn ɨ xaijnyu'ucari teyan jamuan tyu'utaxaj tyaɨjna jamuan ɨ tyaj rajya'upua. 19Aɨj xu cɨn cai che'e saɨn pueen ɨ mej seij chuejra'a japua e'ema'acan na'ari aɨme ɨ maj cai a'ij rumuari, silu xu'uri hua'a jetze ajtyama'acan aɨme jemi ɨ maj a'utyáuu ɨ Dioj jemi. Ee xaa nya'u, xu'uri hua'a jetze ajtyama'acan aɨme ɨ maj tyaɨtestyamua'ame'en pueen ɨ Dioj. 20Naijmi'i tu ti'ivaɨra'a ta'aju'un tɨj seij ɨ chi'i tɨ tzajta'an e'eseijre'e ɨ Dioj. Aɨme ɨ tɨ hua'utajée ɨ Jesús, majta aɨme ɨ mej mejmi'i ti'ixaxa'ata'a ɨ Dioj jetze ma'acan, ayaa mu ti'ivaɨra'a mua'aju'un tɨj tetej tɨ japuan ájtaavijhua ɨ jaxu'u. Ajta aɨn ɨ Cɨriistu'u tɨ ajta i'i Jesús, ai pu aɨn pueen ɨ tetej tɨ esquineeru cɨn ti'ivaɨre'e. 21Naimi'i tu títavi'iraxɨ'ɨsin jetzen tyaɨjna ɨ Cɨriistu'u, tyajta naimi'i tu huatyaaju'u ta'aju'un tej ti teyan ti'ivaɨra'a ta'ara'ani tɨj teyuu tɨ jetzen Dioj huiracatii. 22Sajta muan, jetzen aɨjna ɨ Cɨriistu'u, muan xu sajta tyújvi'iraxɨ'ɨsin sej si seyan ti'ivaɨra'a xa'ara'ani tɨj chi'i tɨ jetzen huiracatii ɨ ruxaijnyu'uca cɨme'e aɨjna ɨ Dioj.

will be added

X\