Efesios 1

1Inyaa, i nyaj i'i Pablo, nyaa nu saɨj pɨrɨcɨ tɨ Dioj na'antihuau ruxé'evi'ira'a cɨme'e nyej ni ti'itɨj cɨn tiraatyavaɨre'en aɨjna ɨ Cɨriistu'u tɨ ajta i'i Jesús. Ayaa nu tyaja'amuayu'use'e muejmi, mɨ saj tyaɨtestyamua'ame'en pueen ɨ Dioj, mɨ saj Efeso e'eche. Nain xu cɨn arauraste a'ij tɨ ari tyajamueijca aɨjna ɨ Cɨriistu'u tɨ ajta i'i Jesús. 2Ajta aɨn ɨ Dioj, ɨ tyaj rajya'upua, jamuan ajta aɨn ɨ tavastara'a, aɨjna ɨ Jesús tɨ ajta i'i Cɨriistu'u, miche'e maɨn rɨ'ɨ tyajamuaachaɨn, majta amuaatyápua'arite'en ɨ a'amua tzajta'a. 3Tiche'e rɨ'ɨ tiraata'an tyaɨjna ɨ Dioj ɨ tɨ ya'upuaara'an pueen ɨ tavastara'a, aɨjna ɨ Jesús tɨ ajta i'i Cɨriistu'u, a'ini aɨn Dioj, aɨ pu ayan taatapueijve nain tɨj na'a tɨ e'eseijre'e u tajapua tɨ ij titáacɨ'ɨti jamuan ɨ Cɨriistu'u. 4Ayaa pu ti'ayajna, a'ini jajcua ɨmɨ, tɨ'ɨj cai xɨ ratyataahua ɨ chaanaca ɨ tyaj yan japuan seijre'e, ajna'ɨmɨ Dioj pu ta'antihuau jamuan ɨ Cɨriistu'u tej ti teyan uraré'enya'a ta'ara'ani ɨ tatzajta'a, tej ti cai ti'itɨ cɨn autyaturan ɨ jemin. 5- 6A'ini eihua pu huapɨ'ɨ taxe'eva'acaa, ayaa pu titaaxa'apɨ'ɨntari'iri'i tɨ aɨn rusaɨj taya'upua a'ara'ani aɨjna cɨme'e tɨ Cɨriistu'u ayan huarɨni tɨ tajetze ma'acan huamɨ'ɨni. Dioj pu ayan titaaxa'apɨ'ɨntari'iri'i ɨ ruxé'evi'ira'a cɨme'e. Ayaa eenya'a a'ara'ani, tej ti teyan rɨ'ɨ tiraata'an aɨjna cɨme'e tɨ eihua huapɨ'ɨ naa seijre'e tɨ aɨn Dioj ayan rɨ'ɨ titáachaɨn. Ajta ruxé'evi'ira'a cɨn ayan rɨ'ɨ ti'itaachaɨn jamuan aɨjna ɨ tɨ raxe'eve'e, aɨjna ɨ Cɨriistu'u. 7Aɨ xaa tyu'utanajchitaca'a aɨjna ɨ tyaj cɨn té'echaɨca'a ɨ Dioj jemi. Ayaa pu aɨjna cɨn tyu'utanajchitaca'a aɨjna cɨme'e tɨ ruxuure'e airáaxɨre tajetze ma'acan tɨ ij Dioj ayan titaatauuni'i ɨ tyaj cɨn jemin autyajturaa. Ayaa tu een cɨn ramua'aree tɨ Dioj rɨ'ɨ ti'itachaɨ ruxé'evi'ira'a cɨme'e, nain cɨme'e tɨ tyeje'eseijre'e u tajapua. 8Nain pu ayan taatapueijve aɨjna cɨme'e tɨ aɨn nain cɨn rɨ'ɨ me tyaúmua'aree, ajta nain cɨn yau'eite aɨjna ɨ Dioj. 9Ajta, ayaa pu taata'a tyaj raamua'ati ti'itɨ tɨ pɨrɨcɨ tɨ ru'avaa aɨjna cɨme'e a'ij tɨ ti'ijxe'eve'e, a'ini ayaa pu ra'aranajchaca'a tɨ ayan huarɨni tɨ'ɨj aɨn ayan tiraaxa'apɨ'ɨntare'en ti'itɨ tɨ cɨn ti'ityavaa a'ame ɨ Cɨriistu'u. 10Ayaa pu raaxa'apɨ'ɨntare tɨ ayan eenya'a a'ame tɨ'ɨj tyaja'ure'enyen ajna xɨcajra'a tɨ jetzen nain araurastejsin, tɨ ij Cɨriistu'u hua'amu'ucan puéenya'a a'ame naijmi'i matɨj mana'a pua'amua e'eseijre'e u tajapua, ajta matɨj mana'a pua'amua yan seijre'e iiyan chaanaca japua. 11- 12Tyajta ityan, i tyaj anacai rá'antzaahua tyaɨjna ɨ Cɨriistu'u, Dioj pu ajta ta'antihuau tɨ ij ti'itɨ taacɨ'ɨti jamuan ɨ Cɨriistu'u. Aɨ pu jajcua ɨmɨ taaxa'apɨ'ɨntari'iri'i a'ij tɨ ayan tira'aranajchaca'a. Ai pu aɨn pueen ɨ tɨ Dioj nain cɨn rɨ'ɨ tyu'uruuren a'ij tɨ ari ti'ihuaujxa'apɨ'ɨntari'iri'i tej ti teyan rɨ'ɨ tiraata'an tyaɨjna cɨme'e tɨ eihua huapɨ'ɨ naa ti'iseijre'e ɨ jemin. 13Sajta muan, mɨ sej seyan raanamuajri'i ɨ nyuucari tɨ ayan ti'ayajna, ɨ tɨ Dioj cɨn amue'iratuaasin, muan xu sajta rá'antzaahua. Ajta, ayaa pu che'eta na'a tyajamuaacɨ́'ɨ jamuan ɨ Cɨriistu'u tɨj ari Dioj ayan tya'ataujratziiri'i tɨ aɨn xaijnyu'ucara'ara'an ɨ Dioj ayan huatyaturan muejmi jemi. 14Ajta aɨn xaijnyu'ucara'ara'an ɨ Dioj, ai pu aɨn pueen ɨ tɨ tyejmi jemi huatyajturaa, ɨ tyaj tyajta cɨn ramua'aree tɨ ayan ti'ayajna tɨ ti'itɨ taacɨ'ɨti ajna xɨcajra'an tɨ jetzen Dioj titaatatuire'esin aɨjna cɨme'e ɨ Cɨriistu'u tɨ tajetze ma'acan tyu'utanajchitaca'a tej ti rɨ'ɨ tiraata'an tyaɨjna cɨme'e tɨ eihua huapɨ'ɨ naa ti'iseijre'e ɨ jemin. 15- 16Aɨj nu cɨn, tɨj na'a nyaj anacai raanamuajri'i sej seyan rɨ'ɨ ra'astijre'e ɨ tavastara'a, aɨjna ɨ Jesús, sajta seyan rɨ'ɨ tihua'ajchaɨ naijmi'ica aɨme ɨ tyaɨtestyamua'ame'en ɨ Dioj, tɨj na'a tɨ yu e'ire'enye, canu a'anaj raatapua'ajtaca'a nyej neyan tí'ijtaujtzi'ire'e ɨ Dioj muejmi cɨme'e, nyajta nu rahuavii muejmi cɨme'en. 17Ayaa nu nyauj neyan rahuavii jemin aɨjna tɨ ya'upuaara'an pueen ɨ tavastara'a, aɨjna ɨ Jesús tɨ ajta i'i Cɨriistu'u. Ayaa nu rahuavii nyaɨjna ɨ ya'upuaara'an tɨ huapɨ'ɨ naa seijre'e tɨ ij aɨn xaijnyu'ucara'ara'an ayan amuaata'an sej si rɨ'ɨ me tityaumuámua'ara, sej si sajta rɨ'ɨ tiyau'eitaa xa'ara'ani aɨjna tɨ ari huataseijre muejmi jemi sej si seyan tiraamua'ati tyamua'a naa ɨ Dioj. 18Ayaa nu nyajta rahuavii sej si sajta yau'eitaa xa'ara'ani tzaahuati'ira'a cɨme'e ɨ a'amua tzajta'a sej si seyan raamua'aree ti'itɨ tɨ pɨrɨcɨ ɨ saj rachu'eve'e, ɨ tɨ cɨn amuaatajée ɨ Dioj, sej si sajta seyan raamua'aree a'ij tɨ een tɨj na'a pua'amua tɨ rɨ'ɨ huapɨ'ɨ naa seiira'a a'ame aɨjna tɨ hua'acɨ'ɨti aɨme ɨ tyaɨtestyamua'ame'en ɨ Dioj. 19- 20Nyajta nu neyan rahuavii sej si seyan raamua'aree tɨ cai amiteere'e, tɨ huapɨ'ɨ eihua raayɨ'ɨtɨ ɨ Dioj tɨ ti'itɨj cɨn ayan huáruuren i tyejmi tzajta'a aɨjna ɨ rumuare'eri'ira'a cɨme'e. Tyan tu teyan ra'atzaahuate'e aɨjna cɨme'e tɨ ari eihua huapɨ'ɨ rɨ'ɨ tyu'uruu ɨ rumuare'eri'ira'a cɨme'e aɨjna cɨme'e a'ij tɨ huarɨj ɨ Cɨriistu'u cɨme'en tɨ'ɨj ayan raatarujte hua'a tzajta'a ɨ mɨ'ɨchite, ajta ya'uvi'itɨ u tajapua. Tɨ'ɨj i an yá'ujra ɨ ɨpuari japua ɨrɨɨta'an pujme'en. 21Cɨriistu'u pu aɨjna cɨn te'entyajrupi ɨ tɨ eitze'e ve'e cai maaj ti'itɨ tɨ u ute'e e'eseijre'e. Aɨ pu eitze'e va'acan cɨn ti'ityejvee cai maa a'atɨ tɨ tie'ijta na'ari a'atɨ tɨ ti'itɨ cɨn antyujmua'aree nusu tevi tɨ ca'anyejri cɨn tyu'utyaamue'itɨ o a'atɨ tɨ aɨjna cɨn ti'ityejvee tɨ anajca cɨme'e. Eitze'e pu ajta ayan ruxe'eve'e ɨ nyuucari ɨ tyaj cɨn teyan ratamua'amua tyaɨjna ɨ Cɨriistu'u cai maa seij ɨ nyuucari ɨ tyaj cɨn a'atɨ huatamua'a. Ayaa pu xaa nya'u che'eta een ijii tɨ ma'acan, ajta tɨ yu auca'itɨ a'ame para rusen cɨme'e. 22Ajta aɨn Dioj, aɨ pu raata'a tɨ Cɨriistu'u nain cɨn antyujmua'aréera, ajta aɨ pu ra'antihuau tɨ tyu'utyavaɨre'en aɨjna cɨme'e tɨ aɨn pueenya'a a'ara'ani ɨ hua'amu'ucan nain cɨme'e ɨ hua'a jemi ɨ mej e'etyujsa'ɨri mej mi ratyaanajche ɨ Dioj. 23Majta aɨme ɨ mej e'etyujsa'ɨri, ayaa mu che'eta mana'a ajtyama'acan aɨjna jetze ɨ hua'amu'ucan tɨj a'atɨ ratyáhue'ira'a ɨ ru jetze, a'ini aɨjna ɨ Cɨriistu'u tɨ ajta hua'amu'ucan pueen, aɨ pu hua'anaijmi'ire'en nain cɨme'e. A'ini ai pu aɨn pueen ɨ tɨ ranaijmi'ire'en tɨj na'a tɨ e'eseijre'e tɨ Dioj raatyataahuaca'a.

will be added

X\