Colosenses 4

1Sajta muan, mɨ sej tihue'ijte'e, sata'aj tihua'utapueijve'en tɨj na'a ɨ tɨ ruxe'eve'e, tɨj na'a tɨ ayan tiraavijte'e tɨ tihua'acɨ'ɨti. Ayaa xu huarɨni a'ini xu'uri ramua'aree tɨ saɨj ajta tyaja'amue'ijte'e muejmi. Ute'e pu e'eseijre'e aɨjna. 2Sata'aj sauj rahuaviira ɨ Dioj jemi. Caxu a'ij ruaaca. Sajta muan, sauche'e ti'ijtáujtzi'ira'a ɨ Dioj. 3Sajta, sata'aj seyan sauj rahuaviira ɨ Dioj jemi ityejmi cɨme'en tɨ ij Dioj ayan taataseijrate'en a'ij tɨ ye'i ti'itɨ huáruuren tyej ti teyan tihua'uta'ixaate'en ɨ nyuucari, tyej ti tyaɨjna hua'utaseijrate'en ɨ Cɨriistu'u, aɨjna tɨ ru'avaa ɨ Dioj jemi. Aɨj pu cɨn, nu'uri aiityanami'i. 4Sauche'e xu sajta rahuaviira ɨ Dioj jemi nyeetzi cɨme'en nyej ni a'ahuauritaacan cɨn tihue'ixaate'en a'ij tɨ tiraavijte'e nyej neyan rɨcɨ. 5Ayaa xu rɨjca muan, caxu cha'a sana'a á'ujhua'anye'en hua'a jamuan ɨ maj cai tya'atzaahuate'e, silu ayaa xu'u rɨjca matɨj tyaɨte ɨ mej rɨ'ɨ metityaumuámua'aree. A'anaj tɨ na'a tɨ í'irɨni sej seyan huarɨni ɨ tɨ i'i xa'apɨ'ɨn, ayaa xu'u rɨjca. 6Sata'aj rɨ'ɨ hua'ata'acare'en saɨjna cɨme'e sej seyan ti'ixaxa'a, mej mi maɨjna cɨn raamua'aree ɨ saj cai rucɨɨnive'e. Sajta seyan tihue'ixaate'en mej mi huajɨ́jxɨn, mej mi re'enya'a mua'ara'ani. 7Ajta aɨn ɨ Tíquico aɨjna ɨ ta'ihuaara'a ɨ Cɨriistu'u jemi, aɨ pu tyajamuaata'ixaate'esin nain a'ij tɨ ti'inyavaɨre'e inyeetzi. Eihua nu raxe'eve'e nyamɨjna. Aɨ pu ari tinaavaɨ. Capu a'anaj a'ɨtzee. Ajta, naijmi'i tu ti'ivaɨre'e ɨ tavastara'a jemi. 8Aɨj nu cɨn nyaraatáiti muejmi jemi tɨ ij ayan tyajamuaata'ixaate'en a'ij tɨ ti'itavaɨre'e, tɨ ij rɨ'ɨ amuaata'an. 9Nyajta nu jamuan raataiti nyaɨjna ɨ Onésimo, ɨ tɨ muejmi jetze ajtyama'acan. Eecan tu tyajta raxe'eve'e tyaɨjna ɨ ta'ihuaara'a. Capu ajta a'anaj a'ɨtzee. Aɨ mu nain cɨn tyajamuaata'ixaate'esin a'ij tɨ ti'iruure iyaacui. 10Majta maɨn ɨ ta'ihuaamua'a, aɨ mu á'amuataujte'e, anacaican aɨjna ɨ Aristarco tɨ ajta ayajna aiityanami'i nyaa jamuan, ajta aɨjna ɨ Marcos, tɨ i'i nyausajra'an pɨrɨcɨ aɨjna ɨ Bernabé. Xu'uri ramua'aree a'ij sej ye'i huarɨni aɨjna cɨme'e, tɨ cɨme'en yee tɨ pua'a aɨn a'uré'enyen muejmi jemi aɨjna ɨ Marcos, sata'aj ra'ancure'evi'itɨn tyamua'a naa. 11Ajta aɨn ɨ Jesús, ɨ tɨ ajta ayan antyahuaa tɨcɨn Justo, aɨ pu ajta á'amuataujte'e. Aime ɨ maj hueica, ai mu'u aɨn pueen ɨ mej Israel jetze ajtyama'acan, ɨ mej meyan nyeetzi jetze ajtyavaɨre'e tyej ti teyan tihua'uta'ixaate'en ɨ tyaɨte cɨme'en ɨ Dioj tɨ tie'ijta iiyan chaanaca japua. Eecan mu rɨ'ɨ naata'a inyeetzi. 12Ajtahua'a seij pu á'amuataujte'e, aɨjna ɨ Epafras. Aɨ pu ajtyama'acan muejmi jetze, ajta pu ravaɨre'e aɨjna ɨ Jesús tɨ i'i Cɨriistu'u. A'anaj tɨ na'a pu tí'ityese'e aɨjna cɨme'e tɨ rahuavii ɨ Dioj jemi muejmi cɨme'en, sej si tya'utaviicue'i, sej si cai ti'itɨj cɨn autyaturan, sej si sajta ra'ara'astijre'en nain cɨme'e a'ij tɨ ti'ijxe'eve'e ɨ Dioj. 13Ayaa nu tyaja'amue'ixaate'e tɨ ayan ti'ayajna. Aɨjna ɨ Epafras, eecan pu ti'ityese'e muejmi cɨme'en, ajta aɨme cɨme'en ɨ mej maun a'uchaatɨme, ajna a'ahua'a Laodicea, majta ɨ maj seij jetze e'eche ɨ chajta'a ajna Hierápolis. 14Aɨ mu majta á'amuataujte'e, aɨjna ɨ Lucas, ɨ tɨ tihua'ahua'atya, ɨ tyaj raxe'eve'e, ajta aɨjna ɨ Demas. 15Sata'aj seyan hua'utataujte'en nyeetzi jetze ma'acan aɨme ɨ ta'ihuaamua'a Laodicea maj a'uchaatɨme, sajta saɨjna ɨ Ninfas. Sata'aj sajta hua'utataujte'en aɨme ɨ mej e'etyujsa'ɨri a'u tɨ e'eche ɨ Ninfas. 16Satɨ'ɨj seri ra'ujijve seijna i yu'uxari sej si naijmi'i raanamua, sata'aj seyan tyu'utaite mej mi hua'utanamuajriste'en aɨme Laodicea mej e'eche. Ajta ɨ saɨj ɨ yu'uxari, Laodicea tɨ e'ema'acan, sata'aj sajta ra'ujijve'en sej si sajta naijmi'i raanamua. 17Sajta, sata'aj seyan tiraata'ixaate'en saɨjna ɨ Arquipo yee: “Rɨ'ɨ papu'u muaa, pej pi nain cɨn ra'ara'asten ɨ tavastara'a tɨ tí'imue'ijcate'e.” 18Inyaa, i nyej i'i Pablo, aij nu jetze tyaja'amuataujte'e eijna i nyej ra'uyu'uxaca'a nyamuajca'a cɨme'e. Caxu yá'uhua'anan ɨ nyej aiityanami'i. Che'e a'ij tyaja'amuavaɨra'a. Yaa pu'u.

will be added

X\