Colosenses 3

1Ayaa pu tira'amitejte'e ɨ Dioj ɨ sej seri sajtahua'a huataruu jamuan ɨ Cɨriistu'u. Aɨj pu cɨn, ayaa pu ruxe'eve'e sej seyan tyu'umua'ati saɨjna cɨme'e ɨ tɨ tyeje'eseijre'e ɨ tajapua a'u tɨ Cɨriistu'u nain cɨn antyujmua'aree ɨ Dioj jemi. 2Sata'aj seyan tyu'umua'ati saɨjna cɨme'e ɨ tɨ tyeje'eseijre'e ɨ tajapua. Caxu seyan sana'a tyu'umua'ati saɨjna cɨme'e ɨ tɨ ti'iseijre'e iiyan chaanaca japua. 3Ayaa xu huarɨni, a'ini xu'uri huacuii ɨ Cɨriistu'u jamuan. Ajta, Cɨriistu'u pu amuaata'ɨnye ɨ tajapua ɨ Dioj jemi, ɨ saj cɨn ruuri xa'ara'ani jemin. 4Ajta aɨn ɨ Cɨriistu'u, aɨjna tyaj jetzen arátaca'anye tyej i'i ruuri, tɨ'ɨj aɨn huataseijre'en me eijre'e, aj tu ti teyan che'eta tyana'a huataseijre'en jamuan. Nain pu ayan naa ti'iseira'a a'ame huapɨ'ɨ mej mi naijmi'i náa rɨ'ɨ tira'utaseij. 5Aɨj pu cɨn, sata'aj seyan raatapua'ajta naijmi'i tɨj na'a tɨ a'ij pua'a een, tɨ a'amua jetze aiiráninyeiica. Caxu hua'a jamuan huajiti ɨ saj cai naijmi'i i'ipi. Caxu che'e seyan rɨjca ɨ ruxana'acɨre'en cɨme'e. Caxu sajta huataura'an tɨ tyajamuaataijte'en ɨ a'amua jetze tɨ aiiráninyeiica. Caxu che'e rahuauca ɨ tɨ a'ij pua'a een. Sajta i'i, caxu ti'imuajchya'a. A'atɨ tɨ ayan ti'imuajche'e, ayaa pu che'eta na'a een ɨ Dioj jemi tɨj aɨjna ɨ a'atɨ tɨ rana'amiche'e ɨ tɨ cai Dioj pueen. 6Pu'uri tyaja'ure'enyejsin tɨ tyu'utyavaɨjtzi ɨ pueijtzi hua'a japua ɨ maj cai maɨjna cɨn ra'ara'astijre'en ɨ Dioj. Eecan mu tirajpueitzi mua'aju'un. 7Sajta muan, ayaa xu anacaican rɨjcaa nain cɨme'e tɨ a'ij pua'a een, satɨ'ɨj sauuche'e ra'astyajca'a nain tɨ ayan. 8Ari ijii, ayaa pu ruxe'eve'e sej ticaura'ari'i naijmi'i tɨj na'a tɨ ayan een: Caxu nínyu'ucacu, ni caxu rujaaxaijvi'ira, ni caxu rutya'axɨ'ɨ, ni caxu a'ij pua'a é'enye'en, ni caxu a'ij pua'a tihua'ixaatya'a hua'a jemi ɨ tyaɨte. Caxu sajta a'ij pua'a ti'ixajta. 9Caxu tyu'urixaatya'a hue'itzi cɨme'e seij ajta seij, a'ini xu'uri raatapua'ajtaca'a saɨjna tɨ mi'ima'acan ú'useijra'acaa ɨ rujetze, sajta nain maj uuraini a'ij tɨ ye'i rɨjcaa aɨjna tɨ mi'ima'acan. 10Ari muan, xu'uri tihuaujchejte saɨjna cɨme'e tɨ ti'ire'en, tɨ ti'ijájcua. Dioj pu auj amuaajajcuare'esin ɨ a'amua tzajta'a sej si seyan eenya'a xa'ara'ani tɨj aɨjna tɨ amuaatyajtuaa iiyan chaanaca japua, sej si nain cɨn raamua'ati. 11Ajta ɨ Dioj, capu jetzen ruxe'eve'e tɨ pua'a a'atɨ Israel jetze ajtyama'acan nusu tɨ pua'a i'i Griego pueenye'en. Capu ajta jetzen ruxe'eve'e tɨ pua'a peri ra'ara'aste paɨjna cɨme'e maj mua'antisijchaca'a a'a navi nusu pacai. Capu amɨn a'ij tɨ pua'a a'ɨmɨ pe'ema'acan, na'ari seij chuejra'a japua peje'eche. Capu ajta a'ij i'irɨni tɨ pua'a seica pej jemin ti'ivaɨɨre'e na'ari paj peyan tihue'ijte'e ɨ seica. Ayaa pu'u, Cɨriistu'u pu xaa aɨn pueen ɨ tɨ ruxe'eve'e. Nain pu cɨn ra'ara'asten. Ajta aɨn pu huatyaturaasin hua'a tzajta'a ɨ rutyaɨtestyamua'a a'u tɨ na'a maj mana'a a'uchaatɨme. 12Ayaa pu'u, Dioj pu amua'antihuau. Xu'uri huatyáuu jemin, ajta aɨ pu amue'ixe'eve'e. Sej si seyan huarɨni a'ij tɨ tiraavijte'e. Sata'aj ahuaujcu'uven seij sajta seij. Sata'aj rɨ'ɨ hua'achaɨn ɨ seica, caxu a'ujtzaahuatya'a, caxu sajta rucɨɨniva'a. Sata'aj seyan tya'utaviicue'i ti'itɨ tɨ a'ij tyaja'amuaruure. 13Sata'aj seyan rá'uviicue'i seij sajta seij. Sata'aj sajta tyu'utauruuni'i tɨ pua'a saɨj rájaaxaijte'en ɨ ruxa'aj tevi. A'ini tavastara'a pu ari muejmi tyu'utauuni'iri'i, sata'aj seyan che'eta sana'a tyu'utauruuni'i seij sajta mɨ seij. 14Ajta, ɨ tɨ eitze'e ruxe'eve'e cai maa nyuucari, sata'aj seyan huaujxe'eve'en. Ai pu aɨn pueen ɨ saj cɨn ahuaujxaxu'ite'en sej si seij sana'a tyaɨtejra'a pueenya'a xa'ara'ani. Ajta, aɨ pu amuaanaijmi'ire'esin. 15Che'e Cɨriistu'u amuaatyápua'arite'en ɨ a'amua tzajta'a sej si ru'ihuaamua'a xa'ara'ani tyamua'a naa. Ayaa pu tyajamuaatajée ɨ tavastara'a sej si seyan xa'apɨ'ɨn eenya'a seij ajta mɨ seij, a'ini naimi'i xu ruxaxu'itare'en. Sajta, seyan ti'ijtaujtzi'ire'en ɨ Dioj. 16Sata'aj seyan tyu'umua'ati eihua saɨjna cɨme'e ɨ nyuucari tɨ cɨme'en raxa ɨ Cɨriistu'u sej si raamua'aree a'ij sej tihua'amua'aten ɨ seica, a'ij sej ye'i rɨ'ɨ me tityaumuámua'aren sej si tihue'ixaate'en nain a'ahuaritaacan cɨme'e. Sajta chuiicari xu cɨn tiraatataujtzi'ire'en ɨ Dioj. Ayaa xu tyu'utachuiica ɨ rutzajta'a saɨjna cɨme'e chuiicari tɨ yu'uxari jetze ma'acan, nusu chuiicari tɨ Dioj jetze raxa, na'ari ti'itɨ tɨ rɨ'ɨ ama'utámua'atziite'en ɨ xaijnyu'ucara'ara'an ɨ Dioj. 17Ayaa pu'u, satɨj sana'a ti'ixa, satɨj sana'a rɨcɨ, sata'aj seyan huarɨni nain cɨme'en nyuucajtze'en ɨ tavastara'a aɨjna ɨ Jesús. Sata'aj tiraatataujtzi'ire'en ɨ Dioj ɨ ta'iya'upua jamuan ɨ Cɨriistu'u. 18Muan, mɨ sej vɨɨche, sata'aj ra'ara'astijre'en aɨme jemi a'amuacɨna'astyamua'a, a'ini ayaa pu tiraavijte'e ɨ tavastara'a jemi. 19Sajta muan, mɨ sej nyaɨche, sata'aj rɨ'ɨ tihua'ajcháɨɨ xa'ara'ani tyamua'a naa aɨme ɨ sej huaja'uvi'itɨn. Caxu a'ij tihua'ajeeva. 20Sajta muan, mɨ sej huataatajmua'a, sata'aj seyan nain cɨn hua'ara'astijre'en matɨj mana'a tyaja'amue'ixaate'en aɨme ɨ a'amuavaujsimua'a, a'ini aɨ pu rɨ'ɨ tiraata'asin aɨjna ɨ tavastara'a. 21Sajta muan, mɨ sej hua'avaujsimua'a, caxu huapɨ'ɨ hua'ajtya'axɨ'ɨ aɨme ɨ a'amuayaujmua'a mej mi cai a'ij pua'a tyá'ujmuajtya. 22Sajta muan, mɨ sej ti'ijti'ire'e, sata'aj nain cɨn ra'ara'astijre'en aɨme ɨ mej tyaja'amue'ijte'e. Sata'aj seyan tyu'umuare'en tyamua'a naa satɨj sana'a tiraayɨ'ɨtɨ a'ini muan xu ra'atzaahuate'e saɨjna ɨ tavastara'a. Caxu raatapua'ajta saɨjna cɨme'e tɨ cai ma'a a'ahua'a aɨjna ɨ tɨ tyaja'amue'ijte'e. Seica mu meyan rɨcɨ. Aɨj mu caj ti'imuare'e tɨ pua'a aɨn tɨ tihue'ijte'e tɨ hua'aseijra. Ayaa mu'u rɨjca mej mi rɨ'ɨ raata'an. 23Ma sajta muan, satɨj sana'a rɨcɨ, sata'aj seyan che'eta sana'a tyu'umuare'en tzaahuati'ira'a cɨme'e satɨj tiraatyavaɨ́re'enche'e saɨjna ɨ tavastara'a. Caxu seyan sana'a tyu'umuare'en mej mi amuaaseij aɨme ɨ tyetyaca. 24Xu'uri ramua'aree tɨ aɨn tavastara'a, aɨ pu ajta tyajámuaatanajchite'esin ɨ tɨ rujɨme'e. Auche'e pu tyajamuaacɨ'ɨti aɨjna saj raamue'itɨ, a'ini ai pu aɨn pueen ɨ sej ti'ijvaɨre'e aɨjna ɨ tavastara'a tɨ ajta i'i Cɨriistu'u. 25Ma ajta, aɨn ɨ tɨ a'ij pua'a rɨcɨ, ayaa pu che'eta na'a a'ij pua'a ti'ijcɨ'ɨti. Ruxa'a pu tihua'aruuren ɨ Dioj, capu a'atɨ eitze'e re'en cai ɨ saɨj ɨ jemin.

will be added

X\