Colosenses 2

1Aɨj nu cɨn neyan raxe'eve'e sej si raamua'aree nyaj a'amua japua ti'ityese'esin eihua. Ayaa nu che'eta nyana'a hua'a japua ti'ityese'e aɨme ɨ maj Laodicea e'eche, nyajta aɨme ɨ maj cai a'anaj naaseij nyenyeerime jetze. 2Ayaa nu een cɨn rɨcɨ mej mi huatyaujca'ane ɨ ru tzajta'a, mej mi majta naijmi'i ru'ihuaamua'a mua'ara'ani tyamua'a naa maɨjna cɨme'e ɨ mej huaujxe'eve'e rujɨɨmua'a. Ayaa nu raxe'eve'e tɨ tihua'acɨ'ɨti ti'itɨ tɨ eecan tihua'utyava'ɨrihua'an mej mi yau'eitaa mua'ara'ani nain cɨme'e, mej mi majta raamua'aree tɨ ayan ti'ayajna aɨjna tɨ ru'avaa ɨ Dioj jemi. Ai pu aɨn pueen aɨjna tɨ i'i Cɨriistu'u. 3Naijmi'i ɨ tɨ ruxe'eve'e tyej ti rɨ'ɨ me tityaumuámua'aree, eitze'e pu titaatyava'ɨrihua'an cai tumin tɨ ru'avaa tyasta'a. Ajta aɨn ɨ Cɨriistu'u, aɨ pu taata'asin tyej ti yau'eitaa ta'ara'ani nain cɨme'e, tyej ti raamua'aree tzaahuati'ira'a cɨme'e. 4Ayaa nu tyaja'amue'ixaate'e tɨ ij cai a'atɨ amuaacuanamuan aɨjna cɨme'e ɨ nyuucari ɨ tɨ cai huataujnyátacan cɨn namuajre'e. 5Canu xaa ye'eche a'amua jamuan, silu ayaa nu ya'ɨmɨ ya huaca. Capu amɨn a'ij. Eihua nu ama'utamua'aree yu nyatzajta'a, cu xuee nyaj cu a'utyejvee muejmi jemi. Eecan nu huatatyamua'ave'e nyaɨjna cɨme'e nyaj neri ramua'aree ɨ sej rɨ'ɨ ru'ihuaamua'a tyamua'a naa, sajta tya'utaviicue'i saɨjna cɨme'e ɨ saj ra'atzaahuate'e saɨjna ɨ Cɨriistu'u. 6A'ini xu'uri autyajhuii saj rá'antzaahuate'en saɨjna tɨ aɨn pueen ɨ tɨ i'i tavastara'a aɨjna Jesús tɨ ajta i'i Cɨriistu'u, sata'aj seyan rɨ'ɨ tityeetyáuuca a'ij tɨ tiraavijte'e aɨjna jemi. 7Sata'aj seyan seijna jetze ucarute ɨ saj rájtyauuni ɨ Cɨriistu'u jemi sej si seyan che'eta sana'a tya'utáviicue'iran tɨj cɨye tɨ ajtanáana'ajme tyetya'ɨmɨ chuaata'a. Xu'uri cɨj caj yau'eite ɨ Cɨriistu'u jemi. Sata'aj seyan tihuaujmua'aten sej si yau'eitaa xa'ara'ani nain cɨme'e, sej si eitze'e tya'utaviicue'i saɨjna cɨme'e ɨ saj ra'atzaahuate'e a'ij mej meri tyajamuaamuá'ate. Sata'aj sajta huapɨ'ɨ tiraatataujtzi'ire'en ɨ Dioj. 8Rɨ'ɨ xu'u muan, caxu hua'uta'acare'en mej amuaatyamue'itɨn seica cɨme'e nyuucari ɨ maj cɨn ti'ihue'itaca. Ayaa mu ti'ijxe'eve'e mej mi meyan tyajamua'ari'iran ɨ saj cɨn tya'atzaahuate'e maɨjna cɨme'e a'ij maj tirajtyau rujɨɨmua'a, ɨ nyuucari tɨ cai ti'itɨj vaɨre'e. Aɨjna, ɨ mej ti'ixaxa'a, camu a'ij tirajtyau ɨ Cɨriistu'u jemi, silu ayaa mu'u tyaja'amue'ixaate'e maɨjna cɨme'e ɨ maj rujɨɨmua'a mana'a tirajtyau, na'ari ɨ maj cɨn ti'imua'ata maɨjna cɨme'e ɨ maj raye'irajca'a ɨ jajcua. 9Ayaa pu'u, a'ini nain tɨj na'a Dioj een, aɨ pu huatyajturaa ɨ Cɨriistu'u jemi ɨ rujetze. 10Ajta Dioj pu ayan amuaanaijmi'iri'i ɨ Cɨriistu'u jemi sej si ruuri xa'ara'ani jemin. Ajta aɨn ɨ Cɨriistu'u, ai pu hua'a mu'ucan pueen matɨj mana'a pua'amua e'eseijre'e ɨ xaijnyu'ucari ɨ maj tie'ijta, majta aɨme ɨ maj títyetyá'upu'u ɨ tajapua. 11Sajta muan, xu'uri ra'ara'aste saɨjna cɨme'e ɨ maj ra'antisí'ichaca ɨ runavij. Ma sajta, caxu ra'ara'aste saɨjna cɨme'e ɨ mej tyetyaca meyan amuaaruu ɨ rumuajca'a cɨme'e silu Cɨriistu'u pu'u ayan ra'ara'aste muejmi jetze ma'acan tɨ'ɨj huamɨ'ɨ ɨ curuu jetze. Aɨ pu nain amuá'ari'iri'i ɨ saj cɨn a'ij pua'a rɨjcaa tɨ ij cai che'e tyajamuaataijte'en ɨ rujetze. 12Ayaa pu tira'amitejte'e ɨ Dioj tɨ ayan tyajamuaaruu satɨ'ɨj huamuaɨ'ɨvijhuaca'a. Xuee saj cu muan ava'ujnaa ɨ Cɨriistu'u jamuan. Ayan che'eta na'a tɨj saj muan a'itacɨɨnye ɨ mɨ'ɨchite tzajta'a jamuan ɨ Cɨriistu'u. Ayaa pu een aɨjna cɨme'e saj muan ra'atzaahuate'e saɨjna cɨme'e ɨ muare'eri'ira'a Dioj tɨ cɨn ra'ajjáj aɨjna ɨ Cɨriistu'u hua'a tzajta'a ɨ mɨ'ɨchite. 13Ajna'ɨmɨ, ayaa xu eenya'a ɨ rutzajta'a, sauche'e xu mɨ'ɨchite pueenya'a ɨ Dioj jemi, saɨjna cɨme'e ɨ saj autyajturaa u Dioj jemi, sajta saɨjna cɨme'e ɨ maj cai meyan amua'antisijchixɨ ɨ a'amuanavi jetze. Ma ajta ijii, Dioj pu ajtahua'a amuaatatɨste ɨ a'amuaxaijnyu'uca sej si a'utyáuu xa'ara'ani ɨ Cɨriistu'u jamuan. Nain pu ari tyajamuaatauuni'iri'i ɨ saj cɨn autyajturaa jemin. 14Aɨ pu xaa ra'urauu aɨjna tɨ te'eyu'usi'ihuaca'a, ɨ tɨ jetzen rá'axajtaca'a ɨ nyuucari tɨ cɨme'en tyejmi jetze ti'itɨj cɨn tya'ujpuá'ajte, ɨ tyaj cɨme'en tye'echaɨca'a. Aɨ pu antipua'ari'ira'a aɨjna cɨme'e tɨ rá'utatai ɨ curuu jetze jamuan aɨjna ɨ Cɨriistu'u. 15Majta maɨn ɨ xaijnyu'ucari ɨ maj tie'ijta, majta ɨ mej títyatatí ɨ tajapua, Cɨriistu'u pu huajá'uriiri'i ɨ maj cɨn antyujmua'areeraca'a. Aɨ pu ajta hua'utatyévi'iraste me eijre'e. Hua'uva'ajaapuajmá'a, pu a'ityajraa. Hua'utyáamue'itɨ aɨjna cɨme'e tɨ huamɨ'ɨ ɨ curuu jetze. 16Aɨj pu cɨn, miche'e macai ámuamueire'e maɨjna cɨme'e a'ij sej tyu'ucua'ani, a'ij sej ye'i tityeeyé'en, nusu aɨjna xɨcajra'a tɨ jetzen ayan nu'u ruxe'eve'e sej tyu'uyesten tɨ tya'utye'itén ɨ maxcɨra'i, na'ari tɨ tya'ara'asti a'anaj maj rusa'upi. 17Naijmi'i tɨj na'a tɨ ayan ti'en, cu xuee tɨ a'atɨ huaquen jetze a'ucha'acan. Ayaa pu ti'ivaɨre'e tyej ti teyan raamua'aree a'ij tɨ tyaja'ure'enyejsin. Ma ajta, ɨ tɨ xaa ápɨ'ɨn tɨn, ai pu aɨn pueen, aɨjna ɨ Cɨriistu'u. 18Majta maɨn ɨ maj hua'araanajchi maj rucɨɨnive'e eijre'ecɨtze'e, aɨme ɨ tyetyaca mu nu'u tihua'utatyaujtzi'ire'e aɨme ɨ mej títyatatí ɨ tajapua. Ma sajta muan, caxu hua'ata'acare'en meyan tyajamua'ari'iran maɨjna cɨme'e ɨ sej seri raamue'itɨ ɨ Dioj jemi. Aɨ mu xaa rucɨɨnive'e maɨjna cɨme'e mej mi nain tyu'utaxaj a'ij mej nu'u tyu'useij a'ij tɨ ti'en ɨ tajapua. Majta eihua ahuaujtzaahuate'en maɨjna cɨme'e ɨ hua'amua'atziira'a ɨ maj rujɨɨmua'a mana'a tirajtyau. 19Mu'uri ma ruurai maɨjna ɨ mu'ucan ɨ tyej jetzen aiirányajxɨ'ɨn, ɨ tyaj jetzen arataca'anye tyej ti teyan che'eta tyana'a naimi'i huavaujse'en a'ij tɨ Dioj titata'aca tɨj ajta tyújvi'iraxɨ'ɨn ɨ cari taata'a jamuan. 20Casi'i muan, Cɨriistu'u pu a'amua japua huanyúu tɨ'ɨj huamɨ'ɨ, ajta camu che'e tyajamue'ijte'e maɨjna cɨme'e ɨ hua'amua'atziira'a ɨ seica ɨ tyetyaca. Tɨ pua'a ayan, ¿a'ini een cɨn seyan che'eta sana'a ti'ijrɨ'ɨre matɨj ɨ seica ɨ maj meyan ti'ijxe'eve'e mej tyajamuaataijte'en maɨjna cɨme'e a'ij mej meri ti'ijrɨ'ɨrajcaa? 21Ayaa mu tyaja'amue'ixaate'e tɨcɨn: “Caxu rajtyámua'atzi. Caxu raatyajcua'ani. Caxu rajtyámɨjhua'an.” 22Naijmi'i tɨj na'a ɨ nyuucari tɨ ayan een, naimi'i pu cɨme'en raxa ti'itɨ tɨ antipua'ari aɨjna cɨme'e ɨ maj raaxɨn. 23Ayej xaa nya'u, ayaa pu tihua'amityejte'e tɨ i'i xa'apɨ'ɨn tɨ pua'a a'atɨ ra'ara'astijre'en aɨjna cɨme'e ɨ nyuucari tɨ ayan een. Cu xuee rɨ'ɨ mu mé tityaumuámua'aree, cu xuee tɨ ti'itiá'a ɨ tɨ cɨn ti'ityavaaca'a ruxé'evi'ira'a cɨme'e, cu xuee pueijtzi pu raata'an ɨ rujetze. Ma ajta, capu ti'itɨj vaɨre'e silu ayaa pu'u mej mi huataura'an rujɨɨmua'a mana'a micu.

will be added

X\