Colosenses 1

1Inyaa, i nyej i'i Pablo, nyaa nu nyajta hua'a jetze ajtyama'acan aɨ́me ɨ tɨ tihua'utaij aɨjna ɨ Jesús, ɨ tɨ ajta i'i Cɨriistu'u. Ayaa nu ti'ivaɨre'e ɨ Cɨriistu'u jemi, a'ini ayaa pu raxe'eve'e ɨ Dioj. 2Jamuan nyeijna i nye'ihuaara'a, aijna i Timuteeyu, ayaa nu tyaja'amuayu'use'e mɨ sej Colosas e'eche, muan mɨ saj a'utyáuu ɨ Dioj jemi. Ayaa tu tyaja'amuataujte'e muan, mɨ saj sauche'e te'eviicue'i, saɨjna cɨme'e saj ra'atzaahuate'e saɨjna ɨ Cɨriistu'u. Che'e aɨn ɨ tɨ ta'iya'upua ɨ tɨ i'i Dioj, che'e amɨn rɨ'ɨ tyaja'amuachaɨ́j a'ara'ani, che'e ajta amuaatyápua'arite'en ɨ a'amuaxaijnyu'uca tzajta'a. 3A'anaj tɨ na'a tyej ti'ijhuavii tyaɨjna ɨ Dioj, ɨ tɨ rajya'upua aɨjna ɨ tavastara'a, aɨjna ɨ Jesús tɨ ajta i'i Cɨriistu'u, a'anaj tɨ na'a tyej ti'ijhuavii muejmi cɨme'e, eecan tu tatyamua'ave'e ɨ Dioj jemi. 4Ayaa tu'u rɨcɨ tyaɨjna cɨme'e tyej teri yá'umua'areeri'i saj nu'u ra'atzaahuate'e saɨjna ɨ Cɨriistu'u tɨ i'i Jesús, sajta nu'u eihua hue'ixe'eve'e naijmi'ica ɨ maj a'utyáuu ɨ Dioj jemi. 5Ayaa xu rɨjca, a'ini sauche'e rachu'eve'en saɨjna ɨ tɨ Dioj a'amua'ɨnye'e ɨ tajapua. Tyatɨ'ɨj cai xɨ tyajamuaatayu'use, muan xu seri sejmi'i raanamuajri'i saɨjna ɨ nyuucari tɨ cɨme'en raxa ɨ Dioj a'atzaahuati'ira'a cɨme'e. 6Eijna i nyuucari ayan che'eta na'a huataseijre muejmi jemi tɨj ajta huataseijre nainjapua ɨ chaanaca. Ayaa pu seijre'e tyaɨte tzajta'a tɨj cɨye tɨ ajvaujse'esin, tɨ ajta antatáca'a. Ayaa pu che'eta na'a ti'iruure muejmi jemi. Tɨj auche'e na'a, satɨ'ɨj anacaican raamua'areeri'i iya'ahuauritaacan cɨme'e tɨ Dioj tzɨte'e rɨ'ɨ a'amuacha'ɨ tɨj na'a aɨn nyuucari tya'utyejche tɨ rɨ'ɨ amuaaruuren. 7Naijmi'i tɨj na'a eijna, aɨ pu tyajamuaamuá'ate aɨjna ɨ Epafras tɨ tajamuan ti'ivaɨre'e. Eecan tu raxe'eve'e tyaɨjna. Ajta aɨn, huapɨ'ɨ pu tajetze ma'acan ti'ivaɨre'e ɨ Cɨriistu'u jemi. Capu ti'itɨj cɨn á'ɨtze. 8Aɨ pu ajta ari titaata'ixaa ɨ sej rɨ'ɨ huapɨ'ɨ ru'ihuaamua'a saɨjna cɨme'e saj jetzen araujca'anye ɨ xaijnyu'ucara'ara'an ɨ Dioj. 9Aɨj tu cɨn, catu a'anaj raatapua'ajtaca'a tyej Dioj ti'ihuavii muejmi cɨme'en. Nain xɨcaj tzajta'a tɨ yu e'ire'enye tɨ'ɨj amɨn titaata'ixaa, ayaa tu rɨcɨ. Dioj tu ti'ihuavii tɨ i aɨn tyajamuáamua'aten nain cɨme'e sej si raamua'aree a'ij tɨ ti'ijxe'eve'e ɨ Dioj, sej si tyamua'a me tityaumuámua'aree, tɨ ij aɨn xaijnyu'ucara'ara'an ɨ Dioj amuaata'an sej si raamua'aree a'ij sej ye'i huarɨni a'ahuauritaacan cɨme'e tyamua'a náa. 10Ayaa tu een cɨn ti'ijhuavii sej si seyan huarɨni a'ij tɨ tihua'uvijte'e aɨme ɨ maj ramua'ate aɨjna ɨ tavastara'a. Tyajta sej si seyan rɨ'ɨ raata'an saɨjna cɨme'e ɨ saj cɨn ti'imɨjhuacara'a. Sata'aj seyan eenye'en tɨj cɨye tɨ ajvaujse'esin, tɨ ajta antatáca'a. Ajta sej si eitze'e raayɨ'ɨtɨhua'an a'ij tɨ een ɨ Dioj. 11Che'e Dioj amuaata'an nain ɨ ca'anijra'a ɨ a'amuatzajta'a aɨjna cɨme'e ɨ muáre'eri'ira'ara'an ɨ tyaj cɨn rɨ'ɨ tira'utaseijra. Aj xu si jetzen araujca'anyejsin sej si tya'utaviicue'i, sej si sajta sauj raachu'eve'en a'ij tɨ ti'itɨ á'amuaruuren, sej si sajta huaujtyamua'ave'en. 12Ayaa xu een cɨn ti'ijtáujtzi'ira'a xa'ara'ani ɨ tɨ ta'iya'upua, a'ini aɨ pu amuaata'a sej si ra'ancura'an saɨjna ɨ tɨ tyajamuaacɨ'ɨti saxu'ijmé'en ajna a'utɨ a'anaj tɨ na'a huanyeeri'i. Ayaa pu che'eta na'a tyajamuácɨ'ɨti seij ajta mɨ seij tɨj ayan tihua'acɨ'ɨti ɨ seica ɨ maj huatyáuu ɨ Dioj jemi. 13Ayaa pu te'eme, a'ini aɨ pu tu'irajtuaa aujna a'u tɨ a'utɨca'a a'anaj tɨ na'a tɨ'ij cai che'e ti'itaijte'en aɨjna tɨ aun antyujmua'aree. Dioj pu ta'araavi'itɨ aujna a'u tɨ tie'ijta aɨjna ɨ yaujra'an tɨ huapɨ'ɨ raxe'eve'e. 14Ayaa pu tyu'utanajchitaca'a ɨ tyaj cɨn té'echaɨca'a ɨ Dioj jemi aɨjna cɨme'e tɨ aɨn yaujra'an tajetze ma'acan huamɨ'ɨ, ajta titaatauuni'iri'i ɨ tyaj cɨn autyajturaa ɨ jemin. 15Ajta aɨn ɨ yaujra'an, ai pu aɨn pueen ɨ tyaj jetzen raamua'aree a'ij tɨ een ɨ Dioj ɨ tyaj cai rasise'ij. Ai pu ajta aɨn pueen ɨ tɨ anacai seijra'acaa tɨ'ɨj cai xɨ me'e e'e ti'itɨjcaa. 16Aɨj pu jamuan Dioj nain tyu'utaahuaca'a, tɨj na'a pua'amua ɨ tajapua tɨ e'eseijre'e, ajta tɨj na'a pua'amua tɨ e'eseijre'e iiyan chaanaca japua, nain ɨ tyaj rasise'ij, ajta nain ɨ tyaj cai rasise'ij. Majta maɨn ɨ xaijnyu'ucari ɨ mej tie'ijta u tajapua, Dioj pu nain hua'utaahuaca'a a'achu maj pua'amua. Aj pu i hua'antihuau mej mi meyan che'eta mana'a tyu'utyavaɨre'en ɨ tajapua matɨj tajtuhuaani, arcaarti, muayajtuumua'a tɨ ve'e, pixcaa muayuu, ajta teneenti'i. Nain pu tyu'utaahuaca'a jamuan ɨ Cɨriistu'u, ajta Cɨriistu'u pu hua'ancure'evi'itɨn. 17Cɨriistu'u pu ayan seijra'acaa tɨ'ij cai xɨ me'e e'e ti'itɨjcaa. Ajta nain pu Cɨriistu'u jetze araujca'anye tɨ ij tya'utáviicue'iran. 18Ai pu aɨn pueen ɨ tɨ va'acan cɨn antyujmua'aree rutyaɨtestyamua'a cɨme'e, aɨme ɨ maj tya'atzaahuate'e. Ai pu aɨn pueen ɨ tɨ jetzen tyu'unyej nain tɨ ti'iseijre'e, ajta ai pu aɨn pueen ɨ tɨ anacai a'itáraa hua'a tzajta'a ɨ mɨ'ɨchite. Aɨj pu cɨn ayaa pu eenya'a a'ara'ani tɨ eitze'e va'atɨ a'ame nain cɨme'e. 19Ayaa pu'u, ra'aranajchaca'a ɨ Dioj tɨ Cɨriistu'u ayan che'eta na'a éenya'a a'ara'ani ɨ ruxa'aj Dioj nain cɨme'e. 20Ajta, ra'aranajchaca'a tɨ Cɨriistu'u jamuan hua'utyápua'aren ɨ maj rajchaɨre'e mej mi rɨ'ɨ tityeetyáturan ɨ Dioj jemi. Naijmi'ica aɨme ɨ maj tajapua e'eseijre'e, majta aɨme ɨ mej yan seijre'e iiyan chaanaca japua, aɨ pu hua'utyápua'araca'a aɨjna cɨme'e tɨ Cɨriistu'u ra'iraaxɨre ɨ ruxuure'e ɨ curuu jetze, tɨ'ɨj huamɨ'ɨ tajetze ma'acan. 21Sajta muan, anacai, caxu xa'apɨ'ɨn é'enya'a ɨ Dioj jemi, sajta rájchaɨra'acaa ɨ a'amua tzajta'a saɨjna cɨme'e a'ij sej ye'i ti'ijrɨ'ɨrajcaa. 22Ma ajta Dioj pu ari amuaatyápua'ari aɨjna cɨme'e tɨ Cɨriistu'u huamɨ'ɨ jetzen ɨ curuu. Cɨriistu'u pu a'amua japua huanyúu aɨjna cɨme'e tɨ tirajpueijtzica'a ɨ rujetze. Aj pu i amua'anvi'itɨn ɨ Dioj jemi, muan mɨ sej a'utyáuu xa'aju'un jemin. Caxu che'e a'anaj ti'itɨj cɨn autyaturan ɨ Dioj jemi. Capu ajta a'atɨ muejmi jetze ti'itɨj cɨn tya'upuá'ajte'en. 23Ayaa pu te'eme tɨ pua'a sauj tya'utaviicue'i sej tya'atzaahuate'e, ajta tɨ pua'a sacai yá'uhua'anan ɨ saj sauj rachu'eve'en a'ij tɨ ti'ixaxa'a ɨ nyuucari tɨ cɨn Dioj amue'irajtuaani. Ai pu aɨn pueen ɨ nyuucari ɨ mej meri tihua'uta'ixaa nainjapua. Me nyajta inyaa, Dioj pu ajta ayan tinyeijca nyej ni nyaɨjna cɨn tyu'utyavaɨre'e. 24Ari ijii, nyaa nu huatantyamua'ave'e nyaɨjna cɨme'e tɨ ayan tyajamuaatyáva'ɨrihua'an ɨ nyaj cɨn tirajpueiitzi na'araa. Nyajta neyan raanaijmi'ire'en ɨ nyejetze cɨme'e ɨ tɨ tya'atura mej mi raamua'aree a'ij tɨ tirajpueijtzica'a aɨjna ɨ Cɨriistu'u. Aɨj nu cɨn nyahua'avaɨre'e aɨme, ɨ tɨ cɨn Cɨriistu'u antyujmua'aree, aɨme ɨ mej i'i tyaɨtestyamua'ame'en. 25Nyaa nu xaa te'entyajrupi nyaɨjna cɨme'e tɨ cɨn Dioj ayan tinyeijca nyej ni neyan huarɨni a'ij tɨ Dioj ayan tiraaxa'apɨ'ɨntare. Aɨj nu cɨn tyajamuaata'ixaate'esin nain cɨme'e ɨ nyuucari tɨ jetzen raxa ɨ Dioj. 26Aijna i nyuucari, ai pu aɨn pueen ɨ tɨ ru'avaa tɨ Dioj ramua'areeraca'a, aviitzi cɨme'e, ajca'ihua'ɨmɨ, nain xɨcaj tzajta'a tɨ yu e'ire'enye. Aɨme ɨ maj anacaican e'echajca'a, camu a'atzu ramua'areeraca'a a'ij tɨ Dioj rɨniiche'e. Aru ijii, pu'uri tihua'uta'ixaa me eijre'e hua'a jemi ɨ maj a'utyáuu ɨ Dioj jemi. 27Ayaa pu raaxa'apɨ'ɨntare ɨ Dioj tɨ tihua'uta'ixaate'en me eijre'e mej mi raamua'aree tɨ eecan pu naa seijre'e eijna ɨ tɨ ru'avaa hua'a tzajta'a ɨ tyaɨte ɨ mej meyan a'uchaatɨme nainjapua, iiyan ɨ chaanaca japua. Ai pu aɨn pueen ɨ Cɨriistu'u tɨ a'amua tzajta'a e'eseijre'e. Aɨ pu ajta amuaata'asin sej si raseíran tɨ eecan pu naa seijre'e ɨ Dioj jemi. 28Tyajta ityan, ayaa tu tihue'ixaate'e ɨ tyaɨte a'ij tɨ ti'itɨj huáruu aɨjna ɨ Cɨriistu'u. Naijmi'ica tu rɨ'ɨ ti'ixaate'e, tyajta iya'ahuauritaacan cɨn tu tihua'amua'aten mej mi raamua'aree tzaahuati'ira'a cɨme'e tɨ pua'a ayan ti'ayajna nusu cai. Ayaa tu een cɨn rɨcɨ tyej ti urare'enya'acan cɨn tyu'utatuiire'en ɨ Dioj jemi ajna xɨcajra'a jetze tyatɨ'ɨj hua'anvi'itɨn naijmi'ica ɨ Cɨriistu'u jemi. 29Aɨj nu cɨn neyan ca'anin cɨn ti'imɨjhuaca, nyajta neyan ti'itese'e nain cɨme'e a'achu tɨ caj nyata'aca ɨ ca'anijra'a, nyajta nain cɨn ɨ nyaj cɨn a'anca'anye.

will be added

X\