Los Hechos 6

1Majta, mu'uri eitze'e mui'icaa aɨme ɨ mej tya'atzaahuatya'acaa. Majta seica ɨ maj raayɨ'ɨtɨhua'a ɨ hua'anyuuca aɨme ɨ griego, aɨ mu autyajhuii maj tinínyu'ucacun. Mahua'ajaaxaijvi'iraca'a aɨme ɨ maj raayɨ'ɨtɨhua'a ɨ hua'anyuuca ɨ mej Israel jetze ajtyama'acan. Meyan tɨcɨn: ―Matɨ'ɨj tyu'ura'ura'asin ɨ tɨ ti'icue'iri'i tɨ'ɨj pɨ na'a nain xɨcaj tzajta'a, camu hui tihua'urá'aca ɨ ucarijse maj rusaxu'ijma'a á'ujhua'an, ɨ maj raayɨ'ɨtɨ ɨ hua'anyuuca aɨme ɨ griego.―Ayaa mu tyu'utaxajtaca'a. 2Aj mu mi hua'ajsaɨj aɨme ɨ mej tya'atzaahuate'e. Matɨ'ɨj mi meyan tihua'uta'ixaa aɨme ɨ maj tamuaamuata'a japuan hua'apua ara'ase tɨcɨn: ―Capu hui raavijte'e tyej teyan tiya'uhua'anan tyej tihua'uta'ixaate'en ɨ tyaɨte Jesús jetze ma'acan tyej ti tihua'umín ɨ meesa japua. 3’Casi'i ta'ihuaamua'a, sata'aj hui arahua'apuaca ava'ahuauni ɨ tyetyaca muejmi mej jetze ajtyama'acan. Sata'aj hua'ava'ajajpuaxɨ'ɨn ɨ maj rɨ'ɨ me titya'umuámua'aree ɨ tyaɨte. Ayaa pu hui tyu'ujxe'eve'e tɨ aɨn xaijnyu'ucara'ara'an ɨ Dioj huatyaturan aɨme jemi seij ajta seij tyamua'a naa. Ajta ayan tyu'ujxe'eve'e maj ru'umua'areera. Tyan tu teyan tihue'ijcate'en tyaɨjna cɨme'e. 4’Tyajta ityan, tauche'e tu teyan rɨ'ɨ tityaaju'u ta'aju'un tyaɨjna cɨme'e tyej raatahuavii ɨ Dioj, tyajta tihua'utá'ixaate'esin ɨ tyaɨte ɨ nyuucari cɨme'e.―Ayaa mu tihua'uta'ixaa. 5Ai pu hua'aranajchaca'a naijmi'ica ɨ tyaɨte. Matɨ'ɨj mi hua'ava'ahuau aɨme ɨ Esteban, aɨjna tɨ eihua ra'atzaahuatya'acaa ɨ Dioj. Ajta aɨn xaijnyu'ucara'ara'an huatyajturaa jemin huapɨ'ɨ. Majta mu maɨjna ava'ahuau maɨjna ɨ Felipe, majta maɨjna ɨ Prócoro, majta maɨjna ɨ Nicanor. Seica mu majta ava'ahuau. Ayaa mu antya'aruu tɨcɨn Timón, ajta aɨjna ɨ Parmenas, ajta aɨjna ɨ Nicolás. Ai pu aɨn pueen ɨ tɨ Antioquía e'ema'acan. Ajta, aɨ pu anacai rá'antzaahua ɨ hua'aye'ira aɨme ɨ mej Israel jetze ajtyama'acan. 6Matɨ'ɨj mi huaja'uvi'itɨ a'u maj a'utyáuuca'a aɨme ɨ maj tamuaamuata'a japuan hua'apua ara'ase. Aj mu mi maɨn raatahuaviiri'i ɨ Dioj. Matɨ'ɨj mi antyujmua'aréera mua'araa maɨjna cɨme'e maj nu'u hua'utyavaɨre'en aɨme ɨ maj tamuaamuata'a japuan hua'apua ara'ase. 7Eihua mu raanamuajri'i ɨ nyuucari aɨme aa mej vejli'i antachaatɨme, majta ajca'ihua'ɨmɨ maj antachaatɨme, majta a'ɨmɨ maj a'uchaatɨme, naijmi'i mu raanamuajri'i. Majta ɨ tyaɨte ɨ maj hua'a jamuan á'ujhua'anya'a anna Jerusalén, eihua mu huatamui'iraca'a. Majta maɨn ɨ mej títyatatyá'acaa u teyujta'a, mui'itɨ mu rá'antzaahua ɨ nyuucari. 8Ajta aɨjna ɨ Esteban, eihua pu ra'atzaahuatya'acaa ɨ Dioj, ajta eihua pu Dioj jetze araujca'anyajcaa. Aɨj pu cɨn hua'utaseijra ɨ tyaɨte a'ij mej ye'i rɨ'ɨ tiraata'an ɨ Dioj. 9Ma majta mu seica a e'ire'enye mej mi raataxaj ti'itɨ tɨ cai xa'apɨ'ɨn. Ai mu aɨn pueen ɨ mej seij jetze e'ema'acan u teyujta'a, mej meyan ratamua'amua tɨcɨn hua'ateyuu ɨ maj huatatuiihuaca'a. Aɨ mu aɨn pueen ɨ maj Israel jetze huanyej. Au mu e'ema'acan aujna a'ahua'a Cirene, majta seica aujna a'ahua'a chajta'a tɨ ayan tyaja'arajtyahuaa tɨcɨn Alejandría. Seica mu majta maun e'ema'acan aujna a'ahua'a Cilicia, majta seica u Asia. Matɨ'ɨj mi autyajhuii mej tira'ixaate'en maɨjna ɨ Esteban. 10Aru camu a'atzu raatyaamue'itɨ a'ini'i aɨj pu jetze araujca'anyajcaa ɨ xaijnyu'ucara'ara'an ɨ Dioj. Ajta eitze'e pu rú'umua'areeracaa aɨjna ɨ Esteban macai aɨme. 11Matɨ'ɨj mi meyan huarɨj aviitzi cɨme'e. Seica mu huatajee. Aj mu mi hua'utaij maj tiraaxajtzi'i tɨcɨn: “Tu'uri raanamuajri'i tɨ aɨn a'ij pua'a tiraataxajtaca'a aɨjna ɨ Moisés, ajta ɨ Dioj.” 12Ayaa mu hua'uruu maj hua'anínyu'ucaste ɨ tyaɨte, majta ɨ hua'avaujsi, majta ɨ maj tihua'amua'atyahua'a ɨ yu'uxari jetze. Matɨ'ɨj mi raatyeevi'i ɨ Esteban. Matɨ'ɨj maun ya'uvi'itɨ aɨme jemi ɨ rujueesi. 13Majta seica mu ava'ahuau ɨ mej meyan tí'ihue'itaca'a tɨcɨn: ―Tɨ'ɨj pɨ na'a nain xɨcaj tzajta'a, ai pu hui a'ij pua'a ti'ixa aɨjna ɨ teyuu, ajta ɨ yu'uxari. 14Tu'uri teyan tiraanamuajri'i tɨ aɨn ayan tyu'utaxajtaca'a tɨ nu'u tiraatauuna aɨjna ɨ teyuu aɨjna ɨ Jesús tɨ Nazaret e'ema'acan, ajta tɨ nu'u ta'ari'i ɨ taye'irá ɨ tɨ taata'a aɨjna ɨ Moisés tyaacan tɨ raatyajtuaa.―Yaa mu tyu'utaxajtaca'a. 15Aj mu mi ca'anin cɨn ra'araaseij naijmi'i ɨ hua'ajueesi. Ayaa mu ra'utaseij cumu tɨ tyataave'en ɨ nyeerima'ara'an aɨjna ɨ Esteban. Yaa pu eenya'a tɨj nyeerima'ara'an ɨ saɨj ɨ xaijnyu'ucari tɨ ti'ivaɨre'e u tajapua ɨ Dioj jemi.

will be added

X\