Los Hechos 5

1Ajta aɨn ɨ a'atɨ tɨ ayan antyahuaa tɨcɨn Ananías, aɨ pu seij chuej huatua aɨjna jamuan ɨ ru'ɨj tɨ ayan antyahuaa tɨcɨn Safira. 2Ajta aɨjna ɨ Ananías, ayaa pu tyu'utaujseijrataca'a tɨ nain a'arajtɨɨ ɨ tumin. Ma ajta cai, capu. E'icaca pu huatyajturaa ɨ tumin ɨ rujemi. Ajta tɨ ti'ituraavaca'a, aɨj pu hua'utatui aɨmej ɨ maj tamuaamuata'a japuan hua'apua ara'ase. Ajta nain pu aumua'areeraca'a aɨjna ɨ jɨita'a. 3Aj pui'i ayan tiraata'ixaa aɨjna ɨ Pedro tɨcɨn: ―Ananías, ¿a'ini een cɨme'e paraata'a tɨ aɨn tiyaaru'u timuaataijte'en ɨ mua'atzajta'a? Muaa paj hui raacuanamua ɨ xaijnyu'ucara'ara'an ɨ Dioj paɨjna cɨme'e ɨ pej e'icaca huatyaturaate ɨ tumin ɨ paj raamue'itɨ paɨjna cɨme'e ɨ chuej ɨ paj raatuaa. 4¿Ni cai mueetzi a'aca'a patɨ'ɨj cai xɨ raatuaa? Ajta, patɨ'ɨj raatuaa, ¿ni cai a'ij ti'irɨ'ɨristaca'a pej tyu'unajchi nain cɨme'e, capaj a'ij pana'a? ¿A'ini pej pi tyu'umuá'a peijna cɨme'e? Capaj aɨme pɨtyu'ucuanamua ɨ tyetyaca, silu aɨj paj pɨtyu'ucuanamua ɨ Dioj. ―Ayaa pu tiraata'ixaa aɨjna ɨ Pedro. 5Tɨ'ɨj raanamuajri'i aɨjna ɨ nyuucari, aj pu'i a a'arajve a vejli'i a'u tɨ a'araɨɨcajme aɨjna ɨ Pedro. Tɨ'ɨqui huamɨ'ɨ aɨjna ɨ Ananías. Majta naijmi'i ɨ maj raanamuajri'i a'ij tɨ ti'itɨj huarɨj, eecan mu tyu'utatzɨn. 6Aj mu mi seica a e'ire'enye mej tyetyaca mej tyaamua. Matɨ'ɨj mi ra'ire'ijcataca'a ti'itɨj cɨme'e, cɨɨxuri. Matɨ'ɨj mi yá'utɨɨ. Matɨ'ɨj mi ra'ava'ana. 7Tyauuma'aca a'achu cumu hueica hora, aj pui'i aɨn u a'atanye aɨjna ɨ ɨra'ara'an aɨjna tɨ huamɨ'ɨ. Capu ti'itɨj mua'areeraca'a aɨjna a'ij tɨ ti'itɨj huarɨj. 8Aj pui'i ayan tiraataihua'uri'i aɨjna ɨ Pedro tɨcɨn: ―Pata'aj hui naata'ixaate'en, ¿ni qui saraatuaa saɨjna ɨ chuej? ¿Ni qui seyan tira'ancura'a ɨ tumin saɨjna cɨme'e ɨ chuej saj raatuaa? Aj pui'i ayan tiraata'ixaa aɨjna ɨ jɨita'a tɨcɨn: ―¡Ee! Tyaraatuaa. 9Aj pui'i aɨn Pedro ayan tiraata'ixaa tɨcɨn: ―¿A'ini een cɨn naimi'i seyan tiru'umua'areeracaa sej si seyan raaruu ɨ xaijnyu'ucara'ara'an ɨ Dioj sej si seyan tiraacuanamuan? Casi'i, a mu a'ava'aca'arajna aɨme ɨ mej meri a a'ava'aju'un. Aɨ mu u ya'ava'ana ɨ a'acɨn. Aɨ mu hui majta mua'atɨni mueetzi, micu. 10Tɨ'ɨj ayan tyu'utaxajtaca'a aɨjna ɨ Pedro, aj pui'i a a'arajve a'utɨ a'araɨɨcajme. Ajta pu aɨn huamɨ'ɨ aɨjna ɨ jɨita'a. Aj mu mi utyajrupi aujna chi'ita aɨme ɨ tyaamua, matɨ'ɨj raaseij tɨcɨn pu'uri mɨ'ɨchi. Aj mu mi ru'irajchui. Majta e'eyan u ya'ava'ana a'u mej ye'etyeetye ɨ cɨna'ara'an. 11Majta naijmi'i ɨ maj ra'atzaahuatya'acaa, majta ɨ seica a'achu maj pua'amua ɨ maj raamua'areeri'i, naijmi'i mu tyu'utatzɨn tyamua'a naa. 12Majta maɨn ɨ maj tamuaamuata'a japuan hua'apua ara'ase, eihua mu meyan tyu'uruu mej mi hua'utaseijrate'en ɨ tyaɨte mej Dioj jetze araujca'anye. Majta ɨ mej tya'atzaahuatya'acaa, aɨ mu tyujsaɨj ajna a'ahua'a mej meyan tyaja'amua'amua tɨcɨn tɨ Salomón a'ave'echi'ive'e. 13Ajta capu a'atɨ a'uca'anyajca'a tɨ ajtyaxɨɨre aɨme jamuan aujna tɨ e'ejtéchi'ivi'i. Capu amɨn a'ij, aɨme ɨ seica, rɨ'ɨ mu tihua'ajchaɨca'a aɨmej ɨ mej tya'atzaahuatya'acaa. 14Aɨj mu cɨn, tya'antzaahua eihua ɨ tyaɨte, tyetyaca, majta juuca. Mu'uri eitze'e mui'icaa ɨ maj ra'atzaahuatya'acaa maɨjna ɨ tavastara'a. 15Majta mi autyajhuii maj hue'irajtɨni ɨ mej ti'icucui'i ɨ caaye jetze. Caama japua mu hua'ujtuaa, majta itari japua. Ayaa mu hua'uruu. Ayaa mu ti'imua'astɨ tɨcɨn tɨ pua'a nu'u queenima'ara'an aɨjna ɨ Pedro hua'a japua tanyen aɨme ɨ mej ti'icucui'i. 16Eihua mu majta cura'acɨjxɨ ɨ tyaɨte maj a'ɨmɨ antachaatɨme. Aɨme mu u a'araavi'itɨ ɨ mej ti'icucui'i, majta ɨ maj hua'a tzajta'a seijre'e ɨ tiyaaru'u. Naijmi'i mu huaruj. 17Matɨ'ɨj mi hua'anchueere eihua aɨjna tɨ tihue'ijte'e u teyujta'a, majta aɨme ɨ maj hua'a jamuan á'ujhua'anya'a aɨme ɨ saduceos. 18Aɨj mu cɨn hua'uvívi'i aɨme ɨ maj tamuaamuata'a japuan hua'apua ara'ase. Matɨ'ɨj mi hue'ityaana u carcel. 19Tɨ'ɨqui tɨca'ɨmɨ saɨj a e'ire'enye. Tɨ'ɨqui tya'antacú aɨjna a'u tɨ a'a pueerta. Aɨ pu aɨn pueen ɨ tɨ ti'ivaɨre'e u tajapua Dioj tɨ e'eseijre'e. Aj pui'i aɨn hue'iraavi'itɨ. 20Tɨ'ɨqui ayan tihua'uta'ixaa tɨcɨn: ―Sericu, sata'aj saun a'utyahuiixɨ'ɨn a'u tɨ a'aráyaujta'a e'ita'a u teyujta'a. Sata'aj hui hua'uta'ixaate'en ɨ tyaɨte nain cɨme'e eijna i nyuucari tɨ cɨme'en Dioj tihua'utauuni'i.―Ayaa pu tihua'uta'ixaa aɨjna ɨ a'atɨ. 21Matɨ'ɨj mi meyan huarɨj. Tapua'arijma'aca mu u a'utyajrupi u teyujta'a. Aj mu mi autyajhuii mej tihua'uta'ixaate'en ɨ tyaɨte. Majta aɨme ɨ tɨ tihue'ijte'e u teyujta'a, majta ɨ maj jamuan á'ujhua'anya'a, matɨ'ɨj maun a'ará'a, mahua'utaitaca'a maj tyujsaɨre'en ɨ hua'ajueesi, majta naijmi'i ɨ hua'avaujsimua'a, ɨ maj maun huachaatɨme ajna Israel. Matɨ'ɨj mi hua'utaijtaca'a maj hue'iravi'itɨn maujna a'u maj nu'u eityanami'ihuaca'a aɨmej ɨ maj tamuaamuata'a japuan hua'apua ara'ase. 22Matɨ'ɨj mi a'ucɨj seica ɨ hua'axantaarustyamua'a. Aj mu mi maun a'uré'enye aujna carcel. Aru capu anu'uja'atɨɨtacaa, majta huara'acɨ mej mi meyan tihua'uta'ixaate'en. 23Meyan tɨcɨn: ―Ayaa tu eenye'eque'e tyana'a raatyau ɨ carcel tyamua'a pu naa te'ityanami'ihuaca'a. Majta mu rachaɨca'a tyamua'a naa ɨ xantaaru'u. Tyatɨ'ɨj tya'antacú, capu anu'uja'atɨɨtacaa. ―Yaa mu'u tyu'utaxajtaca'a. 24Tɨ'ɨj raanamuajri'i aɨjna ɨ capitán tɨ cɨn ti'ivaɨre'e u teyujta'a, majta ɨ mej vivejme'en cɨn títyatatyá'acaa u teyujta'a, capu a'ij tihua'arɨ'ɨristya'acaa a'ij mej ye'i tyu'utaxaj. Eihua mu tyu'urihua'uraca'a a'ij tɨ tya'ara'ani. 25Aj pui'i saɨj a e'ire'enye. Aj pui'i hua'uta'ixaa tɨcɨn: ―Casi'i, aɨme ɨ tyetyaca ɨ saj hui muan hue'ityaana, au mu anu'uhuatyáuu u teyujta'a. Metihua'amua'ate ɨ tyaɨte. 26Ajta'i e'eyan aɨn á'uraa aɨjna ɨ capitán, seica jamuan ɨ maj ravaɨre'e. Matɨ'ɨj mi huaja'uve'evi'itɨ. Camu ca'anyejri cɨn a'ini'i mahua'atzɨɨnya'acaa ɨ tyaɨte. Ayaa mu ti'imua'astɨ tɨcɨn tɨ pua'a mataatyatu'asixɨ'ɨn tetej cɨme'e. 27Matɨ'ɨj huaja'uve'evi'itɨ, aj mu mi hua'utaijtaca'a maj huataujseijrata aɨme jemi ɨ mej títyatatí jueesi cɨme'e mej mi maɨn tihua'utaihua'u ɨ mej tie'ijta u teyujta'a. 28Aj pui'i ayan tihua'uta'ixaa aɨjna tɨcɨn: ―Tyan tu amuaata'ijmɨjri'i saj cai che'e seyan tihua'amua'atyá ɨ tyaɨte saɨjna jetze ma'acan ɨ Jesús. ¿Ni seyan huarɨj muan? Caxu xaa nya'u seyan huarɨj. Sauche'e xu tihua'amua'ate nainjapua iiyan Jerusalén. Sajta seyan tajetze ti'ipua'ajte'e ityejmi tɨcɨn tyan tu tyaɨn pueen ɨ tyaj raaje'ica tyaɨjna ɨ tevi.―Ayaa mu tihua'uta'ixaa. 29Ayaa pu i tyu'utanyúu aɨjna ɨ Pedro, majta ɨ seica. Meyan tɨcɨn: ―Ruxe'eve'e tyaj rá'antzaahuate'en ɨ Dioj. Capu ayan tyu'ujxe'eve'e tyaj mueetzi antzaahuate'en mɨ sej i'i tyetyaca. 30Aɨjna tɨ hua'aDioj ɨ tavaujsimua'a tyaaca, aɨ pu hui ajtahua'a raatatɨste ɨ ruxaijnyu'uca aɨjna ɨ Jesús tɨ ij ruuri a'ara'ani. ’Ma sajta muan, saraaje'ica. Ayaa xu hui tirá'utatai cɨye jetze. 31Dioj pu an yá'ujra ɨpuari japua ru'ɨrɨɨta'a pujme'en. Ajta aɨjna cɨn antyujmua'aréera a'araa tɨ anacai a'ara'ani, ajta tɨ hua'a japua huanyuuni ɨ tyaɨte. Ayaa pu raaruu ɨ Dioj tɨ'ij aɨn hua'uta'an aɨme ɨ maj Israel jetze ajtyama'acan ɨ maj ahuaujca'anyen mej mi saɨque tyu'umua'ati ɨ Dioj jemi, ajta tɨ'ij aɨn tihua'utauuni'i ɨ maj cɨn autyajturaa ɨ Dioj jemi. 32’Aij tu huaseij ityan, ajta ayan che'eta na'a aɨjna ɨ xaijnyu'ucara'ara'an ɨ Dioj, aɨ pu raatyaxajtan. Ai pu aɨn pueen ɨ tɨ Dioj raataityaca'a tɨ huatyaturan aɨme tzajta'a ɨ maj ra'atzaahuate'e ɨ Dioj.―Ayaa pu tihua'uta'ixaa. 33Matɨ'ɨj raanamuajri'i eijna, eecan mu huatanínyu'ucacuca'a. Aɨj mu cɨn meyan ti'ijxe'eva'aca'a maj hua'ucui'ini. 34Aj pui'i saɨj a a'utyeechaxɨ tɨ ayan antyahuaa tɨcɨn Gamaliel. Fariseo pu pueenya'a aɨjna. Aɨ pu tihua'amua'atyahua'a ɨ yu'uxari jetze. Naijmi'i mu rɨ'ɨ tirajchaɨca'a maɨjna ɨ Gamaliel. Aj pui'i aɨn tyu'utaijtaca'a maj hue'iravi'itɨn aɨme ɨ tyetyaca. 35Aj pui'i ayan tihua'uta'ixaa aɨme ɨ mej tie'ijta: ―Muan tyetyaca saj iiyan huachaatɨme Israel, rɨ'ɨ xu'u a'ij sej ye'i hua'aruuren aime i tyetyaca. 36Xu'uri hui ra'utamua'areeri'i, tɨ ari a'atee tɨ saɨj huanyej tɨ ayan antyahuaaca'a tɨcɨn Teudas. Ayaa pu hui tya'ujtzaahuatya'aca'a tɨcɨn eecan pu ruxe'eve'e. Seica mu majta jamuan á'ujhua'anya'a. Ayaa mu ará'axcaa a'achu cumu muaacua cieentu ɨ tyetyaca. Aru maraaje'ica maɨjna ɨ a'atɨ. Majta ɨ maj jamuan á'ujhua'anya'a, seica mu cure'itixɨ. Capu ti'itɨj a'ij tiraatyavaɨ aɨjna ɨ Teudas. 37’Ajtahua'a hui saɨj huanyej, aɨjna ɨ Judás tɨ Galileeya e'ema'acan. Aj pui'i huataseijre ajna matɨ'ɨj hua'ute'itee ɨ tyaɨte. Aɨ pu huaja'uvi'itɨ mui'icaca mej mi jamuan á'ujhua'anye'en. Majta mu hui raaje'ica. Majta ɨ maj jamuan á'ujhua'anya'a, aɨ mu a'ucɨ́jxɨ. 38’Aɨj nu cɨn neyan tyaja'amue'ixaate'e nyaɨjna cɨme'e a'ij mej ye'i rɨcɨ. Caxu hui huá'ajeeva seime i tyetyaca. Miche'e huiracɨɨnye, a'ini'i tɨ pua'a rujɨɨmua'a mana'a meyan tirajtyau, naijmi'i pu tyaja'uvaɨjtzi. 39Na'ari cai tɨ pua'a maɨjna jetze araujca'anye ɨ Dioj mej meyan rɨcɨ, capu ra'antipua'arite'esin. Rɨ'ɨ xu'u hui sej si cai saɨjna nya'usi'itya'a ɨ Dioj, sata'aj cai huaapua'a ratyesa'a saɨjna ɨ Dioj.―Ayaa pu tyu'utaxajtaca'a aɨjna ɨ Gamaliel. 40Naijmi'i mu rá'antzaahua. Aj mu mi aɨme huatajee ɨ maj tamuaamuata'a japuan hua'apua ara'ase. Majta hua'utyaavajxɨ. Majta hua'uta'ijmɨjri'i maj nu'u cai che'e tihue'ixaatya'a ɨ tyaɨte Jesús jetze ma'acan. Aj mu mi hua'utatuaa. 41Majta maɨn ɨ maj tamuaamuata'a japuan hua'apua ara'ase, matɨ'ɨj mi huiiraacɨ aujna a'u maj a'irátya'acaa aɨme ɨ hua'ajueesi. Eecan mu huataujtyamua'ave maɨjna cɨme'e tɨ aɨn Dioj ayan tihua'uta'a mej meyan rajpueiitzi mua'araa maɨjna jetze ma'acan ɨ Jesús. 42Ma majta camu xaa nya'u raatapua'ajtaca'a maj cai che'e meyan rɨjca. Nain tujca'ari tzajta'a aɨ mu tihua'amua'atyahua'a ɨ tyaɨte. Aɨ mu tihue'ixa'atyahua'a tɨ aɨn Dioj an yá'ujra aɨjna ɨ ɨpuari japua aɨjna ɨ Jesús. Ayaa mu tihue'ixa'atyahua'a maujna teyujta'a, majta maujna hua'ache.

will be added

X\