Los Hechos 4

1Mauche'e mu tihue'ixaatya'aca'a ɨ tyaɨte. Matɨ'ɨj mi seica a'a e'ire'enye a'u maj a'utyáuuca'a aɨjna ɨ Pedro, ajta aɨjna ɨ Juan. Ai mu maɨn pueenya'a ɨ me tí'icha'ɨ u teyujta'a, majta aɨme ɨ saduceos. 2Capu hua'aranajchaca'a ɨ tyaɨte ɨ mej meyan tihuá'amua'atyajcaa aɨjna ɨ Pedro, ajta ɨ Juan. Majta meyan tihue'ixaatya'aca'a tɨ cɨn Dioj pu ajtahua'a raatatɨste ɨ xaijnyu'ucara'ara'an aɨjna ɨ Jesús. 3Aj mu mi hua'uvívi'i. Matɨ'ɨj mi hue'ityaana aujna a'ahua'a carcel. Camu tihueihua'uri'i a'ini'i pu'uri tyechuijxarijma'acaa. 4Majta ɨ tyaɨte, eihua mu tyu'unamuajri'i a'ij mej tyu'uxajtaca'a. Majta rá'antzaahua. Aɨj mu cɨn meri meyan ará'axcaa a'achu cumu anxɨj vi'ira'a aɨme ɨ mej tya'atzaahuatya'acaa. 5Yaa ruijmua'a yee, aɨ mu tyujsaɨj anna Jerusalén aɨme ɨ maj antyujmua'aree anna chajta'a, majta aɨme ɨ hua'avaujsimua'a, majta aɨme ɨ mej tihua'amua'atyahua'a ɨ yu'uxari jetze. 6Au pu a'utyavaaca'a aɨjna ɨ Anás ɨ tɨ hua'avastara'a, ajta aɨjna Caifás, ajta aɨjna ɨ Juan, ajta aɨjna ɨ Alejandro. Mui'itɨ mu man na'a a'utyáuuca'a aɨme ɨ maj tyaɨtestyamua'ame'en pueen aɨjna ɨ hua'avastara'a. 7Aɨ mu mi meyan tyu'utaijtaca'a maj hue'iravi'itɨn aɨjna ɨ Pedro, majta aɨjna ɨ Juan mej mi tihueihua'u. Aj mu mi a e'ita'a huaja'utyáhui. Matɨ'ɨj mi tihua'utaihua'uri'i. Meyan tɨcɨn: ―¿A'ataani jetze xa'araujca'anye sej si seyan rɨcɨ, na'ari a'ataani jetze ma'acan seyan ti'iruure seijna cɨme'e? 8Aj pu i aɨn Pedro aɨjna jetze araujca'anye aɨjna ɨ xaijnyu'ucara'ara'an ɨ Dioj. Ayaa pu tihua'uta'ixaa tɨcɨn: ―Muan mɨ saj antyujmua'aree iiya chajta'a, sajta muan mɨ saj hua'avaujsimua'a aɨme ɨ maj yan huachaatɨme iiya Israel. 9Cunqui ijii sej seri ti'ita'ihua'u saɨjna cɨme'e ɨ tɨ i'i xa'apɨ'ɨn ɨ tɨ tiraacɨ́'ɨ aijna i tyaata'a i tɨ cɨyaaxara'acaa, sata'aj raamua'aree a'ij tɨ een cɨn huaruj. 10’Ayaa tu tyaja'amue'ixaate'e mueetzi, tyajta a'achu pua'amuaca sej yan huachaatɨme iiya Israel: eijna i tyaata'a iiya tɨ huatyejvee, aɨj pu cɨn ari huaruj aɨjna cɨme'e tɨ'ɨri rá'antzaahua aɨjna ɨ Jesús ɨ Cɨriistu'u tɨ Nazaret e'ema'acan, aɨjna ɨ saj rá'utatai ɨ curuu jetze. Dioj pu ajtahua'a raatatɨste ɨ xaijnyu'ucara'ara'an tɨ'ij ajtahua'a ruuri a'ara'ani. 11Aɨjna ɨ Jesús, ai pu aɨn pueen “ɨ tetej saj nu'u majca'i ya'uhua'axɨ mɨ saj chi'i ájtaahuaca'a. Ayaa pu tye'irájraa tɨ aɨn pueenya'a a'araa ɨ isquineeru'u.” 12Capu hui ma'a a'atɨ seijre'e tyej jetzen arataca'anyen tɨ'ij Dioj tajapua huanyuuni. Aɨ pu'u na'a Dioj ayan raatyajtua ɨ Jesús itejmi jemi iiyan tyej seijre'e iiyan chaanaca japua tyej ti Jesús jetze arataca'anyen tɨ'ij Dioj tajapua huanyuuni. ―Ayaa pu tihua'uta'ixaa aɨjna ɨ Pedro. 13Eecan mu a'ij hua'utaseij aɨme ɨ tyetyaca. Ayaa mu tihua'axajtaca'a tɨcɨn: ―Hua'uca'anisti'i ɨ hua'a tzajta'a amɨjna mɨ Pedro, ajta amɨjna mɨ Juan. Majta raamua'areeri'i tɨcɨn maj cai a'anaj ti'ihuaujmua'ate, majta meyan tɨcɨn: ―Camu ti'itɨj cɨn tityetyáuuca'a. Aj mu mi hua'umuájtyaca'a tɨcɨn aɨ mu jamuan á'ujhua'anya'a aɨjna ɨ Jesús. 14Majta maɨjna huaseij ɨ a'atɨ tɨ huaruj. Au pu a'utyavaaca'a jamuan aɨjna ɨ Pedro, ajta aɨjna ɨ Juan. Aɨj mu cɨn cai a'ij tyu'utaxajtaca'a yee capu ayan ti'ayajna. 15Aj mu mi hua'utaij maj huiracɨɨnye aujna mej a'iraati maɨjna ɨ hueesi. Matɨ'ɨj mi ti'ityúrixáatya'ajraa. 16Majta meyan tɨcɨn: ―¿A'iqui tyahua'aruuren tyamɨme mɨ tyetyaca? ―Ayaa mu'u tyu'urihua'uraca'a. Majta meyan tɨcɨn: ―Capu hui rɨ'ɨri tyej teyan tiraataxaj yee capu ayan ti'ayajna a'ini naijmi'i ɨ maj iiyan huachaatɨme iiyan Jerusalén, aɨ mu ramua'aree a'ij tɨ ti'itɨj huáruu aɨjna ɨ tevi aɨjna cɨme'e ɨ tɨ ti'icui'icaa. 17Peru, tyej ti cai e'itze'e majca'i huayee hua'anamuajra ɨ tyaɨte tzajta'a, tiche'e hua'uta'ijmɨ ijii maj cai che'e tihue'ixaatya'a ɨ tyaɨte maɨjna cɨme'e nyuucajtze'en aɨjna ɨ Jesús. ―Ayaa mu tyu'utaurixaa. 18Aj mu mi hua'utajee. Majta hua'uta'ijmɨjri'i maj nu'u cai che'e tihue'ixaatya'a ɨ tyaɨte maɨjna cɨme'e nyuucajtze'en ɨ Jesús. Majta nu'u cai che'e meyan tihua'amua'atyá ɨ tyaɨte. 19Ajta aɨjna ɨ Pedro, ajta aɨjna ɨ Juan, ayaa mu tihua'uta'ixaa tɨcɨn: ―Muan xu raaxa'apɨ'ɨntare'en rujɨɨmua'a tɨ pua'a ayan tiraavijtya'a tyaj amua'antzaahuate'en mueetzi nusu tyaj rá'antzaahuate'en aɨjna ɨ Dioj. 20A'ini ayaa pu hui tyu'ujxe'eve'e tyaj raataxaj aɨjna tyej teri raaseij, ajta ɨ tyej teri raanamuajri'i. 21Majta maɨjna ɨ jueesi, aɨ mu mauj hua'uta'ijmɨjri'i, majta hua'utanyeeche. Matɨ'ɨj mi hua'uta'a maj huiracɨɨnye maɨjna cɨme'e maj cai a'ij tirajtyauva'aca'a a'ij mej ye'i tihua'ajtya'axɨ'ɨn a'ini naijmi'i ɨ tyaɨte, aɨ mu rɨ'ɨ tiraata'acara'a ɨ Dioj maɨjna cɨme'e a'ij tɨ ti'itɨj huarɨj. 22Ajta aɨn ɨ tyaata'a tɨ Jesús jetze araujca'anye aɨjna ɨ tɨ huaruj, ayaa pu tirajchaɨca'a a'achu cumu hua'apuate ninye'ira'a japuan e'ita'a. 23Matɨ'ɨj mi hua'utatuaa maɨjna ɨ Pedro, majta maɨjna ɨ Juan. Aj mu mi a'ucɨj aɨme ɨ maj huanami'ihuaca'a. Matɨ'ɨj mi aun a'ará'a a'u maj a'utyáuuca'a aɨme ɨ hua'acumpanyeerustyamua'a. Aj mu mi hua'uta'ixaa nain a'ij mej ye'i tyu'utaxajtaca'a aɨme ɨ maj va'acan cɨn títyatatí, majta ɨ hua'avaujsi. 24Matɨ'ɨj maɨn hua'unamuajri'i, aj mu mi naijmi'i meyan tiraatahuaviiri'i ɨ Dioj. Meyan tɨcɨn: ―Tavastara'a, muaa paj paɨn pueen ɨ paj ratyataahuaca'a aɨjna ɨ tajapua, pajta paɨjna i chaanaca tyaj yan japuan seijre'e, pajta muaa raatyajtuaa ɨ jaj ɨ tɨ ve'e. Naijmi'i tɨj na'a a'achu tɨj pua'amua yen ti'iseijre'e, muaa paj nain tyu'utaahuaca'a. 25Muaa paj hui peyan tyu'utaxajtaca'a ajca'ihua'ɨmɨ paɨjna cɨme'e tɨ ayan axaijnyu'uca jetze araujca'anye aɨjna ɨ David tyaacan, aɨjna tɨ muavaɨra'aca'a. Ayaa pu tira'uyu'uxaca'a tɨcɨn: ¿A'ini mej mi nínyu'ucacu aɨme ɨ maj seij chuejra'a japua e'ema'acan? Majta ɨ tyaɨte, aɨ mu ti'imuajca maɨjna cɨme'e tɨ cai ayan te'irajra'ani. 26Rɨ'ɨ mu u a'uruuren mej mi huataujnya'usi'ite'en aɨme ɨ hua'arey iiyan mej seijre'e chaanaca japua. Majta aɨme ɨ mej tihue'ijte'e ɨ tyaɨte, aɨ mu tyujsaɨre'esin, naijmi'i ɨ maj rajchaɨre'e eijna i tavastara'a, majta eijna tɨ an yá'ujra ɨ ɨpuari japua. Ayaa pu tira'uyu'uxaca'a aɨjna ɨ David tyaacan. 27’Ayaj xaa nya'u ti'ayajna, aɨjna ɨ Herodes, ajta aɨjna ɨ Póncio Pilaatu, aɨ mu hui tyujsaɨj iiya chajta'a hua'a jamuan ɨ tyaɨte mej seij chuejra'a japua e'ema'acan, majta hua'a jamuan ɨ mej yeche iiya Israel. Maujmua'atziitya'acaa a'ij mej tiraatyamue'itɨn aɨjna tɨ muavaɨre'e, aɨjna ɨ Jesús, aɨjna tɨ cai a'anaj ti'itɨj cɨn autyajturaa mueetzi jemi. Ai pu aɨn pueen paj muaa an yá'ujra ɨ ɨpuari japua. 28Ayaa mu che'eta mana'a rɨjcu a'ij pej ye'i anacaican tiraaxa'apɨ'ɨntarej tɨ ayan tyu'uxe'eva'a a'ara'ani, tɨ'ij ayan tyu'urɨni. 29’Ma'acui xaa nya'u, muaa paj ta'ivastara'a, casi'i, pɨ mi ti'itanyeeche. Taata'a ɨ ca'anijra'a ɨ tatzajta'a ityejmi i tyaj muavaɨre'e tyata'aj hui cai ti'itzɨɨnya'a tyej tihua'uta'ixaate'en mueetzi jetze ma'acan. 30Pata'aj pajta ahua'aca'anen pej pi tihua'uhuaate'en ɨ mej ti'icucui'i. Pajta hua'utaseijrate'en eijna ɨ paj cɨn peri hua'uta'a maj raayɨ'ɨtɨhua'an eijna jetze ma'acan i Jesús tɨ muavaɨre'e, tɨ cai a'anaj ti'itɨj cɨn autyajturaa mueetzi jemi. ―Yaa mu tiraatahuaviiri'i ɨ Dioj. 31Matɨ'ɨj maɨjna cɨn meyan huarɨj, aj pu'i huatyaujca'atzɨjxɨ ɨ chi'i maj ɨ tzajta'an huirátya'aca'a. Aj pu'i i huatyajturaa ɨ hua'a tzajta'a aɨjna ɨ xaijnyu'ucara'ara'an ɨ Dioj. Aijna jetze mu a'ujca'anyaacan cɨn meyan tihua'uta'ixaa ɨ Dioj jetze ma'acan. Camu ti'itzɨɨnya'acaa. 32Naijmi'i ɨ maj ra'atzaahuatya'acaa, aɨ mu rɨ'ɨ tyu'urixaatya'acaa. Camu a'ij tihua'axajtaca'a seij majta seij. Majta tyu'urá'ura'a seij majta seij ɨ mej tí'ijchaɨca'a. Capu a'atɨ a'atzu ayan ti'ixa maɨjna cɨme'e yee nyeetzi pu ti'inya'a. Metyu'urá'ura'ate micu, aɨme. 33Majta maɨn ɨ maj tamuaamuata'a japuan hua'apua ara'ase, mauche'e mu tihue'ixaatya'acaa maɨjna cɨme'e tɨ Dioj ajtahua'a raatatɨste ɨ xaijnyu'ucara'ara'an aɨjna ɨ Jesús. Aɨj mu jetze araujca'anyajca'a ɨ xaijnyu'ucara'ara'an ɨ Dioj huapɨ'ɨ mej mi tihue'ixaatya'acaa. Rɨ'ɨ mu tihua'ajchaɨca'a, seij majta seij. 34Ajta ayan eenya'a, capu a'anaj a'atɨ cai a'ij ti'ijviicue'iracaa aɨjna cɨme'e naijmi'i mu tyu'utuaaxɨ a'achu maj caj tyu'ujcháɨtɨma'acaa, ti'itɨj chuej, na'ari chi'i. Aj mu mi meyan huarɨj, u mu ya'arajtɨ ɨ tumin maj ra'ancura'a maɨjna cɨme'e mej tyu'utuaa. 35Aj mu mi tyu'utatuii aɨme jemi ɨ maj tamuaamuata'a japuan hua'apua ara'ase. Majta maɨn, aɨme mu huará'a ɨ tumin ɨ maj cai a'ij ti'ijviicue'i. 36Aɨj pu cɨn ayan tyuju'urɨj aɨjna ɨ José, aɨjna tɨ ti'ivaɨra'acaa aɨme jamuan huaacɨxa'ajstyamua'ame'en ɨ Leví tyaacan. Au pu e'ema'acan aɨjna ɨ José, ajna a'ahua'a tɨ ayan tyaja'arajtyahuaa tɨcɨn Chipre. Ayaa mu majta raatamuá'a tɨcɨn Bernabé. Aijna i nyuucari tɨcɨn Bernabé, ayaa pu huataujmua'a eijna tɨcɨn rɨ'ɨ pu tihua'ata'aca aɨme ɨ maj ruxaamɨste'e. 37Seij pu chuej tichaɨca'a aɨjna ɨ José. Aj pui'i raatuaa. Ajta u ya'arajtɨ aɨjna ɨ tumin. Tɨ'ɨqui aɨme huatatui ɨ maj tamuaamuata'a japuan hua'apua ara'ase.

will be added

X\