Los Hechos 3

1Sei xɨcaj jetze pu ayan tyuju'urɨj aɨjna ɨ Pedro, ajta aɨjna ɨ Juan. Naijmi'i mu a a'ujnyéj anna a'ahua'a teyuu tɨ a'utejvee. Ayaa mu huarɨj, a'ini pu'uri tyaja'ure'enyajca'a a'atzaj maj pua'a tenyuuva'a mua'aye'i ɨ Dioj jemi. A'atzaj pu pɨti'irɨjcaa cumu ayée ucama'aca ɨ xɨcaj. 2Seica mu a'atɨ a a'utu'ara'a mua'aye'i mej mi maɨn ye'itejcheti ajna a'ahua'a ta'apueerta a'u mej meyan taja'atamua'amua tɨcɨn tɨ naa seijre'e. Ayaa mu ti'ijrɨ'ɨrajcaa tɨj na'a nain xɨcaj tzajta'a, tɨ'ij aɨn tumin hua'ahuaviira ɨ maj maun a'utyaru'ipi u teyujta'a. Capu ráye'ivajca'a aɨjna ɨ a'atɨ. Ayaa pu eenya'a huanu'eihuaca'a, capu ráye'ivajca'a, a'ini cɨyaaxara'acaa ɨ ruɨɨca jetze. 3Tɨ'ɨj aɨme huaseij aɨjna ɨ Pedro, ajta aɨjna ɨ Juan ɨ maj maun a'utyarutijma'a u teyujta'a, tɨ'ɨqui tumin hua'utahuaviiri'i. 4Aj pu i aɨn Pedro ra'araaseij tyamua'a naa. Ajta aɨjna ɨ Juan, ayaa pu che'eta na'a naa tira'araaseij. Aj pu i ayan tiraata'ixaa aɨjna ɨ Pedro tɨcɨn: ―Pata'aj hui taaseij. 5Tɨ'ɨqui anpuá'araca'a aɨjna ɨ tyaata'a. Ayaa pu ti'imuajcaa aɨjna tɨcɨn tumin mu raata'asin. 6Ajta aɨn Pedro ayan tiraata'ixaa tɨcɨn: ―Canu plaata ticha'ɨ, canu nyajta ooro ticha'ɨ ɨ nyaj muaatapueijve'en. Eru ti'itɨ nyaj ticha'ɨ, aɨj nu'u muaata'asin. Ayaa nu ti'imue'ixaate'e aɨjna jetze ma'acan ɨ Jesús tɨ Nazaret e'ema'acan, ájchesi, pata'aj hui rajra'ani. 7Tɨ'ɨqui ra'anaavi'i ɨ muajca'ara'ara'an jetze. Ajta ra'ajjáj. Cɨme'en pu'u ra'ajjáj, aj pu i huaruj ɨ ruɨɨca jetze ajta nainjapua ɨ ruchyapua jetze. 8Aɨjna tɨ cɨyaaxara'acaa tɨ'ɨqui ájtzucu. Ajta a a'utyeechaxɨ. Aj pu i autyejche tɨ á'ucha'acanye'en. Tɨ'ɨqui hua'a jamuan a'utyajrupi u teyujta'a ɨ Pedro, ajta ɨ Juan. Titzúna'acha'a pu huama'acaa. Rɨ'ɨ pu tirata'acara'a ɨ Dioj. 9Naijmi'i mu raaseij ɨ tyaɨte tɨ ari á'ucha'acanya'a aɨjna ɨ tɨ cɨyaaxara'acaa, majta raanamuajri'i tɨ rɨ'ɨ tirata'acaa ɨ Dioj. 10Maraamua'a tɨcɨn aɨj pu pɨrɨcɨ ɨ tɨ aj e'ityacatii a'u tɨ a'apueerta tɨ ayan tyaja'arajtyahuaa tɨcɨn tɨ naa seijre'e, ajta ɨ tɨ limujna hua'ahuavi'iraca'a ɨ tyaɨte. Matɨ'ɨj mi náa rɨ'ɨ tira'utaseij, majta tɨn ti'itzɨɨnya'acaa. 11Ajta aɨn ɨ tɨ cɨyaaxara'acaa, aɨ pu hua'avivi'iraca'a aɨjna ɨ Pedro, ajta aɨjna ɨ Juan. Aa mu a'utyáuuca'a ta'apueerta tɨ ayan tyaja'arajtyahuaa tɨcɨn a'u tɨ Salomón e'evé'echi'ive'e. Naijmi'i mu a'utyáarua aɨme ɨ tyaɨte a'u maj a'utyáuuca'a. Eecan mu naa titya'utáujmua'ajtyaca'a aɨme jemi. 12Tɨ'ɨj aɨn Pedro hua'useij, ayaa pu tihua'uta'ixaa tɨcɨn: ―¿A'ini een cɨn seyan a'ij tyajá'useij mɨ rutzajta'a muan, mɨ saj Israel jetze ajtyama'acan? ¿A'ini sej si eecan taseij? ¿Ni seyan ti'imua'atze tyaj ityan tyajɨɨmua'a tiraahuaa eijna i a'atɨ? ¿Ni ayan tyajamua'amityejtye'e tyej ityan raarujte tyaɨjna tɨ ayan me tyaja'ucha'acane'en tyaɨjna cɨme'e ɨ tyaj raayɨ'ɨtɨ na'ari tyaɨjna cɨme'e ɨ tyaj cai a'anaj autyajturaa ɨ Dioj jemi? Capu xaa nya'u ayan ti'ayajna. 13’Ajta aɨjna ɨ Dioj, aɨ pu rɨ'ɨ tihua'ata'acara'a ɨ a'amuavaujsimua'a tyaaca aɨjna ɨ Abraham tyaacan, ajta aɨjna ɨ Isaac tyaacan, ajta aɨjna ɨ Jacobo tyaacan. Aɨ pu hua'aDioj raarujte aijna i a'atɨ, a'ini áij pu tya'antzaahua aɨjna jemi ɨ Jesús tɨ Nazaret e'ema'acan. Dioj pu ayan tiraata'a aɨjna tɨ ravaɨre'e tɨ aɨn ti'ityávaaca ti'itɨj cɨme'e tɨ eitze'e ve'e, aɨjna saj muan tyu'utatuii aɨjna ɨ Jesús hua'a jemi ɨ mej tie'ijta. Ajta aɨn Pilaatu, raxe'eva'aca'a tɨ raatatuaani. Ma sajta muan, caxu raataxe'eve, silu ayaa xu ti'ijxe'eva'acaa tɨ huamɨ'ɨni. 14’Caxu raatátuaa saɨjna ɨ a'atɨ tɨ cai a'anaj ti'itɨj cɨn autyajturaa ɨ Dioj jemi, ajta ɨ tɨ rɨ'ɨ ti'ityevistaca'a silu ayaa xu tiraata'ixaa tɨ aɨjna huatatuaani ɨ seij tɨ a'ij pua'a ti'ityevistaca'a. 15Muan xu hui sajta raaje'ica saɨjna ɨ a'atɨ tɨ hua'ata'acara'a maj ruuri mua'ara'ani ɨ tyaɨte. Ajta Dioj pu ajtahua'a raatatɨste ɨ xaijnyu'ucara'ara'an tɨ i ajtahua'a ruuri a'ara'ani. Aɨj tu xaa huaseij, ityan. 16Aɨj pu jetze araujca'anye ɨ Jesús aɨjna ɨ tɨ cɨyaaxara'acaa. Ɨ saj raaseij, saj sajta seri ramua'ate, aɨ pu rá'antzaahua ɨ Jesús ajta tiraahuaate'e. Aɨj pu cɨn ari huaruj. 17’Ma'acui xaa nya'u, ne'ihuaamua'a, nyaa nu ramua'aree a'ij sej ti'itɨj huáruu saj cai ramua'areeraca'a, majta ɨ maj tyaja'amue'ijte'e, camu majta ramua'areeraca'a. 18Ajta Dioj pu ra'ara'aste a'ij maj anacaican tyu'utaxajtaca'a aɨmej ɨ mej ti'ixaxa'ata'a ɨ Dioj jetze ma'acan. Ayaa mu tyu'utaxajtaca'a tɨ nu'u aɨn Cɨriistu'u rajpueiitzi a'ame, aɨjna cɨme'e tɨ nu'u Dioj an yá'ujra ɨpuari japua. 19’Sata'aj saɨque tyu'umua'ati ɨ Dioj jemi. Sajta huataujtuiire'en ɨ Dioj jemi tɨ ij aɨn tyajamuaataijte'en, tɨ ij ajta aɨn tyajamuaatauuni'i ɨ saj cɨn autyajturaa ɨ jemin. Aj pu hui tyaja'ure'enyejsin aɨjna xɨcajra'a jetze tɨ'ɨj jetzen tavastara'a tajapua nyuuni. 20Aj pu i Dioj u ya'utaiti mueetzi jemi aɨjna ɨ Cɨriistu'u tɨ ari raata'a tɨ aɨjna cɨn antyujmua'aréera tɨ tyu'utaijta nain japua. Ai pu aɨn pueen ɨ Cɨriistu'u aɨjna ɨ Jesús. 21’Ruxe'eve'e tɨ aɨn Jesús u a'utyaváa a'ara'ani aujna u tajapua hasta na'a cai Dioj tyu'ujájcuare'en nain tɨj na'a ɨ tɨ iiyan ti'iseijre'e ɨ chaanaca japua. Ayaa pu aɨn Dioj ajmi'i tya'ataujratziiri'i matɨ'ɨj tyu'utaxajtaca'a aɨme ɨ mej jetzen ma'acan ti'ixaxa'ata'a ɨ Dioj. 22Ayaa pu aɨn Moisés tihua'uta'ixaa aɨme ɨ tavaujsimua'a tyaaca tɨcɨn: “Dioj pu nu'u seij avé'evi'itɨ ɨ a'atɨ tɨ ayan che'eta na'a jetzen ma'acan tyu'utaxajta nyatɨj inyaa. Aɨ pu mueetzi jetze ajtyama'acanta a'ame. Xaanamuajri'i naijmi'i a'ij tɨ aɨn tyu'utaxajta sata'aj sajta rá'antzaahuate'en. 23Tɨ pua'a nu'u cai a'atɨ rá'antzaahuate'en, miche'e raatamuarite'en. Che'e cai che'e aɨn hua'a jemi seijra'a ɨ tyaɨte.” Ayaa pu nu'u hui tihua'uta'ixaa aɨjna ɨ Moisés. 24’Ayaj xaa nya'u ti'ayajna naijmi'i ɨ maj tyu'utaxajtaca'a ɨ Dioj jetze ma'acan, tɨj na'a ajna tɨ'ɨj aɨn Samuel seijra'acaa, ajta tɨj na'a tɨ yu e'ire'enye, aɨ mu anáatyá'a tyu'utaxajtaca'a aɨjna xɨcajra'a jetze tɨ'ɨj Dioj tiraataijte'en aɨjna ɨ Cɨriistu'u. 25Eijna ɨ tɨ Dioj cɨn tya'ataujratziiri'i, aɨ pu hui ajta mueetzi jemi huatyaturaasin a'ini muan xu naijmi'i huayaujmua'a pueen ɨ mej ti'ixaxa'ata'a ɨ Dioj jetze ma'acan. Dioj pu ajta tya'ataujratziiri'i ɨ runyuuca cɨme'e aɨme jemi ɨ a'amuavaujsimua'a tyaaca. Ayaa pu aɨjna cɨn tiraata'ixaa ɨ Abraham tyaacan tɨcɨn: “Naijmi'i ɨ tyaɨte ɨ maj maun huachaatɨma'a mua'aju'un ɨ chaanaca japua, aɨ mu ra'ancura'asin ɨ tɨ i'i xa'apɨ'ɨn tɨj na'a ɨ tɨ hua'utyavaɨre'esin aɨme ɨ maj a jetze airanyejsin.” 26Tɨ'ɨj i Dioj ra'antihuau aɨjna ɨ Jesús tɨ ravaɨre'e. Aɨ pu u ya'utaityaca'a mueetzi jemi tɨ'ij aɨn rɨ'ɨ tyajamuaata'an sej si naijmi'i raatapua'ajta saɨjna ɨ tɨ a'ij pua'a een. ―Ayaa pu tihua'uta'ixaa aɨjna ɨ Pedro.

will be added

X\