Los Hechos 28

1Tyatɨ'ɨj tyeri tyaun e'ere'eti tɨ a'araahuachi, naijmi'i tu ruuricaa. Capu saɨj huamɨ'ɨ. Aj tu ti raamua'areeri'i tɨcɨn ayaa pu tyaja'arajtyahuaa ajna tɨ a'araahuachi tɨcɨn Malta. 2Majta maɨn ɨ maj aun e'eche, rɨ'ɨ mu ti'ityetyaɨtestaca'a ityejmi jemi. Matɨ'ɨj mi auunai, aj mu mi taatajée tyaj ahuátacɨxaite'en a'ini meviiyacaa, ajta huaseevi'i. 3Ajta aɨn Pablo, cɨye pu huara'asaɨj tɨ'ij ra'anajtuaa a tá'ataa. Aj pu i cu'ucu'u u a'iraanye tɨ tyu'ujé'ica ɨ taij jetze a'ini capu ra'aviicue'iraca'a tɨ pɨsti ɨ taij. Tɨ'ɨqui Pablo tímuiiri'i muajca'ara'ara'an jetze. 4Majta maɨn ɨ maj aun e'eche, matɨ'ɨj raaseij tɨ cu'ucu'u an cávɨjcaa muajca'ara'ara'an jetze ɨ Pablo, ayaa mu tyú'urixaatya'acaa tɨcɨn: ―Cu xuee aɨn pueen ɨ tɨ ti'ityacui'ica. Pu'uri xaa ráavaɨ tɨ cai aujamɨ a jaata'a. Ma ajta ayaa pu hui tiraavijte'e ɨ Dioj jemi, tɨ cai raata'asin tɨ ruuri a'ara'ani aɨjna ɨ Pablo. 5Tɨ'ɨqui aɨn Pablo, raatyaaca'atzɨj ɨ rumuajca'a. Aj pu i an tá'ataa huavatzɨ ɨ cu'ucu'u. Capu ti'itɨ a'ij raaruu ɨ Pablo. 6Majta maɨn ɨ tyaɨte, ayaa mu ti'imuajcaa tɨcɨn pu'uri tɨn tyájaasin. Majta seica meyan tɨcɨn pu'uri tɨn mɨ'ɨni. Meti'ijchú'eva'acaa a'atzaj tɨ ti'itɨ a'ij raruuren. A'atzu a'ateevi'ica, ajta aɨjna ɨ Pablo, capu ti'itɨ a'ij raaruu. Aj mu mi saɨque tyu'umuá'a. Matɨ'ɨj mi meyan tyu'utaxajtaca'a tɨcɨn: ―Amɨjna, Dioj pu hui pɨrɨcɨ. 7Aujna vejli'i chuej tɨ a'utacá'a, ajta aɨjna ɨ a'atɨ ɨ tɨ tajtuhuan pɨrɨcɨ aujna tɨ a'araahuachi, aɨ pu ta'ancure'evi'itɨ. Ajta, tyamua'a pu naa titaaxa'apueiri'i hueica xɨcaj tzajta'a. Ayaa pu antyahuaaca'a aɨjna tɨcɨn Publio. 8Ajta aɨn taatajra'an aɨjna ɨ Publio, aɨ pu ti'icui'icaa. Eihua pu pɨstacara'a, ajta a'achu'itaca'a. Tɨ'ɨqui Pablo raamuaaraca'a. Ajta raatahuaviiri'i ɨ Dioj tɨ huarún. Aj pu i ra'ava'amuarej an múutze'en. Tɨ'ɨj i huaruj. 9Ayaa pu'u huarɨj, majta mu seica u a'uva'aju'un ɨ mej ti'icucui'i ɨ maj aun e'eche. Aɨme pu ajta tyu'uhuaa. 10Eecan mu rɨ'ɨ titaatyeejee, majta nain mu titaatapueijve a'achu tɨ tita'aturaatya'acaa ɨ tyaj cɨn a'uju'un. Tyatɨ'ɨjta ti huátacate tyej ti á'ucɨɨnye. 11Tɨ'ɨj tyauuma'aca hueica maxcɨra'i, aj tu ti atyaacɨ seij jetze ɨ baarcu tɨ ajta aun a'utyajturaa tejmi jamuan hasta tɨj na'a cai che'e tyú'ucɨmuajravi'icaa. Au pu e'ema'acan aɨjna ɨ baarcu u Alejandría ɨ tɨ taajá'utɨɨ. Ajta, ti'itɨ pu seijra'acaa a tɨ aunyee ɨ baarcu jetze. Ti'itɨ pu antitaavíihuajma'acaa hua'apua tɨ ayan seijre'e tɨj dioosi ɨ maj hua'apua, saɨj tɨ ayan antyahuaa tɨcɨn Cástor, ajta ɨ saɨj tɨcɨn Pólux. Tyatɨ'ɨjta ti tyaun a'ucɨj tej ti tyaun u a'ara'asti, seij jetze ɨ chajta'ana. 12Tyatɨ'ɨj ti tyaun a'ará'a baarcu tɨ a'utyeecha'aca aujna chajta'a tɨ ayan tyaja'arajtyahuaa tɨcɨn Siracusa. Hueica xɨcaj tu a'atee tyaujna. 13Tyatɨ'ɨj ti a'ucɨj. Tyatɨ'ɨj ti tyaun vejli'i ajtyeenye tɨ a'avastɨme. Au tu ti a'ará'a tyaujna chajta'a tɨ ayan tyaja'arajtyahuaa tɨcɨn Regio. Yaa ruijmua'ate'e yee yente pujme'en pu va'atá'aacaca'a ca'anin cɨme'e. Tyajta seij jetze ɨ xɨcaj, au tu a'ará'a aujna chajta'a tɨ ayan tyaja'arajtyahuaa tɨcɨn Puteoli. 14Au tu huá'utyau seica ɨ ta'ihuaamua'a. Matɨ'ɨj mi taatajee tyaj tyaun a'utyaturan hua'a jamuan sei iteeri. Ayaa tu tyaɨjna cɨn huarɨj, tyatɨ'ɨj ti tyaun a'ará'a tyaujna u Roma. 15Majta maɨn ɨ ta'ihuaamua'a ɨ maj maun e'eche, mu'uri ramua'areeraca'a tyej tyeri tyaun aujú'un. Aɨj mu cɨn huiiraacɨ u chajta'ana mej mi ta'antinájche. Au mu ɨmɨ a'araacɨ maujna chajta'a tɨ ayan tyaja'arajtyahuaa tɨcɨn El Foro de Apio, ajta tɨ ayan tyaja'arajtyahuaa tɨcɨn Tɨ hueica chi'i a'ara'ase a'u maj á'ujta'arujve'e. Tɨ'ɨj Pablo hua'useij, aj pu i rɨ'ɨ tiraata'a ɨ Dioj, ajta eitze'e ahuaujca'anye ɨ rutzajta'a. 16Tyatɨ'ɨj tyaun a'ará'a tyaujna u Roma, aɨ mu raata'a tɨ Pablo rusaɨj nami'ihua. Seij pu'u rachaɨca'a ɨ xantaaru'u. 17Tyauuma'aca hueica xɨcaj tzajta'a, aj pu i Pablo hua'utajee ɨ maj tihue'ijte'e ɨ mej Israel jetze ajtyama'acan. Matɨ'ɨj tyujsaɨj, tɨ'ɨqui Pablo ayan tihua'uta'ixaa tɨcɨn: ―Ne'ihuaamua'a, canu hui ti'itɨ a'ij hua'uruu aɨme jemi ɨ tyaɨte, canu nyajta autya'ɨtze aɨjna cɨme'e ɨ taye'irá. Ayaa nu éenya'a, majtahua'a mu naatyeevi'i maujna Jerusalén, matɨ'ɨj mi aɨme hua'utatui ɨ romanos. 18Metinyaihua'uri'i, majta meyan ti'ijxe'eva'acaa maj naatatuaani a'ini canu ti'itɨ a'ij huáruu tɨ ayan tiraavijte'e maj maɨjna cɨn naaje'ica. 19Canu ti'itɨ cɨn tihuá'axajtzi'iran ɨ mej Israel jetze ajtyama'acan inyaa. Ma majta, matɨ'ɨj huaujnyuuste, aj nu ni raatahuaviiri'i tɨ aɨn raaxa'apɨ'ɨntare'en aɨjna tɨ ayan antyahuaa tɨcɨn César. 20Aɨ nu hui cɨn neyan tiraatahuaviiri'i nyaj ya amuaateeseij, nyajta tyaja'amue'ixaate'en. Aɨj nu cɨn anájɨ'ɨqui'i cadeena cɨme'e a'ini nyaa nu neyan che'eta nyana'a ti'ijchu'eve'e ɨ Dioj matɨj aɨme ɨ mej Israel jetze ajtyama'acan. 21Matɨ'ɨj mi meyan tiraata'ixaa tɨcɨn: ―Capu a'atɨ mu titaja'utaiti'iri'i mueetzi cɨme'e aujna u Judea. Majta ɨ ta'ihuaamua'a, ɨ maj aun a'araacɨ, capu ajta a'atɨ ti'itɨ cɨn ti'imuaxajtzi'i, ni capu ajta a'atɨ titaata'ixaa mueetzi cɨme'e ti'itɨ paj a'ij huáruu ma a'ahua'a. 22Ajta ityejmi, ta'araanajchi tyej hui raanamua a'ij pej ti'ixa muaa, a'ini naijmi'ique'e pu a'ij pua'a namuajre'e aɨjna cɨme'e ɨ tɨ jajcua ɨ nyuucari pej tihue'ihue'ixaa ɨ tyaɨte.―Ayaa mu tiraata'ixaa maɨjna ɨ Pablo. 23Matɨ'ɨj mi raaxa'apɨ'ɨntare a'anaj maj majtahua'a tyujsaɨre'esin mej mi majtahua'a raanamua maɨjna ɨ Pablo. Mui'itɨ mu ajtyáxɨɨraca'a ɨ tyaɨte a'u tɨ Pablo a'utyavaaca'a. Tɨj na'a ara'apua'a tya'utyejche asta chumua'anɨmɨ, raatapua'ajtaca'a tɨ tihue'ixaa aɨjna cɨme'e tɨ Dioj tie'ijta nainjapua iiyan chaanaca japua, ajta u tajapua. Aɨjna ɨ Pablo hua'atesa'acaa tɨ hua'utyamue'itɨn mej mi rá'antzaahuate'en ɨ Jesús. Yu'uxari jetze pu tihua'uta'ixaatya'aca'a aɨn tɨ ra'uyu'uxaca'a aɨjna ɨ Moisés tyaacan, ajta aɨn maj ra'uyu'uxaca'a ɨ seica ɨ mej ti'ixaxa'ata'a ɨ Dioj jetze ma'acan. 24Seica mu ra'atzaahuatya'acaa a'ij tɨ Pablo tihue'ixaatya'aca'a. Majta seica, camu a'atzu ra'atzaahuatya'acaa. 25Matɨ'ɨj mi cai a'ij tyu'uta'a. Aɨj mu cɨn a'ucɨ́jxɨ. Mauche'e mu seica ranamuajracaa a'ij tɨ Pablo tí'ixajtacaa. Tɨ'ɨj ra'antipua'ari, ayaa pu tihua'uta'ixaa tɨcɨn: ―Aɨn ɨ xaijnyu'ucara'ara'an ɨ Dioj, tzaahuati'ira'a pu hui cɨn tihua'uta'ixaa a'amuavaujsimua'acɨ'ɨ tɨ'ɨj aɨn Isaías ayan tyu'utaxajtaca'a ɨ Dioj jetze ma'acan tɨcɨn: 26Aricu, hua'a tzajta'a aɨme jemi ɨ tyaɨtestyamua'ame'en. Pata'aj nu'u tihua'uta'ixaate'en yee muan xu ranamuaara xa'aju'un, aru caxu yau'eitaa xa'aju'un. A'atɨ pu nu'u xaa tyajamuaata'ixaate'esin aɨjna cɨme'e ɨ nyuucari, aru caxu ramua'areeran a'ij tɨ huataujmua'a. 27Ayaa nu nu'u hua'aruuren a'ini mu'uri hua'utyaana ɨ hua'axaijnyu'uca jetze. Majta nacuxa'i pueen. Yaa mu cu xuee macai tanamua. Camu nu'u majta atanyéjnye'e. Canu xaa hua'uta'asin maj maunyejnye'ere. Canu nyajta hua'uta'asin maj raanamua a mej mi yau'eitaa mua'ara'ani ɨ rutzajta'a, mej mi cai ya va'aju'un inyeetzi jemi nyej ni tihua'utauuni'i. Ayaa pu tyu'utaxajtaca'a aɨjna ɨ Isaías ɨ tɨ Dioj jetze ma'acan ti'ixaxa'ata'a. 28’Sata'aj hui seyan raamua'aree muan, ijii tɨ yu auumé, tɨ Dioj ari hua'uta'a ɨ mej seij chuejra'a japua e'ema'acan, mej mi meyan che'eta mana'a tira'ancura'an ɨ tɨ cɨn Dioj tya'ataujratziiri'i tɨ nu'u hua'a japua huatanyuuni. Aɨ mu xaa ranamuajran, micu.―Ayaa pu tihua'uta'ixaa aɨjna ɨ Pablo. 29Tɨ'ɨj ayan tyu'utaxajtaca'a aɨjna ɨ Pablo, aj mu mi a'ucɨ́j ɨ mej Israel jetze ajtyama'acan. Matɨ'ɨj mi huiiraacɨ a pua'aque. Aj mu mi ti'ityúrixáatya'ajraa rujɨɨmua'a. 30Ajta aɨjna ɨ Pablo, au pu a'atee hua'apua ninye'ira'a aujna u chi'ita ɨ maj huataujnyaɨj tzajta'a. Aɨ pu hua'ancure'evi'itɨjcɨcara'a naijmi'ica ɨ maj ya'amuaaracara'a. 31Eihua pu tihue'ixaatyahua'a aɨjna cɨme'e tɨ Dioj nain cɨn antyujmua'aree iiyan chaanaca japua, ajta u tajapua. Ajta tihua'amua'atyahua'a aɨjna cɨme'e ɨ tavastara'a, ɨ Jesús tɨ Dioj an yá'ujra ɨ ɨpuari japua. Capu ti'itzɨɨnya'acaa aɨjna ɨ Pablo. Ajta capu a'atɨ nyu'ucamɨ'ɨcaa.

will be added

X\