Los Hechos 26

1Aj pu i Agripa ayan tiraata'ixaa aɨjna ɨ Pablo tɨcɨn: ―Nyaa nu muaata'asin paj tyu'utaxaj mua'a nyuuca cɨme'e. Aj pu i Pablo ajméijca'ataca'a. Tɨ'ɨj i autyejche tɨ huatyaujnan runyuuca cɨme'e. 2Ayan tɨcɨn: ―Agripa muaa paj i'i rey, yaa pu hui tina'amitejte'e tɨ tyamua'a naa tinatyava'ɨri nyej ya huatyejvee mueetzi jemi nyej ni huatyannan ijii i maj cɨn ti'inyaxajtzi'i ɨ mej Israel jetze ajtyama'acan. 3Naa pu nya'ase a'ini papu'uri ramua'aree a'ij tɨ een ɨ hua'aye'ira ɨ mej Israel jetze ajtyama'acan, pajta ramua'aree ɨ maj cɨme'en rujee. Aɨj nu cɨn neyan ti'imuahuavii paj naanamua tyamua'a naa. 4’Naijmi'i ɨ mej Israel jetze ajtyama'acan mu'uri hui ramua'aree a'ij nyaj ye tyu'utyavaaca'a nyatɨ'ɨj pa'arɨ'ɨstacaa, ajta ijii nyej nyeri vasta'a. Canu ti'itɨj a'ij huáruu ajna nyej e'eche ni iiyacui, canu nyajta ti'itɨj a'ij ruure. 5Mu'uri a'atee maj nyamua'ate. Tɨ pua'a hua'araanajchi, í'irɨni mej meyan tyu'utaxaj yee nain nu cɨn tya'ara'aste ɨ ye'ira ɨ maj raaxa'apɨ'ɨntare ɨ maj i'i fariseo. Eitze'e pu hui muare'eri hua'aye'ira aɨme ɨ fariseo. 6’Ma majta, mu'uri u nya'araajaj mej mi nyeetzi jetze tya'ujpuá'ajte'en maɨjna cɨme'e nyaj rachu'eve'e nyaɨjna tɨ Dioj cɨn tya'ataujratziiri'i ɨ tavaujsimua'acɨ'ɨ jemi. 7’Majta aɨme ɨ tatyaɨtestyamua'a ɨ maj tamuaamuata'a japuan hua'apua ara'ase, aɨ mu majta rachu'eve'e asta na'a cai tyaja'ure'enyen ajna xɨcajra'a jetze matɨ'ɨj huatarujsin hua'atzajta'a ɨ mɨ'ɨchite. Aɨj mu hui cɨn rana'amiche'e ɨ Dioj. Nain tujca'ari tzajta'a, majta nain tɨca'ari tzajta'a mu ravaɨre'e. Ajta muaa, Agripa, pej i'i rey, a'ini ayaa nu che'eta nyana'a ti'ijchu'eve'en nyaɨjna, aɨj mu cɨn ti'inyaxajtzi'i. 8¿Ni tzaa cai rɨ'ɨri saj rá'antzaahuate'en tɨ Dioj ajtahua'a hua'uta'asen ɨ mej meri huacuii mej mi majtahua'a huatarun? 9’Nyaa nu nyajta jajcua'ɨmɨ neyan ti'imuajcaa tɨ ayan tyu'ujxe'eve'e nyaj nain cɨn tihua'uta'ijmɨ ɨ maj ra'atzaahuate'e maɨjna tɨ ayan antyahuaa tɨcɨn Jesús tɨ Nazaret e'ema'acan. 10Nyajta neyan huarɨj anna Jerusalén. Aɨme ɨ mej tie'ijta teyujta'a, aɨ mu hui papee naatapij ɨ nyaj cɨn huatancɨ'ɨpua nyaj hue'ityaanan eihua ɨ mej tya'atzaahuate'e. Ajta, matɨ'ɨj hua'acui'icara'a, nyaa nu nyajta tyu'uta'a ɨ ca'anijra'a nyaɨjna cɨme'e tɨ na'aránajchaca'a. 11’Mui'itɨ nu hui pueijtzi hua'uta'a mej mi ra'antipua'arite'en ɨ maj ra'atzaahuate'e, mej mi majta raatyaxaahuata maɨjna ɨ Jesús. Ayaa nu hua'aruurajcaa nain japua hua'ateyujta'a, a'ini eihua nu hua'ajchaɨra'acaa. A'u tɨ na'a nu huaye'ivajcaa matɨj mana'a tityeechaatɨma'acaa nyej ni a'ij pua'a hua'uruuren. 12’Ayaa nu eenye'eque'e auma'aca nyaujna Damasco. Aɨme ɨ mej tie'ijta teyujta'a, aɨ mu hui naataityaca'a, majta naata'a ɨ nyaj cɨn neyan rɨcɨ. 13’Ayaa nu ti'imue'ixaate'e, muaa paj i'i rey, au nu auuma'aca juye jetze a'atzaj cumu tacuarixpua nyatɨ'ɨj raaseij tɨ a'icátaaxɨ u ta japua. Tyamua'a pu nye jetze ti'irájve ɨ taij, ajta hua'a jetze ɨ mej nya jamuan á'ujhua'anya'a. Eitze'e pu huatátaaxɨ cai ɨ xɨcaj. 14Tyatɨ'ɨj ti aitavátzɨ. Aj nu ni a'atɨ huanamuajri'i tɨ a'a tyaja'utaxajtaca'a hua'anyuuca cɨme'e aɨme ɨ mej Israel jetze ajtyama'acan tɨcɨn: “Saulo, Saulo, ¿a'ini pej pi peyan a'ij pua'a nyaruure inyeetzi? Muaa pa asaɨj tiá'ani.” 15’Nyatɨ'ɨj ni neyan tiraataihua'uri'i tɨcɨn: “¿A'ataani paj pueen, nyavastara'a?” ’Aj pu i ayan tyu'utanyúu tɨcɨn: “Nyaa nu nu'u nyaɨn pueen ɨ Jesús, paj a'ij pua'a nyaruure. 16Ajchesi. Huatyechaxɨ. Ayaa nu een cɨn huataseijre mueetzi jemi nyej ni timueijcate'en nyaɨjna cɨme'e paj naatyavaɨre'en, pajta tihua'uta'ixaate'en ɨ tyaɨte a'ij pej peri tyu'useij inyee jemi, pajta peyan tihua'utá'ixaate'esin a'ij nyaj nyauj eenye'eque'e timuaataseijrate'esin. 17- 18’Nyaa nu nu'u a japua nyuuni hua'a jemi ɨ mej Israel jetze ajtyama'acan, nyajta hua'a jemi ɨ mej seij chuejra'a japua e'ema'acan. Ijii nu muaataiti paj a'ura'ani aɨme jemi mej mi yau'eitaa mua'ara'ani, majta raamua'aree a'ij tɨ ti'ijxe'eve'e ɨ Dioj, tɨ i cai che'e aɨn tihue'ijtya'a ɨ Satanás silu Dioj pu'u tihua'utaijte'esin. Aj pu nu'u xaa Dioj tihua'utauuni'ira. Ajta hua'uta'asin maj maun a'utyá'a mua'ara'ani aɨme jamuan ɨ tɨ Dioj rɨ'ɨ a tihuaja'utyahuii aɨjna cɨme'e ɨ maj na'antzaahua.” Ayaa pu hui tinaata'ixaa aɨjna ɨ Jesús. 19’Ayaa pu'u xaa, Agripa muaa paj i'i rey, nyara'ara'aste nyaɨjna u tajapua tɨ e'eseijre'e. 20Nyatɨ'ɨj ni anacai tihua'uta'ixaa nyaɨme ɨ maj aun a'uchaatɨme aujna Damasco. Nyajta aɨme jemi ɨ maj maun Jerusalén e'eche. Nyajta naijmi'ique'e tɨj na'a au tɨ huatacá'a u Judea, au nu tihua'uta'ixaa ɨ tyaɨte, nyajta ɨ mej seij chuejra'a japua e'ema'acan. Eihua nu hui hua'uje mej mi saɨque tyu'umua'ati ɨ rutzajta'a, mej mi majtahua'a Dioj jemi seira'a mua'ara'ani, mata'aj majta meyan huarɨni mej mi seica raamua'aree tɨcɨn: “Mu'uri saɨque tyu'umuá'a.” 21Aɨj mu hui cɨn ɨ mej Israel jetze ajtyama'acan, aɨ mu naatyeevi'i aujna teyujta'a. Meneje'icatacuca'a, micu. 22- 23’Ma majta, Dioj pu naatavaɨ eihua. Aɨj nu cɨn cai xɨ huamɨ'ɨ silu nyauche'e nu hui tihue'ixaate'e naijmi'ica ɨ tyaɨte, ɨ maj tɨ'ɨrii, nyajta ɨ maj vaujsi. Ai nu'u hua'uta'ixaa a'ij mej tyu'utaxajtaca'a aɨme ɨ mej ti'ixaxa'ata'a ɨ Dioj jetze ma'acan, ajta aɨjna ɨ Moisés tyaacan. Ayaa mu tyu'utaxajtaca'a tɨ ayan eenye'en rɨniiche'e tɨ nu'u ayan rajpueiitzi a'ara'ani aɨn tɨ Dioj an yá'ujra ɨ ɨpuari jetze. Ajta nu'u tɨ'ɨj huamɨ'ɨn, aɨ pu aɨn pueenye'e a'ame ɨ tɨ anacai huatarujsin ɨ mɨ'ɨchite tzajta'a. Ajta e'eyan aɨn nu'u tihue'ixaate'en tɨ ari e'eseijre'e ɨ tɨ cɨn Dioj hua'utavaɨ ɨ tyaɨte ɨ mej Israel jetze ajtyama'acan, ajta ɨ mej seij chuejra'a japua e'ema'acan. 24Cɨme'en pu'u ayan tyu'utaxajtaca'a ɨ Pablo, aj pu i e'eyan huajijhuaca'a aɨjna ɨ Festo tɨcɨn: ―Pablo, pa'atɨmue'i muaa. Pa'atɨmue'i hui paɨjna cɨme'e paj eihua tihua'amua'ate. 25Ajta aɨn ɨ Pablo, ayaa pu tiraata'ixaa tɨcɨn: ―Festo paj i'i tajtuhuan. Canu hui nyatɨmue'i. Cɨme'en aɨjna ɨ nyej neri tyajamue'ixaa nyamua'ariira'a jetze pu huanyej tɨ re'en, ajta ayan ti'ayajna. 26Amɨ pu hui rey ru'umua'aree aɨjna cɨme'e. Aɨj pu cɨn í'irɨni nyaj cai ti'itzɨɨnya'a nyetyu'utaxaj jamuan. Ayej nya'ase, capu ti'itɨ a'ij huarɨj tɨ cai raamua'areeri'i, a'ini capu ti'itɨ a'ij huarɨj aviitzi cɨme'e. 27’Ari muaa, Agripa pej i'i rey, ¿ni pacai ra'atzaahuate'e ɨ maj tyu'utaxajtaca'a aɨme, ɨ mej ti'ixaxa'ata'a ɨ Dioj jetze ma'acan? Nyaa nu ramua'aree paj ra'atzaahuate'e. 28Ajta Agripa ayan tiraata'ixaa tɨcɨn: ―¿Ni ayan timua'amitejte'e paj paɨjna cɨn na'antimue'itɨn nyaj nyajta inyaa tya'antzaahuate'en aɨjna cɨme'e ɨ nyuucari tɨ cai ti'imui'i? 29Ajta aɨn Pablo, ayaa pu tyu'utanyúu tɨcɨn: ―Tɨ pua'a cɨj na'a, na'ari tɨ pua'a eihua, ayaa nu hui ti'ijxe'eve'e ɨ Dioj jemi, paj muaa, majta naijmi'i mɨ seica ɨ maj nyanamua ijii, mej mi meyan tira'ara'asten maɨjna ɨ Jesús nyatɨj inyaa, ɨ nyaj cɨme'en neri pueijtzi huatánnya'a, silu maj cai meyan tirajpueiitzi mua'ara'ani nyatɨj inyaa. 30Cɨme'en pu'u ayan tyu'utaxajtaca'a aɨjna ɨ Pablo, tɨ'ɨj i huatyeechaxɨ aɨjna ɨ rey, ajta aɨjna ɨ tajtuhuan, ajta aɨjna ɨ Berenice; majta mu huatyahuiixɨ ɨ mej e'ere'etya'acaa hua'a jamuan. 31Aj mu mi huiiraacɨ rujɨɨmua'a mej mi tihuaurixaate'en maɨjna cɨme'e. Majta meyan tyu'urixaatya'acaa tɨcɨn: ―Amɨjna mɨ tevi, capu hui ti'itɨj a'ij huáruu ɨ tɨ ti'ita'aca ɨ maj cɨn raaje'ica. Capu ajta ayan tiraavijte'e tɨ ayan aityanami'ihua. 32Ajta aɨn Agripa, aɨ pu ayan tiraata'ixaa aɨjna ɨ Festo tɨcɨn: ―Tɨ pua'a aɨn cai ayan ti'ijhuauca tɨ aɨn raaxa'apɨ'ɨntare'en ɨ tɨ ti'itaijte'e, rɨ'ɨriistaca pu tyaj ra'uxɨjte'enche'e ityan.

will be added

X\