Los Hechos 24

1Anxɨj xɨcaj pu tyauuma'aca, tɨ'ɨj aɨn ɨ Ananías ɨ tɨ tie'ijta u teyujta'a, aɨ pu a'ucanyáa aujna Cesarea aɨme jamuan ɨ hua'avaujsi, ajta seij tɨ abogado pɨrɨcɨ. Ayaa pu antyahuaa aɨjna tɨcɨn Tértulo. Aɨ mu ti'itɨ cɨn jetzen tya'ujpuá'ajte aɨjna ɨ Pablo ɨ tajtuhuan jemi. 2Matɨ'ɨj u ya'utajée ɨ Pablo, aj pu i aɨn Tértulo autyejche tɨ tiraaxajtzi'i. Ayaa pu tiraata'ixaa aɨjna ɨ Félix tɨcɨn: ―Tu'uri hui eihua rɨ'ɨ tí'ityeche naa tyaxaahua meenti pauj muaa ti'itaijte'e. Eihua paj rɨ'ɨ tirajtyauve a'a tzajta'a tyata'aj eitze'e rɨ'ɨ yee títeecháatɨme'eni. 3Nain tu teri ancura'a. Aɨj tu cɨn naa títaatátyamua'ave nain japua. Rɨ'ɨ tu timuaata'aca muaa Félix pej i'i tajtuhuan, pej eihua naa rɨ'ɨ ti'iruure. 4Aru tyata'aj cai maa muá'ɨtzaa, ayaa nu ti'imuahuavii paj a'atzu huata'an ɨ ca'anijra'a paj a'atzu taanamua tej timuaata'ixaate'esin. 5’A'ini amɨjna mɨ tevi, eihua tu'uri hui tirájtyauri'iri'i tɨ ti'itziita iiyan chaanaca japua. Nain japua pu ca'anyijra'a hua'uta'a ɨ tyaɨte ɨ mej Israel jetze ajtyama'acan mej mi huaujnya'usi'ite'en. Aɨ pu ajta antyujmua'aree aɨme cɨme'e ɨ maj ra'atzaahuate'e maɨjna tɨ Nazaret e'ema'acan. 6Ajta aɨ pu huataujtese tɨ raatyaxaahuata ɨ teyuu. Aɨj tu hui cɨn rajví'i. Ayaa tu ti'ijxe'eva'aca'a tyaj pueijtzi raata'an a'ij tɨ te'eyu'usi'i ɨ yu'uxari jetze. 7Ajta aun tɨ ta'anajca, aɨjna ɨ Lisias, aɨ pu aun a'utyajrupi. Tɨ'ɨj i tá'ajajni'iri'i ca'anyejri cɨme'e. 8Ajta ayan titaata'ixaa tɨcɨn maj mueetzi jemi a'uva'aju'un ɨ mej tí'ijxajtzi'i. Tɨ pua'a nu'u muaa asaɨj petiraihua'u, aj paj xaa ramua'areeran tɨ ayan ti'ayajna nain ɨ tyaj cɨn ti'itɨj cɨn jetzen ti'ipua'ajte'e.―Ayaa pu tiraata'ixaa aɨjna ɨ Tértulo. 9Majta maɨn ɨ maj a'utyáuuca'a ɨ mej Israel jetze ajtyama'acan, aɨ mu majta naimi'i meyan tyu'utaxajtaca'a tɨcɨn: ―Ayaa pu ti'ayajna. 10Aj pu i aɨn tajtuhuan rumuajca'a cɨn tiraata'ixaa aɨjna ɨ Pablo ayan tɨcɨn: ―Pata'aj hui tyu'utaxaj. Tɨ'ɨj i Pablo ayan tyu'utaxajtaca'a tɨcɨn: ―Rɨ'ɨ pu hui tinaata'a nyaj huatyánnya'a inyaa, a'ini nyajmua'aree tɨcɨn juees paj pɨrɨcɨ aijna chuejra'a japua. Papu'uri a'atee paj juees pɨrɨcɨ. 11A'ini ti'irɨ'ɨri paj raamua'aree tɨ ayan ti'ayajna. Auchan pu tamuaamuata'a japuan hua'apua xɨcaj a'atee nyaj an a'ujnyéj an Jerusalén nyej ni rɨ'ɨ tiraata'an ɨ Dioj. 12’Majta aɨme ɨ mej ti'inyaxajtzi'i, matɨ'ɨj naateevi'i, canu hua'ajtya'axɨ'ɨca'a ɨ tyaɨte aujna teyujta'a tɨ ve'e tzajta'a, ni canu nyajta ca'anijra'a hua'ata'acaa maj huataninyu'ucacun aujna teyujta'a, ni canu nyajta ca'anijra'a hua'ata'acaa nyaujna u chajta'a. 13Amɨme mɨ tyaɨte, camu majta a'ij tirájtyausin ɨ maj cɨn nye jetzen tya'ujpuá'ajte'en. 14’Ayaa nu'u xaa ti'imue'ixaate'e. Nyaa nu hui ravaɨre'e ɨ Dioj ɨ maj rana'amicha'a ɨ nyavaujsimua'acɨ'ɨ. Nyaa nu ravaɨre'e nyaɨjna cɨme'e ɨ ye'ira ɨ mej jetzen huaju'ucaa. Aɨjna cɨme'e ɨ nyeye'ira, ayaa mu ti'ixa amɨme tɨcɨn nyasaɨj nu a'ij tirajtyau. Me nyajta, canu. Nain nu hui antzaahua a'ij tɨ ye'i te'eyu'usi'i ɨ yu'uxari jetze ɨ tya'anxɨvi, nyajta nain a'achu maj caj tira'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan. 15Ayaa nu hui nyajta inyaa tirájxe'evi'ira'a ɨ Dioj jemi, matɨj amɨme nyaɨjna cɨme'e maj huatarujsin ɨ mɨ'ɨchite tzajta'a ɨ mej meri huacuii, aɨme ɨ maj rɨ'ɨ ti'ityetyaɨtestaca'a, majta aɨme ɨ maj a'ij pua'a titetyújchaɨca'a. 16Aj nu hui cɨn ti'ityese'e nyej neyan réenya'a me nyá'ucha'acanye'en ɨ Dioj jemi, nyajta hua'a jemi ɨ tyaɨte. 17’Tɨ'ɨj tyauuma'aca a'achu pua'an ninye'ira'a nyaj a'ucha'acan nyej ni tumin hua'uta'an ɨ nyetyaɨtestyamua'a, nyajta tyu'utámuaɨ'ɨvejtan ɨ Dioj jemi. 18Nyatɨ'ɨj ni u a'ahuánjajcuare a'ij tɨ tya'axa ɨ taye'irá jetze. Ayaa nu rɨjcaa matɨ'ɨj seica taaseij maujna teyujta'a tɨ ve'e. 19’Aɨme aɨn pueenya'a ɨ maj maun e'ema'acan aun tɨ huatacá'a aujna Asia. Camu eihua a e'etyaɨtestaca'a inyeetzi jemi, camu majta ru'itzíitya'aca'a. Tɨ pua'a ti'itɨ a'ij metyá'umua'areera inyeetzi jemi, miche'e maɨn yéve'eré'enyen mueetzi jemi mej mi maɨjna cɨn nye jetze tya'ujpuá'ajte'en. 20Na'ari cai, miche'e mamɨn mɨ mej ya huatyáuu raataxaj ti'itɨ nyaj cɨn autyajturaa nyatɨ'ɨj nyaun a'utyavaaca'a hua'a jemi ɨ hua'a jueesi. 21’Tij cai hui aɨ pueen ɨ ti'itɨ ɨ nyaj cɨn autyajturaa nyatɨ'ɨj u a'utyavaaca'a hua'a jemi, nyatɨ'ɨj ni huajijhuaca'a neyan tɨcɨn: “Muan xu ti'inyaxajtzi'i ijii saɨjna cɨme'e ɨ nyaj tya'atzaahuate'e aɨjna cɨme'e maj nu'u majtahua'a huatarujsin ɨ mɨ'ɨchite.”―Ayaa pu tyu'utaxajtaca'a aɨjna ɨ Pablo. 22Tɨ'ɨj Félix raanamuajri'i, capu ra'aranajchaca'a tɨ raaxa'apɨ'ɨntare'en. A'ini aɨ pu rú'umua'areeracaa a'ij tɨ eenya'a ɨ hua'aye'ira ɨ mej tya'atzaahuate'e. Ayaa pu tihua'uta'ixaa tɨcɨn: ―Chauj mi'i uve'enyén ɨ xantaaru'u ɨ ta'anajca aɨjna ɨ Lisias. Aj nu tyamua'a naa ti'ijmua'areeran aijna ɨ saj cɨn tí'ijxajtzi'i muan. 23Aj pu i Félix aɨjna huataij ɨ xantaaru'u tɨ anxɨte tie'ijta tɨ auj rachaɨ́ca aɨjna ɨ Pablo. Ajta nu'u a'atzu raata'an tɨ á'ucha'acanye'en rusaɨj. Ajta maj ráamuaare ɨ amiincustyamua'ame'en, majta ti'itɨ tiraata'an tɨ tira'aturaate'e. Ajta aɨjna ɨ Félix, aj pu i á'uraa. 24Tɨ'ɨj tyauuma'aca a'achu pua'an xɨcaj, ajtahua'a pu uve'enye aɨjna ɨ Félix, ajta jamuan ɨra'ara'an tɨ ayan antyahuaa tɨcɨn Drusila. Aɨ pu Israel jetze ajtyama'acan. Tɨ'ɨj i raataijtaca'a ɨ Pablo tɨ i aɨn tiraataihua'u aɨjna cɨme'e tɨ pua'a a'atɨ ra'atzaahuaatya'a aɨjna ɨ Jesús, tɨ i'i Cɨriistu'u. 25Pablo pu ayan tiraata'ixaa tɨ ayan tyu'ujxe'eve'e tɨ a'atɨ ayan huarɨni ɨ tɨ i'i xa'apɨ'ɨn cɨme'e naijmi'ica jemi, ajta nu'u tɨ rɨ'ɨ hua'utyéchaɨn. Pablo pu ajta ayan aɨjna tyu'uta'ixaa aɨjna ɨ Félix tɨ Dioj ayan pueijtzi tihua'uta'asin aɨme ɨ mej yen seijre'e iiyan ɨ chaanaca japua. Aɨj pu cɨn tyu'utatzɨn aɨjna ɨ Félix. Aj pu i ayan tiraata'ixaa tɨcɨn: ―Pata'aj a'ura'ani ijii. Nyamuaatájeevi hui nyajtahua'a nyatɨ'ɨj huatácɨ'ɨpáaca. Aj nu ni muanamuajran nyajtahua'a. 26Ma ajta aɨn Félix ayaa pu ti'ijxe'eva'acaa tɨ Pablo tumin raata'an aɨjna cɨme'e tɨ raatatuaani. Aj pu cɨn eihua pu raataijtaca'a tɨ tyu'uxáj jamuan. 27Tɨ'ɨj tyauuma'aca hua'apua ninye'ira'a, tɨ'ɨqui Félix airajraa tɨ ti'ityavaaca'a tajtuhuan cɨme'e. Tɨ'ɨquita'i saɨj te'entyajrupi tajtuhuan cɨme'e. Ayaa pu antyahuaaca'a tɨcɨn Porcio Festo. Ajta aɨn ɨ Félix, ayaa pu ti'ijxe'eva'acaa tɨ reenya'a huatyaturan aɨme jemi ɨ mej Israel jetze ajtyma'acan, aɨj pu cɨn cai raatátuaa ɨ Pablo.

will be added

X\