Los Hechos 23

1Tɨ'ɨj i hua'useij ɨ Pablo aɨme ɨ hua'a jueesi ɨ maj e'etyujsaɨra'acaa. Tɨ'ɨj i ayan tihua'uta'ixaa tɨcɨn: ―Ne'ihuaamua'a, tɨj na'a nyej che'e tyamueista, tɨj na'a tɨ yu e'ire'ene nain nu cɨn tya'ara'aste. Canu hui ti'itɨj cɨn autyajturaa ɨ Dioj jemi. 2Aj pu i aɨn Ananías, ɨ tɨ tihue'ijte'e aɨme ɨ mej ti'ivaɨre'e u teyujta'a, aɨ pu hua'utaij maj ra'ancajveeni. 3Ajta aɨn Pablo, ayan tiraata'ixaa tɨcɨn: ―Dioj pu mua'ancavejsin mueetzi, mɨ paj a'ij pua'a ti'itevi. Muaa papu'u paman huataca pej pi na'uxɨjte'en peijna jetze i yu'uxari. Ma pajta ayaa paj tya'utyaturaasin peijna cɨme'e paj hua'utaij maj na'ancájveeni. 4Majta maɨn ɨ maj maun e'ere'etya'acaa, ayaa mu tiraata'ixaa tɨcɨn: ―¿A'ini pej pi peyan a'ij pua'a ti'ijree pamɨjna tɨ eitze'e ruxe'eve'e ɨ Dioj jemi? 5Ayaa pu tihua'uta'ixaa ɨ Pablo tɨcɨn: ―Ne'ihuaamua'a, canu ramua'areeraca'a a'atɨ tɨ pueen. Ma ajta tzɨj aɨn pueen ɨ tɨ eitze'e ruxe'eve'e ɨ Dioj jemi. Ajta, tɨ pua'a nyajmua'areera, canu neyan tyu'utaxáatache'e, a'ini ayaa pu te'eyu'usi'i ɨ yu'uxari jetze tɨcɨn: “Capej a'ij pua'a ti'ijxajta paɨjna tɨ tihue'ijte'e ɨ tyaɨte.” 6Aj pu i raamua'areeri'i ɨ Pablo tɨcɨn seica mu puéenya'a ɨ mej meyan huataujmua'a tɨcɨn saduceos, majta seica meyan tɨcɨn fariseos. Aj pu i ca'anin cɨme'e hua'utajée tɨcɨn: ―Ne'ihuaamua'a, nyaa nu fariseo pɨrɨcɨ. Hua'a jetze nu huanu'eihuaca'a aɨme ɨ fariseos. Ijii mu ti'inyaxajtzi'i iiyacui maɨjna cɨme'e nyaj rachu'eve'e ajna xɨcajra'an jetze matɨ'ɨj huatarun ɨ mɨ'ɨchite. 7Tɨ'ɨj ayan tyu'utaxajtaca'a aɨjna ɨ Pablo, aj mu mi autyajhuii mej ti'ihuáurihua'u aɨme ɨ fariseos, majta aɨme ɨ saduceos. Aɨj pu cɨn cai che'e huatarɨ'ɨristaraca'a mej ti'itɨj huaxa'apɨ'ɨntare'en matɨ'ɨj tyujre saɨj ajta saɨj. 8Majta maɨn ɨ saduceos, ayaa mu ti'ixa tɨcɨn: “Camu nu'u huatarujsin ɨ mɨ'ɨchite.” Majta meyan tɨcɨn: “Camu nu'u seira'a mua'aju'un ɨ xaijnyu'ucara'ara'an mej ti'ivaɨre'e u tajapua, camu majta seira'a mua'aju'un ɨ hua'axaijnyu'uca aɨme ɨ meri huacuii.” Ma majta aɨme fariseos, nain mu cɨn tya'atzaahuatya'acaa. 9Eecan mu eihua ijhuaca'a. Mu'uri eitze'e eihua tyéjijhuajmá'a. Matɨ'ɨj mi seica huatyahuiixɨ. Ai mu aɨn pueen ɨ mej tihua'amua'ate ɨ yu'uxari jetze. Majta mu maɨn pɨrɨcɨ ɨ maj fariseos jetze ajtyama'acan. Aj mu mi meyan tyu'utaxajtaca'a tɨcɨn: ―Amɨjna mɨ a'atɨ, capu hui ti'itɨj a'ij huáruu. Ajta tɨ pua'a saɨj ari tiraata'ixaa ɨ xainyu'ucari tɨ ti'ivaɨre'e va'acan cɨme'e u tajapua tɨ e'eseijre'e, tiche'e cai jemin nyuuca'an ɨ Dioj. 10Eecan mu eihua tyu'urixaatya'acaa. Mu'uri eitze'e nínyu'ucacuca'a. Aɨj pu cɨn tyu'utatzɨn ɨ xantaaru'u tɨ anxɨte tie'ijta. Ajta ayan tyu'umuá'a tɨcɨn tyamua'a mu hui tiraatéte'enyajxɨ'ɨsin aɨjna ɨ Pablo. Aɨj pu cɨn hua'utaij ɨ xantaaru'u maj a'uju'un mej mi ru'irávi'itɨn ca'anyejri cɨme'e, mej mi maun ra'anvi'itɨn a'u me e'eche ɨ xantaaru'u. 11Seij tɨca'ari tzajta'a pu aɨn tavastara'a huataseijre vejli'i aɨjna jemi ɨ Pablo. Ayaa pu tiraata'ixaa tɨcɨn: ―Uhuatyá'aca'anyechi mua'a tzajta'a. Ayajna patɨj peri nye jemi tyu'utanyúu iiyan Jerusalén, ayaa paj hui che'eta pana'a tyája'utaxájta paujna Roma. 12- 13Yaa ruijmua'ate'e yee, seica ɨ mej Israel jetze ajtyama'acan, aɨ mu tya'ataujratziiri'i maj raaje'ica maɨjna ɨ Pablo, Hua'apuate japuan cɨj caj mu ará'axcaa ɨ tyetyaca. Ayaa mu tyu'utaxajtaca'a tɨcɨn: “Camu nu'u ti'icua'ani, ni camu majta ye'en asta mana'a cai raaje'ica.” 14Au mu a'uju'un aɨme jemi ɨ mej tie'ijta u teyujta'a, majta aɨme jemi ɨ hua'avaujsi. Ayaa mu tihua'uta'ixaa tɨcɨn: ―Tu'uri hui teyan titya'atátaratziiri'i tyaj cai che'e tyu'ucua'ani, asta tyana'a cai raaje'ica ɨ Pablo. Aj tu hui ti ti'icua'ani, tyajta ye'en. 15Ijii, ayaa xu huarɨni muan, majta ɨ seica ɨ jueesi, sata'aj raatahuavii ɨ xantaaru'u ta'anajca tɨ ya'arávi'itɨn ɨ Pablo, aɨjna cɨme'e sej si tyu'utaihua'u tyamua'a naa. Tyajta ityan, tu'uri rɨ'ɨ huataruu tyaj raaje'ica meenti cai xɨ ya uve'enye. 16Ma ajta pa'arɨ'ɨ pu ti'inamuáaraca tɨ'ɨj ayan tihua'uta'ixaa. Aj pu'i aɨn pa'arɨ'ɨ aun a'umej a'u mej e'eche ɨ xantaaru'u. Tɨ'ɨj i raata'ixaa aɨjna ɨ Pablo. Aɨjna ɨ pa'arɨ'ɨ, aɨ pu rayauj cu'utzaara'an ɨ Pablo. 17Tɨ'ɨqui aɨn Pablo seij huatajée ɨ maj anxɨte tie'ijta. Ayaa pu tiraata'ixaa tɨcɨn: ―Pata'aj hui ra'anvi'itɨn ɨ pa'arɨ'ɨ aɨjna ɨ ta'anajca jemi ɨ xantaaru'u. Ti'itɨj pu raata'ixaate'esin. 18Tɨ'ɨqui aɨn tɨ anxɨte tie'ijta, ya'uvi'itɨ ɨ xantaaru'u jemi ta'anajca. Tɨ'ɨj i ayan tiraata'ixaa tɨcɨn: ―Aɨjna ɨ Pablo tɨ aityanami'i, ayaa pu tinaataij nyaj nu'u ya'arávi'itɨn iiya mueetzi jemi nyeijna i pa'arɨ'ɨ. Ti'itɨj pu nu'u muaata'ixaate'esin. 19Ajta aɨn xantaaru'u ta'anajca, ra'anaví'ira'a ɨ muajca'ara'ara'an jetze. Tɨ'ɨj i ya'uvi'itɨ ayée. Tɨ'ɨj i ayan tiraataihua'uri'i tɨcɨn: ―¿Ti'itajni pénye'ixaatya'amɨ'ɨ? 20Ayaa pu tiraata'ixaa ɨ pa'arɨ'ɨ tɨcɨn: ―Aɨme ɨ mej Israel jetze ajtyama'acan, aɨ mu ataujratziiri'i mej muaatahuavii ɨ Pablo paj nu'u ruijmua'a ra'anvi'itɨn hua'a jemi ɨ hua'ajueesi. Mata'aj nu'u rɨ'ɨ tiraamua'aree. 21Aru, capaj hua'atzaahuatya'a. Seica mu nu'u rachu'eva'a mua'aju'un maujna juye jetze aviitzi cɨme'e. Hua'apuate japuan cɨj caj mu ara'ase aɨme ɨ tyetyaca. Maraaxa'apɨ'ɨntarej runyuuca cɨme'e maj nu'u cai ti'itɨj cua'ani, majta nu'u cai ye'en asta mana'a nu'u cai raaje'ica. Mu'uri rɨ'ɨ huaujruu. Mejchu'eve'e mu'u mi paj raata'an tɨ ayan huarɨni. 22Aj pu i ɨ xantaaru'u ta'anajca raataityaca'a ɨ pa'arɨ'ɨ tɨ a'ura'ani. Anacaican pu ayan tiraata'ixaa tɨcɨn: ―Capaj a'atɨ ixaatya'a a'ij pej tinaata'ixaa. 23Aj pu i hua'apuaca huatajée ɨ maj anxɨte tie'ijta. Tɨ'ɨj i ayan tihua'utaij tɨcɨn: ―Sata'aj hua'ajsaɨre'en ɨ xantaaru'u, a'achu cumu hua'apua ciento ɨ maj ru'ɨcan á'uju'un, majta hueicate japuan tamuaamuata'a maj avé'etye'ete, majta hua'apua ciento ɨ maj chun tyu'ɨsin. Sata'aj a'uju'un saujna Cesarea ijii tɨca'a a'atzaj aramuaacuacajretze pu tyauuma'aca ɨ tɨca'ari. 24Ajta hua'uta'ixaa tɨcɨn: ―Sajta seij tyé'esiirate'en ɨ cahuaayu'u ɨ Pablo tɨ japuan ava'acái a'uméj. Sata'aj saun yautuaani ɨ tajtuhuan jemi tɨ ayan antyahuaa tɨcɨn Félix. Caxu a'atɨ ta'acare'en tɨ a'ij raruuraa. 25Ayaa pu tiraataiti'iri'i aɨjna ɨ Félix tɨcɨn: 26“Claudio Lisias, ɨ tajtuhuan tɨ eihua ruxe'eve'e. Yaa nu muataujte'e muaa Félix mɨ paj tajtuhuan cɨn ti'ityejvee, mɨ pej eihua axe'eve'e. 27Aɨme ɨ mej Israel jetze ajtyama'acan, aɨ mu raatyeevi'i maɨjna ɨ tevi. Majre'icatache'e mu, aru nyaa nu a'uré'enye nyahua'antívi'itɨ́ ɨ nyaxantaaru'ustyamua'a. Nyaa nu japuan huanyúu a'ini nyaraamua'areeri'i tɨ aɨn romano pueen. 28Nyeya'uvi'itɨ hua'a jemi ɨ jueesi ɨ mej ti'ixa'apɨ'ɨntare'e a'ini nyájmua'areerimɨ'ɨca'a a'ij mej een cɨn tí'ijxajtzi'i. 29’Nyatɨ'ɨj ni raamua'areeri'i maj maɨjna cɨn tí'ijxajtzi'i maɨjna cɨme'e ɨ ruye'ira. Capu ti'itɨ cɨn autyajturaa ɨ maj cɨn raaje'ica nusu ɨ maj cɨn ra'ityaanan aɨjna ɨ a'atɨ. 30Aru nyatɨ'ɨj raamua'areeri'i maj seica ɨ maj maun Israel jetze ajtyama'acan, aɨ mu nu'u tya'ataujratziiri'i maj raaje'ica, nyatɨ'ɨj ni muaataiti'iri'i nyaɨjna ɨ tevi. Nyajta nu hua'utaij ɨ maj tí'ijxajtzi'i maj mueetzi huata'ixaate'en ɨ maj cɨn tí'ijxajtzi'i.” Aj pu i aɨjna huataiti'iri'i ɨ tajtuhuan. 31Majta maɨn xantaaru'u, ayaa mu raaruu a'ij tɨ tihua'uta'ixaa ɨ xantaaru'u ta'anajca. Tɨca'a mu ya'uvi'itɨ maɨjna ɨ Pablo. Matɨ'ɨj mi maun ya'ure'enyejte aujna chajta'a tɨ ayan tyaja'arajtyahuaa tɨcɨn Antípatris. 32Yaa ruijmua'ate'e yee mu a'ucɨj ɨ maj ta'ave'ete'ete maɨjna Pablo jamuan. Majta ɨ maj ru'ɨcan huaju'ucaa, aɨ mu huara'acɨ a'umaj e'eche ɨ xantaaru'u. 33Matɨ'ɨj a'ucanyáa maujna Cesarea ɨ maj avé'etye'ete, matɨ'ɨj mi raatatui maɨjna ɨ yu'uxari, majta maɨjna ɨ Pablo. 34Ajta aɨn ɨ tajtuhuan tɨ'ɨj ra'ancure'epi ɨ yu'uxari, aj pu i ra'ujijve. Ajta e'eyan aɨjna Pablo tyu'utaihua'uri'i ayan tɨcɨn: ―¿Ti'itajni chuejra'a japua pe'ema'acan? Tɨ'ɨj i raamua'areeri'i tɨ aun Cilicia e'ema'acan. 35Aj pu i ayan tiraata'ixaa tɨcɨn: ―Aj nu muanamuajran matɨ'ɨj yá uve'enyén ɨ maj ti'itɨj cɨn mueetzi jetze ti'ipua'ajte'e. Aj pu i raataijtaca'a maj nu'u ráachaɨn ɨ polisiiya aujna a'u tɨ Herodes eirajca.

will be added

X\