Los Hechos 22

1―Ne'ihuaamua'a, sajta nyavaujsimua'a, xaanamuajri'i a'ij nyaj tyajamuaata'ixaate'esin inyaa cɨme'en. 2Matɨ'ɨj raanamuajri'i tɨ ayan tihua'uta'ixaa hua'anyuuca cɨme'e ɨ hebreo, matɨ'ɨj mi huatyapua'araca'a tyamua'a naa. Ajta ayan tihua'uta'ixaa aɨjna ɨ Pablo tɨcɨn: 3―Nyaa nu hui Israel jetze ajtyama'acan. Au nu a'unu'ihuaca'a aujna a'ahua'a Tarso au tɨ huatacá'a u Cilicia. Aru, ayuu nu huave'ese yu Jerusalén. Nyetihuanmua'ate nyaɨjna jemi ɨ Gamaliel, tɨ tyejtyánamuajraca'a ɨ yu'uxari jetze ajca'i tɨ ɨmɨ e'ema'acan. Ayaa nu hui nyaa tyu'uvaɨ jemin ɨ Dioj nain cɨme'e ɨ nyexe'evi'ira'a satɨj muan rɨcɨ ijii. 4A'anaj ɨmɨ nu a'ij pua'a hua'aruurajcaa nyaɨme ɨ mej tya'atzaahuate'e aɨjna cɨme'e ɨ nyuucari ɨ mej jetzen huaju'ucaa. Nyahua'utavén asta nyana'a cai hua'ucuii. Nyajta naijmi'ica huavívi'i ɨ tyetyaca, nyajta ɨ maj juuca nyej ni hue'ityaanan. 5’Aɨjna tɨ tihue'ijte'e aɨme ɨ mej ti'ivaɨre'e teyujta'a, majta aɨme ɨ vaujsi, naijmi'i mu hui ramua'aree ɨ maj yu'uxari naatapij nyej ni huája'uvá'ajajpuan u Damasco ɨ ta'ihuaamua'a ɨ mej Israel jetze ajtyama'acan nyej ni tyu'utatuiire'en. Au nu á'umej nyej ni hua'uvívi'iran nu ɨ mej tya'atzaahuate'e, nyajta u huája'arájajpua neyujna Jerusalén tyej ti pueijtzi hua'uta'an. 6’Nyatɨ'ɨj ni nyaun auma'aca juye jetze. Nu'uri tɨmua'a antyenyéesima'acaa nyaujna Damasco a'atzaj cumu tacuarixpua. Ca'anacan pu hui taij huatátaaxɨ inyee jemi. Ute'e pu e'icátatzave'e ca'anin cɨme'e. 7Nyatɨ'ɨj ni ca'anacan a a'arajve a chuaata'a. Nyajta e'eyan a'atɨ huanamuajri'i tɨ ayan tinaatajée tɨcɨn: “Saulo, ¿a'ini een cɨn peyan a'ij pua'a nyaruure?” 8Nyatɨ'ɨj ni neyan tiraataihua'uri'i tɨcɨn: “¿A'atani paj pɨrɨcɨ muaa, nyavastara'a?” Ajta ayan tinaata'ixaa tɨcɨn: “Nyaa nu nu'u hui aɨn pueen Jesús nyaj Nazaret e'ema'acan, nyaa nu aɨn pueen ɨ pej a'ij pua'a nyaruure.” 9’Majta maɨn ɨ mej nya jamuan huaju'ucaa, aɨ mu majta raaseij ɨ taij, majta tyu'utatzɨn. Ma majta, camu raanamuajri'i ɨ a'atɨ tɨ naatajée. 10’Nyatɨ'ɨj ni neyan tiraataihua'uri'i tɨcɨn: “¿A'ini ti'itɨ nyaruuren, nyavastara'a?” ’Ajta aɨn tavastara'a, ayaa pu hui tinaata'ixaa tɨcɨn: “Ajchesi, aricu aujna u Damasco. Au mu muaata'ixaate'esin nain a'ij pej ye'i huarɨni.” 11’Nyajta arácuuni'i na'araa ɨ taij cɨme'e. Aɨj mu cɨn maɨn ɨ maj nya jamuan huaju'ucaa, aɨ mu nyajautuaa u Damasco. 12’Saɨj pu aun a'utyavaaca'a aujna tɨ ayan antyahuaa tɨcɨn Ananías. Nain pu cɨn ra'ara'aste ɨ tɨ te'eyu'usi'i ɨ yu'uxari jetze a'ij tɨ tyu'utaxajtaca'a aɨjna ɨ Moisés tyaacan. Rɨ'ɨ mu tiraatajee naimi'i ɨ mej Israel jetze ajtyama'acan ɨ maj aun e'echajcaa aujna Damasco. 13Mu pu a'uve'eme tɨ naamuaare aɨjna. Aa vejli'i pu nye jemi huatyeechaxɨ. Aj pu i ayan tinaata'ixaa tɨcɨn: “Ne'ihuaara'a, Saulo, pata'aj atanyéeri pua'ara'ani.” ’Cɨme'en pu'u ayan tinaata'ixaa, aj nu ni atanyéeri na'araa. 14Ajta ayan tinaata'ixaa tɨcɨn: “Hua'aDioj ɨ tavaujsimua'a tyaacan, aɨ pu nu'u hui mua'ave'evi'itɨ mueetzi pej pi raamua'aree a'ij tɨ ti'ijxe'eve'e, pajta raseijran aɨjna tɨ cai a'anaj ti'itɨj cɨn autyajturaa ɨ Dioj jemi, pajta ranamuaaran a'ij tɨ ti'itɨ ti'ixa. 15Muaa pa á'ucha'acanya'a pua'ame tyaɨte tzajta'a paɨjna jetze ma'acan ɨ tavastara'a. Muaa pa nu'u hui hue'ixáatya'a pua'ame a'ij pej peri tyu'useij, pajta ɨ pej peri raanamuajri'i. 16Ajta ijii, ¿ti'itajni pauj chu'eve'e? Ajchesi, a'a huá'amuaɨ'ɨhuachi, pajta raatajéeven nyuucajtze'en ɨ tavastara'a tɨ ij aɨn timuaatauuni'i ɨ paj cɨn autyajturaa ɨ Dioj jemi.” Yaa pu hui tinaata'ixaa. 17’Nyatɨ'ɨj ni neyun a'uve'eme yu Jerusalén. Teyujta'a nu a'utyajrupi nyej ni Dioj jemi tyu'utanyuuni'i. Nyajta e'eyan tyu'umaaraca'a. 18Aɨj nu hui tavastara'a huaseij, tɨ nu'u ayan tinaata'ixaa tɨcɨn: “Ca'anacan, á'ura'a ayujna Jerusalén a'ini camu mua'antzaahuate'esin a'ij pej tihua'utá'ixaate'esin inyeetzi jetze ma'acan.” 19’Aj nu ni neyan tiraata'ixaa tɨcɨn: “Nyavastara'a, aɨ mu ramua'aree ɨ nyaj á'ucha'acanya'a hua'ateyujta'a a, nyajta meyee, nyajta hue'ityaana ɨ mej tya'atzaahuate'e mueetzi jemi, nyajta hua'utyaavajxɨ. 20Majta ramua'aree nyaj nyaun a'utyavaaca'a nyaujna matɨ'ɨj raaje'ica maɨjna ɨ Esteban ɨ tɨ tyu'utaxajtaca'a mueetzi jetze ma'acan. Nyaa nu hui tyu'uta'a nyaɨjna cɨme'e maj raaje'ica. Nyajta tyú'uchaɨ ɨ tihua'acɨɨxu aɨme ɨ maj raaje'ica.” 21’Ma ajta aɨn tavastara'a, ayaa pu tinaata'ixaa tɨcɨn: “Aricu, a'ini nyamuaataiti ɨmɨ tyaɨte tzajta'a ɨ mej seij chuejra'a japua e'ema'acan.”―Ayaa pu tihua'uta'ixaa aɨjna ɨ Pablo. 22Mauche'e mu raanamuajri'i. Aj mu mi autyajhuii maj huatyéjíihuajra'ani. Meyan tɨcɨn: ―Xa'anvi'itɨchi sata'aj raaje'ica. Tyana'ajtzɨ raatáijtache'e maj raaje'ica. 23Eecan mu tyéjijhuajmá'a. Majta tyu'ujcɨɨxu, ute'e mu tyajá'uhua'anaa, majta chuej eirá'aratzɨ́'ɨ. Ute'e mu tyajá'uhua'anaa. 24Meenti mauj tyéjijhuajmá'a, ajta aɨn xantaaru'u ta'anajca, aɨ pu hua'utaij maj ru'utyajtuaani u tete'e a'u me e'eche ɨ xantaaru'u. Ajta tyu'utaijtaca'a maj ra'ira'avajxɨ'ɨn, majta tiraihua'uran maɨjna ɨ Pablo mej mi raamua'aree a'ij mej een cɨn meyan títyetyéjijhuajma'a ɨ tyaɨte. 25Matɨ'ɨj mi raatyáajɨ'ɨque mej mi ra'ira'avajxɨ'ɨn. Aj pu i Pablo ayan tiraata'ixaa ɨ cɨn ti'ityejvee tɨ aa a'utejvee ayan tɨcɨn: ―¿Ni ayan tyajamuaata'aca ɨ a'amuaye'ira sej si na'ira'avajxɨ'ɨn inyeetzi i nyaj nyaun Roma jetze e'ejtyama'acan? Ma majta cai xɨ meyan tiraaxa'apɨ'ɨntarej maj pueijtzi naata'an inyeetzi. 26Ajta aɨn tɨ anxɨte tie'ijta, tɨ'ɨj raanamuajri'i aɨjna ɨ Pablo, au pu a'umej aɨjna jemi xantaaru'u ɨ ta'anajca. Aj pu i ayan tiraata'ixaa tɨcɨn: ―¿A'ini pana'a pijrɨni aɨjna cɨme'e ɨ a'atɨ? ¿Au pu chajta'a e'ema'acan Roma tɨ e'ejtyama'acan? 27Aj pu i aɨn ɨ xantaaru'u ɨ ta'anajca, a a'ire'enye ɨ Pablo jemi. Tɨ'ɨqui ayan tiraataihua'uri'i tɨcɨn: ―Naata'ixaate'e. ¿Ni paun e'ema'acan chajta'a tɨ Roma e'ejtyama'acan? Aj pu'i Pablo ayan tyu'utanyúu tɨcɨn: ―Ee. 28Aj pu i aɨn ɨ xantaaru'u ɨ ta'anajca ayan tiraata'ixaa tɨcɨn: ―Eihua nu tyu'unajchitaca'a inyaa nyej ni huatyanromáanota. Tɨ'ɨj i ayan Pablo tiraata'ixaa tɨcɨn: ―Ni'i romano inyaa a'ini auj nu a'unu'ihuaca'a. 29Majta maɨn ɨ maj raataihua'uri'i, aj mu mi ava'acɨ rujɨme'e. Ajta aɨn xantaaru'u ɨ ta'anajca, aɨ pu mi'ijmu tyu'utatzɨn tɨ'ɨj raamua'areeri'i tɨ ra'ityaana aɨjna ɨ Pablo, ɨ tɨ aun Roma jetze ajtyama'acan. 30Yaa ruijmua'ate'e yee, ajta aɨn xantaaru'u ɨ ta'anajca, ayaa pu ti'ijxe'eva'acaa tɨ raamua'aree a'ij mej een cɨn meyan tí'ijxajtzi'i ɨ Pablo aɨme ɨ mej Israel jetze ajtyama'acan. Tɨ'ɨqui ra'uxɨjte. Ajta hua'utaij maj nu'u tyujsaɨre'en aɨme ɨ mej tie'ijta u teyujta'a, majta ɨ jueesi. Aj pu i ya'ujáj aɨjna ɨ Pablo. Tɨ'ɨqui hua'a jemi a yáuutuaa.

will be added

X\