Los Hechos 21

1Tyatɨ'ɨj ti a huaja'uhua'axɨ ɨ ta'ihuaamua'a, tyatɨ'ɨj ti atyaacɨ ɨ baarcu jetze. Aj tu ti antacɨj aujna u Cos. Yaa ruijmua'ate'e yee tu tyaun a'uraanye tyaujna Rodas. Tyajta tyaun huiiraacɨ, tyatɨ'ɨjta ti tyaun a'uraanye aujna u Pátara. 2Au tu ti sei á'utyau ɨ baarcu tɨ Fenicia a'uméj. Aɨj tu jetze atyaacɨ. Tyatɨ'ɨj ti a'ucɨj. 3Au tu a'ujú'ucaa tyatɨ'ɨj raaseij a tɨ a'araahuachi. Ayaa pu tyaja'arajtyahuaa tɨcɨn Chipre. Au tu tauutata'a pujme'en ajcaanye, mu tu a'uju'un tyana'a asta aujna u Siria. Au mu tye'iratuaaxɨ ɨ ijca tɨ tyu'utɨsima'a ɨ baarcu. Aɨj tu cɨn acaacɨj. Ayaa pu tyaja'arajtyahuaa aujna tɨcɨn Tiro. 4Au tu ti huá'utyau ɨ ta'ihuaamua'a. Au tu ti hua'a jamuan a'utyajturaa aráhua'apua xɨcaj jetze. Aj pu i xaijnyu'ucara'ara'an ɨ Dioj, ti'itɨ hua'uta'ixaa aɨme. Aɨj mu cɨn raata'ijmɨjracaa tɨ nu'u cai a'ura'ani aɨjna ɨ Pablo aujna Jerusalén. 5Tɨ'ɨj tyaja'ure'enye aráhua'apua xɨcaj jetze, aj tu ti a'ucɨj. Naijmi'i ɨ mej tya'atzaahuate'e, majta ɨ maj hua'atyevi'itɨn, majta ɨ hua'ayaujmua'a, au mu tajautuaa tɨ uastɨmee chajta'ana jetze. Au tu titunutaxɨ a'apueiri japua, tej ti raatyajhuauni ɨ Dioj jemi. 6Tyatɨ'ɨj ti hua'utatauutya'a, aj tu ti atyaacɨ ɨ baarcu jetze. Majta maɨn ɨ maj a taja'avá'atuaa, au mu huara'acɨ. 7Tyatɨ'ɨj huiiraacɨ taujna Tiro, tyauche'e tu huaju'ucaa baarcu jetze. Tyatɨ'ɨj ti tyaun a'ará'a taujna Tolemaida. Tyatɨ'ɨj ti hua'utataujte ɨ ta'ihuaamua'a. Tyajta tyaun huá'a jamuan a'utyajturaa sei xɨcaj. 8Yaa ruijmua'ate'e yee pu á'uraa ɨ Pablo. Tyajta ityan i tyaj jamuan á'ujhua'anya'a, tyajta tu jamuan a'ucɨj. Tyatɨ'ɨj ti eitacɨj ayun pujme'en, chajta'a tɨ ayan tyaja'arajtyahuaa tɨcɨn Cesarea. Au tu a'ará'a aa tɨ e'eche aɨjna ɨ Felipe tɨ tyajá'uxajtan tyaɨte tzajta'a. Ai pu aɨn pueen seij ɨ maj aráhua'apua ara'ase ɨ mej ti'ivaɨre'e u teyujta'a. Au tu a'utyajturaa taɨjna jamuan ɨ Felipe. 9Muaacuaca pu tiyaujmua'a juucajtaca maj cai xɨ vɨɨche. Aɨ mu tí'ixajtacaa nyuucari cɨme'e tɨ Dioj raatyajtuaa hua'a jemi. 10Aun tu a'atee yaa pua'an xɨcaj tɨ'ɨj saɨj a e'ire'enye tɨ ayan antyahuaa tɨcɨn Agabo. Au pu a'arajraa aujna u Judea. Ai pu pɨrɨcɨ aɨjna ɨ Agabo seij tɨ Dioj jetze ma'acan ti'ixaxa'a. 11U pu a'uve'eme tɨ ij támua'aree. Aj pu i ra'ava'axɨjtaca'a ɨ Pablo ɨ puaasajra'ara'an. Tɨ'ɨqui aɨjna cɨn ra'anaajɨ'ɨque ɨ ɨɨcajra'an jetze, ajta ɨ muajca'ara'ara'an jetze. Ayaa pu tyu'utaxajtaca'a tɨcɨn: ―Ayaa pu hui ti'ixa ɨ xaijnyu'ucara'ara'an ɨ Dioj aɨjna tɨ cɨme'en yee, maj nu'u ra'anaajɨ'ɨque'esin aɨjna cɨme'e ɨ puaasajra'ara'an aɨme ɨ mej Israel jetze ajtyama'acan aujna Jerusalén. Majta nu'u hua'utatuiire'esin aɨme ɨ mej seij chuejra'a japua e'ema'acan. 12Tyatɨ'ɨj raanamuajri'i tyaɨjna, ityan, majta aɨme ɨ mej Cesarea e'ema'acan, naijmi'i tu raatajée tɨ nu'u cai au á'ume'en. 13Aj pu i ayan tyu'utanyúu ɨ Pablo tɨcɨn: ―¿A'ini een cɨn seyan tyu'ujyein, sajta a'ij pua'a tityá'ujmuajte inyeetzi cɨme'e? Niche'e hui huamɨ'ɨni. Ayaa nu tya'anca'anye maj na'anájɨ'ɨque'en, nyajta nyaj huamɨ'ɨni nyaujna Jerusalén nyaɨjna cɨme'e nyaj ravaɨre'e ɨ tavastara'a ɨ Jesús.―Ayaa pu titaata'ixaa aɨjna ɨ Pablo. 14A'ini catu raataviicue'iri'i tyaj ra'antimue'itɨn, tyatɨ'ɨj ti raata'a tɨ u á'ume'en. Ayaa tu tiraata'ixaa tɨcɨn: ―Che'e ayan tyaja'ure'enyen a'ij tɨ ti'ijxe'eve'e ɨ tavastara'a. 15Tyajta e'eyan huátacate. Tyajtɨ'ɨj ti tyaun a'ujnyéj anna Jerusalén. 16Seica ɨ mej tya'atzaahuate'e ɨ mej Cesarea e'ema'acan, aɨ mu a'ujnyéj tajamuan. Ajta saɨj tɨ hua'a jetze ajtyama'acan ɨ me Chipre e'ema'acan, ayaa pu antyahuaa tɨcɨn Mnasón. Pu'uri a'atee tyamua'a tɨ tya'atzaahuate'e. Au tu a'araíxanche'e a'u tɨ e'eche aɨjna. 17Tyatɨ'ɨj tyaun a'ará'a, naa mu rɨ'ɨ tita'ancuré'evi'itɨ ɨ ta'ihuaamua'a. Eecan mu huataujtyamua'ave. 18Yaa ruijmua'ate'e yee pu Pablo ta jamuan u á'umej tyej ti ya'uva'amuaare tyaɨjna ɨ Jacobo. Majta ɨ vaujsi, naijmi'i mu aun a'utyáuuca'a. 19Aj pu'i Pablo hua'utataujte. Tɨ'ɨqui ayan tihua'uta'ixaa naijmi'ica a'ij tɨ ti'itɨ huarɨj aɨme jemi ɨ mej seij chuejra'a japua e'ema'acan, aɨjna cɨme'e tɨ Dioj jetze ruca'anye aɨn ɨ Pablo, ayan Dioj jetze tya'aráujca'anyajca'a. 20Matɨ'ɨj raanamuajri'i, aj mu mi rɨ'ɨ tiraata'a ɨ Dioj. Matɨ'ɨj mi meyan tiraata'ixaa maɨjna ɨ Pablo tɨcɨn: ―Casi'i, ta'ihuaara'a, a'ini aɨme ɨ mej Israel jetze ajtyama'acan, mui'itɨ mu hui tya'atzaahuate'e, majta, naijmi'i mu raxe'eve'e tɨ a'atɨ ayan huarɨni a'ij tɨ tyu'utaxajtaca'a ɨ yu'uxari jetze aɨjna ɨ Moisés tyaacan tɨ ra'uyu'uxaca'a. 21Majta meyan ti'ixa paj nu'u tihua'amua'ate aɨme, ɨ mej Israel jetze ajtyama'acan, ɨ maj majta seij chuejra'a japua e'eche, muaa paj nu'u peyan tihua'amua'ate maj nu'u cai meyan rɨjca a'ij tɨ tyu'utaxajtaca'a aɨjna ɨ Moisés, maj nu'u cai ra'antisijchixɨ'ɨ ɨ hua'anavij ɨ hua'ayaujmua'a, majta nu'u cai ra'ara'asten ɨ taye'irá. 22’¿A'ini tyana'a tijrɨni?, a'ini matɨ'ɨj raamua'aree ɨ tyaɨte paj ya uve'enye, aj mu mi tyujsaɨre'esin. 23’Pata'aj peyan huarɨni a'ij tyaj timuaata'ixaate'esin ityan. Muaacua mu ya muaatyáuu ɨ tyetyaca, ɨ maj ti'itɨj cɨn tya'ataujratziiri'i ɨ Dioj jemi. 24Pata'aj hua'anvi'itɨn paujna teyujta'a pej pi huá'ajajcuare'en hua'a jamuan, pajta tyu'unaachita ɨ maj hua'ajijve'en. Aj pu hui xaa rɨ'ɨriista a'ame maj caujyajxɨ'ɨn. Aj mu mi ramua'areeran tɨ cai ayan ti'ayajna a'ij mej timuaata'ixaa mueetzi, silu pajta paj muaa ra'ara'astejsin ɨ yu'uxari. 25’Majta ɨ maj cai Israel jetze ajtyama'acan, tu'uri tihua'utaiti'iri'i tyej teyan raaxa'apɨ'ɨntare maj cai hue'ira'a cua'aca maj raamuaɨ'ɨvajtaca'a. Aɨ pu hui xaa rɨ'ɨri maj raacua'ani ɨ maj cai raamuaɨ'ɨvajtaca'a. Aru, camu nu'u majta xuure'e cua'aca, majta cai racua'aca ɨ hue'ira'ara'an ɨ maj racácue'imin. Majta cai tyu'ujxana'acɨra'a ɨ tyetyaca juuca jamuan ɨ maj cai hua'atyevi'itɨn, majta ɨ juuca, maj nu'u cai seica autyanaxcan ɨ tyetyaca ɨ maj cai hua'acɨna'ajmua'a pueen. 26Yaa ruijmua'ate'e yee, Pablo pu huaja'uvi'itɨ aɨme ɨ tyetyaca. Ajta huaujjajcuare hua'a jamuan. Aj pu i teyujta'a a'utyajrupi tɨ i hua'uta'ixaate'en ɨ mej tie'ijta aujna matɨ'ɨj ra'antipua'arite'en ɨ maj rujajcuare'en, majta maɨjna cɨn meyan huarɨni mej tyu'umuaɨ'ɨvejta, saɨj ajta saɨj. 27Tɨ'ɨj ari tɨmua'a antipua'arijma'aca aráhua'apua xɨcaj jetze, seica ɨ mej Israel jetze ajtyama'acan, aɨ mu raaseij aɨjna ɨ Pablo aujna teyujta'a. Aɨme au mu e'ema'acan tɨj na'a au tɨ huatacá'a u Asia. Matɨ'ɨj raaseij, nainjapua mu hua'uta'ixaa ɨ tyaɨte. Ca'anijra'a mu hua'uta'a maj huatanínyu'ucacu, matɨ'ɨjta mi raatyeevi'i. 28Muajijhuaca'a ca'anin cɨme'e. Meyan tɨcɨn: ―Muan tyetyaca mɨ sej hui Israel jetze ajtyama'acan, sataatávaɨre'e. Ai pu hui aɨn pueen ɨ tyaata'a tɨ nainjapua a'ucha'acan, tihua'amua'atyá naijmi'ica ɨ tyaɨte maj nu'u ma ruuraini ɨ taye'irá, majta maj nu'u cai ra'ara'asten a'ij tɨ te'eyu'usi'i ɨ yu'uxari jetze, majta mej mi meyan a'ij pua'a ti'ixajta aɨjna cɨme'e ɨ teyuu. Ajta aɨn, seij pu hui griegos utyaarujte iiyu teyujta'a, aɨj pu cɨn autya'ɨtze ɨ taye'irá cɨme'e. 29Ayaa mu tyu'utaxajtaca'a, a'ini anacai mu raaseij maɨjna ɨ Trófimo tɨ Efeso e'ema'acan. Au mu ya'useij chajta'a, jamuan aɨjna ɨ Pablo. Aɨj mu cɨn meyan tyu'umuá'a tɨ aun ru'utyaarujte aujna teyujta'a. 30Nainjapua ɨ chajta'ana, eihua mu ru'itziitya'acaa. Majta cura'aruaáchejye'icaa. Matɨ'ɨj mi raatyeevi'i maɨjna ɨ Pablo. Majta ru'irajáanajraa a pua'aque aujna teyujta'a. Majta e'eyan tye'ityaana a tɨ a'apueerta. 31Mu'uri tɨn raajé'icatache'e maɨjna ɨ Pablo. Tɨ'ɨj i raamua'areeri'i aɨjna ɨ xantaaru'u ta'anajca ayan tɨcɨn maj nu'u nainjapua ru'itziite'e u chajta'a. Ajta aɨjna ɨ xantaaru'u, ayaa pu aɨjna tye'entyujmua'areeraca'a tɨ tihua'utaijte'en ɨ xantaaru'u ɨ maj seivi'ira'a ará'axcaa. 32Aj pu i aɨn xantaaru'u ta'anajca hua'ajsaɨj ɨ ruxantaaru'ustyamua'a, ajta aɨme ɨ maj anxɨte tie'ijta. Matɨ'ɨj mi u a'uju'un maruáachijmá'a a'u maj a'utyáuuca'a ɨ tyaɨte. Majta maɨn ɨ tyaɨte, matɨ'ɨj hua'useij maɨjna ɨ xantaaru'u ta'anajca jamuan ɨ ruxantaaru'ustyamua'a, matɨ'ɨj mi raatapua'ajtaca'a maj ratyáva'ara'a ɨ Pablo. 33Aj pu i ajtyáxɨɨraca'a ɨ xantaaru'u ta'anajca. Tɨ'ɨj i rajví'i aɨjna ɨ Pablo. Aj pu i raataijtaca'a maj ra'anajɨ'ɨque'en hua'apuaca cɨme'e ɨ cadeena. Aj pu i ayan tihua'uta'ihua'uri'i tɨcɨn: ―¿A'ataani pɨrɨcɨ? ¿Ti'itajni a'ij huáruu? 34Majta maɨn ɨ tyaɨte, seica mu meyan saɨque titétejijhuajmá'a, majta seica saɨque. Aɨj pu cɨn cai a'ij tiraamua'areeri'i tzaahuati'ira'a cɨme'e aɨjna ɨ xantaaru'u ta'anajca aɨjna cɨme'e mej eihua tyéjijhuajmá'a. Tɨ'ɨj i raataijtaca'a maj ra'ajjan a'u mej e'iraati ɨ xantaaru'u. 35A'ini eihua mu tyaɨte, majta ca'anyejri cɨn ratyáca'anihua'a maɨjna ɨ Pablo, matɨ'ɨj mi maɨn ɨ xantaaru'u huá'ajajni'iri'i. Matɨ'ɨj mi yá'uchui maɨjna ɨ Pablo, majta ra'antítuaa maɨjna escaleera jetze tɨ ajtyu'upu'u ɨ chi'i jetze. 36Majta maɨn tyaɨte ɨ maj raatavén, ayaa mu mauj titétejijhuajmá'a tɨcɨn: ―Sá'ajajni'iri'i, che'e huamɨ'ɨni. 37Matɨ'ɨj ru'utyarúute'esima'aca maɨjna ɨ Pablo a'u maj e'iraati ɨ xantaaru'u, tɨ'ɨqui aɨn Pablo tiraataihua'uri'i aɨjna ɨ xantaaru'u ta'anajca tɨcɨn: ―¿Ni pacai naata'aca nyej a'atzu timuaata'ixaate'en? Ajta aɨn xantaaru'u ta'anajca, ayaa pu tyu'utanyúu tɨcɨn: ―¿Ni muaa paraayɨ'ɨtɨ ɨ hua'anyuuca ɨ griego? 38¿Ni pacai paɨn pueen ɨ paj Egipto e'ema'acan, u paj pauchan hua'ɨtziitya'aca'a ɨ tyaɨte mej mi autyajhuii mej tyújnya'usi'ite'en? ¿Ni pacai muaa paɨn pɨrɨcɨ ɨ paj huaja'uvi'itɨ muaacua vi'ira'a mej ti'ityacui'ica paujna a'u tɨ cai e'e ti'itɨ? 39Aj pu i Pablo ayan tiraata'ixaa tɨcɨn: ―Me nyajta, nyaa nu Israel jetze ajtyama'acan. Au nu e'ema'acan aujna Tarso, chajta'ana tɨ eihua ruxe'eve'e aun tɨ huatacá'a u Cilicia. Eihua nu muahuavii paj naata'an nyej tihua'uta'ixaate'en ɨ tyaɨte. 40Aj pu i xaa raata'a tɨ tihua'uta'ixaate'en. Aj pu i Pablo huatyeechaxɨ ajna escaleera jetze. Rumuajca'a pu cɨn hua'uta'ijmɨjri'i maj cai che'e téjijhuajme'en. Matɨ'ɨj cai che'e e'ijtyáruaasima'aca, aj pu i hua'anyuuca cɨn tihua'uta'ixaa ɨ hebreo. Ayan tɨcɨn:

will be added

X\