Los Hechos 20

1Tɨ'ɨj antipua'araca'a ɨ maj huauritziite, Pablo pu hua'utajee ɨ mej tya'atzaahuate'e tɨ ij aɨn a'atzu ca'anijra'a hua'uta'an mej mi cai ruxaamɨjtya'a. Aj pu i hue'ire'echuiixɨ seij ajta seij, ajta hua'utataujte. Tɨ'ɨqui á'uraa u Macedonia. 2Nainjapua pu hua'umuaaraca'a matɨj mana'a titye'echaatɨma'acaa aɨme ɨ i'ihuaamua'ame'en. Eecan pu ca'anijra'a hua'uta'a aɨjna cɨme'e ɨ tɨ cɨn tihua'uta'ixaa. Ajta e'eyan, aun a'ará'a aujna u Grecia. 3Au pu ayan a'atee a'achu cumu hueica maxcɨra'i. Tɨ'ɨqui atyéye'imɨjcaa ɨ baarcu jetze tɨ i antara'ani aujna Siria. Majta aɨme ɨ mej Israel jetze ajtyama'acantacaa, aɨ mu meyan tiraaxa'apɨ'ɨntarej maj maun ye'ityéchu'eve'en juye jetze tɨ jetzen huamej. Ajta aɨjna ɨ Pablo, tɨ'ɨj nu'u i raamua'areeri'i. Tɨ'ɨqui ayan tyu'utaxajtaca'a tɨcɨn niche'e huara'ara'ani nyej ni nyaun a'uré'enyen u Macedonia. 4Aɨ mu a'ucɨj jamuan, aɨjna ɨ Sópater tɨ yaujra'an pueen aɨjna ɨ Pirro. Au pu e'ema'acan aɨjna ɨ Sópater u Berea. Aɨ mu majta a'ucɨj aɨjna ɨ Aristarco, ajta ɨ Segundo, ɨ maj Tesalónica e'eche. Gayo pu ajta á'uraa aun tɨ Derbe e'ema'acan. Aɨ mu majta a'ucɨj aɨjna ɨ Timuteeyu, ajta aɨjna ɨ Tíquico, ajta Trófimo. Au mu e'ema'acan a'u tɨ huatacá'a u Asia. 5Aɨ mu ɨ ta'ihuaamua'a anára'asaca'a. Majta maɨn, au mu nu'u taje'echu'eva'a mua'aju'un ityejmi aujna chajta'a u Troas. 6Tyajta ityan, tɨ'ɨj tya'upua'araca'a ɨ mej tyu'uyé'este maɨjna cɨme'e ɨ maj racua'aca ɨ pan tɨ cai levaduura ranaxca, au tu a'araacɨ aujna Filipos ɨ baarcu jetze. Anxɨj xɨcaj tu jetze a'ará'a aujna Troas. Au tu huaja'utyau ɨ seica. Tyajta ityan, au tu a'atee aráhua'apua xɨcaj. 7Tɨ'ɨjta tyaja'ure'enye ɨ seij xɨcajra'a jetze, aɨ mu tyujsaɨj mej mi hua'uraɨ'ɨpɨ'ɨte'en ɨ pan. Ajta aɨ pu tihua'umuá'ate aɨjna ɨ Pablo. A'ini ayaa pu tyu'ujxe'eva'acaa tɨ a'ura'ani ɨ seij xɨcajra'a jetze tɨ ra'itya'asi, auche'e pu tihue'ixaatya'acaa asta e'ita'a tɨca'ɨmɨ. 8Au mu tyujsaɨj anna ɨmɨ cuaartu jetze, tɨ tyu'ujhueica. An pu u'utaaca eihua ɨ cantiira'a. 9Ajta au pu huiracatii tyamueij tɨ ayan antyahuaaca'a tɨcɨn Eutico. An pu ave'ere'eyeijxɨ tɨ anacun. Ajta aɨn ɨ Pablo, eihua pu tihue'ixaa. Eecan pu a'atee tɨ tihue'ixaate'e. Aɨj pu cɨn huamué'itɨche ɨ cutzi cɨme'e aɨjna ɨ Eutico. Aj pu i ticu. Cuj pu ancure'ejve tɨ tyu'ujhueica jetze ɨ chi'i. Matɨ'ɨj mi ra'ajjáj mɨ'ɨchícan. 10Aj pu i acajraa aɨjna ɨ Pablo tɨ'ɨj i ra'ave'evii aɨjna ɨ tyamueij tɨ'ɨri mɨ'ɨchi. Tɨ'ɨqui ru'ihuaamua'a ayan tyu'uta'ixaa tɨcɨn: ―Caxu ti'itzɨɨnya'a. Auche'e pu hui ruuri. 11Aj pu i ajtahua'a antiraa ɨ chi'i jetze. Hua'uraɨ'ɨpɨ'ɨte ɨ pan. Matɨ'ɨj mi raacuaa. Tyamua'a pu tyu'utáxai tɨ tihue'ixaate'e. Tapua'arijma'aca pu á'uraa. 12Ajta aɨn ɨ tyamueij, ruurican mu a'uví'itɨ. Eecan mu naa tyu'utaujtyamua'ave. 13Tyajta ityan, ta'anáatyá'a tu a'uju'un. Tyatɨ'ɨj ti baarcu jetze atyaacɨ. Au tu a'ará'a taujna Asón, tyej ti ya'arávi'itɨn taɨjna ɨ Pablo, a'ini ru'ɨcan pu a'araye'imɨjca'a. 14Tyatɨ'ɨj ráatyau taɨjna ɨ Pablo taujna Asón, tɨ'ɨqui tajamuan atyajraa ɨ baarcu jetze. Tyatɨ'ɨjta ti a'ucɨj ajna a'ahua'a u Mitilene. 15Au tu huiiraacɨ. Yaa ruijmua'ate'e yee tu antacɨj utan pujme'en. Au tu vejli'i e'ejtyenyaa a'utɨ a'araahuachi tɨ ayan tyaja'arajtyahuaa tɨcɨn Quío, tyatɨ'ɨj ti seij jetze ɨ xɨcaj tyaun antanyej taujna Samos. Yaa ruijmua'ate'e yee aun tu a'ará'a aujna chajta'a tɨ ayan tyaja'arajtyahuaa tɨcɨn Mileto. 16Ayaa tu huarɨj a'ini Pablo pu raaxa'apɨ'ɨntare tɨ cai aun a'atanyén aujna Efeso. Capu ajta e'eteerimɨ'ɨca'a aujna aun tɨ huatacá'a u Asia. Ca'anacan pu u a'urányajmɨ'ɨca'a aujna Jerusalén, tɨ pua'a nu'u i'irɨ'ɨriistan tyaj tyaun a'utyáuuca matɨ'ɨj ti'iyestyen maɨjna cɨme'e maj ra'utamua'aree tɨ ari ayan tyaumé anxɨj tamuaamuata'a xɨcaj. 17Au pu a'utyaváa u Mileto, tɨ'ɨj Pablo hua'ataijtaca'a maj u a'uva'aju'un ɨ vaujsi ɨ maj hua'a jetze ajtyama'acan aɨme ɨ maj tyujsa'ɨrihua'a aujna u Efeso. 18Matɨ'ɨj mi maɨn vaujsi a e'ire'enye. Aj pu i ayan tihua'uta'ixaa tɨcɨn: ―Muan xu ramua'aree a'ij nyej ye tyu'utyejvee nyatɨj nyana'a anacaican nyej yara'a iiya Asia. 19Ayaa nu hui ti'ijvaɨɨre'e ɨ tavastara'a tzaahuati'ira'a cɨme'e. Canu a'antzaahuate'e nyeijna cɨme'e silu nyahuanyeinixɨ nyaɨjna cɨme'e nyajá'amuacha'ɨj. Nyajta, eihua nu tyu'utése nyaɨjna cɨme'e mej a'ij pua'a tinaatajée. 20’Canu a'anaj a'atura nyaj cai pua'a tyaja'amue'ixaatya'a ti'itɨj cɨme'e tɨ amuaatyava'ɨri muejmi. Nyetyaja'amue'itii nyaujna teyujta'a, nyajta nyaujna a'amuache. 21Nyetihua'uta'ixaa nyaɨme ɨ mej Israel jetze ajtyama'acan, nyajta nyaɨme ɨ mej seij chuejra'a japua e'ema'acan, tɨ ayan tyu'ujxe'eve'e maj saɨque tyu'umua'ati ɨ Dioj jemi, majta rá'antzaahuate'en maɨjna ɨ tavastara'a ɨ Jesús aɨjna tɨ Dioj an yá'ujra ɨ ɨpuari japua. 22’Tɨj ajta ijii, au nu hui Jerusalén a'uma'aj na'ame nyaɨjna cɨme'e tɨ aɨn xaijnyu'ucara'ara'an ɨ Dioj ayan tinaataij. Canu xaahui ramua'aree a'ij tɨ ti'itɨ mu'u nyaja'aruuren. 23Aij nu'u xaa mua'aree, tɨ aɨn xaijnyu'ucara'ara'an ɨ Dioj anacaican ayan tinaata'ixaa yee a'u tɨ na'a tɨ huachájta'atajme, au mu nu'u nye'ityánajsin. Ayaa nyaj nu'u tirajpueiitzi na'ame. 24Capu amɨn a'ij, capu nye jetze ruxe'eve'e inyeetzi. Ajta nyetevi, capu ti'itɨj ranajchi inyeetzi jemi. Aii nu'u hui neyan ti'ijxe'eve'e, nyaj ra'anticɨ'ɨti nyaj huára'ani iiyan chaanaca japua, nyajta ra'ara'asten nyaɨjna cɨme'e ɨ tɨ Dioj ayan tinyeijca nyej tihua'uta'ixaate'en ɨ tyaɨte ɨ nyuucari cɨme'e tɨ jetzen ra'axa ɨ Dioj, tɨ'ij aɨn tihua'utauuni'i ruxé'evi'ira'a cɨme'e. 25’Ma sajta muan, nyej a'amuajemi á'ucha'acanya'a a'aye'i, nyajta á'amue'ixaate'e cɨme'en ɨ Dioj tɨ nain japua tie'ijta, iiyan chaanaca japua, ajta u tajapua. Ayaa nu ti'ijmua'aree saj cai che'e a'anaj nyeseijran inyeetzi. 26- 27Aɨj nu cɨn neyan tyaja'amue'ixaate'e ijii, tɨ pua'a a'atɨ ya'uraini ɨ ruxaijnyu'uca ɨ Dioj jemi, capu Dioj nye jetze rapua'arite'e, a'ini canu a'anaj raatapua'ajtaca'a nyej tyajamue'ixaa ɨ nyuucari, silu nain nu tyajamue'ixaa a'ij tɨ ti'ijxe'eve'e ɨ Dioj. 28Rɨ'ɨ xu'u muan mɨ rutzajta'a. Sajta rɨ'ɨ xu'u hua'a jetze aɨme ɨ tyaɨte Dioj tɨ tyajamueijca. Sata'aj hua'uchaɨn naijmi'ica ɨ mej tyujsa'ɨri ɨ Dioj jemi, ɨ tɨ hua'unanai ɨ rutevi cɨme'e aɨjna ɨ Jesús. 29’Ayaa nu nyaa ti'ijmua'aree nyatɨ'ɨj a'ura'ani, seica mu a'uva'aju'u mua'aju'un mueetzi tzajta'a mej meyan e'en matɨj ɨɨra'ave titya'utyáru'ipi hua'a tzajta'a ɨ ya'amuaate. Camu tihua'utauuni'ira ɨ mej tya'atzaahuate'e. 30Majta seica mu a'amua tzajta'a huataseijre'esin. Hue'itzi mu cɨn tyajá'amuamua'aten mej mi amuajsaɨre'en muejmi ɨ rujemi. 31’Naa xu'u rɨ'ɨ muan. Aɨj xu autamua'aree, tɨ'ɨri ayan tyauumé hueica ninye'ira'a nyej tyaja'amue'ixaate'e seij nyajta seij nain tujca'ari tzajta'a, nain tɨca'ari tzajta'a, neyan ni te'icán yé'inya'a a'amua cɨme'e. 32’Nyajta ijii, nyetyaja'amueijcate'e ɨ Dioj jemi, nyaɨjna cɨme'e ɨ nyuucari tɨ jetzen ra'axa a'achu tɨ caj titaatapueijve'esin ɨ Dioj. Aijna ɨ nyuucari pu amuaata'asin ɨ ca'anijra'a, ajta amuaata'asin saj a'utyá'a xa'ara'ani hua'a jamuan ɨ tɨ Dioj rusaɨj hua'avá'ajajpuaca'a. 33’Canu a'anaj neyan ti'ijxe'eva'aca'a nyaj ra'ancura'an hua'a tumin, canu nyajta ɨ tihua'acɨɨxu aɨme ɨ nye'ihuaamua'a. 34Ayaa xu hui sajta ti'ijmua'aree nyaj huatyanvaɨ nyamuajca'a cɨme'e, nyajta neyan che'eta nyana'a tihua'utyavaɨ aɨme ɨ mej nyaj jamuan á'ujhua'anya'a. 35Nain nu hui cɨn tyu'umuarej, nyajta nu amue'itiiri'i tɨ ayan tyu'ujxe'eve'e aɨjna cɨme'e tyaj hua'utyavaɨre'en ɨ maj cai a'ij ti'ijviicue'i. ’Muan xu sajta seyan tira'utamua'aree a'ij tɨ tyu'utaxajtaca'a ɨ Jesús tɨcɨn: “Eitze'e pu rɨ'ɨ rutyamua'ave'e aɨjna ɨ tɨ ti'ita'aca cai aɨjna ɨ tɨ tya'ancura'aca.”―Ayaa pu tihua'uta'ixaa aɨjna ɨ Pablo. 36Tɨ'ɨj ayan tihua'uta'ixáatya'a, aj pu i Pablo titunutaca'a hua'a jamuan aɨme ɨ vaujsi. Ajta raatyahuau ɨ Dioj jemi. 37Naijmi'i mu ru'ire'echuixɨ, majta antyujyeinya. Majta ra'ancávisiitɨmua'axɨ. 38Ai pu aɨn pueen ɨ nyuucari tɨ raataxajtaca'a tɨ eitze'e a'ij pua'a hua'uta'a yee maj nu'u che'e a'anaj me'e ye'eseijran. Aj mu mi u a'uju'un jamuan a'u tɨ a'atyajraa ɨ baarcu jetze.

will be added

X\