Los Hechos 18

1Ajta e'eyan Pablo huiirajraa aujna Atenas. Tɨ'ɨqui aun a'ará'a chajta'a tɨ ayan tyaja'arajtyahuaa tɨcɨn Corinto. 2Au pu yá'utyau seij tɨ Israel jetze ajtyama'acan tɨ ayan antyahuaa tɨcɨn Aquila. Au pu e'ema'acan aujna seij chuejra'a japua tɨ ayan tyaja'arajtyahuaa tɨcɨn Ponto. Aɨjna ɨ Aquila, ajta aɨjna ɨ ɨra'ara'an tɨ ayan antyahuaa tɨcɨn Priscila, aɨ mu maun a'araacɨ aujna a'ahua'a seij chuejra'a japua tɨ ayan tyaja'arajtyahuaa tɨcɨn Italia, a'ini ayaa pu tyu'ujxe'eva'acaa maj nu'u á'ucɨɨnye maujna aɨjna cɨme'e ɨ hua'arey ɨ romanos tɨ ayan a tyaja'utaityaca'a mej a'ucɨɨne naimi'i ɨ mej Israel jetze ajtyama'acan. Ajta aɨn ɨ Pablo, aɨ pu u huaja'uvá'amuaaraca'a. 3Pablo pu racu'unya'apuaca'a ɨ navij chi'ira'a. Ayaa mu che'eta mana'a ti'imuara'acaa aɨme, aɨjna ɨ Aquila, ajta aɨjna ɨ Priscila. Aɨj pu cɨn a'utyajturaa hua'a jamuan, ajta ti'imuara'acaa hua'a jamuan aɨjna ɨ Pablo. 4Nain xɨcajra'a jetze matɨj pua'a rusa'upi, au pu a'utyaru'ipicha'a hua'a teyujta'a, tihue'ixaatya'acaa tɨ'ij ayan eenye'eque'en hua'antimue'itɨn aɨme ɨ mej Israel jetze ajtyama'acan, majta ɨ mej seij chuejra'a japua e'ema'acan. 5Matɨ'ɨj mi huiiraacɨ aujna u Macedonia aɨjna ɨ Silas, ajta aɨjna ɨ Timuteeyu. Matɨ'ɨj mi maun a'ará'a a'u tɨ a'utyavaaca'a ɨ Pablo, tɨ ajta cɨn antyujmua'areeraca'a nain cɨme'e tɨ tihua'uta'ixaate'en ɨ yu'uxari jetze. Naa tya'ahuauritaacan cɨme'e, aɨ pu tihue'ixaatya'acaa aɨme ɨ mej Israel jetze ajtyama'acan, aɨjna cɨme'e tɨ Jesús aɨn pueen ɨ tevi tɨ Dioj an yá'ujra ɨ ɨpuari japua, aɨjna maj rachu'eva'acaa. 6Majta maɨn, camu a'atzu raxe'eva'acaa maj raanamua. Aɨj mu cɨn autyajhuii mej a'ij pua'a tiráajeeve. Aj pu i Pablo tyu'utyaca'atzɨjxɨ ɨ tyu'ujcɨɨxu mej mi raamua'aree tɨcɨn ma'utya'ɨtzee ɨ Dioj jemi. Ayaa pu tihua'uta'ixaa tɨcɨn: ―Muaan xu puéenya'a xa'aju'un tɨ'ij mueetzi jetze rajveti ɨ pueijtzi. Nyaa nu hui ra'ara'aste tɨ tinyeijca. Ijii tɨ yu auca'itɨ a'ame, hua'a jemi nu a'uma'a na'ame ɨ mej seij chuejra'a japua e'ema'acan.―Ayaa pu tihua'uta'ixaa. 7Aj pu i huirajraa u hua'ateyujta'a. Aa pu a'ará'a aa tɨ e'eche a'atɨ tɨ ayan antyahuaa tɨcɨn Justo. Aɨ pu rana'amiche'e ɨ Dioj, ajta aun e'echajca'a ajna vejli'i a'u tɨ a'utyejvee ɨ teyuu. 8Ajta aɨn ɨ Crispo, ɨ tɨ tie'ijta u teyujta'a, aɨ pu rá'antzaahua ɨ tavastara'a, majta meyan che'eta mana'a naijmi'i tɨ hua'a jamuan e'echajca'a aɨjna ɨ Crispo. Majta seica ɨ maj Corinto a'uchaatɨma'acaa, matɨ'ɨj raanamuajri'i ɨ nyuucari, eihua mu rá'antzaahua. Matɨ'ɨj mi huamuaɨ'ɨvijhuaca'a. 9Aj pu i tɨca'ɨmɨ, tɨ'ɨj aɨn Pablo tí'imaaracaa, aɨ pu raaseij ɨ tavastara'a. Ayaa pu tiraata'ixaa tɨcɨn: ―Capej ti'itzɨɨnya'a. Pauche'e paj hui tihue'ixaatya'a pua'ame. Capaj raatyápuaapua'ajtan. 10Nyaa nu a jamuan ya huatyejvee. Capu a'atɨ timua'antyu'uuni'ira. Capu ajta a'atɨ pueijtzi muaata'asin. Eihua nu hui tityaɨtestyamua'a iiya chajta'a.―Ayaa pu tiraata'ixaa ɨ tavastara'a. 11Aɨj pu cɨn Pablo ayan aun e'etee sei ninye'ira'a japuan e'ita'a aujna Corinto. Tihua'amua'atyajcaa aɨjna cɨme'e ɨ nyuucari tɨ jetzen ra'axa ɨ Dioj. 12Aru tɨ'ɨj aɨn Galión aun ti'ivaɨra'acaa tajtuhuan cɨme'e aujna tɨ ayan tyaja'arajtyahuaa tɨcɨn Acaya, aɨmej ɨ mej Israel jetze ajtyama'acan, aɨ mu autyajhuii mej tinínyu'ucacun maɨjna jemi ɨ Pablo. Matɨ'ɨj mi ya'ujáj jueesi jemi. 13Aj mu mi meyan tiraata'ixaa ɨ tajtuhuan tɨcɨn: ―Aijna i tyaata'a, aɨ pu hui hua'amue'itɨjcaa ɨ tyaɨte mej mi meyan saɨque ti'ijna'amiche'en ɨ Dioj. Aru capu hui ayan tihua'ata'aca ɨ taye'irá mej meyan rɨjca. 14- 15Pu'uri tɨn tyu'utaxáatache'e aɨjna ɨ Pablo, tɨ'ɨj aɨn Galión, ayan tihua'uta'ixaa aɨme ɨ mej Israel jetze ajtyama'acan tɨcɨn: ―Casi'i muan, mɨ sej Israel jetze ajtyama'acan, tɨ pua'a hui amɨn ti'itɨ a'ij pua'a huáruu tɨ cai xa'apɨ'ɨn, na'ari ti'itɨ huaje'ica tɨ huapɨ'ɨ ruxe'eve'e, aj nu xaa neyan tyája'amuanamuáarache'en. Aru a'ini ai pu'u cɨn ti'ixa a'amuaye'ira, ¿a'iqui huataujmua'a aɨjna? ¿Ni cai nyuucari pueen aɨjna? Ayaa pu hui tiraavijte'e rujɨɨmua'a saj muan seyan ra'antipua'arite'en, a'ini canu nyaa raxe'eve'e nyaj raaxa'apɨ'ɨntare'en nyeijna i nyuucari.―Ayaa pu tihua'uta'ixaa. 16Tɨ'ɨj i hue'irajtuaa a pua'aque aujna a'u maj e'etyujsa'ɨrihua'a ɨ jueesi. 17Aj mu mi maɨn ɨ mej i'i griego, naijmi'i mu rajví'i maɨjna ɨ Sóstenes ɨ tɨ tie'ijta u teyujta'a. Matɨ'ɨj mi raatyaavajxɨ aujna jemi ɨ tajtuhuan. Ma ajta aɨjna ɨ Galión, capu jetzen ruxe'evá'a a'araa aɨjna cɨme'e. 18Auche'e a'atzu a'atee aujna Corinto aɨjna ɨ Pablo. Tɨ'ɨqui hua'utataujte ɨ ru'ihuaamua'a. Ajta e'eyan baarcu jetze atyajraa, ajta á'uraa jamuan aɨjna ɨ Priscila, ajta aɨjna ɨ Aquila. Matɨ'ɨj antacɨɨnye ajna a'ahua'a seij chuejra'a japua tɨ ayan tyaja'arajtyahuaa tɨcɨn Siria. Tɨ'ɨj cai xɨ u a'arajraa aujna u Cencrea, aj mu mi racaaye tɨ i ra'ara'asten ti'itɨ cɨme'e tɨ aɨn aɨjna cɨn tya'ataujratziiri'i. 19Matɨ'ɨj mi maun a'ará'a aujna chajta'a tɨ ayan tyaja'arajtyahuaa tɨcɨn Efeso. Au pu huaja'utyáhui ɨ Pablo jamuan aɨjna ɨ Priscila, ajta aɨjna ɨ Aquila. Aj pu i aun a'uré'enye aujna teyujta'a. Tihua'uta'ixaa aɨme ɨ mej Israel jetze ajtyama'acan ɨ maj tyujsa'ɨrihua'a aujna. 20Aɨ mu raatajé tɨ nu'u eitze'e a'ateevi'in. Ma ajta cai, capu ahuaujca'anye. 21Aj pu i hua'utataujte. Ayan tɨcɨn: ―A'anaj nu'iran ya tanyejsin tɨ pua'a Dioj naata'an. Aj pu i ajtyajraa ɨ baarcu jetze. Tɨ'ɨqui aun Efeso á'uraa. 22Tɨ'ɨj aun a'utanyaa, chajta'a tɨ ayan tyaja'arajtyahuaa tɨcɨn Cesarea. Anacaican pu anna a'ujnyéj u Jerusalén. Tɨ'ɨj i hua'utataujte ɨ mej tyujsaɨj u teyujta'a. Ajta e'eyan, aɨn aun a'ucáanye aujna Antioquía. 23Au pu a'atzu a'atee aujna. Aj pu i u a'arajraa. Aa pu a'atanyaa a'u tɨ e'echajta'ajtajmee saxu'ijma'a a'u maj a'uchaatɨma'acaa ɨ tyaɨte, seij chuejra'a japua tɨ ayan tyaja'arajtyahuaa tɨcɨn Galacia, ajtahua'a saɨj tɨ ayan tyaja'arajtyahuaa tɨcɨn Frigia. Aɨ pu ca'anijra'a hua'ata'acara'a naijmi'ica ɨ mej tya'atzaahuate'e. 24Aɨjna xɨcajra'a jetze, saɨj pu a e'ire'enye tɨ Israel jetze ajtyama'acan. Ayaa pu antyahuaa tɨcɨn Apolos. Au pu e'eche aujna chajta'ana jetze tɨ ayan tyaja'arajtyahuaa tɨcɨn Alejandría. Eecan pu raayɨ'ɨtɨhua'a tɨ tihua'uta'ixaate'en ɨ nyuucari cɨme'e. Ajta tyamua'a tiraayɨ'ɨtɨhua'a a'ij tɨ ye'i huataujmua'a ɨ tɨ te'eyu'usi'i ɨ yu'uxari jetze. 25Naa pu tyu'umua'atyajcaa a'ij tɨ ti'ijxe'eva'acaa ɨ tavastara'a. Tyu'utaxajtaca'a a'ujca'anyaacan cɨme'e, ajta tɨ tyamua'a naa rɨ'ɨ tyu'utanyuuni aɨjna cɨme'e ɨ Jesús. Ajta aɨj pu'u mua'areeraca'a aɨjna ɨ tɨ cɨn Juan hua'utamuaɨ'ɨhuaca'a. 26Aɨ pu aɨjna cɨn autyejche tɨ tihua'uta'ixaate'en u teyujta'a a'ujca'anyaacan cɨme'e. Matɨ'ɨj maɨn raanamuajri'i aɨjna ɨ Priscila, ajta aɨjna ɨ Aquila, aɨ mu raata'inee tɨ huaja'uva'amuaare aujna a'u maj e'eche. Au mu ra'itiiri'i eitze'e a'ij tɨ ti'ijxe'eve'e ɨ tavastara'a. 27Ajta tɨ'ɨj ari á'uye'imɨjcaa ajna a'ahua'a Acaya aɨjna ɨ Apolo, aɨ mu ihuaamua'ame'en ca'anijra'a raata'a. Aj mu mi tihuaja'utaiti'iri'i ɨ ru'ihuaamua'a ɨ maj aun e'eche maj nu'u naa tyamua'a tira'ancure'evi'itɨn. Tɨ'ɨj aɨn Apolos aun a'ará'a aujna Acaya, eecan pu hua'utavaɨ tɨ Dioj hua'uta'a ruxé'evi'ira'a cɨme'e maj rá'antzaahuate'en. 28A'ujca'anyaacan cɨme'e pu hua'utyaAmue'itɨ ɨ tyaɨte aɨme tzajta'a ɨ mej Israel jetze ajtyama'acan. Aɨjna yu'uxari jetze pu tihua'utaseijrate tɨ Jesús aɨn pueen ɨ tɨ nu'u Dioj an yá'ujra ɨ ɨpuari japua.

will be added

X\